Matiu 16 - Maləmce Məfele mala Ɓakuli: Kurcau Məbəshe

Aɓwana alta gir'lǝmndǝa aban Yesu

¹ Amǝ Farisi andǝ amǝ Saduki yiu aban Yesu à nǝ̀ karǝki. À zǝmbǝi wi ama ɓǝ̀ lǝmndǝia wia ɓe kǝ gir'ndali mana nǝ̀ lǝmndǝ ama yì ka, pur nǝban Ɓakuli.

² Yesu pǝlǝia wia ama: Nǝ pwarikpǝra ka ɓǝ̀ wu sǝn kuli bang ngga wu kǝ na ama, “Ban no nǝ̀ ɓoaro.”

³ Sǝ nǝ budǝmbari ɓǝ̀ wu sǝn kuli bangŋa sǝ ban pǝndǝ ka, wu na ama, “Mbulo no nǝ̀ nya yalung.” Wu kǝ gandǝ bang ɓa pa mala bumkuli, sǝ agir mana à kǝ lǝmndǝ pa mala nza man ngga wu bwaltea ɗang.

⁴ Nza mala amǝ'ɓealɓikea andǝ amǝ'ɗwanyi ɓanggi Ɓakuli na à alkiyita gir mana à nǝ̀ sǝn ngga. Sǝ à pà nǝ̀ lǝmndǝia ɓe kǝ gir'lǝmndǝa ɗang, she kǝ mala Yunana. Yesu pǝlǝa nyia o.

Yist mala amǝ Farisi andǝ amǝ Saduki

⁵ Lang alaggana mala Yesu eauwe a ɓe nkaring nggeamur ka, à sǝni ka ɓalǝia lorǝo à twal bǝredi a buia ɗang.

⁶ Yesu nea wia ama, “Wu par kir wun, wu yal ɓamur rǝ wun arǝ yist mala amǝ Farisi andǝ amǝ Saduki.”

⁷ Pǝlǝa alaggana male kutia na cau a rǝarǝia ama, “Bang anggo acemǝnana sǝm yinǝ bǝredi raka.”

⁸ Yesu yi sǝlǝia wia nǝ cau mǝno à nakiyi ka sǝ ɗia ama, “Palang sǝ wu kǝ na cau arǝarǝ wun amur ɗwanyi bǝredi? Paɓamuru ma'wun kyau fat!

⁹ Wun ado ka wu kǝ gandǝ bwalta cau mbo? Ɓalǝ wun lorǝna ce abǝredi tongno mǝnana ǝn linǝ aɓwana á-tongno nǝi ka? Azace shen sǝ wu lumsǝia nǝ aɓwanggine?

¹⁰ Sǝ lang arǝ abǝredi tongno-nong-ɓari mǝnana ǝn linǝ aɓwana á-ine nǝi ka? Azace shen sǝ wu lumsǝia nǝ aɓwanggine mǝnana a ueo ka?

¹¹ Palang sǝ wu gandǝ sǝlǝ ama ǝn pa arǝ na cau amur bǝredi raka? Mǝ nda arǝ na ama wu par kir wun ce wu earnǝ yist mala amǝ Farisi andǝ amǝ Saduki ɗang.”

¹² Nda sǝ ce kpania wia ama pa arǝ nunkiria amur yist mana à tsǝkiyi arǝ bǝredi ka ɗang. Nda arǝ na cau amur kanigir nyir mala amǝ Farisi andǝ amǝ Saduki.

Bitǝrus bangŋa ama Yesu nda Kǝrǝsti

¹³ Lang Yesu yina a nzali Kaisariya Filipi ka, ɗi alaggana male ama, “Yana ɗe aɓwana kǝ na ama nda mim Muna mala Ɓwa?”

¹⁴ Sǝ à pa eare ama, “Aɓea aɓwana kǝ na ama a nda Yohana Mǝbatisǝma; aɓea ka à kǝ na ama, Iliya; sǝ aɓea gbal ka ama Irmya ko mwashat aɓalǝ amǝ'ɓangna mala Ɓakuli.”

