1 Samuel 15 - Sharanahua: Diospan Tsain

Nocon Ifo Diosin Saúl potani afanan Israelifoan ato niaifo inonma

¹ Asca huacatan shafa futsa Samuel Saúl yoini isca huaquin, —Nocon Ifo Diosin ua yonoa cuscan un nocon caifo Israelifo tapimani nocon Ifo Diosin mia catoan min nocon niaifo inon. Ascacun ua nicahuu, nocon Ifo Diosin mia yoiai cuscan natian un mia yoinon.

² Nocon Ifo Diosin ahuun curushhuunshon ahuamamishti huatiro cuscan nan mia yoiquin isca hua, “Maton shunifo Egipcio anoashu fuaifotian nan Amalecitafoan ato rutupai fuafo. Ascan natian un ato onaintimai.

³ Natian min ranushumuafoya ato ano fotacahuun ato nantifi rutuqui cuyononfo. Nantifi Amalecitafo cuyocahuun. Nocofunufo rutufain ainfofo rutufain facufo rutufain facumishtifo rutufain nantifi inafo moifo non chashoanfo non camellofo non burrofo non nantifi rutuqui futsashcaquin,” ishon nocon Ifo Diosin mia yonoaran, —ishon Samuel Saúl yoiaiton.

⁴ Nan nicatan Saúl nantifi Israeli ranushumuafo Telaim mai ano ato ichanan huashon ato tanan hua ahuutimainquin dos cientos mil yafi Judá anoashu diez mil funifo.

⁵ Asca huatan Saúl yafi Israeli ranushumuafo focani pushu rasi Amalec chaimashta machi rafu nushmancayan noconifo. Nannoshon ato manayonifo ato samamashta rutushcaquin.

⁶ Nannoshon manaino Saúl Ceneofo tsain fomani isca huaquin, —Amalecitafo icanoashu fotacahuun. Non ato rutuquin matori non rutupaimacai. Uhuun shunifo Egipcio anoashu nuri fuaifoan maton caifoan noco shunifo sharahuani. Ascan non matori sharahuapaifiai man Amalecitafomaquinoashu man pashcayamaino non ato rutuaino matori rutupaiyamafiaquin non mato rututiro man ato fu natiroran, —ishon Saúl ato yoiaiton nicacani Ceneofo Amalecitafomaquinoashu pashcanifo.

⁷ Ascano Saúl futan Israeli ranushumuafoan Havila mai aria yafi Shur mai aria nan Egipcio mai anoshon fari oaiquirishon Amalecitafo rutuqui futsanifo.

⁸ Amalecitafoan aton niaifo ahuun anu Agag fusticai Saúl rutumanima. Amalecita futsafo nantifi Saúl ato rutumaquin cuyonifo.

⁹ Ascan Saúl yafi ahuun ranushumuafo Agag niaifo rutuyamafain nan chashoan sharafosi rutuyamafain moi sharafo non moi cahua shoa sharafo non chashoan cahuashara nan ahuara fuchipaicoiainfo cuyopaitamarocon ato cushunifo. Ascan ahuara chacafo non ahuamafo cuyonifo.

¹⁰ Asca huashon nocon Ifo Diosin Samuel yoini isca huaquin,

¹¹ —Saúl ua tanasharayamafain un yonoa cuscan afanan ua nica sharaima. Ascan uhuun nomuran mun fasi shinain. Un Saúl catonyamani niaifo icama shara icuanaran, —ishon nocon Ifo Diosin Samuel yoiaiton nicaquin Samuel arifi fasi shinancoinni. Yamutishon nocon Ifo Diosi cufinshini.

¹² Ascano iyoconaino Samuel Saúl funaiton futsan yoini, —Saúl pushu rasi Carmel ano man caa. Nanno toquirifo putsamuinia yorafoan oinonfo Amalecitafo rutuafo cuscan ahuunoa shinansharanonfo. Nanscashu Gilgal ano caran, —ishon yoinifo.

¹³ Nannori nicatan Saúl icano Samuel cani. Aqui nocoaiton Saúl yoini isca huaquin, —Nocon Ifo Diosin mia shara huanon. Nocon Ifon ua yonoa cuscan mun huaaran, —ishon yoiaiton.

¹⁴ —¿Iconmainquin ahuuscai un chashoan aton oi un nicaimun? ¿Nocon Ifo Diosin mia yonoa cuscan min huaquin ahuuscai un moifo aton oi mun nica? —ishon yocaiton.

¹⁵ —Ranushumuafo Amalec anoashu fuafo. Nan chashoan sharafosi catonshon moi sharafori catonpacushon. Ascashon chipo man rutui min Ifo Diosi inain cafisca huashquin. Nansca huaquin ahuun yorafo oinmanon. Ascafia ahuara futsafo rutufain non mafo non pushufo yafi non coaquin cuyoaran, —ishon Saúl cumaiton.

¹⁶ —¡Afanan puusiamahuu! Nocon Ifo Diosin yamu ua yoia cuscan nicahuun, —huaiton. —Ua yoihuun, —ishon cumani.

¹⁷ Ascaiton Samuel yoini isca huaquin, —Un ahuamaran ishon min shinanpaoni. Ascafia min natian nocon caifo Israelifo manifoti min nocon niaifo. Nocon Ifo Diosin nocon caifo ismayamua mia catoan min nocon niaifo inon.

