2 Samuel 9 - Sharanahua: Diospan Tsain

David Jonatán furun Mefi-boset shara huani

¹ Ascan shafa futsa David ahuun nomuran shinanni isca huaquin, —Un Jonatán yoiyoni ahuun yorafo un shara huashquin. Ascan un natian un futsa yocain Saúl ahuun yorafo futsafo niamun un ato shara huanon, —ishon ahuun nomuran shinanni.

² Ascan David Saúl ahuun oinmati cuna yocashquin. Nococun yocaquin isca huani, —¿Minmun Siba Saúl oinmati ipaoni? —ishon yocani. —Uhuun niaifon, unfin nanquin, —ishon Siba cumani.

³ Ascaiton David afanan yocaquin isca huani, —¿Saúl ahuun yora futsafo niamun? Futsa niicun un nocon Ifo Diosihuunshon un shara huapai, —ishon David yoiaiton. —Ai, Fusti nia. Jonatán facu fusti man nia. Aacai mumama. Ahuun tau rafu chaca. Nipaiqui ranainran, —ishon yoiaiton.

⁴ —¿Ranimun? —ishon yocaiton. —Amielpan furun Maquir pushu ano ica. Nan pushu rasi Lodebar ano icaran, —ishon Siba cumani.

⁵ Nicatan David futsa nichini Maquir pushu ano Lodebar mai anoshon aqui ihuunon.

⁶ Ascan Jonatán ahuun furu ahuun anu Mefi-boset. Saúl ahuun shota. Davidqui nocoi fasi ratucoin maiqui fuoshopacucahuani a ismashquin David ahuun niaifocun. Ascaiton David yoini, “Mefi-boset,” huaiton. —Unquian min oinmati, —ishon cumaiton.

⁷ —Un mia shara huashquin ihuua. Ascan ratuyamahuu. Min upa nataima un yoiyoni “Min yorafo un ato shara huashquinran,” ishon un yoini. Ascan nantifi min shota Saúl ahuun mai ipaoni un mia inain mina inon. Ascan min u fu nuno uhuun pushu muran itiro. Shafatifi min nunoshon u futan pitiroran, —ishon David yoini.

⁸ Ascaiton nicaquin maiqui fuoshopacucahuatan Mefi-boset cumani, —Uncai ahuama. Un pashna naa cuscaran. ¿Ascan ahuuscai mian shara huaimun? —ishon yoini.

⁹ Asca huafiatan David Saúl oinmati ipaoni Siba yoini isca huaquin, —Un min niaifo ipaoni Saúl yafi ahuun yorafo un nantifi atona ato mai non nantifi ahuun ahuarafori un Saúl ahuun shota Mefi-boset inanshquin.

¹⁰ Ascan min non min facufo non min oinmatifoyashon a mau huashocahuun ahuun yorafo pimasharashqui. Ascafia Mefi-boset nunoshon uhuun pushu anoshon shafatifi u futan piishquinran, —ishon David Siba yononi. Siba ahuun furu ranan quince icaino ahuun oinmatifo veinte ipaoni.

¹¹ Ascan Siba David cumani isca huaquin, —Ai, niaifon. Mian yoia cuscan un nantifi aashquinran, —ishon cumani. Ascan a fu icain chain Mefi-boset David futan pini. Ahuun facu shinantsa a futan pini.

¹² Mefi-boset ahuun furonanfacu ahuun anu Micaía. Ascan Siba yorafo nantifi Mefi-boset ahuun oinmatifo ini.

¹³ Ascan ahuun tau rafu chaca icaino Mefi-boset Maquir pushu anoashu David pushu Jerusalén pushu rasi ano shucuni shafatifi a futan pifain a fu iishquin.