1 Samuel 10 - Sharanahua: Diospan Tsain

Samuel Saúl ahuun mapoqui shuni ocani Israelifo aton niaifo inon

¹ Ascano Samuel shuni motica fiitan Saúl ahuun mapoqui ocafain tamo tsoani. Ascashon Samuel Saúl yoini isca huaquin, —Natian nocon Ifo Diosin mia catoan min yora Israelifoan noco niaifo min inon.

² Nan min nunoashu umaqui caitian min nocofunu rafuquin nan Raquel mai huanifoanno min atoqui nocoicai. Nan pushu rasi ahuun anu Selsa Benjamín ahuun funafoan mai ano min atoqui nocoaiton nan rafutan mia yoicani isca huaquin, “Nan min burrofo funaifin man fuchiafoquin. Natiacai min upan afanan burrofohuunoa shinantamarocon mia fasi shinain min ahuara chaca finoanran,” ishon nannori shinanquin. Nan rafutan mia yoishquicani.

³ Nan min ato anoashu cai min ihui uhuapa Tabor ano nocoshquin. Nanno nocofunu rafu non fusti miqui nocoi. Nan rafu non fustifin Betel ano focaniquin nannoshon nocon Ifo Diosi cufin focani. Futsan cabra facu rafu non fusti foaino futsan misi rafu non fusti foaino futsan fichi tutso muran uva unu foicai.

⁴ Nan rafu non fustifain mia yoisharafain mia misi rafu inainton nan misi fihuun.

⁵ Nan min ato anoashu cai min nan Diosi ahuun mai Gabaa ano min nocoshquin. Nanno Filisteofoan aton ranushumuafoan cushumisi ano. Min nocoaiton Diosin tsain yoimisifo nantian miqui nocoshcaniquin. Machi mamaquinoashu aton manutifo manuyanan fotoshcani. Nan manutifo ahuu anufo futsan salterio manufain panderofo manufain shaintifo manufain arpafo nan guitarra cuscaran manucani. Diospan tsain yoifocani.

⁶ Nantian nocon Ifo Diosin ahuun Yoshin Shara mia inanfain nantian ahuun curushhuunshon mia iquini. Ascano min futsafo futan minrifi min Diospan tsain yoishquin. Nocon Ifo Diosin Yoshin Shara mia fiananan huai minrifi nan futsafo cuscaran min inon.

⁷ Nan un mia yoia cuscan min aino nocon Ifo Diosi mi fu ishquin. Nan min ahuara shara huapaiyai cuscan nocon Ifo Diosin mi fu rafuiquin.

⁸ Natian Gilgal ano catahuun. Nannoshon siete dia oshatan ua manayohuun. Un miqui caicain nan un nocoaitian nocon Ifo Diosi ina rutushofain non coashonon. Non asca huaquifin nocon Ifo Diosi non ismaicai naan fustimain nocon Ifocoincun. Nan noco amapaiyai cuscan fusti non huashonon. Nonfin ahuunacoinquin. Nanscashon non ismasharanon. Ascashon ina futsari non rutunon nocon Ifo Diosin nocohuun ramapaiyaino non a fu rafushon ismashquin. Ascano nocon nomuran noco unimamanon. Non nansca huaquifin nocon Ifo Diosi non ismasharaicain. Nannoshon ua manahuun un miqui caicain. Un mia ahuara futsa non acai cuscan mia yoinon, —ishon Samuel Saúl yoini.

⁹ Nannori yoiaiton nicain Saúl cani Diosin ahuun nomuran natian fianananrisca huani ahuara shara fusti huanon. Ascano nan Samuel yoia cuscan nanscaracoin nan shafata finonni.

¹⁰ Ascano Saúl yafi ahuun oinmati Gabaa mai ano nocoquin oianfo Diospan tsain yoimisifo atoqui funifo. Nantian Diospan Yoshin Sharapan Saúl iquinain cuscan nantian arifi Diosin tsain yoini.

¹¹ Ascan Saúl fu rafumisifoan nicaquin yoinifo isca huaquin, —¡Aira! ¿Saúl arifi Diospan tsain yoimisimun? ¿Ahuuscashuco Cispan facu arifi Diospan tsain yoimisi iquimun? —ishon nannori yoinannifo.

¹² Ascano nan chaima ica futsan yoini isca huaquin, —Nan ratoran futsafin nocon Ifo Diosi catoinquin ahuun tsain yoimisi iishquin. Nan apa ahuamafiano ahuun facun Diospan tsain yoimisi itiroran, —ishon ato yoinifo. Ascano tau huaquin yoinifo isca huaquin, —¿Iconmun Saulmun arifi Diospan tsain yoimisi? —ishon yocanifo. Ascan futsafoanri nannori yoimisifo.

