Yohana 15 - Maləmce Məfele mala Ɓakuli: Kurcau Məbəshe

Yesu nda nggun anap mǝ mǝsǝcau nì

¹ Mǝ nda nggun anap mǝ'mǝsǝcau nì, sǝ Tárram nda mǝtsǝkkir ɓaban.

² Ko ya bu-nggun a ɓalǝam mǝnana kǝ pa ɓǝle raka, kǝ kasǝi kǝ turi a nzali, sǝ abu-nggun mǝnana à kǝ pa ɓǝlea ka, kǝ gilǝkicea ace mǝnana ɓǝa ɓoaro ɓǝa pa ɓǝlea kpǝm ngga.

³ Cau mǝnana ǝn kania wun ngga gilǝkina wun, wu fànà.

⁴ Wu do a ɓalǝam sǝ mim ngga mǝ nǝ do aɓalǝ wun. Kǝla mǝnana bu-nggun anap pà nǝ̀ gandǝ pa ɓǝle nǝmurǝì raka, she ɓǝ̀ dumǝna aɓa nggea ngguni ka, anggo gbal sǝ wun ngga pà wù nǝ̀ gandǝ pa ɓǝla wun ɗang, she ɓǝ̀ wu dumǝna a ɓalǝam ngga.

⁵ Mǝ nda nggun-anap, sǝ wu nda ka bu-nggun. Ɓǝ̀ ɓwa do a ɓalǝam, sǝ ǝn do a ɓālǝi ka, nǝ̀ pusǝ ɓǝle kpǝm. Ɓǝ̀ nǝ́ mim raka pà wù nǝ̀ gandǝ pak ɓe kǝgir ɗang.

⁶ Ɓǝ̀ ko ya ɓwa na sǝ do a ɓalǝam raka, nda kǝla bu-nggun mǝnana à turi sǝ im ngga; a'ulang abu-nggun mǝno ka aɓwana kǝ ramnggia, à nǝ̀ soea aɓa bǝsa à nǝ̀ pisǝia.

⁷ Sǝ ɓǝ̀ wu do a ɓalǝam, sǝ cau mem do aɓalǝ wun ngga, wu zǝmbǝi Ɓakuli gir mǝnana kat wu earkiyice ka, sǝ nǝ̀ pa wun gir nî.

⁸ Ɓǝ̀ wu pusǝ aɓǝla wun kpǝm ngga, nda lǝmndǝ ama wu ndaka laggana mem ngga. Sǝ mǝno gbal ka nda nǝ̀ yinì Tárram nǝ́ gulo ka.

⁹ Kǝla mǝnana Tárram kǝ earcem ngga, anggo sǝ ǝn nggǝ earce wun. Wu do aɓa earcearǝu mem.

¹⁰ Ɓǝ̀ wu kpata anzongcau mem ngga, wu nǝ̀ do aɓa earcearǝu mem, kǝla mǝnana ǝn kpata anzongcau mala Tárram sǝ ǝn do aɓa earcearǝu male ka.

¹¹ Ən bangga wun agir mǝnia ka, ace mǝnana ɓǝ̀ bumpwasǝa mem do aɓalǝ wun, sǝ ɗǝm ngga, ɓǝ̀ bumpwasǝa ma'wun ɓǝ̀ lumsǝo.

¹² Mǝnia ka nda nzongcau mem: Wu earce rǝarǝ wun kǝla mǝnana ǝn earce wun ngga.

¹³ Earcearǝu mǝgule kat mǝnana ɓwa nǝ̀ lǝmndǝì agyajam male ka, nda mǝnana ɓǝ̀ pà yilǝmi acea ka.

¹⁴ Ɓǝ̀ wu kǝ pak gir mǝnana ǝn bangga wun nǝma wu pak ka, wu ndaka gyajam mem.

¹⁵ Pa mǝ nǝ tunǝ wun ɗǝm ama aguro ɗang, acemǝnana guro ka surǝ gir mǝnana mǝtala-ɓala male kǝ pak ka ɗang. Ado ka, wu ndaka gyajam mem, acemǝnana ǝn nanà wun gir mana kat ǝn ok a kun Tárram ka.

¹⁶ Wun nǝ̀ taram ɗang, mǝ nǝ̀ tár wun, sǝ ǝn pa wun turo nǝma wu kya pâ ɓǝla wun, ulang ɓǝle mǝnana pà nǝ̀ kiɗiki raka. Anggo ka sǝ Tárram nǝ̀ pa wun gir mǝnana kat wu zǝmbǝi wi aɓa lullǝam ngga.

¹⁷ Mǝnia ka nda nzongcau mǝnana ǝn pa wun ngga: Wu earce rǝarǝ wun.

Ɓinǝmǝsǝu mala ɓanza arǝ amǝkpata Yesu

¹⁸ Ɓǝ̀ ɓanza ɓinǝmǝsǝ wun ngga, wu sǝlǝ ama, ɓinǝna mǝsǝam gbal a dǝmbǝa.

¹⁹ Ɓǝ̀ wu ndaka mala ɓanza ka, ɓanza nǝ̀ earce wun kǝla amale. Sǝ ado ka wu ndaka mala ɓanza ɗang. Acemǝnana ǝn tarki wun ɓǝ̀ wu puri ɓa ɓanza ka, nda tsǝa sǝ ɓanza kǝ ɓinǝmǝsǝ wun ngga.

²⁰ Wu ɗenyi nǝ cau mǝnana ǝn bangga wun nǝma, “Kǝ guro pà kàm gulo kuti mǝtala-ɓala male ɗang.” Ɓǝa pam tanni ka, à nǝ̀ pa wun tanni gbal. Sǝ ɓǝ̀ pǝlǝa ama à kpanata kanigir mem ngga, à nǝ̀ kpata kanigir ma'wun gbal.

²¹ À nǝ̀ pakka wun amǝnia yì agir kat ka ata cau mem, acemǝnana à surǝ Tárram mǝnana tasǝam ngga ɗang.

²² Ɓǝ̀ ǝn yiu ma ǝn yi namia cau raka, ɓǝ́ cauɓikea pa a ɓamuria ɗang. Sǝ ado ka à pànǝ kun na cau ace acauɓikea malea ɗang.

²³ Ɓwa mǝnana kat ɓinǝ mǝsǝam ngga, ɓinǝna mǝsǝ Tárram gbal.

²⁴ Ɓǝ̀ ǝn pakki ma agir mǝnana kǝɓwa malaká pea aɓalǝia raka, ɓǝ a pà nǝ̀ kumia nǝ cauɓikea ɗang. Sǝ ado ka à sǝnǝna amǝnia yì agir-ndali ǝn pea ka, sǝ kat andǝ mǝno ka, à ɓinǝ mǝsǝam sǝnǝ Tárram.

²⁵ Mǝnia ka nda yi lumsǝ gir mǝnana à gilǝì aɓa Malǝmce mala Ɓakuli ama: “À ɓinǝ mǝsǝam ɓà, tǝri pà kàm ɗang.”

²⁶ Nǝ nzǝmo ka mǝ nǝ tasǝa wun Mǝbwali aɓwana, yì Bangŋo mala mǝsǝcau mǝnana nǝ̀ pur nǝban Tar sǝm aban yiu aban wun ngga, nǝ̀ yia bang kuni kat a muram.

²⁷ Sǝ wun gbal ka dumǝna ama wu nǝ̀ nakunam aban aɓwana, acemǝnana tita turo mem ngga sǝm nda a tarǝ sǝm sǝnǝa wun.