1 Samuel 26 - Sharanahua: Diospan Tsain

Afanan David Saúl rutupaiquin rutucuanfiashon rutunima

¹ Ascan chipo pushu rasi ahuun anu Zif anoashu nocofunufo pushu rasi Gabaa Saúl icano fonifo aqui chani focani. Yoiquin isca huanifo, —Nan min David funafoanfafainna natian tsoa istaipama machi ahuun anu Haquila chaimashta onuaran, —ishon yoinifo.

² Nannori nicatan Saúl tres mil ranushumuafo fasi tapicoianfo ato iyoni David achinonfo. Tsoa istaipama Zif ano fonifo.

³ Machi Haquila David icano chaimashta Saúl fai cusumunri oshani. Ascafia Saúl funai aqui oaiton David tapini.

⁴ Ascan ahuun yora futsafo nichini Saúl icano David tapimashquin.

⁵ Ascan Saúl osha ano yamunacucahuanaino David yafi ahuun yora futsafo funaiquimashta aqui caiton oinonfo. Ascan oianfo Saúl yafi Nerpan facu Abner nan ranushumuafoan aton niaifo nanno oshanifo. Israeli ranushumuafoan ato tarati hua. Nanfori man oshafainnifo.

⁶ Ascan a fu rafuafo nan Hitita Ahimelec non Joab yora nan Sarvia ahuun facu Abisai David yocani, —¿Tsoa u fu caimun Saúl oshano u fu nocoshquin? —ishon David ato yocani. —Un mi fu cairan, —ishon Abisai cumani.

⁷ Ascan David yafi Abisai funanmanshta fonifo Saúl ahuun ranushumuafo fu icano fonifo. Funanmanshta focaquin nantifi oshai futsuafo ato fuchini. Saúl oshaquin ahuun mapoquiri ahuun ashi maiqui nichia. Ranushumua niaifo Abner yafi ahuun ranushumuafoan Saulqui tarati huayacucanashu arifi oshanifo.

⁸ Ascan Abisai yoini isca huaquin, —¡David, oinpon! Natian nocon Ifo Diosin yonoa mia noicasmai min rutumatiro. Ua yoihuun un natian uhuun ashin un chachinon naanon. Un ashi curushcai tsacaquin maiya tashnihuatanon naanon. Uncai chachiqui rafu huaima. Un fusti huano nairan, —ishon fashushu Abisai yoini.

⁹ Ascaiton David cumani isca huaquin, —¡Ma! Rutuyamahuu. Nocon Ifo Diosin Saúl nocon niaifo inon catonniquin. Non rutuashu non chaca itiro.

¹⁰ Non icoinra huatiro nocon Ifo Diosin nia. Nanscarifi ai non icoinra huatiro nocon Ifo Diosin chipo Saúl onaintimaiyamaino un shinan raca chipori futsafo rutuaino arifi natiro iyamarai anifoshtashu natiro.

¹¹ Nocon Ifo Diosin Saúl catonni. Nocon Ifo Diosin ua shinanmasharaino uncai Saúl rutunacama. Ascafia ahuun ashi yafi ahuun botica unu ayati non fiiain canon. Non aya ichonon, —ishon David yoini.

¹² Ascan David nan ashi yafi botica Saúl mapo chaimashta tsaoa fiini. Tsoancai fiiaiton oinyamafain oshashu moinifoma. Nocon Ifo Diosin ato fasi osha chai camacoiano moitirocai inifoma. Ascaino Abisai yafi David atomaquinoashu ichonifo.

¹³ Saúl yafi a fu futsafo icanoashu David yafi Abisai machi ocuma futsa mapunifo. Chaicunoashu Saúl yafi a fu icafo Davidqui nocoriscatirofo inima.

¹⁴ Ascan huaiton oi ashcafinin David Nerpan facu Abner yafi ranushumua futsafo cunani isca huaquin, —¡Abner, moihuu! ¿Mian cumaimamun? —ishon cunaiton. —¿Min tsoamun? ¿Ahuuscai nocon niaifo oshafiacun min cunaimun? —ishon yocaiton.

