Matiu 15 - Maləmce Məfele mala Ɓakuli: Kurcau Məbəshe

Kanigir mala aɓwana-mǝgule

¹ Anzǝm mani ka aɓea amǝ Farisi andǝ amǝkani Nggurcau mala Musa pur a Urǝshalima, à yiu aban Yesu sǝ à ɗi ama,

² “Mana tsǝa sǝ alaggana mo kǝ yàl nzongcau mala aká sǝm? À kǝ̀ lak buia sǝ à nǝ̀ lili ɗang!”

³ Yesu pǝlǝia wia ama: Sǝ ace man ɗe sǝ wu kǝ yàl nzongcau mala Ɓakuli ace pakki akanigir ma'wun?

⁴ Ɓakuli ka bangŋa ama, “Pè tárro andǝ nggo gulo, sǝ ɓwa mǝnana sang tarrí ko nggè ka, púp à nǝ̀ wali ɓǝ̀ wú.”

⁵ Sǝ wun ngga wu bangŋa ama ɓǝ̀ ɓwa ne tarrí ko ngge ama, “Gir mǝnana ɓǝ a wú nǝ́ kumo a buam ace po gbasha ka, ǝn pani Ɓakuli ka,”

⁶ ɓwe nǝ̀ gandǝ ginǝ pe tarrí ko nggè gulo nǝi. Anggo ka wu nyesǝna cau mala Ɓakuli ɓà ace pakkiagir ma'wun.

⁷ Wun amǝ'kunɓarina! Ɓangna mala Ishaya amur wun ngga nda a njari, mǝnana bangŋa ama:

⁸ “Aɓwana mǝnia ka à kǝ pam gulo nǝ mburkunia, sǝ ɓabumia ka nda kuko nǝ mim.

⁹ Peri malea abanam ngga mǝɓane na; akanigir malea ka anzongcau mala ɓwapǝndǝa na à kaniki ka.”

Agir mana à kǝ tsǝk ɓwa sǝ kǝ pǝndǝki ka

¹⁰ Yesu tunǝ ɓwabunda sǝ banggia wia ama, “Wu kwaki kir wun ɓǝ̀ cau kpaka wun.

¹¹ Gir mana kǝ kutio a kun ɓwa ka nda kǝ pǝndǝkì ka ɗang, cau mana purkiyi a kuni ka, nda mana kǝ tsǝi sǝ kǝ pǝndǝki ka.”

¹² Alaggana male pǝlǝa à yiu abani sǝ à ɗi ama, “A sǝlǝ ama bum amǝ Farisi lullo arǝ cau mana a ne ka?”

¹³ Sǝ Yesu pǝlǝia wia ama, “Ɓǝ̀ ya girpwala nani à pandǝi mǝnana Tárram mana a kuli ka nǝ̀ pandǝi raka, à nǝ̀ ui.

¹⁴ Wu ɗekia; yia ka à ndaka ante mana à kǝ bwali ante gara ka. Ɓǝ̀ nte bwali nte gara ka, yia kǝm ngga à nǝ̀ kpa tūli.”

¹⁵ Bitǝrus ne wi ama, “Bǝla sǝm ɓa kanicau mana ama girlina na kǝ tsǝk ɓwa sǝ kǝ pǝndǝki raka.”

¹⁶ Yesu nea wia ama: Wun gbal ka cau kǝ kpaka wun re?

¹⁷ Wu sǝlǝ mbo ama gir mana kat kutio a kun ɓwa ka kǝ o a bumi, sǝ nǝ̀ ngga pur a nza?

¹⁸ Sǝ agir mǝnana à kǝ pur a kun ɓwa ka à kǝ̀ yiu nǝ ɓabumi, sǝ à ndaka mǝnana à nǝ̀ tsǝk ɓwa nǝ̀ do nǝ pǝndǝkya ka.

¹⁹ Àkǝ̀ ɓabum ɓwa sǝ aɗenyicau mǝɓane kǝ puro; wal-lú, nongnǝban a nza nǝ doɓala, gyagung, ǝn'i, kumsǝkun, sǝ zalǝban.

²⁰ Amǝnia ka à ndaka gir mǝnana à nǝ̀ tsǝk ɓwa nǝ̀ pǝndǝki ka. Lili nǝ abu mǝnana à lea raka pà nǝ̀ tsǝk ɓwa nǝ̀ pǝndǝki ɗang.

