2 Samuel 22 - Sharanahua: Diospan Tsain

Nocon Ifo Dioshuunshon David fanainsharashoni

¹ Ascan nocon Ifo Diosin David numani Saúl rutunonma. Ascatari nan noicasmaifoanri David rutupaifiainfoan Upa Diosin David numani. Ascacun David nocon Ifo Diosi fanainshoni isca huaqui,

² —Uhuun Ifo Diosin min uhuun cushumisicoincun. Un miqui ichotiro min ua cushunon. Min uhuun numamisi ahuara chacafoan ato oinmati un inonma.

³ Min uhuun Diosin min uhuun toquirininhuan cuscaran. Toquiri uhuapacai tsoan shucatiroma. Nanscarifi ai min u fu icanocai tsoan mia shucatiroma uqui nocoshon ua chaca huashquin. Min uhuun cuno sapaqui pia iquitiroma cuscaran. Ascan minhuunshon ua chaca huapaifiacaquicai tsoan ua chaca huatiroma. Min ua numai min curushhuunoashu un isharanon. Cunu cuyacoin tarati huashu tsoa pushu rasi muran iquitiroma yorafo chaca huashquin. Nanscarifi ai min uhuun cunu cuyacoin cuscaran. Ascacun tsoan ua ahuusca huatiroma. Min ua numamisi. Yora pofufoan ua fasi chaca huaiton min ua numa ua ahuusca huanonfoma.

⁴ Ifon, min fasi sharacoincun un mihuunoa yoipacunaca. Un mia cufiainton min ua numamisi ua noicasmaifoan ua ahuusca huanonfoma.

⁵ Unuhuan fuchoaino yora asatiro. Nanscarifiaquin yora chacafoan ua namapai. Un fasi ratucoin ua cuyopaiyaifoanno.

⁶ Ua noicasmaifoan shinanfo ua samamashta mai huacani. Un shinanni mun nai.

⁷ Ascan un omitsiscaquin uhuun Ifo un cufini. Uhuun Diosi un cufinquin isca huani, “Uhuun Ifo Diosin ua numapun,” ishon un yoini. Ascaiton nan icanoshon ua nicani.

⁸ Ascan nocon Ifo Diosin ua noicasmafoqui sinaino mai yafi nai nayanaiyaini.

⁹ Ahuun ruchoconun coinmanhuan potai cafisca huani ahuun ashfanpari uru manhuan potai cafisca huani. Ascaino chii urumanhuain cafiscani.

¹⁰ Ascan nai murannoashu fupucumuacucahuanaino Diosin fotoni. Coinmanhuan fisocoin rucu oaino amanaonri Diosin fotoni.

¹¹ Ahuun oinmati mutsispacoin a fu nai muran ica fototiro cuscan Diosin fotoni. Puiya uhuapanunhuan fuun noyamatiro cuscan Diosin fuuhuan muran fotoni.

¹² Coin faquishihuan murannoashu fotoni.

¹³ Asca fotoaino fasi chashacointan cana fasi piishini.

¹⁴ Ahuun oi turuica nicatsa. Nocon Ifo Diosin tsoancai finontiroma fasi oi ashcafinin nan ua noicasmaifo ato mustaimani.

¹⁵ Ahuun piiyan cuscara piiyacaino ua noicasmaifo pashcananfainnifo. Cana piishicaino ichofoannifo.

¹⁶ Ascano nocon Ifo Diosihuunoashu ashaintanaino unuhuan nushmancayan maitsaoriscatani. Nan mai oni huani cuscari shafacafi nantifishon ointirofo.

¹⁷ Asca huashon afin icanoshon ua numani. Un fasi omitsiscaquin un shinan ua chacahuaifo cuscan un tunutiroma. Un unu noacoin muran asai cafisca. Un ascaiton nocon Ifo Diosin ua numani.

¹⁸ Ua noicasmaifo fasi curushcoinfofia uncai ufiri numatiromafia nocon Ifo Diosin ua numamisi.

¹⁹ Uficai un numatiroma. Ahuara fasi chaca un finoainno natian ua noicasmaifoan ua pacumapaicani. Nantian nocon Ifo Diosin ua ahuun curush inan uacai pacumatirofoma.

²⁰ Nocon Ifo Diosin uhuun noicoin uqui fasi unimai. Ascan ua numa ua iyoanocai ua noicasmafo uqui nocoshquima.

^21-25 Nocon Ifo Diosin ua tapima cuscan un huamisi. Uhuun Diosicai un chaca huamisima nanscacucai ua potamisima. Noco yononi cuscan un shinanfafaini. Ahuun tsain cununi cuscan un potamisima. Diosin ua oin un ahua chaca shinantama un ahuun tsain tanacoian. Nanscacun uhuun nomuran un ahua shinanchacama oinquin nocon Ifo Diosin ua ahuara shara huashoshquin.

²⁶ Nocon Ifo Diosin, mia tanasharamisifo min atori cushusharashquin. Nanscarifi ai tsoa nan min yoia cusca amisi minrifi min ato yoiyomisi cuscan min huaashqui.

²⁷ Tsoan ato nomuran shinansharafain chaca huamisima nocon Ifo Diosin min ato oinmani minri shinanshara fustifain min ahua chaca huamisima. Ascafia tsoan chaca huamisifin min ato ismaicain min main atohuunoa onancoinshon min ato onaintimashquin.

