Matiu 3 - Maləmce Məfele mala Ɓakuli: Kurcau Məbəshe

Yohana Mǝbatisǝma gilǝki njar ace Yesu

¹ Arǝ abaku mǝno ka, Yohana Mǝbatisǝma yiu kǝ hamnǝ cau a ɓabondo a bu-nzali Yahudi

² kǝ na ama, “Wu pwanzali wu pǝlǝ nzǝm wun arǝ acauɓikea ma'wun, ace mǝnana Domurǝm mala kuli gbashina.”

³ Yohana Mǝbatisǝma ka nda ɓwa mǝnana Ishaya mǝɓangna mala Ɓakuli bang ce ama: “Ɓe ɓwa kǝ hama nǝ giu mǝcande a ɓabondo kǝ na ama, ‘Wu gilǝki tanjar mala Mǝtalabangŋo. Wu tamsǝ anjarkusǝu ace pǝrapǝra.’ ”

⁴ Agir-nggurǝu mala Yohana mana oasǝ ka à tea nǝ nyang kalakadambi. Nggur-ɓunu male ka nggú na. Girlina male ka doshi na andǝ nyi-pu.

⁵ Ɓwapǝndǝa pur aɓa nggeala Urǝshalima, andǝ aɓea la a bu-nzali Yahudi kat, andǝ bareban mala Nggeasala Jodan kat, à o abani.

⁶ À bang acauɓikea malea, sǝ pakkia wia batisǝma a Nggeasala Jodan.

⁷ Sǝ lang Yohana sǝn amǝ Farisi andǝ amǝ Saduki à nǝ̀ nggǝ yiu pas abani ace mǝnana ɓǝa pakkia wia batisǝma ka, nea wia ama, “Wun amuna an'yau barya! Yan nun kir wun ama ɓǝ̀ wu ɓanggi ɓashi mala Ɓakuli mǝnana kǝ yiu ka?

⁸ Wu pak agir mǝnana à nǝ̀ lǝmndǝ ama wu pwana'nzali, wu ɗekina acauɓikea ma'wun ngga.

⁹ Sǝ wu kǝa sǝni kǝla ɗenyicau ma'wun mǝnana ama Ibǝrayim ngga kà wun na ka, nǝ̀ amsǝ wun ɗang. Ən nggǝ bangga wun, Ɓakuli nǝ̀ gandǝ loasǝ atali mǝnia à nǝ̀ pǝlǝì Ibǝrayim amǝkau.

¹⁰ Ko ado ka Ɓakuli kwakina kun bero a tǝr anggun. Nggun mǝnana kat pusǝ ɓǝle mǝɓoarne raka, à nǝ̀ kwari à nǝ̀ turri a bǝsa.

¹¹ “Ən nggǝ pakka wun batisǝma nǝ mur mǝnana nǝ̀ lǝmndǝ ama wu nyingŋǝna acauɓikea ma'wun. Nǝ nzǝmo ka, ɓeɓwa na nǝ̀ ngga yiu mǝnana kutiam nǝ bangŋo ka, mǝnana yale nkura kusǝì ka ǝn kārǝa mǝ bwali a buam ɗang. Yì ka, nǝ̀ yia pakka wun batisǝma nǝ Bangŋo Mǝfele andǝ bǝsa.

¹² Kwar sarǝgir male na a bui, nǝ̀ yia pusǝ kwá arǝ mǝsǝsa a katǝra, nǝ̀ so mǝsǝsa a ba, sǝ kwá ka nǝ̀ pisǝì a bǝsa mǝnana panǝ linggi raka.”

Yohana pakki Yesu batisǝma

¹³ Aɓalǝ anonggeo mǝno ka, Yesu pur a Galili sǝ yiu a Nggeasala Jodan ace mǝnana Yohana ɓǝ̀ yi pakki wi batisǝma ka.

¹⁴ Sǝ Yohana ka ɓariki ama nǝ̀ ɓinǝi wi. Ne wi ama, “Mim ɓwan mǝ nǝ ká abano ace batisǝma ka a nyare a yiu a banam mǝ pakko batisǝma!”

¹⁵ Sǝ Yesu pa eare ka ne wi ama, “Ɗeki ɓǝ̀ pa ana adyan. Anggo ka sǝ sǝm nǝ̀ lumsǝ agir kat mǝnana Ɓakuli earkicea ka.” Pǝlǝa Yohana eare pakki wi batisǝma.

¹⁶ Lang Yohana malǝna pakki Yesu batisǝma, sǝ Yesu eapi mur ani ka, kara kuli mǝnna sǝ sǝn Bangŋo mala Ɓakuli aban sulǝo kǝla kutu, yi do amuri.

¹⁷ Aɓwana ok gi Ɓakuli nacau a kuli ama, “Mǝnia ka nda Munem, mǝnana ǝn earkiyice, mǝnana bumam kǝ pwasǝa rǝì kǝrkǝr ka.”