1 Samuel 13 - Sharanahua: Diospan Tsain

Israelifo fu Filisteofo rutunannifo cuscan

¹ Saúl ahuun fari treinta fariyatian Israelifoan aton niaifo tauni. Ascashu nan aton niaifocoin cuarenta y dos fari ahuun yorafo iquipaoni.

² Nan niaifoatian Saul, tres mil ahuun caifofo Israeli ahuun ranushumuafo catonni. Ascashon ranushumua futsafo aton pushu ano nichini. Nan tres mil a fu nituaino mil ahuun facu Jonatánya nichini Gabaa pushu rasi Benjamín mai ano fotanonfo. Nanno chaimashta mai machifo ahuun anu Betel. Nan dos mil ranushumuafo nituafo Saúl fu pushu rasi ahuun anu Micmas ano fonifo.

³ Ascano nantian Jonatán nan mil ranushumuafo futan Filisteofo Gabaa anoafo ato rutui fonifo. Ascano atirifi ato rutuaifoanno atirifi Filisteofo Gabaa mai anoashu ichonifo. Ascano samamashtacoin Filisteofoan nicanifo nan Israelifoan ato rutui foafo. Ascashon nantian Saúl manuti ahuun anu trompeta manumani nantifi ahuun caifofo nan Hebreofoan aton ranushumuafo yoimani Gilgal ano aqui funonfo.

⁴ Ascano Saúl nantifi ahuun caifofo Israelifo tapimaquin isca huani, —Filisteofoan Gabaa aton cushumisi uhuapa ano uhuun ranushumua non Filisteofo aton ranushumuafo rutufain atirifi ichofain ato cushumisi uhuapacoin non chaca huaquin futsanifo. Ascano Filisteofoan natian noco fasi noicasmacoinran, —ishon Saúl ato yoini. Ascashon nantifi Israelifo ranushumuafo Saúl Guigal anoafo ichanan huani.

⁵ Ascano nantiari Filisteofoan aton ranushumuafo ichanannifo. Tres mil taramutiya ichanan huafain seis mil caballoya ichanan huafain nan ranushumua atirifi tsoancai ato tanan huatiroma ato fu pushu rasi Micmas nan fari oaiquiri Bet-avén ano chaimashta ichanannifo.

⁶ Ascano nantian Israeli nocofunufoan oinnifo Filisteo ranushumuafo fasi ichapacoin ichanannifo ato rutui fuushcaquin. Nan ichanainfoan oincani fasi ratucoinifo. Ascashu mahua quini muran atirifi onupaifain chacafo muran onupaifain mai quini uhuapa muran onupaicain toquirininhuanfo cachori onupaicain pozo muranri onupainifo.

⁷ Ascano atirifoan unu Jordán pocufainifo nan mai Gad yafi Galaad ano ichonifo. Ascano Saúl Gilgal ano nituyoni. Atirifi ranushumuafo fu nituaino fasi ranushumuafo ratucoincani tari tarinifo.

⁸ Samuel tau huaquin Saúl yoiquin isca huani, —Niaifo, ua Micmas anoshon ua manayohuun, —ishon Samuel Saúl yoini. Manafiainocai Samuel nocoatai inima. Ascano atirifi ranushumuafo Saulmaquinoashu fonifo.

⁹ Ascano Saúl ahuun ranushumua futsa yononi isca huaquin, —Ua ina fishotahuun. Un nocon Ifo Diosi ismanon nan noco yonopaiyai cuscan non ashonon nocohuun ramapainon non a fu rafupaiyai cuscan noco yononon, —ishon Saúl ahuun ranushumua yononi. Ascano nan Saúl yonoa cuscan ahuun ranushumuaton ina fushoni Saúl nan toquirifo putsamuinia acamaquishon ina rutuni nocon Ifo Diosi ismashquin.

¹⁰ Ascano man ina coaquin cuyoano nantianri Samuel atoqui nocoshon Saúl yoiquin isca huani, —¡Aicho! Man min nocoiran, —ishon Saúl yoini.

