Matiu 13 - Maləmce Məfele mala Ɓakuli: Kurcau Məbəshe

Kanicau arǝ Mǝɓeale

¹ Àkǝ̀ pwari mǝno ka Yesu puro nying ɓala sǝ kya do a kun Garang.

² Aɓwabunda mana à yì rambǝa abanì ka à lakki kǝrkǝr gandǝa eauwe do aɓa muna-waru, sǝ aɓwana kat came a kun mur.

³ Pǝlǝa banggia wia agir pas nǝ́ kanicau. Na ama: Mǝ'rya puro wario a ɓeale.

⁴ Lang ndarǝ kwak mǝsǝɓeale ka aɓea sukkio amur njargula, sǝ amuna-nyal sulǝo à yì tarkia.

⁵ Aɓea kpa a mǝsǝtali, aban mǝnana nzali pa akàm pepe raka. Zuku ka à yì sangna acemǝnana nzali banì lim ɗang.

⁶ Lang pwari camta ka, kara à wuli. À ime acemǝnana nlerǝia bwal nzali pepe ɗang.

⁷ Aɓea mǝsǝɓeale kpa aɓalǝ azwe. Azwe gulo à sorǝkia.

⁸ Aɓea mǝsǝɓeale kpa amur nzali mǝɓoarne, à yì ɓǝl pas à kuti mǝsǝɓeale kusǝ gbǝman, aɓea ka kusǝ lumi-tongno-nong-mwashat, sǝ aɓea ka kusǝ lumi-tārú.

⁹ Ɓwa mǝnana ndanǝ akiru ka ɓǝ̀ o.

Tǝr bangcau mala Yesu nǝ akanicau

¹⁰ Alaggana male yiu abani à ɗi ama, “Ace mana sǝ a kǝ ne aɓwana cau nǝ kanicau?”

¹¹ Yesu earia wia ama: Surǝ gir-ɓasǝmbǝra mala Domurǝm mala kuli ka à pana wuni, sǝ yia ka à pea wia ɗang.

¹² Aɓwana mana à kǝ kwaki kiria arǝ kanigir mem ngga à nǝ̀ pea wia ɓe sǝlǝ amur mǝnana à ndanǝi ka, sǝ à nǝ̀ kum surǝgir kpǝm. Sǝ aɓwana mana à kǝ kwaki kiria raka, kǝ mǝnana à ndanǝi ka à nǝ̀ é a rǝia.

¹³ Mǝnia ka nda gir mana tsǝa sǝ ǝn nggǝ nea wia cau nǝ kanicau ka. À ndanǝ amǝsǝu, sǝ à kǝ sǝnban ɗang; À ndanǝ akiru, sǝ à kǝ ok cau kpakia wia ɗang.

¹⁴ Abania ka ɓangna mala Ishaya yi lumsǝo, mana ama: “Wu nǝ̀ nggǝ o, sǝ pà nǝ̀ kpaka wun ɗang. Wu nǝ̀ nggǝ sǝna, sǝ pa wu nǝ̀ bwalte ɗang.

¹⁵ Ɓabum aɓwana mǝnia ka jimgbǝrina; à kǝ gandǝ okban nǝ akiria ɗang, sǝ yia ka à girkina amǝsǝia. Ɓǝ̀ ana raka mǝsǝia nǝ̀ sǝnban, à nǝ̀ okban nǝ akiria, à nǝ̀ bwalta ɓacau nǝ ɓabumia, sǝ à nǝ̀ pǝlǝa, à nǝ̀ nyare abanam, sǝ mǝ nǝ sonzǝia.”

¹⁶ Ma wun she ka mur wun ɓoaro. Acemǝnana amǝsǝ wun kǝ sǝnban, sǝ akir wun kǝ okban.

¹⁷ Ən nggǝ bangga wun mǝsǝcau, amǝ'ɓangna mala Ɓakuli andǝ aɓwana mala Ɓakuli pas pak nzal sǝn gir mana wu kǝ sǝn ngga, sǝ à kumo à sǝn ɗang. À earǝna ce oe, sǝ à kumo à ok ɗang.

Yesu bǝlki ɓa kanicau arǝ mǝɓeale

¹⁸ Wu kwaki kir wun wu ok ɓa kanicau mala mǝɓeale:

¹⁹ Ɓǝ̀ ɓwa ok cau mǝɓoarne amur Domurǝm mala kuli, sǝ ce kpaki wi raka, nda kǝla mǝsǝɓeale mana kpa a tanjargula ka. Mǝɓealɓikea kǝ yiu kǝ fwa gir mana à ɓeali a ɓabumi ka.

²⁰ Mǝsǝɓeale mǝnana kpa amur taliban ngga cam a kun ɓwa mǝnana ok ce sǝ é tu nǝ bumpwasǝa.