²⁸ Ascan tsoan ahuunoa fusti shinantama futsafohuuri shinansharacoinquin futsafo finonpaitamarocon man tapia Diosi fasi yopacoinquin. Nanscarafo min ato numashquin. Ascan nan cacapaimisifoan nantifi finonpaimisifo. Un tsoa futsa yopaimaran icashon shinanmisifo. Ascarafofin min nantififain ointaifin min ato ismashquin afocai ahuama.

²⁹ Uhuun Ifon, min uhuun lampara cuscaran chashamashquin. Icon, Ifon, faquish muranri mian chashamashoshqui.

³⁰ Min curushhuunshon un ranushumua mani futsafo un cuyotiro. Un minhuunoashu cunu cuyacoin ari inatiro.

³¹ Ascan Diosin ahuara shara fustisi huai. Ifon, min yoiyomisi cuscan nantifi iconcoin. Tsoan mia yoiquin isca huai, “Ifon, ua cushusharapun,” ishon yoiaiton nan cuno sapaqui pia iquitiroma cuscan huaquin nocon Ifo Diosin ato cushushara. Nan noicasmaifoancai ato ahuusca huatiroma.

³² Nocon Ifo fustifin Diosiquin. Nan fustifin toquirininhuan cuscaraquin. Tsoan Diosin shucatiroma noco cushunonma.

³³ Diosifin cunu cuyacoin pushu rasi tarati hua cuscaraquin. Ahuun curushhuunoashu noco noicasmaifocai nocoqui nocotiroma. Diosihuunoashu non isharatiro noco ahuusca huanonfoma.

³⁴ Chasho casharatiro machi cuya mamaqui nocosharashquin. Nanscarifi ai un niyoano ahuarafo ua nitu huapai Diosin ahuun curushhuunshon ua mutsismashon ua iyopaiyaiquiri pacutamarocon un nocosharatiro.

³⁵ Ua noicasmacaquin ua chaca huapaiyaifoan Diosin ua itisharahua nocofunun mutsisipa ahuun cuno piacati curushcain un piantiro. Nanscarifi ai nocon Ifo Diosin ahuun curush ua inain ua noicasmaifo un ato piancaiton ua ahuusca huanonfoma.

³⁶ Cuno sapa nituhuaticai aqui pia iquitiroma. Nanscarifi ai mian numahuunoashu yoshin chaca uhuun nomuran iquitiroma ua chaca huashquin. Min ua ashomisihuunshon un futsafo finoncoian.

³⁷ Min ua mau fai huashoan un pacunonma.

³⁸ Ascano nan ua noicasmaifo un ato ichomana ato rutuqui cuyoshquin. Un ato cuyoataima un ato mufainquin unuama. Ascashon un ato cuyocoinni.

³⁹ Un ato cuyocoinshon ato shatuqui futsa afanan funinonfoma. Uhuun tau naman pacui futsuafo.

⁴⁰ Mian mutsismana ua noicasmaifo ichoshquin. Ua noicasmaifo min ato finoan ua ahuusca huanonfoma un ato yononon.

⁴¹ Min ato umaquinoa ichoni. Nan ua noicasmaifo nantifi un ato cuyoquin futsanon.

⁴² Ua noicasmaifo cunacani futsan ato numanon. Ascafiaitocai tsoan ato numai oama. Ascaino nocon Ifo Diosiri cunafiaifono arificai ato cumanima.

⁴³ Un ato cuyocoiano mai mapo ointsa inifo. Yoran unmaintinoa mai mapo matsotiro cusca huaquin un ato potani.

⁴⁴ Uhuun yorafoan uhuunoa tsain chaca huafiafo min ua numa uhuunoa afanan ahua chaca yoinonfoma. Mian cushuaino un mani futsafoan un aton niaifo ica. Un futsafo oinyamafiamisishaquin un ato yonoa cuscan minhuunshon ua nicasharafo.

⁴⁵ Futsafo uhuun caifoma ratucani uqui fuafo. Uhuunoa nicai fucani un ato yonoai cuscan samamashta aashcaquin.

⁴⁶ Samamashta ratucani aton cunu cuyacoin muran tarati huayacucanashu ratucani taritariyanan uqui fuafo.

⁴⁷ ¡Ifo Diosin, minfin uhuun toquirininhuan cuscaran nipanaca! Tsoan mia anoa shucatiroma. Min ua cushupacunaca. Uhuun Numamisi nocon Ifo Diosin nantifi finoncoian. ¡Nannori nantifi yoipacupainon!

⁴⁸ Tsoan ua chaca huaifin min ato ua copishoniquin. Min curushhuunshon un caifo futsafo finoan uhuun yonomati inonfo.

⁴⁹ Ua noicasmacaquin pofufoan ua chaca huapaiyaifo nocon Ifo Diosin min ua cushushara ua ahuusca huanonfoma. Uhuun Ifon, futsafoanri ua rutupaifiainfoan mian numamisi ua rutunonfoma.

⁵⁰ Uhuun Ifon mian shara huamisi. Ascan un manifoti mihuunoa yoicai. Un ato yoiquin isca huai, “Uhuun Ifo Diosi fasi sharacoin ahuamamishti huatiro. Tsoan uhuun Ifo finontiromaran,” ishon minhuunoa un ato yoishquin. Un mihuunoashu unimacain fanain sharashquin.

⁵¹ Upa Diosin nonfin min yora Israelifo. Mian catonni uhuun caifoan un aton niaifo inon. Ascano noco noicasmacaquin noco rutupaifiaifoan min curushhuunshon un ato finoncoian. Min ua catoan cuscan ua noiquin unupacunacama. Ua non uhuun facufo non uhuun funafori min noco noiai cuscacai unupacunacamaran, —ishon David yoini.