¹³ Nan Diosin tsain yoiquin anaititan Saúl machi mamaqui mapuni nan toquiri putsamuiniano noconi.

¹⁴ Nanno nocoaiton apa futsan ahuun oinmati yafi yocani, —¿Ahuuscai man sama racamun? ¿Min rani nituyoamun? —ishon yocani. —Non burrofo funaquin. Fuchiyamacaifin non Diospan tsain yoimisi Samuel ano caaquin burrofohuunoa noco tapimanon, —ishon nannori apa futsa cumani.

¹⁵ —¿Samuel mia raquiri yoiamun? —ishon apa futsan yocani.

¹⁶ —“Min burrofo man fuchiaforan,” ishon noco yoiaran, —ishon Saúl apa futsa cumani. Ascafia Saulcai Samuel ahuun mapoqui shuni ocamana Israelifo niaifo inon ishoncai apa futsa tapimanima.

¹⁷ Nantian Samuel atoqui nocoshon ahuun caifo Israelifo cunani nocon Ifo Diosi ahuun ointaifi mai Mizpa ano aqui funonfo.

¹⁸ Nococashon Samuel ato yoini isca huaquin, —Uhuun yora Israelifoan, nocon Ifo Diosin natian noco tapimai isca huaquin, “Un mato Egipcio mai anoshon ihuua. Nan Egipciofoan ato curushhuunshon mato omitsiscamani aton yonomati man inon. Ascano un mato numani nanfo futan futsafoan mato omitsiscamanifo cuscan afanancai man aton yonomatifo inonma,” ishon nocon Ifo Diosin yoini.

¹⁹ Diosin fasi mato shara huamisi man omitsiscaino nan man ahuara chaca futsa finoainton nanscarafohuunoa Diosin mato numani. Diosin mato sharahuapaifiaiton man potapaifain niaifo futsa man catonpai. Ascashon man yoiquin isca huai, “Natian non niaifo futsa funanon noco nanton yononon,” ishon man yoia. Natian nocon Ifo Diosi ahuun ointaifi ichanancahuun. Nan manifoti uqui fucahuun, —ishon Samuel ato yoini.

²⁰ Ascano Samuel Israelifo nan manifoti cunani aqui funonfo. Nocoaifoan Upa Diosin Benjamín ahuun caifofo catonni.

²¹ Ascashon Benjamín ahuun yorafoti cunaino Matri ahuun yorafori catonni. Ahuun unutaqui Cispan facu Saúl catonni Israelifo aton niaifo inon. Ascafia Saúl funafiacaquicai tsoan fuchinima.

²² Ascashon nantian afanan nocon Ifo Diosi cufinifo isca huaquin, —¿Ranimun Saulquin? —ishon nocon Ifo Diosi cufinifo. —Nan maton forusafo maniafo muran onuaran, —ishon nocon Ifo Diosin ato cumani.

²³ Nannori nocon Ifo Diosin ato yoiaiton nicacaquin forusafo mani ano funacaquin fuchinifo. Ascashon nan ichananfo ano atoqui ihuunifo. Saúl fasi cuyacoin masoa nantifi yorafo finoncoian. Tsoa futsacai ahuun Saultian masoa inima. Ahuun potin ano fusti masoafo.

²⁴ Ascano Saúl atoqui oaiton Samuel nantifi Israelifo yoini isca huaquin, —Na nocofununfin nocon Ifo Diosin catoanquin nocon niaifo inon. Rato Israeli futsacai Saúl cuscarama. Noco nantifi finoncoianran, —ishon Samuel ato yoini. Nannori ato yoiaiton nicacaquin nantififain oi ashcafinin yoinifo, —¡Aicho! ¡Nafin nantishotapiquin nocon niaifo ipanacaquin! —ishon yoinifo.

²⁵ Ascashon nan niaifoan atiro cuscan Samuel Israelifo tapimani. Niaifoan atiro cuscan Samuel nocon Ifo Diosi ointaifi libro muran cununi. Asca huatan Samuel nantifi Israelifo aton pushu ano nichini.

²⁶ Ascashu Saúl ahuun pushu Gabaa ano nasoni. Nocoano nocofunu mutsisipafo nocon Ifo Diosin aton nomuran shinanmasharaino Saulqui funifo a fu rafupacushcaquin.

²⁷ Ascano nannoa nocofunu chacafoan fasi tsain chipunifo. Yoiquin isca huanifo, —Na nocofunucai ahuama. Aacai noco numatiroma, —icashu yoinannifo. Nantian Saulhuunoa shinanchacanifo. Nanfoancai ahuara futsan inanpaicoinnifoma. Aqui tsain chaca huafiaifoannocai Saúl puusinima.