1 Samuel 20 - Sharanahua: Diospan Tsain

Jonatán David shara huashoni

¹ Ascano David Naiot Ramá mai anoashu Jonatán icano ichoni. Nocoshon yocani, —¿Un ahua chaca huamun? ¿Un min upa ahua chaca huamun ua rutupaiyai? —ishon David Jonatán yocaiton.

² —¡Ma! Uhuun upancai mia rutuima. ¡Shinanpo! Uhuun upa ahuara huataima ua rufofo yoimisi. Ahuara shara huayamafiaquin ua tapimayomisi. ¿Ascan mia rutupaifiaquin ahuuscai ua yoiyamamun? Ma. Un shinancai iconma, —ishon Jonatán yoiaiton.

³ Nicaquin David cumani isca huaquin, —Diosin ua nicaino un mia icon yoi. Min upa tapia mian noiaiton. Ascan mia ointi isinmapaiquima mia foman min tapinonma. Ascan Diosiri min ua nicai cuscan un mia icon yoi min upan ua samamashta rutupairan, —ishon David yoiaiton.

⁴ —Ascan un mia ashoai cuscan ua tapimahuun un mia ashonon, —ishon Jonatán cumaiton.

⁵ David cumani isca huaquin, —Funamari nocon caifoan fusititian ahuun anu oshu ina funano min upa ua yoita mato futan pinon. Ascan un mato futan piyamaiforan un fasi fununun onuicaicain. Un nanno osha rafunon fusti yatatifi onuicai.

⁶ Min upan “¿David raqui caamun?” huaiton yoihuu isca huaquin, “David caashquin ua yocaquin tau hua Belén ano apa icano coshicoin caashquin nantifi ahuun yorafo futan amisi cuscan nocon Ifo Diosi ina rutushoni cairan,” ishon ua yoia.

⁷ Ascan mia upan cumasharaiton min shinantiro ua rutupaima. Ascafia min uhuunoa yoiaino sinaiton oinquin min tapitiro ua rutupaiyai.

⁸ Ascan uhuun yorashta. Man min tapia min u fu nocon Ifo Diosin ointaifin non yoinonansharapacunaca. Ascan ua upa achimayamahuun. Min shinain un min upa chaca huacun min upa ua achimatamarocon mifin ua rutuyohuun, —ishon David yoini.

⁹ —¡Ma! Uncai mia asca huapacunacama. Ascan uhuun upa mia rutupaiyai tapishon un mia yoi cuanaran, —ishon Jonatán cumani.

¹⁰ —¿Min nica ua upa rutupaiyai tapishon ahuuscashomun mian tapimatiroquin? —ishon David yocaiton.

¹¹ —Nuri ohuu. Non fasi fununun canon, —ishon Jonatán cumani. Ascashu nan rafu fasi fununun fonifo.

¹² Nocotan Jonatán yoini isca huaquin, —Nonfin Israelifoquin nocon Ifo Dioshuunshon un mia icon yoi. Ascan osha rafu finontan uhuun upa mihuunoa shinan cuscan un tapishquin. Un nica mia ahuusca huayamaiton un mia tapimatiro.

¹³ Ascan un nicai mia uhuun upa chaca huaiton un mia tapimayamaino min ichocun nocon Ifo Diosin ua fasi asca huapainon. Nocon Ifo upa fu ipaoni cuscan natianri mi fu ica.

^14-15 Ascan un niyoa chain nocon Ifo Diosin ua noia cuscan minrifi ahuunshon ua shara huafafainhuun. Mia noicasmaifo nocon Ifo Diosin cuyoaitian uhuun yorafo shinanhuun. Ato shara huafafainhuun, —ishon Jonatán yoini.

¹⁶ Asca huatan afanan nocon Ifo Diosihuunshon Jonatán David yoini isca huaquin, —Mia noicasmaifo nocon Ifo Diosin ato cuyopainon.

¹⁷ Ua noiquin afanan ua yoiyohuun uhuun yorafo min ato shara huashquinran, —ishon Jonatán David yoini. Ascan Jonatán afin noimuai cuscan Davidhuuri noicoinni.

¹⁸ Ascan afanan Jonatán David yoini isca huaquin, —Funamari nocon caifoan fusititian ahuun anu oshu ina funaran huamisifotian min no fu iyamaiton uhuun upan ua yocashquin ahuuscaimain min no fu iquimacai.

¹⁹ Ascan min onuitano afanan osha rafu finoanno yatashta toquirifo putsamuinia anoshon manayohuun.

²⁰ Nannoshon min manaino uhuun piacatinin un toquiri putsamuinia chaima pianquin rafu non fusti huai.

²¹ Ascan huashon un furonanfacu nichin ua piafo fushonon. Min nican un furonanfacu yoiquin isca huai, “Toquirifo nuquirishtanoa uhuun piafo fuchishon ua fushohuun,” ishon un furonanfacu yonoaiton nicaquin min nocon Ifo Diosihuunshon tapicointiro uhuun upa mia ahuusca huaima. Ahua chacacai mihuunoa shinainma. Ascan nannori nicashu osharahuun.

