2 Samuel 12 - Sharanahua: Diospan Tsain

David chaca huani cuscan Natán a yoini

¹ Ascan nocon Ifo Diosin ahuun tsain yoimisi Natán Davidqui nichini yoiquin isca huanon, —Niaifon, un mia ahuara yoipai. Pushu rasi futsa muran nocofunu rafu icafo. Futsa mafo ichapaya icaino futsa ahuuoma ini.

² Nocofunu mafo ichapaya chashoanfo non moifo ichapacoian.

³ Ascan nocofunu ahuuoma chashoan facu ahuinshta fustiya. Nan chashoan facushta aya ahuun facufo aya icaifono yosia. Ahuun tushu piifain ahuun cucho ayafain nocofunun chishtoano osha. Ahuun facu cuscaracoin.

⁴ Ascan shafa futsa nocofunu ahuara ichapayano nocofunu futsa ahuun pushu ano chaicunoashu nocoa. Nan nocofunu pimashquincai ahuun chashoanfo ichapayafiashoncai ahuuna futsa rutushopaitama nocofunu ahuuomana chashoanun facu ahuinshta fianshon rutushona nan nocofunu chaicunoashu oa pimashquin, —ishon Natán yoini.

⁵ Ascaiton nicain David nocofunu mafo ichapayaquin fasi aqui sinaquin yoini isca huaquin, —Ascan nocon Ifo Diosi nicun non icoinra huatiro. Non icoinra huatirori na nocofunun mafo ichapaya futsa ahuuoma chaca huashu naa shara icuana.

⁶ Nan chashoan facu fustishtayahuuncai ahuun ramapaima. Ascaiton nan ahuara ichapayaton ahuun rafanan chashoan facu ahuuoma inanquin rafu non rafuri huairan, —ishon David Natán yoiaiton.

⁷ Natán David cumani, —Minfin nan nocofunu ichapaya. Nonfin Israelifoquin. Nocon Ifo Diosin mia yoi isca huaquin, “Un mia catoan min caifo Israelifoan aton niaifo min inon. Saúl mia rutunonma un mia numamisi.

⁸ Saúl pushu yafi ahuun ahuin ranan un mia inan. Israelifo non Judáfoan aton niaifo un mia imani. Nanfo ichapayamacun un mia paratamacoin inan cuana.

⁹ ¿Ascan ahuuscaquin uhuun tsain ahuamaran ishon min shinanmun? ¿Ahuuscai min chaca huamun? Min Amonitafohuunshon Urías rutufain ahuun ahuin min fiian min ahuin inon.

¹⁰ Ascan min Urías nan Hitita ahuun ahuin min fian min ahuin inon. Ascacun nan min chaca huahuunshon min yorafoan shinantiro uhuun tsaincai atona ahuama. Nanscacun min yorafo afi ranan rutunanpacunacafo.

^11-12 “Nan min chaca huahuunshon un yonoi min yoracoinfoan mia chaca huanon. Min ahuinfo un min yoracoin inain. Min chaca hua cuscan min fomanpai. Ascafia un shafacafin futsafoan ointaifin min ahuinfo min yoracoin fu iishquin,” ishon Diosin mia yoi, —Natán David yoini.

¹³ Nannori yoiaiton nicaquin David Natán yoini, —Unfin Diosqui chaca huaquin, —ishon yoiaiton. Natán David cumani isca huaquin, —Nocon Ifo Diosin min chaca hua cuscan mia soashona. Mincai naima.

¹⁴ Ascafia min chaca huahuunoa nocon Ifo Diosin nan noicasmaifoan shinantiro acai ahuamaran ishon yoifain ahuunoa tsain chaca huacani. Ascan min facu rama caian man nairan, —ishon Natán David yoini.

¹⁵ Ascan Natán ahuun pushu ano nasoaitian chipo Urías ahuin David fiiano ahuun facu nocon Ifo Diosin fasi isininmani.

¹⁶ Ascaiton David nocon Ifo Diosi fasi cufini isca huaquin, —Ifon, uhuun facushta ua caya huashopun naanonma, —ishon cufinquin piqui tunufai yamutifi maitoca racashini.

¹⁷ Israeli niaifo patasharinoafo ahuun pushu muran icafoan yoinifo isca huaquin, —Niaifon David, funihuu noco futan piishquin, —ishon yoifiaifono funipaitama ato futaricai piinima.