¹⁵ —¿Iconmun min ranushumua shara? Tsoan Israel icafoanno mia finontiroma. ¿Ascan ahuuscai min niaifo min cushusharama? Futsan min niaifo rutupai cafiacun mincai a cushusharama.

¹⁶ Min aca cuscan sharama. Icon nocon Ifo Diosin nia cuscan iconri min non mi fu ranushumua futsafoan maton niaifo nan nocon Ifo Diosin catoanton man cushuama. Ascan man chaca huahuunoashu man natiro. ¡Oinpo! ¿Ranimun niaifoan ahuun ashi non motica ayati? —ishon machi ocuma futsa chaicushon David cunani.

¹⁷ Cunaiton Saúl David ahuun oi onanni. Ascaiton cumani isca huaquin, —¿Uhuun facushta David, na minmun? —ishon cunaiton. —Unquian, uhuun niaifo min nocon niaifo.

¹⁸ ¿Ascan ahuuscai mian ichomashquimun? ¿Un mia ahua chaca huamun? Un ahua chaca huamainquin ua yoihuu.

¹⁹ Ascan nocon niaifon unfin min oinmatiquin. Un mia yoiai cuscan ua nicasharapun. Nocon Ifo Diosin mia uhuunoa shinanchacamanaiton un nocon Ifo Dioshuunshon un ina rutushoshquin Ifoan uhuun chaca soashonon. Ascan nocofunufoan uhuunoa mia shinanchacamanai nocon Ifo Diosin ato onaintimacoinpainon. Mian uhuun pushu anoshon ichomana afanan uhuun yorafoyashon ichananshon nocon Ifo Diosiricai un ato futan cufintiroma. Un afanan ato futan nocon Ifo Dioshuunoa shinantiroma. Ua futsafoan yoimisifo, “Diosi futsafo afin rami huafo cufinhuun,” ishon ua yoiafo.

²⁰ ¿Unmun caifo futsafoan aton mai anoashu naashquicai? ¿Ahuuscai nocon Ifo Diosin nan mai nocon inan ano min ua imapaimamun? Uhuun caifo Israelifoan minfin nocon niaifo. Nan ia funa huaquin mian funariai. Nan nocofunun machi ano coma funatiro cuscan mian funariairan, —ishon David yoiaiton.

²¹ Saúl cumani, —Unfin chaca huaquin. Uhuun facushta David, uqui nasohuun. Min uhuunoa shinansharaquifin min na shafata ua rutuamaquin. Ascan un afanan mia ahuusca huaima. Un mihuunoa shinan cuscan fasi chaca. Un fasi amaquiri shinan. Un nisofoan shinainfo cuscaran shinanmisiran, —ishon Saúl yoiaiton.

²² —Naquian min ashi. Min ranushumua pushco futsa nichihuun fiyonon.

²³ Rato yoran nocon Ifo Diosin tanasharacoianfo ato shara huashoshquin. Na shafata nocon Ifo Diosin ua tapipaiquin yonoa un mia rutupaiquin rutu cuana. Nocon Ifo Diosin mia catonnicun nocon niaifo inon. Ascan un mia ahuusca huama.

²⁴ Un minhuunoa shinansharaquin mia un rutupaima. Nanscarifi ai nocon Ifo Diosin uhuunoa shinansharapainon ahuarafoan ua omitsiscamaiton ua numanon, —ishon David yoiaiton.

²⁵ Nicatan Saúl cumani isca huaquin, —Uhuun facushta David, nocon Ifo Diosin mia shara huashopainon. Min chipo fasi ahuarafo shara huaicai. Iconcoin min nantifi ahuara finoincairan, —ishon Saúl yoini. Asca huatan David caino Saúl ahuun pushu ano nasoni.