²¹ Sǝ acemǝnana nlerǝi ko a nzali raka, gandǝ came banì sau ɗang. Pwari mǝnana tanni yipi wi acemǝnana paɓamuri arǝ cau mala Ɓakuli ka, nǝ̀ kaurǝ a kpa.

²² Mǝnana kpa aɓalǝ azwe ka nda cam a kun ɓwa mana kǝ ok ce, sǝ bumpina arǝ alta agir mala ɓanza mǝnia andǝ swarkiban mala kume à yì marǝki sǝ à tsǝi pusǝ ɓǝle ɗang.

²³ Sǝ mǝnana kpa amur nzali mǝɓoarne ka cam a kun ɓwa mana ok cau mala Ɓakuli sǝ kpaki wi ka. A bui mǝnia ka pa ɓǝle gbǝman, a ɓe bui ka pa ɓǝle lumi-tongno-nong-mwashat, sǝ a ɓe ka lumi-tārú.

Kanicau amur mǝssa andǝ nkwangŋan

²⁴ Yesu nea wia ɓe kanicau ɗǝm ama: À nǝ̀ kànì Domurǝm mala kuli arǝ ɓeɓwa mǝnana ɓeal mǝsǝɓeale mǝɓoarne a ɓaban male ka.

²⁵ Lang aɓwana na ntulo kat ka, ɓimǝbura yiu yi ɓeal nkwangŋan aɓa mǝssa, sǝ pǝlǝa o.

²⁶ Mǝssa tita bwalo, sǝ nkwangŋan pusǝrǝi.

²⁷ Aguro mala mǝtala ɓabanì yiu abani sǝ à ɗi ama, “Ɓwamǝgule, mǝsǝɓeale mǝɓoarne na a ɓeal a ɓaban mo ka re? Sǝ ankwangŋan pur nǝ kǝshe?”

²⁸ Sǝ na ama, “Ɓiam-mǝbura nǝ pak gir man.” Sǝ aguro ɗi ama, “A earce ama ɓǝ̀ sǝm kya ukkia le?”

²⁹ Sǝ earia wia ama, “Awo, acemǝnana ɓǝ̀ wu ndarǝ ukki ankwangŋan ngga, wu nǝ̀ gandǝ ukkia andǝa mǝssa.

³⁰ Wu ɗekia ɓǝa gulo a tarǝia. Pwari wale ka mǝ nǝ ne amǝturo ɓǝa tar nkwangŋan ɓǝa kurkia sǝ ɓǝa pisǝia. Sǝ mǝssa ka ɓǝa soapa mi a ba.”

Kanicau arǝ mǝsǝ musta

³¹ Yesu banggia wia ɓe kanicau ɗǝm ama: À nǝ̀ kànì Domurǝm mana a kuli ka arǝ mǝsǝ musta, mǝnana ɓeɓwa twali sǝ ɓeali a ɓaban male ka.

³² Ata amǝsǝɓeale kat ka nda mǝsǝì keke kutiban ngga, sǝ ɓǝ̀ yi gulna ka kǝ gulo kǝ kuti acili agirpwala, sǝ kǝ pǝlǝ nggun mǝnana amuna-nyal mana a kuli ka à kǝ bwal ndà arǝ abui ka.

Kanicau arǝ yist

³³ Nea wia ɓe kanicau ɗǝm ama: Domurǝm mala kuli ka nda kǝla yist mǝnana ɓe mɓwama twali sǝ sùrǝì andǝ muku tasau tārú, sǝ yi aki ɓa muku tsǝi vwali.

³⁴ Yesu ne aɓwana acau mǝnia ka kat nǝ akanicau. Kǝ cau pà kàm mǝnana banggia wia mana kanicau pà kàm raka.

³⁵ Pak mǝnia ka ace mǝnana ɓǝa lumsǝ cau mana mǝɓangna mala Ɓakuli bangŋa ama, “Mǝ nǝ mǝn kunam nǝ kanicau, Mǝ nǝ arkia wia ɓalǝ agir mana à nda aɓa sǝmbǝrǝa pur a tita ɓanza ka.”

Yesu bǝlki ɓa kanigir amur nkwangŋan

³⁶ Yesu ɗeki ɓwabunda a nza pǝlǝa kutio a ɓala. Alaggana male kuti ate à yì ne wi ama, “Bǝla sǝm ɓa kanicau mana amur nkwangŋan a ɓaban ngga.”

³⁷ Sǝ Yesu pǝlǝia wia ama: Ɓwa mǝnana ɓeal mǝsǝɓeale mǝɓoarne ka nda Muna mala Ɓwa.

³⁸ Ɓaban ngga nda ɓanza, sǝ amǝsǝɓeale mǝɓoarne ka à ndaka muna mala Ɓakuli a Domurǝm male. Sǝ ankwangŋan ngga à ndaka muna mala Mǝɓealɓikea.