¹⁸ Ascan siete osha finoano facushta naani. David ahuun oinmatifo ratucaquin nan facu naacai David yoinifoma. Ascashu afi ranan yoinancani iscanifo, —Facu nataima David fasi shinancoian. Non yoiai cuscan noco nicapaiyama. Ascan natia ahuun facu man naa non yoiaino fasi shinanmitsai finacai. Shinanmitsacoinquiraca ahuara chaca huatiro, —icashu yoinannifo.

¹⁹ Ascaifoan David ato oinni fashushu yoinainfoan oinquin ahuun nomuran shinanni man facu naa. Ascaifoan oinquin ato yocani, —¿Uhuun facushta man naamun? —ishon ato yocaiton. —Ai. Man naaran, —ishon yoinifo.

²⁰ Nicain David funinacahuan nashicain shiran icain sahuuti futsa sahuufain Diosi fu tsainti pushu muran iquishon nocon Ifo Diosi cufifain ahuun Ifo Diosihuunoa yoisharani. Yoiquin anaititan ahuun pushu ano nasoni piishquin.

²¹ Ascaiton oincaquin ahuun niaifo patasharinoafoan yocani, —Niaifon, min acai cuscacai non tapiama. Min facu nataima min piqui tunufain fasi min uaica. Ascan min facu naano min funishon min piaran, —ishon yoinifo.

²² David ato cumani isca huaquin, —Uhuun facu nataima un shinan, “Uhuun Ifo Diosin uhuun ramapaiquin facu ua nimashotiroraca,” ishon un piqui tunufain un uaica.

²³ Ascan natian man naa. ¿Ascan ahuuscai natian un piqui tunuimun? Un piqui tunuahuunshon uhuun facu caya huatiroma. Ratora shafata naashu un aqui nocotirofiacai aafin afanan uqui nasotiromaran, —ishon ato yoini.

Salomón cainni cuscan cununi

²⁴ Ascaino David ahuin Betsabé ahuun nomuran facu fasi shinainton David tsain shara yoini afanan omitsiscanonma. Afanan a fu oshashon facu nanumana. Furonanfacu caincun anuni Salomón. Nocon Ifo Diosin nan facuhuun noicoinni.

²⁵ Ascan nocon Ifo Diosin ahuun tsain yoimisi Natánhuunshon David yoini isca huaquin, —Ahuun anu futsa Jedidías ishquinran, —ishon yoini. Jedidías Israelifo tsainman nocon Ifo Diosin ahuun noiran, ishon anuni.

David ahuun ranushumuafoya Rabá finifo

²⁶ Ascan nantianri Joab futan Israeli ranushumuafoan Amonitafo aton pushu rasi Rabá ano iquinifo. Nanno Amonitafo aton niaifofo ipaonifo. Nantifi Amonitafo rutufain ato ichonifo.

²⁷ Ascan Joab tsain fomisifo Davidqui nichiano yoiquin isca huani, —Natian un Rabá muran iquishon non Amonitafo rutuquin finonshon Rabá icafoanno a aton unu non fiian.

²⁸ Natian ranushumua futsafo ichanan huahuu nuri funonfo. Ascan minfin min nocon ranushumuafo iyotiro Rabá mai ano iquinonfo nocona inon. Min asca huaino nantifi nocon caifo uhuunoa yoitamarocon yoishcani isca huaquin, “David Amonitafo finoncoincashon aton pushu rasi fiaran,” ishon mihuunoa yoisharanonfo, —ishon Joab David tsain fomani.

²⁹ Ascano Joab yoia cuscan David ranushumua futsafo ichanan huano a fu Rabá ano fonifo nan iquiafotian Israelifona inon.

³⁰ Ascatan David Amonitafo niaifo ahuun maiti pucashon ahuuna inon maimani. Nan maiti orohuunshon oni huani. Toquiri cuscaran sharashta futsa futsatapafo nan maitihuun nuua ini. Ahuun ihuu treinta y cuatro kilos. Rabá mai anoshon David ahuara sharafo ichapa ahuun mai ano foni.

³¹ Rabá icanoafo David yononi Israelifo aton yonomatifo inon. Nisatinin yonofain cuno mai poquitinin yonofain ruratinin yonofain ladrillo huamisiri ini. Nantifi Amonitafo aton pushu rasi icafoannoshon David ato nanscara yonomani. Ascan anaitiafono David yafi Israeli ranushumuafo Jerusalén ano nasonifo.