1 Samuel 8 - Sharanahua: Diospan Tsain

Israelifo nan caifo futsafo ica cuscan arifi niaifoyapainifo

¹ Nan Samuel anifoaitian furunfo catonni Israelifo yonononfo. Nanfori Samuel cuscara inonfo.

² Samuel ahuun facu iyoa ahuun anu Joel. Chipocuton ahuun anu Abías. Nan rafutan pushu rasi Beerseba ano ato yononifo.

³ Ascafia furunfocai apa cuscara inima. Samuel nocon Ifo Diosi tanashara cuscacai ahuun furun rafutan huaafo inima. Pui fusti shinanquin futsafo fomannifo pui paratama fiishcaquin. Futsan ato yoiquin isca huani, —Un futsa chaca hua cuscan man yoicuma un mato pui inainran, —ishon yoiaiton nan Samuel furun rafutan nan pui fiinifo. Ahuara iconmafia nanscara yoinifo.

⁴ Ascacatan Israeli niaifo patasharinoafo ichanannifo. Ascashu Samuelqui Ramá ano fonifo.

⁵ Aqui nococatan yoinifo isca huaquin, —Min natian anifoshta. Min noco shara huapaoni cuscacai min facu rafucai ascarama. Nan rafutacai nocon Ifo Diosi tanafoma. Ascacun nan caifo futsafoan aton niaifo cuscaran catonhuun noco yononon, —icashu Samuelqui chaninifo.

⁶ —Noco niaifo futsa catonshohuun noco yononon, —ishon Samuel yoinifo. Nan nicatan Samuel ahuun nomuran shinancoinni. —Ascaracai sharamaran, —ishon shinanni. Ascashon nocon Ifo Diosi cufini.

⁷ Nantian nocon Ifo Diosin Samuel isca huani, —Mia yoiafo cuscan ato nicahuun. Mia potapaitamarocon ua potapaicani un afanan ato niaifo inonma.

⁸ Nan un ato Egipcio mai anoshon ihuunitian natianri ua potamisifo caifo futsafoan aton diosfo ramihuafo cufifain ato ahuara huashomisifo. Natianri mia nanscahuapaicani.

⁹ Ascacun ato nicahuun nan apaiyaifo cuscan huahuu. Ascafia ato yoihuun niaifo futsa nan ato asca huatiro cuscaran inon, —ishon nocon Ifo Diosin Samuel yoini.

¹⁰ Ascano nan nocon Ifo Diosin yoini cuscan Samuel ato tapimani.

¹¹ Ato yoiquin isca huani, —Nan niaifo futsan mato iquinanton mato isca huashquin: Maton furufo ranushumua imashquin ahuun taramutiyafo yafi ahuun caballofo iyoshononfo. Nan taramutiyafo foaifoanno maton furufo rufofo ichomashquin.

¹² Nan niaifoan futsa catontiro mil ranushumuafoan aton niaifo inonfo. Ascano ratoran futsa cincuenta ranushumuafoan aton niaifo iishquicani. Futsafoan niaifo mau huashofain yono chitushofain futsafoan ahuun taramutiyafo aromisifo non ahuun ashifo non ahuun piacatifo huashonon caifo futsafo fu rutunanonfo.

¹³ Nan niaifoan maton ainfacufo ahuun pushu ano ihuishquin ahuun yonomatifo inonfo. Futsafo ahuun pichamisi icaino futsafo ahuun ininti huashomisi iishquin.

¹⁴ Maton mau shara fianfain maton fimi uva sharafo fianfain maton fimi shara olivofori fiianshon ahuun oinmati futsafo inanshquin.

¹⁵ Maton fasi ushufo atirifi fianfain maton mau anoa man chitua cuscari mato fiain ahuun ranushumua niaifofo inanfain a fu yonomisi futsafori inanshquin.

¹⁶ Maton oinmati nocofunufo ihuifain maton oinmati ainfofo ihuifain maton moi sharafori fianfain maton burrofo fianshquin nantifi ato yonopaiyai cuscan huashononfo.

¹⁷ Ascashon maton chashoanfori atirifi fii ahuuna inon. Marifi ahuun yonomatifo man iishquin.

¹⁸ Mato nansca huaitian man Diosi cufinshquin nan niaifoan afanan mato yonononma. Man cufinqui ascahuafiaitocai nocon Ifo Diosin mato cumashquimaran, —ishon Samuel ato yoini.

¹⁹ Nan ato tapimapaisharafiaitocai ahuun tsain nicapainifoma. —¡Nanscanon! Norifi futsafoan aton niaifo cuscaran non fuchipai noco yononon.

²⁰ Ascacun norifi nan mani futsafo cuscara non itiro. Nan niaifo noco yonosharafain noco noicasmaifoan noco rutupai fuaifoan nan niaifo noco iyotiro non ato rutunon, —ishon Israelifoan yoinifo.

²¹ Nan yoiaifo cuscan nicaquin Samuel nocon Ifo Diosi nannori ahuun ointaifin yoini.

²² Nan Samuel cufini cuscan nocon Ifo Diosin nicaquin cumani isca huaquin, —Mia yoiafo cuscan ato ashohuun. Aton niaifo futsa catohuun, —ishon nocon Ifo Diosin Samuel yoini. Ascan nocon Ifo Diosin yoini cuscan nicain Samuel ahuun yora nan Israelifo yoini isca huaquin, —Maton pushu rasi ano fotacahuun, —ishon ato yoini.