²² Ascafia un furonanfacu isca huaquin yoi, “Uhuun piafo min fuchiama. Fasi orishta cashon uhuun piafo min fuchitiroran,” ishon un furonanfacu yoiaiton min tapitiro uhuun upa mia chaca huapaiyaiton. Nicain min nuno itiroma. Musu itiro. Ascano min mai futsa ari ichotiro.

²³ Ascan nan non yoinonansharaita cuscan nocon Ifo Diosin noco nica. Nonmain nanscasi ai shara huatananpacunacaquin, —ishon Jonatán David yoini.

²⁴ Asca huaiton nicatan David fasi fununun onuni. Nantianri oshu ina funa fusititian niaifo Saúl ahuun pushu muran acamaquishon piti ano tsaoni piishquin.

²⁵ Cunuquitafiashu tsaonmisi cuscan afanan nannori tsaoni. Furun Jonatán acamaquishon piti ocuma futsa tsaoni. Ranushumua niaifo ahuun anu Abner Saúl chaimashtacoin a fu tsaoni. Ascan David tsaomisi anocai tsoa tsaonima.

²⁶ Nan shafata Saúl ahuashta yoitama puusinima. Ahuun nomuran shinanni isca huaquin, —Nocon Ifo Diosin yononi cuscan non ahuara chaca ramanshon non futsafo futan pitiroma a ina Diosihuunshon rutushon piaino. Ascan un shinain David ahuara chaca ramanshon no futan pitiroma. Ascashu nocoqui oamaran, —ishon Saúl ahuun nomuran shinanni.

²⁷ Ascano iyoconainocai David afanan ato futan pishquin onima. Ascaiton Saúl furun Jonatán yocani, —¿Ahuuscai Isaí facu afanan noco futan pifafainfiashu na shafatari oamamun? —ishon Saúl yoini.

²⁸ Ascaiton Jonatán cumani, —David ua yoita isca huaquin, “Ua Belén ano nichipun.

²⁹ Nanno oshu ina funa fusititian ina rutushcaquin nocon Ifohuunshon shinanyonifo. Ascacun uhuun ochin ua yonoa urifi un ato fu inon. Ascan ua noicoinquin ua nichipun uhuun yorafo fu un inon,” ishon ua yoita. Ascan no fu icamaran, —ishon Jonatán apa yoini.

³⁰ Nannori nicatan Saúl ahuun furuqui fasi sinacointaquin yoini, —Min uhuari chacacoin ano. Minrifi min fasi chacacoin. Min shinanmun un tapiama min Isaí facu niaifo imapaiyai. Min icai cuscan min uhuari rafipaitiro.

³¹ Nan Isaí facu nianocai min niaifo itiroma. Ascacun ua ihuurisca huaiyohuun un rutunon, —ishon yoiaiton.

³² —¿Ahuuscai min David rutupaimun? ¿Ahua chaca huamun naanon? —ishon Jonatán apa yoiaiton.

³³ Cumatamarocon Saúl ahuun ashi furu rutupaiquin tsacani. Asca huaitofin Jonatán tapiniquin iconcoin apan David rutupaiyai.

³⁴ Ascaino apaqui fasi sinacoin Jonatán acamaquishon piti anoashu funini. Nan shafa fusticai afanan ahua pinima. —Uhuun upa David fasi chaca huaran, —ishon Jonatán David shinancoinni.

³⁵ Ascan iyoconaino David yoita cuscan Jonatán furonanfacu chifi cainquifaitan yoini isca huaquin,

³⁶ —Na pia un piancai ichoshon ua fishoriscatahuun, —ishon yononi. Nan yonoai cuscan facu ichoni. Jonatán pia fasi chaicoin pianquin furonanfacu finonmacoinni.

³⁷ Facu piaqui noco cuanaiton Jonatán cunashon yoini isca huaquin, —Pia pacu ano min nocoamaqui.

³⁸ Nituquima orishtaquin afanan ichotahuun, —ishon Jonatán facu yononi. Ascaino ichoicai piaqui nocoshon ifo fushoni.

³⁹ Jonatán David yoita cuscacai facun tapinima. Jonatán futan David fustiton tapinifo.

⁴⁰ Ascan Jonatán piacati non piafo facu inanquin yoini isca huaquin, —Pushu rasi ano ua foshotahuun, —ishon yononi.

⁴¹ Ascan facu caiton David toquiri putsamuinia ano ocuma futsa onu ano Jonatánqui nocoshon David maiqui fuoshopacucahuan rafu non fusti ashoni. Asca huatan icononancunfoancatan uaiquitanannifo. Nan rafu uaicaifono David uaiqui finacoinni.

⁴² Asca nan rafu fasi shinanonainfoan Jonatán yoini isca huaquin, —Natian min casharatiro. Non nocon Ifo Dioshuunoashu non yoinonan sharapacumisi. Ahuun ointaifi non yoicoian nocon Ifon Diosin min funafo non uhuun funafori ato cushusharapacunaca, —ishon Jonatán David yoini. Ascaino David nannoashu caino Jonatán pushu rasi ano nasoni.