2 Samuel 5 - Sharanahua: Diospan Tsain

Nantifi Israeli mai ano icafo non Judá ano icafori David aton niaifo ini

¹ Ascan chipo nantifi Israeli mani futsafo anoashu Hebrón pushu rasi ano Davidqui fucashon yoinifo isca huaquin, —Nonfin min imiquin. Non min yorafo.

² Saúl noco niaifo iyopaonifiashon min nocon ranushumuafo iyoni noco numanon. Nocon Ifo Diosin mia yoini isca huaquin, “Min uhuun yora Israelifo cushushquin aton niaifo min iishquiain,” mia yoiniran, —ishon Israelifoan David yoinifo.

³ Asca huacatan nantifi Israeli niaifo patasharinoafo Hebrón ano Davidqui funifo. Ascan David ato futan nocon Ifo Diosi ointaifin nannorifosi yoinansharanifo. Ascaifoan David ahuun mapoqui shuni ocatan yoinifo, —Natian min nantifi Israelifo nocon niaiforan, —ishon yoinifo.

⁴ Ascan David treinta fariaitian Israelifo aton niaifo iqui tauni. Aton niaifo cuarenta fariya ini.

⁵ Tau huaquin siete fari non seis oshuri pushu rasi Hebrón ano niaifo ini. Ascan chipo pushu rasi Jerusalén ano nantifi Israeli icano yafi Judá icanoafori aton niaifo treinta tres fari David ini.

David yora futsafo Jebuseofo Jerusalén pushu rasi anoshon potani Israelifona inon

⁶ Ascan chipo David Israeli ranushumuafo iyoni pushu rasi ahuun anu Jerusalén anoshon Jebuseofo potanonfo. Ascan Jebuseofoan David yoini isca huaquin, —Min noco Jerusalén pushu rasi muran iquipacunacama. Fushofo non chatofoanri mia nituhuatirofo min nuno iquinonma, —ishon yoinifo. —David nocon pushu rasi muran iquitiromaran, —ishon shinannifo.

⁷ Ascafiaino David ahuun ranushumuafoya Jerusalén pushu rasi muran iquini. Ahuun anu futsa Sión. Iquifainnaifoan Jebuseofo ato potani Israelifona inon. Chipo nan pushu rasi anu futsa tuqui huani Davidnaran ishon anunifo.

⁸ Jerusalén iquiataima nan tsain chaca Jebuseofoan David fomani. Nicashon David ahuun ranushumuafo yoini isca huaquin, —Ato quini unu afain muran iquiyotacahuun nan Jebuseo fushofo non chatofo rutunon. Un ato fasi noicasmaicai, —ishon ato yoini. Asca tau huaquin yoiyomisi cuscan, —Fushofo non chatofo pushu muran iquitiromaran, —ishon cashucaquin yoimisifo.

⁹ Ascan nan Jerusalén pushu rasi ano David iquini nanno ahuun pushu huaashquin. Anu futsa caquin pushu rasi Davidnaran ishon anunifo. Ascan nanno David cunu cuyacoin tarati huayacuni nan pushu rasi muran noicasmaifo iquinonfoma.

Niaifoan ahuun anu Hiram ahuun mai arishon nocofunufo Davidqui nichini

¹⁰ Ascan nocon Ifo Diosin David fu imisi ahuunshon futsafo iquiquin finacaimisi. A tsoan finontiroma ipaoni.

¹¹ Ascan ahuunoa nicaino Tirofo mai anoa aton niaifoan ahuun anu Hiram nocofunufo Davidqui nichishoni tsain shara yoinonfo. Nantianri yonomisifori nichishoni a futan pushu huashononfo. Ihui cosha ichapa fomafain ihui yonomisifo aqui nichifain toquiri uhuapacoin ahuun yonomisifori nichishoni David pushu uhuapa ashononfo.

¹² Ascan David oianno niaifo futsa shara huashoaiton oinquin tapini nocon Ifo Diosin yonoa cuscan nantifi manifoannafoan Israelihuunoa nicanifo. Futsafoan shinanfo Israeli caifofo mutsisipacoincun. David tapini nocon Ifo Diosin Israelifo noicoinquin aton niaifo imani.

David ahuun facu ranan ichapacoin ini

¹³ Ascan David Hebrón anoashu Jerusalén ano shucuaitian ahuin ichapafo fini. Ascan furonanfacu non ainfacu ichapaya ipaoni.

¹⁴ Ahuun furufo Jerusalén anoashu cainnifo aton anufo Samúa non Sobab non Natán non Salomón non

¹⁵ Ibhar non Elisúa non Nefeg non Jafía non

¹⁶ Elisama non Eliadá non Elifelet nanti ini.

David Filisteofo finonni

¹⁷ Nocon Ifo Diosin David catoan Israelifo aton niaifo inon Filisteofoan nicaquin aton ranushumuafo ichanancashon David achinonfo. Ascafia David nicain Filisteofo fuaifono cununhuan cuyacoin muran tarati huayacunashu iquini.

¹⁸ Ascan cununhuan cuyacoin muran David iquiano Filisteofoan chaimashta nococanashu machi rafu nushumancaya ahuun anu Refaim ano iquinifo.

¹⁹ David ato oinquin nocon Ifo Diosi cufinquin isca huani, —¿Uhuun Ifon, un natian uhuun ranushumuafo fu un Filisteofo icano un catiromun ato rutushquin? ¿Min noco nichimun min curushhuunshon non ato rutunon? —ishon David nocon Ifo Diosi cufiainton. —Ai. Min atoqui catiro. Icocoin un mi fu cai min ato shuhuinon, —ishon nocon Ifo Diosin David cumani.

²⁰ Ascan David ahuun ranushumuafo fu Baal-perasim mai ano cani Filisteofo rutui focani. Nococashon ato rutuni. Ascan David yoini, —¡Aicho! Ifo Diosin aca non Filisteofo rutuano faitahuanun samamashta nantifi tara caimatiro cuscan nocon Ifo Diosin nantifi a noicasmaifo ichoni nocohuunshon Diosin ato rutua. Ascan nuno nan mai non anutiro, “Baal-perasim, Onicoinnin tsainman Diosin atoqui nocoriscashon ato potaran,” —ishon yoinifo.

²¹ Filisteofoan ato ahuara rami huacashon atohuunoa yoiquin isca huamisifo, —Nanfo nocon diosiran, —huamisifo. Ichocaquin nanfo potanifo. Ascan David ahuun ranushumuafoan Filisteofo aton dioscoinfoma fonifo.

²² Ascafia chipo afanan Filisteo ranushumuafo machi rafu nushumancaya Refaim ano nasonifo.

^23-24 Ascan afanan David nocon Ifo Diosi cufinquin isca huani, —Ifon, Filisteofo afanan nocoafo. ¿Un ahuusca huatiromun? —ishon yocaiton. —A fusoafoquiri ato ointaifin cayamahuun. Ascatamarocon ato tarati huayacucashon ato cachorinoashu ihui bálsamofo ano yora cahuanai nicatsa nicai min ranushumuafo yoihuu Filisteofo rutushquin fotanonfo. Un mato tapimai ahuutian man atoqui nocotiro. Ascan ihui bálsamofo camaqui yora cahuanai nicatsacun man atoqui ichotiroquin. Ascan un mato ichomanai cuscan urifi mato fu cai, —ishon nocon Ifo Diosin David yoini.

²⁵ Nocon Ifo Diosin yononi cuscan David yafi Israeli ranushumuafo anifo. Gabaón mai aria chaicoincunoa Gezer mai anoa Israeli ranushumuafoan Filisteo ranushumuafo rutunifo.