1 Samuel 3 - Sharanahua: Diospan Tsain

Nocon Ifo Diosin Samuel cunani

¹ Ascano nantianri nan furonanfacu Samuel Elí yononi cuscan huashoni. Nanscahuahuunshon Samuel nocon Ifo Diosi ashomisi. Nantiancai nocon Ifo Diosin ahuun tsain tsoan tapiyonima. Fusti rasiton ahuun tsain nicanifo. Aton namapanhuunshon Diosin ato tapimapaiyai cuscan fusti rasi tapinifo.

² Ascan yamu futsa Elí ahuun racati ano racani. Ahuun furo afanan oinsharaima.

³ Elí yafi Samuel Diosin tsainti pushu muran icafoanno aton farocai nocatai inima. Nantian Samuel nocon Ifo Diosi fu tsainti pushu muran racani. Diospan casho a muran ahuun tsain nanuni Samuel chaimashta raca ini.

⁴ Samuel nanno racano nocon Ifo Diosin cunani. “Samuel,” huaiton. “Unquian. Unfin nunoquin,” huatan.

⁵ Funinacahuan Elí racano ichoni. —Min ua cuna. ¿Ahua min yopaimun? —ishon yocaiton. —Ma. Uncai mia cunama. Caashu racatahuun, —ishon yoini. Ascano afanan caashu racani.

⁶ Ascatan afanan nocon Ifon Diosin Samuel cunani, “¡Samuel!” huaino. Afanan funinacahuatan Elí racano cani. Ascatan afanan yoini, —Min ua cuna. ¿Ahua min yopaimun? —ishon yocaiton. —Uhuun facushtan, un mia cunama. Caashu afanan racatahuun, —Elí huani.

⁷ Nocon Ifo Diosincai Samuel cunayomisima. Ascano ahuun oiricai nicayamafain aacai onantaima ini.

⁸ Ascatan afanan nocon Ifo Diosin Samuel cunaino funinacahuan Elí racano afanan cani. Ascashon yoini, —¿Mian cunamun? —ishon yocaiton. Nantian Elí tapirisca huatani nocon Ifo Diosin nan furonanfacu Samuel cunacun.

⁹ Ascashon afanan yoini, —Afanan caashu racatahuun. Nocon Ifo Diosi mia afanan cunaiton cumaquin isca huahuu, “Unquian, Ifon. Ua yoihuun un mia nicanon,” —ishon yoihuun. Ascano Samuel afanan ahuun racati ano racani.

¹⁰ Ascano afanan nanscari huaquin nocon Ifo Diosin aqui oshon cunani, —¡Samuel! ¡Samuel! —huaiton, —Unquian min oinmati. Ua yoihuun un mia nicanon, —ishon cumani.

¹¹ Ascashon nocon Ifo Diosin Samuel yoini isca huaquin, —Un samamashta Israel mai ano acai cuscan nicacani fasi ratucoinshquicani.

¹² Un Elí yoia cuscan un huashquin. Nan non ahuun yorafo fasi omitsiscashcani.

¹³ Munfin yoimisiquin ahuun facu rafutan ua chaca huafiaifoancai ato yoipaimisima. Nanscacufin un ahuun yorafoya ato onaintimacoincain. Nanfocai afanan ato caifohuunoa ua cufinshomisifo ipanacama.

¹⁴ Un yoimisi cuscacai un fianananpacunacama. Elí non ahuun facu rafutan ua ina rutushotiro ua ahuara futsa inanpaifiaifoancai un aton chaca rau huashopacunacamaran, —ishon nocon Ifo Diosin Samuel yoini.

¹⁵ Nan nicatan afanan Samuel nanno racani nan shafai chain. Ascashu funamari nocon Ifo Diosi pushu shoi caincaiti ano fupushoni. Nocon Ifo Diosi yoia cuscan Samuel ratuquicai Elí yoipainima.

¹⁶ Ascatan Elí Samuel cunaquin isca huani, —Uhuun facushtan, Samuel, —huaiton. —Unquian nuno, —ishon cumaiton.

¹⁷ —¿Nocon Ifo Diosin mia raquiri yoiamun? Nantifi ahuun tsain ua yoihuun. Mian fomainton nocon Ifo Diosi mia fasi onaintimapainonran, —ishon yoini.

¹⁸ Nannori Elí huaiton nicaquin nan nocon Ifo Diosin yoia cuscan Samuel nantifi Elí tapimani. Ahuashtacai fomannima. Nan yoiaiton nicaquin Elí yoini isca huaquin, —Naanfin nocon Ifoquin. Nan shinan cuscafin sharaquin. Nantofin nan apaiyai cuscan huatiroquin, —ishon Elí Samuel yoini.

¹⁹ Nan Samuel yosiatian nocon Ifo Diosin a fu ipaoni. Nocon Ifo Diosin Samuel inonpacoai yoini cuscan nanscaracoin finonni.

²⁰ Ascano nantifi Israeli maifoti icafoan yoinifo isca huaquin, —Samuel Dioshuunshon noco yoimisi. Noco yoimisi cuscan huamisiran, —ishon ahuunoa yoinifo.

²¹ Nan Silo pushu rasi ano Diospan ichananti pushu muran nocon Ifo Diosin Samuelqui nocopaoni ahuun tsain tapimashquin. Ascano nocon Ifo Diosin Samuel tapimani cuscan ahuun caifo Israelifori tapimapaoni.