1 Samuel 4 - Sharanahua: Diospan Tsain

Diospan tsain nan casho murannoa Filisteofoan finifo

¹ Nantian Filisteofo fu Israelifo rutunannifo. Ascano Israelifoan aton ranushumuafo Eben-ezer ano iyonifo. Ascano nan Filisteofoan aton ranushumuafori Afec mai ano iyonifo.

² Ascano nantian Filisteofo Israeli icafoanno nocoriscatanifo. Ascashon ato rutunifo. Cuatro mil Israeli ranushumuafo Filisteofoan ato rutunifo.

³ Rutunain unucatan Israelifo afanan nan icafoanno nasonifo. Nantian aton niaifofo yocanonannifo, —¿Ahuuscaimun nocon Ifo Diosin noco cushuamaquin Filisteofoan noco rutunonfo? —icashu yocanonannifo. Ascatan yoinifo isca huaquin, —Nan Silo anoshon Diospan casho ahuun tsain a muran noco fushononfo. Nan non Filisteofo fu rutunaintian nan casho non fotiro. Nanton noco numanon nan nocon noicasmaifoan noco ahuusca huanonfoma, —ishon yoinifo.

⁴ Ascashon nocofunufo Silo ano nichinifo Diospan casho ahuun tsain a muran ato fushononfo. Nan nocon Ifo Diosin ahuun curushhuunshon noco ahuamamishti huashotiro ahuun nai oinmati rafu aton ointsa rami huacashon nan casho camaqui ocuma rafu nimanifo. Nan nocon Ifo Diosin arifi nanno ini nan casho ano. Ascano Elí facu rafu Ofni yafi Finees nocon Ifo Diosi ahuun casho ano inifo. Nan casho muran Diosin Israelifo cunushoni cuscan nanunifo.

⁵ Ascano nan casho atoqui nocoafono Israelifoan fasi unimacani oi ashcafinin cunariscatanaifono mai nayanaiyaiquin mutsa. Nan nii uhuapacoin pacua mutsa muunifo.

⁶ Nantian Filisteofoan nicacaquin yoinifo isca huaquin, —¿Ahuuscai nan Israelifo (aton anu futsa Hebreofo) icanoafo fasi mucacanimun? —icashu yocanonannifo. Ascaiton futsan ato yoini nan Israelifo aton Ifo Diospan casho atoqui nocoano icaniran ato huani.

⁷ Nan nicacani fasi ratucoinnifo. Yoiquin isca huanifo, —¡Ohua! Israelifo icano aton Diosi futsa nocoa. Natiafin non ahuara chaca finoincain. Ascara ahua tsoan oinyomisima cuscaran.

⁸ ¡Ohuashta! ¿Nonmun ahuuscatiroquin? ¿Tsoan noco numatiromun? Nan icafoanno aton Diosin curushcoin nocoa. Nan Diosi tsoa istaipama anoshon Egipciofo pau isincoin fuchimanano nai futsunifo.

⁹ Uhuun caifofoan ratuyamacahuun. Filisteofoan mutsisipainifoancahuun. Non atoqui ratuaino nocon rutuqui finoanfoanno non na Hebreofo yonomatifo itiro. Ascacun non ato rutuicanon, —icashu yoinannifo.

¹⁰ Nantian afanan Filisteofo fu Israelifo curushcain rutunannifo. Ascano ato rutuqui finaifoan oin Israelifo nan icafoanno aton pano pushu rasi ano ichonifo. Filisteofoan ato ranushumuaton Israelifo ichapacoin rutunifo. Trienta mil Israeli rutunifo.

¹¹ Diospan casho Filisteofoan fiinifo. Elí facu rafu Ofni yafi Finees nantianri rutunifo.

¹² Ascano nan nocofunun Israeli mani futsa Benjamín ahuun funa nan rutunainfoannoashu ichoni. Ascashu Silo ano noconi. Nocoaiton oiainfono ahuun sahuuti fashnu fashnu ani mai mapori ahuun mapo camaqui masaica ini.

¹³ Israeli icanoashu Benjamín ahuun funa nocoaitian Elí fai cusumunri tsaonshon oinni. Fasi ratuquin shinanni ahuara chaca nan Diospan casho finoanmainquin. Ascano nan nocofunu nocotan Israelifoan finoan cuscan ato tapimani. Nan nicacani nantifi pushu rasi anoafoan fasi oiashcafinin ato manocani uainifo.

¹⁴ Ascatan nan nicaquin Elí ato yocani, —¿Ahuuscai man fasi uaiquimun? —ishon yocani. Ascano nan nocofunun Elí tsao ano ichoni.

¹⁵ Elí ahuun fari noventa y ocho fariyatiancai afanan ointiro inima.

¹⁶ Ascano nan nocofunun oian cuscan Elíqui chanini. Yoiquin isca huani, —Nan rutunainfoannoashu un ramashta nocoa. Na shafata un rutunainfoannoashu un ichoaran, —ishon yoiaiton. —¿Uhuun facushtan ua yoihuun ahua finoanmun? —ishon Elí yocaiton.

¹⁷ —Filisteofoan nocon caifo ichofain nocon caifo ichapacoin rutuafo. Min facu rafuri Ofni yafi Finees man rutuafo. Ascano nan Filisteofoan Diospan casho man fiaforan, —ishon yoini.

¹⁸ Nan Diospan cashohuunoa yoiaiton nicain Elí ahuun tsaoti pushu rasi shoi caincaiti anoashu manansca pacuni. Anifocoinfiashu fasi ihuucoin ini. Nanscashu pacui tutucumutan naani. Naanfin Israelifoan aton niaifo cuarenta fari ipaoniquin.

¹⁹ Ascano nan Elí ahuun facu Finees ahuun ahuin facu nanua cainti sunuin. Nan ainfoan nican Filisteofoan Diospan casho fifain Elí fafahuan man naa ahuun funu man rutuafo nicaino nan samamashta facu isinhuani afanancai tunutiro inima.

²⁰ Ascano nan ainfo naiton ainfo futsan a fu icaton yoini isca huaquin, —Ratuyamahuun. Natian min furonanfacuyaran, —ishon yoini. Ascafia nan ainfoan yoiain cuscacai futsa cumanima. Afanancai cumatiro inima. Man naaquin.

^21-22 Ascan nataima yoini isca huaquin, —Filisteofoan Diospan casho fifain uhuun fafahuan yafi uhuun funu man naa. Afanancai nocon Ifo Diosin Israelifo fu icama. Nanscaquicai afanan ahuara shara noco mai ano itiroma. Ascano uhuun facu ahuun anu Icabod iishquinran, —ishon yoini.