Sǝna 1 - Maləmce Məfele mala Ɓakuli: Kurcau Məbəshe

Cau mǝnana Yohana bangŋa amur mǝnia yì Sǝna ka

¹ Mǝnia ka nda sǝngir aɓa bangŋo nǝ bu Yesu Kǝrǝsti mǝnana Ɓakuli pe wi acemǝnana ɓǝ̀ lǝmndǝì aguro male agir mǝnana duk púp à nǝ̀ yia kutio, banì pà nǝ̀ sau raka. Yesu túr mǝturonjar male ɓǝ̀ yì mǝnggi mǝnia yì girsǝna aɓa bangŋo ka aban guro male, Yohana.

² Yohana yì bang gir kat mǝnana sǝna, amur Cau mala Ɓakuli, andǝ agir mǝnana Yesu Kǝrǝsti pea sǝ nea ka.

³ Ɓwa mǝnana kǝ ɓal mǝnia yì cau ɓangna, andǝ aɓwana mǝnana à kǝ oe, sǝ à kǝ kpata agir mǝnana à gilǝia a ɓalǝi ka, à ndanǝ tsǝkbu, acemǝnana pwari pa mala agir mǝnia ka gbashina tù.

Makkun mala Yohana aban ká aban a'ikǝlisiya tongno nong-ɓari

⁴ Cautera mǝnia ka pur abanam, Yohana, aban ká aban a'ikǝlisiya tongno-nong-ɓari aɓa nzali Asiya. Ən nggǝ shamba wun ɓwamuru andǝ do rǝpwala mǝnana à kǝ pur nǝban Ɓakuli ka. Yì Ɓakuli ka nda mana ndakam ado, mǝnana ndakam a pwaryan, sǝ nda mǝnana nǝ̀ pàk kàm a dǝmbǝa ka. Ɗǝm ngga ǝn nggǝ shamba wun ɓwamuru andǝ do rǝpwala mǝnana à kǝ pur nǝban abangŋo tongno-nong-ɓari mǝnana à nda a ɓadǝm bunomurǝm mala Ɓakuli ka.

⁵ Sǝ ǝn nggǝ shamba wun ɓwamuru andǝ do rǝpwala mǝnana à kǝ pur nǝban Yesu Kǝrǝsti ka. Yì Yesu Kǝrǝsti ka nda mǝ'nakún mala Ɓakuli aɓa mǝsǝcau, mǝdǝmbǝa mala aɓwana mǝnana à kǝ loapi ɓembe anzǝm lú ka. Sǝ yì nda mǝyalban amur amurǝma mala ɓanza. Yì nda mǝnana earmǝsǝ sǝm, sǝ panzǝna sǝm aɓalǝ acauɓikea ma'sǝm nǝ nkila male,

⁶ sǝ nyesǝ sǝm, sǝm pǝlǝna apǝris a Domurǝm mala Ɓakuli, yì Tarrí ka. Ɓǝ̀ gulo kat andǝ rǝcandǝa duk male, masǝlǝate pà kàm ɗang! Amin.

⁷ Wu sǝni! Ndya kǝ yiu aɓalǝ apǝrɓang a kuli ka. Koya ɓwa ka nǝ̀ sǝni, kat andǝ aɓwana mǝnana à zuɓi nǝ kaɗa ka; sǝ akún mǝnana a ɓanza ka, à nǝ̀ ɓua ace. E, anggo sǝ ɓǝ̀ pa! Amin.

⁸ Ɓakuli Mǝtalabangŋo na ama, “Mǝ nda Alfa, ǝn tita agir kat, sǝ mǝ nda Omega, mǝ nǝ masǝlǝata agir kat. Mǝ nda mǝnana mǝ ndakam ado, andǝ mǝnana a pwaryan, andǝ mǝnana kǝ yiu a dǝmbǝa ka. Mǝ nda mǝnana nǝ Rǝcandǝa ǝn Karmur Gulo kat ka!”

