1 Samuel 16 - Sharanahua: Diospan Tsain

Nocon Ifo Diosin David catonni niaifo inon

¹ Ascan nocon Ifo Diosin Samuel yoini isca huaquin, —Mun yoia Saulcai afanan Israeli niaifo itiroma. Ascan afanan ahuunoa shinanyamahuun. Min moi masho muran shuni manuhuun. Asca huatan Belén pushu rasi ano catahuun. Nanno a nocofunu Isaí icano catahuun. Ahuun furun futsa un catoan Israeli niaifo inon, —ishon Diosin yoini.

² —Ifon, uncai ari catiroma. Ua Saúl nicaquin ua rututiroran, —ishon yoini. —Moi facuoma iyotahuun. Nocoshon ato yoihuun min na ina ua rutushon nai cuscan uhuunoa yoisharafain ua cufinon, —ishon ato yoihuun.

³ Nantianri Isaí yoihuun min ua moi facuyamisima ua rutushonni oa atirifi funonfo. Ascan nantianri un mia tapimai rato Isaí ahuun furunmain un catoincain min caifoan aton niaifo inon. Nanton ahuun mapoqui shuni ocahuun naanfin niaifo iquiquin.

⁴ Ascan nocon Ifo Diosin yoia cuscacoin Samuel huani. Belén ano nocoaino niaifo patasharinoafo fasi ratucoincaquin Samuel yoiquin isca huanifo, —¿Ahuara chaca finoanshu min oamun? ¿Ascayamarai unimai min oamun? —ishon yocanifo.

⁵ Yocaifoan ato cumani, —Uncai ahuuscai oama. Un nocon Ifo Diosi moi facuoma rutushoni oa. Un moi facuoma rutuano marifi uqui fucahuun non Dioshuunoa yoisharafain non cufinon. Nanton noco amapaiyai cuscan fusti non atiroquin. Ascan Moisés yononi cusca acahuun. Ascaquifin man nocon Ifo Diosi ahuunacoinshon man ismatiroquin, —ishon Samuel yoini. Asca huatan Isaí furufo futan Moisés yononi cuscan Samuel ato ashoni. Nanton moi facuoma rutuano a fu nanno inonfo.

⁶ Ascan Isaí furufo fu aqui nococashon Samuel Isaí furu ahuun anu Eliab oinni nocofunu fasi cuyamasoa. Ascano Samuel ahuun nomuran shinanquin isca huani, —¡Aicho! Un shinanraca icon naafin nocon Ifo Diosin catoanquin. Ascacun un ahuun mapofuchi shuni ocai nocon niaifo inon, —ishon ahuun nomuran shinanni.

⁷ Ascan nocon Ifo Diosin yoini, —Min nocofunu cuyamasoa shara oian. Ascacun min shinan un nan nocofunu catoncun. Nan min shinain cuscari nannori yorafoan shinanmisi. Ascan uncai anori shinanmisima. Uncai Eliab catoanma. Uncai yora ahuun cuyamasoahuunshon un ato catoanma. Yorafoan aton no muran shinainfo cuscan un tapishocai un ato catontiro iyamarai un ato catoinmaran, —ishon nocon Ifo Diosin yoini.

⁸ Isaí furu futsa ahuun anu Abinadab cunashoni Samuel oinnon. Ascaiton Samuel yoini, —Nantocai nocon Ifo Diosin catoanmaran, —ishon yoini.

⁹ Ascan Isaí furu futsa Sama Samuelqui ocun oinon. Ascafia nanri Samuel yoini, —Natoricai nocon Ifo Diosin catoanma niaifo ipanan, —ishon Samuel yoini.

^10-11 Nanscarifi ai nan sieite Isaí furufo Samuel ointaifi fusti rasi furi furinifo. Ascafiainfoancai Samuel Isaí yoini, —Nafoancai nocon Ifo Diosin catoanma. ¿Min furu futsa yamaimun? —ishon Samuel yocaiton. —Uhuun facu chipocutonfin fasi funununshon chashoanfo cushuaquin, —ishon Isaí cumaiton. —Futsa yonohuu min facu chipocu ua ihuishotanon. Nan nocoataimacai non piyoimaran, —ishon Samuel yoini.