¹⁵ Pǝlǝa Yesu ɗia ma, “Sǝ wun ngga, wu kǝ na ama mǝ nda yan?”

¹⁶ Shiman Bitǝrus pa eare ama, “A nda Kǝrǝsti, Muna mala Ɓakuli mǝyilǝmuì.”

¹⁷ Yesu ne wi ama: Tsǝkbu na muro, we Shiman muna mala Yunana, acemǝnana sure mala ɓwapǝndǝa na lǝmndǝo mǝnia yì gir ka ɗang. Tárram mǝnana a kuli ka nda.

¹⁸ Sǝ we Bitǝrus ka a nda tali, sǝ amur tali mǝnia ka mǝ nǝ ɓak Ikǝlisiya mem, sǝ rǝcandǝa mala Lú pa nǝ̀ gandǝi ɗang.

¹⁹ Mǝ nǝ po akyî mala Domurǝm mǝnana a kuli ka; gir kat mǝnana à kùrrì a ɓanza ka anggo sǝ à nǝ̀ kùrrì a kuli, sǝ gir kat mǝnana a panzǝi a ɓanza ka anggo sǝ à nǝ̀ panzǝi a kuli.

²⁰ Pǝlǝa nunkir alaggana male ama ɓǝa kǝa ne kǝɓwa ama yì nda Kǝrǝsti ɗang.

Yesu bang cau amur lú male

²¹ Twal a pwari mǝno ka Yesu tita mǝnggi alaggana male ɓa cau ama, “Dumǝna púp mǝ nǝ ká a Urǝshalima, mǝ nǝ ká nu tanni kǝrkǝr a bu aɓwana-mǝgule, agbani pǝris andǝ amǝkani nggurcau. À nǝ̀ wal-luem, sǝa ma a tāruia nongŋo ka mǝ nǝ loapi ɓembe nǝ yilǝmu.”

²² Bitǝrus pǝlǝa tunǝi zak sǝ pǝrki nǝ ce a kuni ama, “Pà nǝ̀ pak ɗang, Mǝtalabangŋo. Kǝgir pà nǝ̀ kumo anggo ɗang!”

²³ Yesu pǝlǝa arǝ Bitǝrus sǝ ne wi ama, “Nyaram anggo, Shetan! A kǝ earce tsǝem mǝ annda, acemǝnana ɗenyicau mo ka mala Ɓakuli na ɗang, mala ɓwapǝndǝa na.”

²⁴ Pǝlǝa Yesu banggi alaggana male ama: Ɓwa mǝnana kat earce ama nǝ̀ yiu atam nǝ̀ duk mǝkpatam ngga, dumǝna púp nǝ̀ nying ɗenyicau ɓamuri, nǝ̀ twal nggun-gangndi male sǝ nǝ̀ kpatam.

²⁵ Ɓwa mana kat kǝ sǝni nǝ̀ amsǝ yilǝmi ka nǝ̀ ngga ɗwanyi banì, sǝ ɓwa mǝnana kǝ turta yilǝmi acem ngga, nǝ̀ ngga kumi.

²⁶ Ɓǝ̀ ɓwa kum koya gir a ɓanza man kat, sǝ ɗwanyi yilǝmu mǝnana málá male pà kàm raka, lǝmndǝ ama pà nǝ́ kǝgir ɗang. Sǝ ɓǝ̀ ɗwanyini yilǝmu mǝnana málá male pà kàm raka, pà nǝ́ kǝgir mǝnana nǝ̀ pa sǝ nǝ̀ kumi ɗǝm ngga ɗang.

²⁷ Acemǝnana Muna mala Ɓwa ka nǝ̀ ngga yiu aɓa gulo mala Tarrí, andǝ amǝturonjar male ate, sǝ nǝ̀ yia pe koyan ngga tangnakusǝi, ace gir mǝnana pak ka.

²⁸ Ən nggǝ na wun aɓa mǝsǝcau ama, aɓea ɓwana na akani aban came mǝnana à pà nǝ̀ wu ɗang she ɓǝa sǝna yiu mala Muna mala Ɓwa a Domurǝm male ka.