Yohana sǝn Mǝtala sǝm mǝnana loapi ɓembe ka

⁹ Mim Yohana, mǝ'eam wun andǝ ɓi wun aɓa nutanni, sǝ aɓa Domurǝm mala Ɓakuli, andǝ gandǝrǝu, amǝnana à dumǝna ma'sǝm aɓa Yesu ka, mǝ nda aɓa luran mǝnana à tunǝki ama Patmos ka. À twalam à yì turam akani acemǝnana ǝn hamnǝ cau mala Ɓakuli, sǝ ace nakun Yesu ka.

¹⁰ A pwari mǝnana à tarì ace Mǝtalabangŋo ka, Bangŋo mala Ɓakuli em, kara ǝn ok ɓe kǝ giu mǝcande kǝla ɓua mala njawe, a nzǝmam.

¹¹ Kǝ na ama, “Gilǝ agir mǝnana a kǝ sǝnia ka aɓa malǝmce. Sǝ wu teri aban a'ikǝlisiya mǝnia tongno-nong-ɓari ka, amǝnana arǝ anggea-là Afisu, andǝ Sǝmirna, andǝ Pargamu, andǝ Tiyatǝra, andǝ Sardis, andǝ Filadefiya, sǝ Lawodisi ka.”

¹² Lang ǝn pǝlǝa mǝ nǝ sǝn yana ɓwe nakiyiam cau ka, kara ǝn sǝn agir tamsǝ pitǝla zǝnariya tongno-nong-ɓari.

¹³ Aban came aɓalǝ agir tamsǝ pitǝla ka, ɓeɓwa nakam “kǝla Muna mala Ɓwa.” Ɓwe oasǝ daura mǝlime mǝnana yi sulǝo arǝ akusǝi, sǝ marǝ bugir zǝnariya a kikili.

¹⁴ Ɓamuri andǝ nyang-múrí ka amǝpwasǝe na kǝla buke, à pwasǝ pwapwat kǝla tali mbulo; sǝ amǝsǝì na kǝla lasǝ bǝsa mǝnana kǝ earki ka.

¹⁵ Akusǝi kǝ tànzama kǝla bolo-ntul mǝbangŋe mǝnana nggangsǝa aɓa bǝsa-ntul ka, sǝ gǝshi gi na kǝla gǝggǝli mala nggeamur aɓa songnǝo male.

¹⁶ Bwal anlero tongno-nong-ɓari a bui-mǝli, sǝ nggeabyau mǝnana nǝ akuni mǝceauwe ɓari ka, pur a ɓakuni. Ɓamǝsǝi kǝ tànzama kǝla ta mala pwari aɓa zǝkia male.

¹⁷ Lang mǝ nǝ yia sǝni ka, kara ǝn kpa a nzali a kusǝì kǝla ɓwa mǝnana wuna ka. Pǝlǝa yi tsǝk bui-mǝli a muram sǝ nam ama: Ɓangciu ɓǝ̀ kǝa pakko ɗang! Mǝ nda Mǝdǝmbǝa, ǝn tita agir kat, sǝ mǝ nda Mǝtankwang, mǝ nǝ masǝlǝ agir kat!

¹⁸ Mǝ nda mǝnana nǝ yilǝmu ka. Ɗiɗyal ka ǝn wú, sǝ sǝni, mǝ ndya nǝ amǝsǝam ngga, masǝlǝate pà kàm ɗang. Akyî mala Lú andǝ Domurǝm mala Lú ka nda aɓa buam.

¹⁹ Gir mǝnana a sǝni ka gilǝì; amǝnana ado, andǝa mǝnana à nǝ̀ yia pa anzǝm amǝnia ka.

²⁰ Mǝnia ka nda ɓa cau ɓa-sǝmbǝrǝa amur anlero tongno-nong-ɓari mana a sǝnia aɓa buam-mǝlì, andǝ ɓa cau ɓa-sǝmbǝrǝa amur agir tamsǝ pitǝla zǝnariya tongno-nong-ɓari ka. Anlero mǝnia tongno-nong-ɓari ka, à ndaka amǝturonjar mala a'ikǝlisiya tongno-nong-ɓari, yì akpapi mala amǝkpata Yesu. Sǝ agir tamsǝ pitǝla tongno-nong-ɓari ka, à ndaka yia a'ikǝlisiya tongno-nong-ɓari.