¹² Ascano Isaí futsa nichini furu chipocu futsa ihuitanon. Pushco isininmisima ointsa. Ahuun fuso sharacoin fupishtacoin. Samuel oinquin nocon Ifo Diosin yoini, —Naanfin un catoanquin Israelifoan aton niaifo inon. Ahuun mapofuchi shuni ocahuun un catoan cuscan ato ismanon, —ishon nocon Ifo Diosin yoini.

¹³ Nicatan Samuel moi masho murannoa shuni fitan ochifoan ointaifi chipocuton ahuun anu David ahuun mapofuchi shuni ocaino samamashta Diospan Yoshin Shara Davidqui nocoriscatan ahuun curush inanni. Shafatifi Diospan Yoshin Shara David fu rafuni ahuun curush shara inanni. Asca huatan Samuel afanan ahuun pushu Ramá ano nasoni.

Niaifoan Saúl yononi David ahuun oinmati inon

¹⁴ Nantiancai nocon Ifo Diosin ahuun Yoshin Shara afanan Saúl fu rafunima man potacoian ini. Ascan nocon Ifo Diosicai yoshin chaca nitu huanima Saulqui noconon ahuun nomuran fucash huashquin omitsiscanon.

¹⁵ Ascan Saúl ahuun oinmatifoan yoinifo isca huaquin, —Niaifon, nocon Ifo Diosin yoshin chaca miqui nichia mia omitsiscamanon.

¹⁶ Niaifon, noco nichihuun, nonfin mia nocofunu funashonicai ahuun manuti mia manushonon. Nocon Ifo Diosin yoshin chaca miqui nichiaitian nan nocofunun mia manushotiro nan yoshin chacanun afanan mia omitsiscamai cuscan muutamarocon min afanan isharairan, —ishon yoinifo.

¹⁷ Ascan huaifoan ato cumani, —Nan futsa manuqui tapi shara ua funashotacahuun. Fuchishon ua ihuushoriscacahuun, —ishon Saúl ato yoini.

¹⁸ Futsan nica cuscan yoini. —Niaifon, mun nican Isaí pushu rasi Belén ano ica ahuun facu futsan manuti fasi tapisharacoian tsain shara yoifafainni. Ascanori nan pushcohuai ahuaqui ratuyamacain mutsisipa shara ahuun fuso fupishtacoin. Nocon Ifo Diosi a fu icaran, —ishon yoini.

¹⁹ Nannori nicaquin Saúl ahuun oinmatifo nichini Isaí tapimashquin. Ato yoini isca huaquin, —Man Isaí pushu ano nocoshon yoihuu un tsain fomai isca huaquin, “Min facu David chashoan cushumisi ua nichishohuun,” ishon ua yoishotacahuun, —ishon Saúl ato yoini.

²⁰ Nannori nicatan Isaí David cunani yoiquin isca huashquin, —Niaifo Saúl mia cuna. Ascan burropan catu camaqui misi ichapa fofain fimi unu ahuun anu vino fichi tutso muran manushon fofain cabrari fotahuun Saúl inanshquin, —ishon Isaí David yoini.

²¹ Ascano David aqui nocoshon nan Saúl yononi cuscan David aani. Saúl Davidqui unimacain ahuun noicoinni. Ascan David ahuun oinmatiri a fu ica ini.

²² Saúl fasi Davidhuun noicoinquin apa Isaí tsain fomani isca huaquin, —Un Davidqui fasi unimai. Ascan ua David yoishopun u fu nitutiromainquin uhuun oinmati iishquin, —ishon Saúl Isaí yoini.

²³ Ascan nan yoshin chaca nocon Ifo Diosin nitu huayamaino Saulqui noconi David ahuun manuti manushonaino afanan Saúl ahuun ointi ihuu itamarocon afanan shinansharacoinni. Ascaino nan yoshin chaca amaquinoashu cayoni.