Sǝna 12 - Maləmce Məfele mala Ɓakuli: Kurcau Məbəshe

Mɓwama ɓǝl muna sǝ Dǝragon ama nǝ̀ wal-luí

¹ Pǝlǝa ɓe nggea gir'lǝmndǝa mǝ'pa ndali pusǝrǝi a kuli. Ɓe mɓwama na oasǝ pwari a rǝì nda agir-nggurǝu male, sǝ tamsǝ akusǝi amur zongŋo. À oasǝi wi jeko a ɓamuri mǝnana nǝ anlero lum-nong-ɓari a rǝì ka.

² Mɓwame gongŋǝna, malanǝ gbashi, sǝ kwanban andǝ tanni mala gbashi ka, ci kǝ ɓua.

³ Nyare ɓe gir'pandali mǝgule pusǝrǝi a kuli. Kaɓa ɓe nggea Dǝragon mǝbangŋe na, ndanǝ aɓamuri tongno-nong-ɓari andǝ anjawe lum, sǝ amur koya ɓamuri ka ndanǝ sukuru-murǝm kam.

⁴ Yì Dǝragon ngga, wuli nggilate pwan banì mwashat aɓalǝ agauwe tārú mala anlero mǝnana a kuli ka, rangsǝia a ɓanza. Sǝ yi came a ɓadǝm mɓwama mǝnana kǝ gbashí ka, ace mǝnana ɓǝ̀ gbashína ani ka nǝ̀ shak muni.

⁵ Mɓwame gbashi muna ɓwabura mǝnana nǝ̀ yal aɓwana kat a ɓanza nǝ gara bolo ka. Sǝ muna ka, Ɓakuli fwe, twali um nǝi a baní, kya dumsǝi ate amur bunomurǝm male.

⁶ Mɓwame ɓangŋa, o a ɓabondo, aban mǝnana Ɓakuli gilǝkini wi nǝ̀ tsǝkiri kam aɓalǝ anonggeo á-mwashat nǝ́ gbǝman-ɓari nǝ́ lumi-tongno-nong-mwashat ka [1,260].

Makel lo munǝo arǝ Dǝragon

⁷ Pǝlǝa munǝo lo a kuli. Ɓe gbani mǝturonjar mala Ɓakuli, yì Makel ka, lo andǝ amǝturonjar mǝnana ate ka sǝ à soa munǝo arǝ Dǝragon; sǝ Dǝragon andǝ amǝturonjar male gbal ka, à oa munǝo a rǝia.

⁸ Sǝ Dǝragon ngga munǝo gandǝi. Yì andǝ amǝturonjar male ka, à ɗwanyi bancame malea a kuli.

⁹ Nda à ramta mǝnia yì nggea kaɓǝne Dǝragon, mǝno yì share n'yau mǝnana à tunǝki ama Mǝɓealɓikea sǝ Shetan, mǝnana kǝ swarkita aɓwana kat aɓa ɓanza ka. Yì Dǝragon ngga andǝ amǝturonjar male kat, à ramtea a kuli à yì kpa a nzali a ɓanza!

¹⁰ Pǝlǝa ǝn ok ɓeɓwa a kuli loasǝ gi kǝrkǝr na ama: “Adyan ngga, amsǝban andǝ rǝcandǝa, andǝ Domurǝm mala Ɓakuli ma'sǝm, andǝ garamurǝm mala Kǝrǝsti male ka, à yina! Acemǝnana mǝ'yinǝ acauɓashi amur amǝ'eam sǝm, mǝnana kǝ oasǝkimuria, a ɓadǝm Ɓakuli ma'sǝm, du andǝ pwari ka, à ramǝna te a ɓanza!

¹¹ À limurǝm amuri nǝ nkila mala Mǝgam, andǝ nakun malea nǝ mǝsǝcau amur Mǝgam a ɓadǝmbǝ aɓwana; yia ka à eare à pa yilǝmia, à nyar nǝ tea ɗang yi pur a lú malea.

¹² Ace mǝno ka, pak banɓoarnado, We kuli! Sǝ wun kat mǝnana wu ndanǝ do a kuli ka, wu pak banɓoarnado! Sǝ mala ɓanza andǝ nggeamur ka, gir'murmwana amur wun, acemana Mǝɓealɓikea, yì Shetan ngga, sulǝna aban wun. Lumsǝ nǝ bumlulla kǝrkǝr, acemǝnana sǝlǝna ama pwari ueki wi bǝti.”

¹³ Lang Dǝragon sǝni à ramna te kpana a ɓanza ka, pǝlǝa lo pǝrta mɓwama mǝno, mǝnana ɓǝl muna ɓwabura ka.

¹⁴ Sǝ mɓwama ka, Ɓakuli pe wi abu-nyal ɓari mala nggea nkwang mǝgule ɓǝ̀ yale ɓǝ̀ o aban mǝnana à gilǝki wi a ɓabondo ka, akano ka, à nǝ̀ tsǝkiri pǝlǝa tārú nǝ cili, Dǝragon pà nǝ̀ gandǝ kumi ɗang.

¹⁵ Dǝragon pǝlǝa mǝn kuni polǝ mùrgula ata mɓwama ace mǝnana ɓǝ̀ mur ɓǝ̀ kya pwani ɓǝ̀ um nǝi ka.

¹⁶ Sǝ nzali ka bwali mɓwama kam; nzali mǝn kuni sonzǝ mur nggeasala mǝnana Dǝragon polǝi ka.

¹⁷ Gir mǝnia ka pe Dǝragon bumlulla kǝrkǝr arǝ mɓwama man. Nda nyare o nǝ̀ ká munǝo arǝ cili amuna mala mɓwame, yia aɓwana kat mǝnana à kǝ kpata anzongcau mala Ɓakuli, sǝ à duk amǝ nakun Yesu nǝ mǝsǝcau ka.

¹⁸ [Dǝragon pǝlǝa yi came a sala a kun nggeamur.]