1 Samuel 31 - Sharanahua: Diospan Tsain

Saúl yafi ahuun facufo nani cuscan

¹ Ascan iyoconaino Filisteo ranushumuafoan Israeli ranushumuafo rutunancaquin Filisteofoan shuhuinifo. Ascan Israeli ranushumuafo ichonifo. Ichocani atirifi Gilboa machi ano Filisteofoan ato mufain ato rutunifo.

² Nantian Filisteofoan Saúl furu rafu non fustiya rutupaiquin ato mufaini. Atoqui nococashon nan Saúl facu rafu non fusti Jonatán non Abinadab non Malquisúa rutunifo.

³ Ascan Filisteo ranushumuafo Saulqui noconifo fasi rutupaicani. Ascan ichapafain nannosi piannifo. Ascaquin futsan pia tsacamanifo.

⁴ Ascan Saúl naaquin ahuun oinmati yoini isca huaquin, —Mun nai. Na Filisteofocai nocon Ifo Diospan yorama samamashta uqui nocoaino tau huaquin ua omitsiscamafain ua rutushquin. Uncai atohuunoashu napaima. Ascan min nopun ua rutuhuu, —ishon Saúl yoini. Ascaino ahuun oinmati fasi ratucoinquin rutunima. Ascafiaino Saúl aficoin ahuun nopu cunoquiri fosoancufoan aficoin aqui pacuashu naani.

⁵ Ascaiton oin ahuun oinmati arifi nanscariai ahuun nopuqui afincoin pacuashu naani.

⁶ Ascan nan shafata Saúl furu rafu non fustiya ahuun oinmati non ahuun ranushumua futsafori nannoashuri naanifo.

⁷ Ascan Israelifo chaimashta machi ocuma futsa nan unu Jordán fari oaiquirinoa icafoan oiainfono aton ranushumuafo Filisteofoan rutuafo nanforifi icafoannoashu ichonifo. Ascan Filisteofoan nan Israelifo pushu rasi ano icafo aton pushufo muran iquinifo.

⁸ Ascan iyoconaino Filisteofo funifo Israeli naafo ano aton ahuarafo fiishcaquin. Ascan nantian machi Gilboa ano Saúl yafi furu rafu non fusti aton caya fuchinifo.

⁹ Ascan Saúl tushtushon ahuun cuno sahuuti pucanifo. Asca huaifoan oinquin futsafo nichini Filisteofo icanoafo atoqui chaninifo Saúl man rutuafono. Aton dios ointsa afin rami huafoquiri aton pushu murannoafori ato tapimanifo. Saúl man naaran ishon ato tapimani.

¹⁰ Ascan Filisteofoan aton dios anunifo Astartéran, huanifo. Ahuun pushu muran Saúl ahuun cuno sahuuti huani. Aton pushu rasi ahuun anu Bet-sán ano Saúl ahuun caya cunuqui mastanifo.

^11-12 Ascan Israelifo pushu rasi Jabes de Galaad anoafo Filisteofoan Saúl chaca huai cuscan nicanifo. Nocofunufo ratutama yamu foshinifo Saúl yafi furu rafu non fustiton ahuun caya foshcaquin. Ascan Bet-sán ano nococashon Saúl yafi furufo ato caya cunuqui mastanifo ano fotomashon ato pushu rasi Jabes ano fonifo. Nannoshon ato coanifo.

¹³ Ascashon chipo aton shaofo ihui naman Jabes ano mai huanifo. Ascashon siete osha finoanno Israelifoan nannoshon piqui tununifo.