¹⁸ Ascan nocon Ifo Diosin mia yonoa isca huaquin, “Nan Amalecitafo fasi chacacoinfoquin. Ato rutuqui futsahuun. Min ranushumuafo yonohuun nantifi Amalecitafo rutucahuun. Ato nantifi rutuqui cuyocahuun,” ishon mia yonoa.

¹⁹ ¿Ascacun ahuuscai min nocon Ifo Diosi nicacasmamun? ¿Ahuuscai min samamashta ahuara sharafo non ina sharafori min fiamun? Nantifi coaquin cuyohuun nocon Ifo Diosin mia hua. ¿Ahuuscai nocon Ifoan ointaifin min chaca huamun? —ishon Samuel yoiaiton.

²⁰ Saúl cumani, —Ascan nocon Ifo Diosin ua yonoa cuscan mun huaa. Ua nichia cuscan mun caa. Un nantifi Amalecitafo rutuqui cuyoa. Aton niaifo Agag fusti un ihuua.

²¹ Ascan ranushumuafoan chashoan sharacoinfo non moi sharacoinfori fushoa nocon Ifo Diosina inon min Ifo Dioshuunshon toquiri putsamuinia Gilgal mai anoshon rutunonfo, —ishon Saúl cumani.

²² Asca huaiton nicaquin Samuel cumani, —¿Ratocaimun nocon Ifo Diosi fuchipaiquin? Min inafo ahuunshon rutushofain cooashoshquin iyamarai nocon Ifo Diosin mia yoia cuscan aiton min nicasharaino fasi shara finacaian. Nanscarafin nocon Ifo Diosi fuchipaicoinquin.

²³ Shointi yafi yoshin chaca fu tsainqui chacacoin. Nanscarifiai nocon Ifo Diosi mia yonoa cuscan min ayamai nanrifin chacacoinquin. Ahuara afi rami huacashon cufimisifo cuscan fasi chacacoin. Nanscarifiai nocon Ifo Diosin mia yonoa cuscan min nicacasmaifin chacacoinquin. Nocon Ifo Diosin mia yoia cuscan min acasmaiton natian nocon Ifo Diosin afanan mia niaifo imapaimaran, —ishon Samuel yoini.

²⁴ Nicaquin Saúl cumani, isca huaquin, —Icon, mun chaca hua. Nocon Ifo Diosin ua yonoa cuscan un huayamafain min ua tapima cuscan un aama. Uhuun caifofoan ua apaiyai cuscan un atoqui ratua. Ascacun ua yoiafo cuscan un hua.

²⁵ Ascafiacun un chaca hua cuscan ua rauhuahuun. Afanan afohuunoa shinantamarocon u fu capun nocon Ifo Diosi non cufinyonon, —ishon Saúl yoiaiton.

²⁶ Samuel cumani isca huaquin, —¡Ma! Uncai mi fu caima. Nocon Ifo Diosin mia yonoa cuscan min nicacasmaiton arifi mia pota min afanan nocon caifo Israelifoan niaifo inonma, —ishon Samuel yoini.

²⁷ Asca huatan Samuel ifiacucahuanaiton Saúl ahuun sahuuti cupanan achini nitu huashquin. Achiquin ahuun sahuuti fashnuni.

²⁸ Ascan Samuel yoini, —Min uhuun sahuuti fashnua cuscan nanscarifi huaquin Ifo Diosin mia shatumana min afanan niaifo inonma. Upa Diosin min caifo futsa niaifo imanon. Aafin nocofunu sharacai mia finoanquin.

²⁹ Nocon Ifo Diosin arus fusti sharacoin. Ahuunoashu fusti Israelifo isharatirofo. Nancai chanimisima. Nocofunun afanan shinan futsatiro cuscacai nocon Ifo Diosicai ascarama. Nancai shinan rafuyama. A shinain cuscaracai fianananpacunacama, —ishon Samuel Saúl yoini.

³⁰ Afanan Saúl yoini, —Mun tapia un chaca hua cuscan. Ascafiacun uhuun yorafoan aton niaifo patasharinoafo non nantifi nocon yorafoan ointaifin u fu capun min Ifo Diosi cufishquin uhuunoa shinansharanonfo, —ishon Saúl yoini.

³¹ Ascatan Samuel a fu cani. Saúl nocon Ifo Diosi cufini.

³² Chipo Samuel yononi, —Ua Amalecitafo aton niaifo Agag ua ihuushohuun, —huani. Agag ahuun nomuran shinanni isca huaquin, —Ua afanan rutupaiyamaino. Afanan uhuun nomuran un musuimaran, —ishon Agag ahuun nomuran shinain ratutama Samuelqui oni.

³³ Ascaiton Samuel yoini, —Min nopun facufo yafi ahuafo ichapacoin min rutumisi. Ascan natian min uhua facuoma iishquinran, —ishon Samuel yoini. Nannori huaiton Samuel Gilgal mai anoshon nocon Ifo Diosi ointaifin nopun Agag rutuquin shatu mishti huapani.

³⁴ Asca huatan Samuel ahuun pushu Ramá ano cani. Ascano Saúl ahuun pushu Gabaa ano nasoni.

³⁵ Ascan nan Samuel naitiancai afanan Saúl oinnacama. Afanan oinyamafiaquin fasi ahuunoa shinancoinpaoni. Nocon Ifo Diosinri ahuun nomuran fasi shinancoinni. —¡Ohuashta! Un Saúl Israelifoan aton niaifo imanima shara icuanaran, —ishon Diosin shinanni.