Paɓamuru mala mɓwama Kan'ana

²¹ Yesu nying ban mǝno sǝ o a nzali mala amǝ Taya andǝ amǝ Sidon.

²² Ɓe mɓwama Kan'ana mǝnana ndanǝ do a mǝno yì bu ban ngga, yiu abani nǝ ɓua ama, “Mǝtalabangŋo, Muna mala Dauda, sǝn mǝsǝswatǝr mem! Ɓoarnsarilem ngga nda aɓa tanni kǝrkǝr a ɓabu kukwar mǝnana kutia rǝì ka.”

²³ Yesu pǝlǝi wi kǝ cau ɗang. Alaggana male yiu abani sǝ à zǝmbǝi wi ama, “Sǝnbi mɓwama mǝnia ka ɓacau male ɓǝ̀ o. Ace mǝnana camarǝ gya ata sǝm nǝ ɓua.”

²⁴ Yesu pǝlǝia wia ama, “Kǝ anzur mala amǝ Isǝrayila mana à ɓwarki ka nda à turam abania ka.”

²⁵ Mɓwame yiu yi kūndǝo a ɓadǝmbǝi, sǝ na ama, “Mǝtalabangŋo, bwalam kam!”

²⁶ Yesu pǝlǝi wi ama, “Ɓoaro ɓǝa twal girlina mala amuna ɓǝa pe anvwa ɗang.”

²⁷ Mɓwame eare ama, “E, Mǝtalabangŋo, nggearǝ anvwa ka à kǝ tarki aɓwanggina girlina mǝnana à kǝ kpaki a nzali a ban-li mala amǝtalea ka.”

²⁸ Yesu pǝlǝa ne wi ama, “Mɓwama, paɓamuru mo ka nggea mǝgule na! Zǝmbǝa mo ka à ongŋǝni.” Kara àkǝ̀ banì rǝ muni mala.

Yesu linǝ́ aɓwana á-ine

²⁹ Yesu nying ban mǝno sǝ gya a kun Garang mala amǝ Galili. Kya eauwe a bum ɓe nkono do akàm.

³⁰ Ɓwabunda pas yiu abani. À yiu nǝ aɓwana mana à su ka, ante, a gbakǝre, amǝ'talasǝuɓunna andǝ acilia pas, à yì nongsǝia a ɓadǝmbǝi; sǝ twalia wia ban akwano malea.

³¹ Ɓwapǝndǝa ndali lang à sǝn amǝ'talasǝuɓunna aban na cau, aɓwan à su ka à lo tak, agbakǝre lo à kǝ gya, sǝ ante kǝ sǝnban. Pǝlǝa à ɓwangsǝki Ɓakuli mala amǝ Isǝrayila.

³² Yesu tunǝ alaggana male abani sǝ nea wia ama, “Ən nggǝ sǝn mǝsǝswatǝr mala aɓwana mǝnia ka, acemǝnana à ndakani atam nongŋo tārú a dyan, andǝa nzala. Ɓǝa kǝa o anggo ɗang, ace mǝsǝpǝndǝa makkia a njar.”

³³ Pǝlǝa alaggana male ne wi ama, “Ake sǝ sǝm nǝ̀ kum girlina a bondo mǝnia ka, mǝnana sǝm nǝ̀ linǝ aɓwana mǝnia pas ka?”

³⁴ Yesu ɗia ama, “Agbatali bǝredi shen a bu wun ɗe?” À ear ama, “À nda tongno-nong-ɓari andǝ amǝnji bǝti.”

³⁵ Pǝlǝa Yesu ne ɓwabunda ɓǝa do a nzali.

³⁶ Sǝ twal abǝredi tongno nong-ɓari andǝ anji, lang pangŋǝni Ɓakuli yàwá ka, pǝlǝa ɓwanggia sǝ pe alaggana male. Sǝ yia gbal ka, à gaki aɓwana.

³⁷ Ɓwabunda man kat ka lili ɗǝmbǝo, nying cili. Alaggana male ramnggi cili mana ueo ka, à pwano arǝ azace tongno-nong-ɓari.

³⁸ Laki mala aɓwana mana à lili ka, aburana á-ine na. Amamǝna andǝ muna mana atea ka à ɓallia ɗang.

³⁹ Yesu pǝlǝa ne aɓwabunda ɓǝa o a la, sǝ kutio a waru o a bu-nzali Magadan.