1 Samuel 7 - Sharanahua: Diospan Tsain

Samuel Israelifo aton niaifo ipaoni

³ Nantian Samuel nantifi Israelifo yoini isca huaquin, —Iconmainquin man nocon Ifo Diosiqui nasocoianmainquin caifo futsafoan aton diosfo rami huafo potacahuun. Nan rami huafo ahuun anu Astarté ointsafo nantifi potacoincahuun nocon Ifo Diosi mato amapaiyai cuscan huaashquin. Nan fusti ifohuacahuun. Man nanscaiton nocon Ifo Diosin mato numai Filisteofoan afanan mato ahuusca huanonfoma, —ishon Samuel ato yoini.

⁴ Nan nicacatan Israelifoan Baal ointsafo rami huafo cuscan potafain Astarté ointsafo rami huafo cuscan potanifo nocon Ifo Diosi fustiton ato amapaiyai cuscan huashoshcaquin.

⁵ Afanan Samuel Israelifo yoini isca huaquin —Uhuun yorafoan, nantifi Mizpa mai ano uqui fucahuun un mato nocon Ifo Diosi cufinshonon, —ishon Samuel ato yoini.

⁶ Ascano Samuelqui fucashon unu fishon maiqui ocanifo nan chaca huafo cuscan shatufain nan nocon Ifo Diosi fusti tanapaiyaifo cuscan ismanifo. Nan shafatari piqui tununifo nocon Ifo Diosi cufinyanan yoiquin isca huanifo, —Upa Diosin, min nocon Ifo non mia chaca huamisiran, —ishon cufinnifo. Nantian Mizpa mai ano Samuel Israelifo aton niaifo ini.

^7-8 Nanscaifoan Filisteofoan nicani Israelifo Mizpa ano ichanainfoan. Ascashon aton niaifofoan aton ranushumuafo ichanan huani Mizpa mai ano focashon Israelifo rutunonfo. Nan nicacani Israelifo ratucoinnifo. Ascashon Samuel yoinifo isca huaquin, —Nocon Ifo Diosi noco cufishonfafainhuun Filisteofoan noco ahuusca huanonfoma, —ishon Samuel yoinifo.

⁹ Ascano Samuel chashoanun facu rutuni toquirifo putsamuinia camaquishon coani. Ascashon Samuel Israelifohuunshon nocon Ifo Diosi cufiain cuscan nocon Ifoan nicani.

¹⁰ Ascano nan Samuel chashoanun facu cooaino Filisteofo atoqui chaimashta funifo Israelifo rutupai. Ascafia nantian nocon Ifo Diosin nai turuimaqui fasi achacoin huaiton nicain Filisteofo fasi ratucoincani ichonifo. Ascaiton oincaquin Israelifoan ato mufaintan atirifi Filisteofo ato rutunifo.

¹¹ Nan Mizpa mai anoshon Filisteofo mufaincatan Israelifoan ato rutunifo Bet-car chaimashtashon ato rutunifo.

¹² Ascatan nocoafono Samuel toquiri uhuapa nan Mizpa yafi Sen nushmancayan nichini. Ascashon nan toquiri nichimua anuni Eben-ezer onicoinnin tsainman yoia —Nantian nocon Ifo Diosin noco cushushararan, —ishon Samuel anuni.

¹³ Ascan nan Israelifoan Filisteofo ichoanfoannocai afanan Israeli mai ano funifoma Israelifo rutupai. Samuel niyoatian nocon Ifo Diosin ahuun curushhuunshon Filisteofo nitumani afanan Israelifo fucash huanonfoma.

¹⁴ Ascano nan Israelifoan Filisteofo ichoni aton mai fianshcaquin. Ascano nan pushu rasi Ecrón chaicoin pushu rasi Gat ano Filisteofoan Israelifo nasonifo afanan atona inon. Ascano nan mai futsafo chaimashtari Israelifoan Filisteofo nannoshon potanifo afanan ato yonononma. Nantiancai Israelifo fu Amorreofo afanan rutunanpainifoma.

¹⁵ Ascan nan Samuel niyoatian Israelifoan aton niaifo ipaoni. Ascashon ahuuscatirofomainquin Samuel ato tapimani.

¹⁶ Ascashu faritifi Samuel cahuacacaipaoni Betel mai ano non Gilgal mai ano non Mizpa anori cani ahuara Israelifoan finoainfo cuscan ato yoisharaicai afanan shinanchacanonfoma.

¹⁷ Ascano ato yoiquin unutan pushu rasi Ramá ano Samuel nasoni. Nanno ahuun pushu ini. Nannoshori ahuara finoan cuscan ahuun yorafo tsain shara yoini afanan shinanchacanonfoma. Ascashon Ramá ano toquirifo putsainini anoshon nocon Ifo Diosi cufishquin.