Sǝna 20 - Maləmce Məfele mala Ɓakuli: Kurcau Məbəshe

À bwal shetan à kùrrì ba apǝlǝa á-mwashat

¹ Ən sǝn ɓe mǝturonjar mala Ɓakuli puro a kuli aban yiu a nzali. Bwal gir mǝn kun tuli-tàtǝkǝtè andǝ nsolo mǝgule a bui.

² Yiu yi gbami dǝragon, mǝno yì share n'yau mǝnana à tunǝki ama Mǝɓealɓikea ko Shetan ngga, sǝ kùrrì nǝ nsolo ɓǝ̀ pak apǝlǝa á-mwashat aɓa kùrban.

³ Mǝturonjar pǝlǝa ramte aɓa tuli-tàtǝkǝtè, gir kuni sǝ kumlǝi, ace mǝnana ɓǝ̀ kǝa swarki aɓwana arǝ anzali ɗǝm ɗang, she ɓǝ̀ amǝno yì apǝlǝa á-mwashat malǝna ka. Anzǝm mǝno ka, dumǝna pup à nǝ̀ yia panzǝi arǝ apwari bǝti.

⁴ Pǝlǝa ǝn sǝn abuno-murǝm sǝ aɓwana mǝnana à do amuria ka, à pania rǝcandǝa mala pak ɓashi. Sǝ ǝn sǝn ayilǝmi aɓwana mǝnana à kasǝ ɓamuria ace nakun malea amur Yesu andǝ bang cau mala Ɓakuli ka. Yia ka, à peri aban nyamɓikea ko ɓǝ̀nzál male ɗang, sǝ à ak nyoulǝa male a kundǝmbǝia ko arǝ abuia ɗang. Yia kat, à lo nǝ yilǝmu ɗǝm, sǝ à duk amurǝma ata Kǝrǝsti arǝ apǝlǝa á-mwashat.

⁵ Mǝnia ka, nda lo nǝ yilǝmu mǝdǝmbe. (Acili aɓwana mǝnana à wuna ka, à lo nǝ yilǝmu ɗang she anzǝm mǝnana mǝno yì apǝlǝa á-mwashat malǝna ka.)

⁶ Amǝnia yia aɓwana à kum kāmbe aɓa lo a ɓembe nǝ yilǝmu a dǝmbe ka, à ndanǝ tsǝkbu mala Ɓakuli, sǝ yia ka amǝfele na. Ɓaria lú pà nǝ rǝcandǝa amuria ɗang. A kúnì ka, à nǝ̀ duk apǝris mala Ɓakuli andǝ mala Kǝrǝsti, sǝ à nǝ̀ duk amurǝma ata Kǝrǝsti arǝ apǝlǝa á-mwashat.

Kpa mala Shetan andǝ masǝlǝata kìɗìkì male

⁷ Ɓǝ̀ apǝlǝa á-mwashat malǝna ka, à nǝ̀ panzǝ Shetan, nǝ̀ puri ɓa ndàkurban male.

⁸ Nǝ̀ o nǝ̀ ngga swarki aɓwana mala anzali, à nǝ̀ purkio arǝ abuban aɓa ɓanza kat, mǝnana à dapi kat ka, à tunǝia ama Gog andǝ Magog. Shetan nǝ̀ ngga rambǝia abanɓwáná ace ká lwa; lakki malea ka ɓallè pà kàm ɗang, kǝla lakki mala amǝsǝsala a kun nggeamur.

⁹ Sǝ ǝn sǝnia à puro aban ká amur banfana mǝtangŋe mala ɓa ɓanza, à kya karǝì aɓwana mana à nda bui mala Ɓakuli ka andǝ nggeala mǝnana Ɓakuli earkiyi ace raka, a ɓalǝu. Sǝa ma bǝsa puro a kuli yi sulǝo amuria, pisǝia pupup.

¹⁰ Sǝ yì Shetan, mǝnana swarkia ka, à ramte aɓa garang mala bǝsa mǝnana kǝ li nǝ atali ear-bǝsa ka, à kǝ̀ ban mǝnana à ramta nyamɓikea andǝ mǝɓangna mǝ'nyir nì kàm ngga. À nǝ̀ ueo kano aɓa kum kwanban mǝkǝrkǝr nì du andǝ pwari, mǝnana málá male pà kàm raka.

Masǝlǝata Ɓashi

¹¹ Sǝ ǝn sǝn nggea bunomurǝm mǝpwasǝe andǝ ɓwa mǝnana do amuri ka. Nzali andǝ kuli ɓanggi ɓadǝmbǝi, à o à kya ndǝrmikea, ko à nyare à sǝnia ɗǝm ɗang.

¹² Sǝ Ən sǝn aɓwana mǝnana à wuna ka, ɓwa mǝgule andǝ ɓwa mǝkyauwe, aban came a ɓadǝm bunomurǝm nì. Pǝlǝa à mǝnggi amalǝmce, sǝ à yì mǝn ɓe malǝmce, mǝnia ka nda Malǝmce Yilǝmu. Sǝ aɓwana mǝnana à wuna ka, à pakkia wia ɓashi arǝ agir mǝnana à pak ka, kǝla mǝnana ndakam à gilǝia aɓalǝ amalǝmce mǝno ka.

¹³ Nggeamur ndǝli alú mǝnana a ɓalǝi ka. Lú andǝ Domurǝm mala lú ka, à pusǝ alú-aɓwana mǝnana aɓalǝia ka. Sǝ ko ya ɓwa ka, à pakki wi ɓashi arǝ aturo male mǝnana pak ka.

¹⁴ Pǝlǝa à ramta Lú andǝ Domurǝm mala lú aɓa garang mǝnana kǝ li nǝ bǝsa ka. Mǝnia yì garang mala bǝsa ka, nda ɓaria lú.

¹⁵ Sǝ ɓwa mǝnana kat lullǝi pà kàm à gilǝì aɓa Malǝmce Yilǝmu raka, à turi aɓa garang mǝnana kǝ li nǝ bǝsa ka.