2 Samuel 11 - Sharanahua: Diospan Tsain

David yafi shomaya ahuun anu Betsabé

¹ Ascan oshu mayo iyamarai junio niaifofoan aton ranushumuafo futan mani futsafo rutui fomisifo. Nantianri David ranushumua niaifo Joab yafi Israel ranushumua futsafori nichini. Ascan Amonitafo rutufain aton pushu rasi uhuapa ahuun anu Rabá iquinifo a murannoafo ato ichoshquin Israelifona inon. Ascaifono David Jerusalén ano nituni.

^2-4 Yatashtacoin David ahuun racati anoashu funicaini pushu fomancaya sapacoin camaqui cahuancacaini ainfo fasi sharashtacoin nashiaiton oinni. Na ainfo ahuun imishupucumisitian imi shatuano nocon Ifo Diosin Israeli yononi cuscan nashini. David oinshon ahuun oinmati nichini nan ainfohuunoa tapimanon. Ascaino ahuun oinmatinin ainfo icanoashu nasoshon yoini isca huaquin, —Na ainfo ahuun anu Betsabé Eliam facu. Ahuun funu Hitita ahuun anu Uríasran, —ishon yoiaiton David ahuun oinmati cumani isca huaquin, —Betsabé pushu ano catahuun ua ihuushoshquin, —ishon yononi. Ascano aqui nocoashu a fu oshani. Iyoconaino ahuun pushu ano nasoni.

⁵ Ascan imimisitian oshu finoanno Betsabé mua man facu nanua. Tapishon David tsain fomani isca huaquin, —Mun facu nanuaran, —ishon yoini.

⁶ David tapini nanton facu nanumana. Ascacun ranushumua niaifo Joab cunu fomani isca huaquin, —Nan Hitita Urías ua nichishoriscahuun, —ishon yononi. Ascan Joab Urías David ari nichini.

⁷ Nocoshon David yocani isca huaquin, —¿Niaifo Joab sharamun? ¿Ranushumua futsafori sharamun? ¿Nan Amonitafo aton ranushumuafo nocon caifoan ato shuhuiamun? —ishon David Urías yocani.

⁸ Ascan ahuun tsain anaitishon David Urías yoini isca huaquin, —Natian min pushu ano catahuun tunuyoshquin, —ishon yoini. Urías caiton chipo David tushu sharacoin fomani piisharanon.

⁹ Ascafianocai Urías ahuun pushu ano canima. Niaifo David pushu unmainti ano ahuun oinmatifo osha ano arifi nanno oshani.

¹⁰ Ascaino futsan Davidqui chanini, —Niaifon, Urías ahuun pushu ano yamu caama. Nanno oinmatifo osha arifi nanno osharan, —ishon yoini. Ascaino David Urías cunashon yoini, —Min fasi chaicunoashu oa. ¿Ahuuscai min pushu muran min oshamamun? —ishon David yocaiton.

¹¹ —Niaifon, Na casho muran Diospan tsain non Israelifo non Judápan ranushumuafo nan pano pushu muran icafo. Niaifo Joab yafi nocon ranushumua futsafori nanno fasi fununun icafo. ¿Ascan ahuuscai urus fusti natianri uhuun pushu muranshon pisharafain ayasharafain uhuun ahuin fu un icamun? —ishon Urías yoini.

¹² Ascan David Urías yononi isca huaquin, —Afanan na shafata nuno ihuu. Funamari un mia nichinon, —ishon yoini. Ascan na shafa yafi iyoconaino Urías Jerusalén ano nituyoni.

¹³ Asca huaino nan yata David afanan Urías cuna a futan pinon. Pimatan David shinanni, —Un fasi paumanon Urías ahuun pushu ano caashu ahuin fu oshanon, —ishon shinanni. Asca huafiano ahuun pushu ano catamarocon afanan David oinmatifo osha ano arifi nanno ato fu oshani.

¹⁴ Ascan iyoconaino David ranushumua niaifo Joab cunusho fomani. Nan cunu Urías inanni Joab foshotanon.

¹⁵ Nan cunun yoini isca huaquin, —Fasi rutunain finacoiyainfoanno Urías nichihuun. Ascan min ranushumua futsafo yoihuun Urías icano nasoriscanon Urías arus fusti nanno nitunon Amonitafoan a rutunonfo, —ishon cununi.

¹⁶ Ascan David yononi cuscan Joab ani. Amonitafo ranushumua mutsisipacoinfo rutumitsaquin tapicoianfoanno Uríasqui nichini.

¹⁷ Ascan pushu rasi Rabá mai anoshon Amonita ranushumuafoan ato nichini Joab ranushumuafo rutunon. Ascan Israeli ranushumua futsafo naino nantianri Urías arifi nani.

¹⁸ Ascan Israeli ranushumuafo non Amonita ranushumuafo rutunainfo cuscan Joab David nantifi tapimani.

¹⁹ Ahuun ranushumua futsa nichiaton yoini isca huaquin, —Nantifi finoanfo cuscan niaifo David yoitacahuun.

²⁰ Ascan min anori yoiyaino sinaquiraca mia yocainraca isca huaquin, “¿Ahuuscai man pushu rasi chaimashta foamun? ¿Man tapiamamun nan pushu rasi cunu cuyacoin tarati huaafo? Nan cunu cuyacoincamaquinoashu man chaimashta nocoaiton mato piantirofo.

²¹ ¿Man shinanmamun nocon shuni Jerobaal facu Abimelec pushu rasi Tebes nocoshon ainfoan cunu cuya camaquishon toquiri uhuapacoin ahuun mapoqui potaquin man rutumanaran?” ishon mia yoiaiton min cumatiro isca huaquin, “Urías arifi man noco yorafo fu naaran,” —ishon yoihuu.

²² Ascan Joab nan ranushumua Davidqui nichini. Nocoshon Joab yoini cuscacoin Davidqui chanini.

²³ Yoiquin isca huani, —Nocon noicasmaifoan ichapacoin nocoqui pushu rasi anoashu foafo noco rutushcaquin. Ascaifoan non ato afanan pushu rasi shoi caincaiti anoshon caimana.

²⁴ Nan pushu rasi cunu cuyacoin camaquishon aton ranushumuafoan noco piancafo. Ascaino nocon caifo fusti rasi naino Urías arifi man naaran, —ishon ranushumua David yoini.

²⁵ Nicaquin David ranushumua yoini isca huaquin, —Min niaifo Joab ua yoishohuun isca huaquin, “Shinanchacayamahuun. Rutunainfoancai non tapitiroma ratomain naicai. Ascan afanan pushu rasi ano min ranushumuafo iyotahuun afanan amuranfo cuyoinonfo,” ishon nannori Joab yoihuun ahuun nomuranshon shinansharanon, —ishon David tsain fomamisi yoini.

²⁶ Ascan Urías ahuin Betsabé ahuun funu naa nicain fasi uaini.

²⁷ Uaiquin unuano David futsa nichini ahuun pushu ano Betsabé ihuunon. Ascan ihuuano David fini ahuun ahuin inon. Chipo man furonanfacuya. Ascafia David aca cuscan nocon Ifo Diosin shinansharamanama. Fasi chaca hua.