1 Samuel 14 - Sharanahua: Diospan Tsain

Jonatán Filisteofo rutui cani

¹ Nan shafa futsa Saúl ahuun furun Jonatán ahuun yonomati yoiquin isca huani, —Non Filisteofo rutui canon nopu yafi ashifo ua foshoi focahuun. Nan unu pocufaitan aton cushumisi ano non canon, —ishon Jonatán ahuun yonomati yoini. Nan acai cuscacai apa tapimanima. Jonatán apa yoitama ahuun oinmati fusti fu cani.

² Ascano nantian Saúl yafi ahuun ranushumuafo seis cientos Gabaa pasoaton icafo ini. Nanno machi yafi ihui ahuun anu granado.

³ Ascano Saúl fu Ahitob furun Ahías nan ahuun caifofohuunshon Diosi cufinshomisifo nanfoansi sahuuti futsa cuscaran sahuutirofo. Ahías nan sahuuafo cuscaran sahuua ini. Ahitob a fu nanua nocofunu ahuun anu Icabod. Ahitob apa Finees ahuun shota Elí ipaoni. Nan Elí pushu rasi Silo ano nocon Ifo Diosi fu tsainti pano pushu muranshon ahuun yorafohuunshon Diosi cufinshomisi ini. Israelifoancai tapinima nan Jonatáncai ato fu inima.

⁴ Nan Jonatán Filesteo ranushumuafoqui nocopai cai mahuanhuan rafu cuyacoin nushmancayan nocotan inapaini. Nan mahuanhuan rafu anuquin Boses yafi Seneran ishon anunifo.

⁵ Mahuanhuan futsan fari oai istafariri pushu rasi Micmas chaimashta ini. Futsan fari cai istafariri Gabaa chaimashta ini.

⁶ Ascashon Jonatán a fu yonomisi yoiquin isca huani, —Non unu pocufaini canon nan nocon Ifo Diosi nan Filisteofo icoinra huafoma ano non canon. Nanno non oincanon. Nocon Ifoan noco ashoaitoraca non ato rututiro. Ahuara futsacai nocon Ifo Diosi amatima huatiroma ahuun yorafo numanon. Nantofin yora fusti iyamarai yora ichapafohuunshon futsafo finoncointiroquin, —ishon yoiaiton.

⁷ —Nan min shinan cuscan shara. Non atiro. Un mi fu unimai cairan, —ishon ahuun yonomatinin cumani.

⁸ Ascano Jonatán yoini isca huaquin, —Non canon. Non unu pocufainaiton Filisteofoan noco oinonfo.

⁹ Ascashon nanfoan yoiquin isca huaifoan non nica, “Nuri fuyamacahuun. Nannoshon noco manayocahuun non mato ari caicain,” ishon noco yoiaifoanno non atoqui caima.

¹⁰ Ascan noco yoiquin isca huaifoanno, “Nuri mapui fucahuun,” ishon noco yoiaifoanno non atoqui catiro. Nannori noco huaifoanno nocon Ifo Diosin noco tapimai aafin no fu caino non ato rutuquin finontiroran, —ishon Jonatán yoini.

¹¹ Ascashu nan rafu Filisteoqui foaifoan ato oinnifo. Ascashon Filisteofoan yoiquin isca huanifo, —¡Oincapon! Nan Hebreofo aton quini murannoashu cain furacaniran, —ishon nannori ato cashu mutsama huanifo.

¹² Ascano Filisteofoan ato yoiquin isca huani, —Nuri nocoqui mapui fucahuun. Non mato ahuara tapimanon, —ishon Filisteofoan ato cunanifo. Nannori ato huaifoan nicaquin Jonatán a fu yonomisi yoini isca huaquin, —Nocon Ifo Diosin noco ashoin non ato rutunon. Ucachori mapuinihuun, —ishon Jonatán ahuun yonomati yoini.

¹³ Ascano nan rafu ahuun mucu futan ahuun tau yatashu manhuanhuan mapuininifo. Jonatán rucu caino ahuun yonomati acachori cani Filisteofo ano nococashon ato ichapacoin rutunifo.

¹⁴ Jonatán futan ahuun yonomatinin samamashta veinte Filisteofo ahuun ranushumua rutunifo. Dos cientos metros cuana aton caya nanno pacutan nai futsunifo.

¹⁵ Ascatan Filisteofo ratuaifoanno ahuun ranushumuafo nan cushumisifori nantifi ratucoinifo. Ascatapaiyaino nantian nocon Ifo Diosin yonoai cuscan fasi mai nayanaiyainacahuani. Ascaino fasi ratui finacoinnifo.

¹⁶ Nantianri Saúl ahuun ranushumua cushumisifoan Gabaa nan pushu rasi Benjamínfo mai anoshon oinnifo Filisteofo aton ranushumuafo ichofoanfafainnaiton Israelifoan oinnifo.

¹⁷ Ascaiton Saúl ahuun ranushumua ranan yoiquin isca huani, —Nantifi uhuun ranushumua ato cunahuu uqui funonfo. Ascashon oinsharacahuun rato ranushmuamain no fu ichanainmaquin, —ishon Saúl ato nannori yoini. Ascano nantifi ranushumuafo Saúl ichananhuashon oian Jonatán yafi ahuun yonomati yamai ini.

¹⁸ Nan nicatan Saúl Ahías yoini isca huaquin, —Nan Diosin ahuun cashon ua fishoriscatahuun, —ishon yoini. Nantian Israelifoan Diosin ahuun cashoya inifo.

¹⁹ Nantian Saúl Ahías yoiaiton nicai Filisteo ranushumuafo fasi mucainifoannaifoan nicaquin Saúl Ahías yoini, —Nanscanon. Ua afanan casho fushoyamahuun. Non Filisteofoqui canon, —ishon yoini.

²⁰ Nantian Saúl ahuun ranushumuafo seis cientos fu cani Filisteo ranushumuafoqui fonifo ato rutui focani. Atoqui nococashon oianfo Filisteofocai afanan afi ranan shinannonannima. Niso cuscarafoashu afiranan nopu rutunannifo.

²¹ Ascano nantian Hebreofo Filisteofo fu iyomisifo. Ascano atomaquinoashu Hebreofo focanashu Saúl yafi Jonatán non aton caifo Israeli futsafo ato fu rafunifo.

²² Nan Israeli futsafo Efraín mai nan machifo ano onuafoan nicanifo Filisteofo ichofoanfafainnaifoan nan Israeli onufiacashon cainnifoantan Filisteofo ato mufainifo ato rutui focaquin.

²³ Israelifoan Filisteofo ato ichoni Bet-avén ocuma futsa. Ascano nan shafata nocon Ifo Diosin Israelifo numani.