1 Samuel 12 - Sharanahua: Diospan Tsain

Samuel Israelifo yoini cuscan

¹ Ascashon Samuel nantifi Israelifo yoiquin isca huani, —Nan man ua yoia cuscan mun nantifi nica. Ascano natian un Diosinhuunshon nocon niaifo un catoan nanton noco iquinon.

² Natianfin man niaifoyaquin nantofin mato yonoiquin. Unfin mun anifoan. Nan un anifoataima non natianrifi un mato sharahuamisi. Nan un pushcoaitian un maton niaifo imisi. Uhuun facufori mato fu iquin.

³ Unfin natian nuno noco Ifoan Diosi ointaifi non nocon niaifoan nan nocon Ifo Diosin catoan ahuun ointaifin un nia. Ua yoicahuun. ¿Unmain tsoan moi onunfain tsoan burro onunfain un tsoan paramisiquin? ¿Ascashomain un yorafo omitsiscamamisiquin? ¿Ascatari tsoan ua pui inanmun un mato fomanmisiquin ratoran futsa chaca huashquin? Un ratoran futsa chaca huamainquin ua yoicahuun un nanfo shara huanon, —ishon Samuel nannori ahuun caifo Israelifo yocani.

⁴ Nannori ato yocaiton cumaquin isca huanifo, —Ma. Mincai noco paranyamafain min noco omitsisca huamisima. Futsancai mia ahuara inanmisima min noco fomafain nan futsa fusti min shara huanon. Mincai ascara chacafo huamisimaran, —ishon yoinifo.

⁵ Afanan Samuel ahuun caifofo yoiquin isca huani, —Nocon Ifo Dios ua oinfain nan catoanton maton niaifo funa Saúl ua oiainno tsoancai uhuunoa yoitiroma un maton chaca huamisiran, —ato huaiton. —Icon. Mincai noco chaca huamisimaran, —ishon Israelifoan cumanifo.

⁶ Ascano Samuel afanan ahuun caifo Israelifo yoini isca huaquin, —Nocon Ifo Diosin Moisés yafi Aarón catonni. Atohuunshon nocon shunifo Egipcio mai anoshon ato ihuuni.

⁷ Nan nocon Ifo Diosin nocon shunifo shara huashofain nocorifi shara huashomisi cuscan un natian mato shinanmani.

⁸ Nocon shuni Jacob Egipcio mai ano iyopaoni. Ascashu chipo nocon shuni Israelifoan nocon Ifo Diosi cufinifo ato numanon. Ascano Moisés yafi Aarón nichini Egipcio mai anoashu na mai shara anoa ato ihuunon.

⁹ Ascafia nantiacai nocon Ifo Diosihuunoa afanan shinannifoma. Ascano aton Ifo Diosin yononi cuscan Hazor icanoafo aton ranushumuafo niaifo Sísara non Filisteofo non Moabfo aton niaifoan Israelifo achinifo aton oinmatifo imashquin.

¹⁰ Ascano nantian nocon shunifo fasi uaiyanan nocon Ifo Diosi cufinnifo isca huaquin, “Ifon, non mia chaca huafain non mia cachiquiri huashon nan caifo futsafoan aton diosfo rami huashon anunifo nan Baal yafi futsari rami huashon anunifo Astartéran huanifo non ato cufinmisi. Ascafia min natian nan noco noicasmafoqui min noco numaiton non mia fusti cufinfain nan min noco yonoai cuscan non mia ashoiran,” ishon nocon shuni Israelifoan cufinnifo.

¹¹ Ascano nocon Ifo Diosin noco Jerobaal non Barac non Jefté non ua non afo matoqui nichini mato numafain. Nantifi noco noicasmafotiqui noco numani non atoqui ratutama non isharanon.

¹² Ascafia man man oian Amonitafoan aton niaifo Nahas ahuun ranushumuafoya nocoqui fuafo noco rutushcaquin. Nanscaino man fasi ratucoian. Ascano uqui man fua. Nocon Ifo Diosin maton niaifofian ua man yoia isca huaquin, “Non niaifo futsan yopai. Nanton noco yonotiroran,” ishon man yoia.