^11-12 Asca huaiton Samuel cumaquin isca huani, —¿Ahuuscaimun un nocoataima min ina rutushon coarisca huaquin? —ishon yoiaiton. Saúl Samuel cumani isca huaquin, —Uhuun ranushumuafo man umaquinoashu foafo. Nan mian yoiatian min nocoyamaino nantianri Filisteofo Micmas ano ichananfo noco rutui fushcaquin. Nan Filisteofo ichanainfo cuscan mun oian. Ascaifoan oinquin un shinanquin isca hua, “Filisteofoan noco rutui fupaifiainfoancai un nocon Ifo Diosi cufiantaima noco cushusharanon.” Ascano un shinan nantian min nunomano unfin toquirifo putsamuinia camaquishon ina rutuaquin nocon Ifo Diosi ismafain non fasi nocon Ifo yopai cuscan noco cushunon, —ishon nannori shinain cuscan Saúl Samuel tapimani.

¹³ Nannori yoiaiton nicaquin Samuel Saúl cumani, —¡Ohuashta! Min fasi amaquiri chaca shinan. Mia nocon Ifo Diosi yonoa cuscacai min huama. Nan mia yonoa cuscan min huaino nocon Ifo Diosin mia non min facufo non min funafori Israelifoan aton niaifo imapacucuana.

¹⁴ Ascashucai min non min facufo Israelifo aton niaifo ipatiroma. Aafin shinain cuscan nocon Ifo Diosin nocofunu futsa nan shinain cuscaran catoinquin Israelifoan niaifo inon. Nocon Ifo Diosin mia yonoa cuscacai min aama. Ascan natiafin nocon Ifo Diosin nocofunu futsa catoinquin. Nan ahuun tsain tanapai nanfin Diosin catoin nocon caifoan niaifo inon, —ishon Samuel yoini.

¹⁵ Ascatan Samuel Gilgal anoashu Gabaa nan Benjamínfoan mai ari cani. Ascano Saúl fu ranushumua atirifi nitunifo. Nantian Saúl ato tanan huani seis cientos ranushumuafo fusti a fu nituanfo.

¹⁶ Ascano Saúl yafi ahuun facu Jonatán non aton ranushumuafo Gabaa Benjamínfoan mai ano inifo. Nantianri Filisteo ranushumuafo Micmas ano inifo.

^17-18 Ascashon Filisteo ahuun ranushumuafo ato nanti rasisi nan rafu non fusti pashcanan huapani. Atirifi nan icanoashu Ofra nan Saúl mai ano foaifoanno atirifi Bet-horón ano foaino atirifiri nan machihuan rafu nushmancayan ahuun anu Zeboim ano fonifo.

¹⁹ Nantian Filisteofoan yononi cuscan Hebreofoan afanan nopu oni huafain ashifo oni huanonfoma. Ascacun Filisteofoan shinannifo Hebreofoan nopu yafi piyafo oni huashon nanfoan noco rututiroforan ishon nannori Filisteofoan shinannifo. Ascanocai Israel mai ano afanan tsoan ahuara futsan nopu cuscarafo oni huanima. Nantian nantifi nopufo Israelifo icano yamaicoin ini.

²⁰ Ascano Israelifoan aton mai poquiti non ahuun ahuara nahuuti non rurati non fasi oroti nanscarafo Filisteofoan cuno yonomisifo ano fonifo ato ahuara cuno iishquishquin.

²¹ Nantian Filisteofoan Israelifo ato pui yocapaonifo. Ahuun mai poquiti non ahuara nahuuti non rurati non fasi oroti nan ahuara cunofohuunshon Filisteofoan Israelifo fasi pui ichapacoin ato yocapaonifo nan yopaifo cuscan ato inanon.

²² Ascano Israeli ahuun ranushumuafocai afanan tsoashta nopu yafi ashifo tsoa aya inima. Saúl yafi furun Jonatán nan rafusi nopu yafi ashiya inifo.

²³ Nantianri Filisteofoan ahuun ranushumuafo Micmas ano cushunifo nan Israelifoan finoainfoan ato ruturisca huashcaquin.