¹³ Ascafia oincapon. Natian nuno maton niaifo. Manfin Saúl catoanquin mato niaifo inon. Man yoca cuscan nocon Ifo Diosin mato niaifo inan.

¹⁴ Man noco Ifo Diosqui ratucain nan mato yoia cuscan huashofain mato yonomapaiyai cuscan nicasharafain ahuun tsainri nicafain man cachiquiri huayamaino mato niaifofoanri nocon Ifo Diosi tanasharafo shara itiro.

¹⁵ Man nocon Ifo Diosin tanasharatamarocon nocon Ifoan noco yonopaiyai cuscan nicacasmafain ahuun tsainri man nicayamaiton nan maton shunifo onaintimani cuscan matorifi onaintimacoinshquin.

¹⁶ Natian nunoshon manayocahuun nocon Ifo Diosin ahuamamishti huatiro cuscan mato ismanon.

¹⁷ Man man tapia nan non nocon fanafo non chituaitiancai oi fuama. Ascafia un nocon Ifo Diosi na shafata cufin turuimafain oi fumanon. Nocon Ifo Diosin nan acai cuscahuunshon man tapitiro man fasi Diosqui chaca hua niaifo futsa noiquin. Nan niaifo futsacai Dioscoinmaran, —ishon Samuel ato yoini.

¹⁸ Ascashon nan Samuel cufian cuscan nan shafata nocon Ifo Diosin cana pishimafain oinhuanrasi fumariscatani. Ascaino nantifi Israelifoan shinanni isca huaquin, —Tsoa futsacai nocon Ifo Diosi cuscarama. Atofin ahuamamishti huatiroquin. Nocon caifo murancai tsoa futsa Samuel cuscarama. Nocon Ifo Diosi cufian cuscan nicacointiroran, —ishon yoinifo.

¹⁹ Ascashon Samuel yoiqui isca huanifo, —Nonfin nocon Ifo Diosi chaca huamisiquin. Nonfin chaca huaquin finacoinmisiquin. “Noco niaifo futsa catonshonhuun,” ishon non yoia. Natian nocon Ifo Diosi noco cufinshohuun. Min noco cufinshoyamaino non nai futsutiroquin, —ishon Israelifoan ratucoincaquin nannori Samuel yoinifo.

²⁰ Nannori yoiaifoan Samuel ato cumaquin isca huani, —Ratuyamacahuun. Man chaca huafiashon nocon Ifo Diosi cachiquiri huatamarocon nan mato yonoai cuscan huashocahuun. Ahuara futsa shinanyamacahuun. Unimayanan nan mato amapaiyai cuscan huashocoincahuun.

²¹ Nan nocon Ifo Dioscoin potayamacahuun. Dioscoinfoma tanayamacahuun. Nanfoancai mato numatiroma. Nanfocai ahuama. Nanfoanricai mato ahuara shara huamatiroma. Nanscarafofin ipaitsi rami huacashon nocon diosiran huamisifoquin.

²² Nocon Ifo Diosin mato catonni ahuun yorafo man inon. Nan mato potainocai ahuunoa futsafoan shinansharashquima shinanquin isca huashquicani, “Diosicai mato numatiromaran,” ishon ahuunoa nannori yoishquicani. Nanscacucai mato potapacunacama ahuunoa shinanchacanonfoma.

²³ Un mato nocon Ifo Diosi cufinshoyamaquin un aqui chaca huatiro. Ascan unfin mato Upa Diosi cufinshofafainniquin. Nan un mato tapimanai cuscan man isharafain man cayacafi shara nocon Ifo tanasharanon.

²⁴ Ascatari ointiaquimayamacahuun nocon Ifo Diosin ahuara shara mato ashoa cuscan. Nan nocon Ifo Diosi fusti nicasharacoincahuun nan mato yoia cuscan ahuun curushhuunshon ashofafaincahuun. Nan mato shara huamisi cuscan nanfohuunoa shinanfafaincahuun.

²⁵ A mato amapaiyai cuscan huatamarocon man chaca huaiton nan mato niaifo yafi matorifin nocon Ifo Diosin namaquin futsashquinran, —ishon Samuel Israelifo yoini.