³⁹ Ɓibura mǝnana ɓeal nkwangŋan ngga nda Shetan. Wal-mǝsa ka nda masǝlǝata ɓanza, sǝ amǝ'walmǝsa ka à ndaka amǝturonjar mala Ɓakuli.

⁴⁰ Kǝla mǝnana à kǝ ram nkwangŋan sǝ à nǝ̀ pisǝì a bǝsa ka, anggo sǝ nǝ̀ pa a masǝlǝata ɓanza gbal.

⁴¹ Muna mala Ɓwa nǝ̀ tur amǝturonjar male, ɓǝa yi pusǝ koya gir kat mǝnana kǝ yinǝ cauɓikea, andǝ aɓwana kat mǝnana à kǝ pak gir mǝɓane aɓa Domurǝm male ka.

⁴² À nǝ̀ ramtea aɓa bǝsa mǝnana pi kǝrkǝr ka. Aban mǝno ka à nǝ̀ ngge ɓua sǝ à nǝ̀ nggǝ nǝmnggi munabuia.

⁴³ Sǝ amǝ'ɓealɓoarna ka à nǝ̀ tǎ kǝla pwari aɓa Domurǝm mala Tárria. Ɓwa mǝnana ndanǝ kir okban ngga, ɓǝ̀ o.

Kanicau arǝ gǝna mǝnana sǝmbǝrǝ ka

⁴⁴ Domurǝm mala kuli ka nda kǝla gǝna mǝnana sǝmbǝrǝa a ɓe ɓaban ngga. Ɓe ɓwa kumi sǝ sǝmbǝrǝi. Banɓoarnado tsǝi makki agirkuma male kat, yi kúr mǝno yì ɓaban ngga.

⁴⁵ Ɗǝm ngga Domurǝm mala kuli ka nda kǝla mǝ'nggaliki mǝnana kǝ alta nzali ka.

⁴⁶ Lang yi kumǝna mǝɓoarne ka, pǝlǝa nyare o kya makki agir male kat sǝ yi kúrí.

Kanigir arǝ ndámbú

⁴⁷ Ɗǝm ngga, Domurǝm mana a kuli ka nda kǝla ndámbú mǝgule mǝnana à turi a nggeamur sǝ bwal koya ulang nji kat ka.

⁴⁸ Lang ndámbú lumsǝna ka, amǝkpakia sunyi à yinǝi a nza. À yì do à tarki anji mǝɓoarne aɓalǝ azace, sǝ amǝɓane ka à sukkia.

⁴⁹ Anggo sǝ nǝ̀ pa a masǝlǝata ɓanza. Amǝturonjar mala Ɓakuli nǝ̀ yiu à nǝ̀ yia pusǝki amǝ'ɓealɓikea aɓalǝ amǝ'ɓealɓoarna

⁵⁰ sǝ à nǝ̀ ramta amǝ'ɓealɓikea aɓa ndabǝsa. Akàm ngga à nǝ̀ ɓua à nǝ̀ nggǝ nǝmnggi munabuia.

⁵¹ Yesu ɗia ama, “Wu bwalǝna ta amǝnia yì acau ka le?” À ear ama, “E, kpana sǝm.”

⁵² Pǝlǝa nea wia ama “Ace mani ka, mǝ'eaulǝki Nggurcau mala Musa mǝnana à kani wi gir, kum kwar rǝǔ ace Domurǝm mala kuli ka, nda kǝla mǝtala-ɓala mǝnana kǝ pusǝ gǝna mǝbǝshe andǝ amǝ'e aɓa bah male ka.”

Amǝ Nazarat ɓinǝ Yesu

⁵³ Lang Yesu malǝna naki amǝnia yì akanicau ka, pǝlǝa loapi banì.

⁵⁴ Nyar a la male a Nazarat. Tita kani aɓwana gir aɓa ndakpapi malea. Ɓwapǝndǝa ndali sǝ à ɗiban ama, “Ake sǝ mǝnia yì ɓwa ka kum mǝnia yì sǝlǝe andǝ bangŋo mala pakki agir-ndǝlǝki ka?

⁵⁵ Mǝnia ka muna mala kapinta na re? Ngge nda Maryamu sǝ amǝ'eambǝi ndaka Jemis, Yisǝfu, Shiman andǝ Yahuda re?

⁵⁶ Sǝ amǝnggaule kat ka à pà ta sǝm akani re? Sǝ ake sǝ ɓwe man kum mǝnia yì agir kat ka?”

⁵⁷ Bumia lullo a rǝì, à ginǝ earnǝi. Pǝlǝa Yesu nea wia ama, “Mǝɓangna ka, a ko ya ban ngga la kǝ pe wi gulo, sǝa ma a la male aɓalǝ aɓwana male ka, à pākiyi wi gulo ɗang.”

⁵⁸ Pakki agir-ndǝlǝki pas a la male ɗang ace ɗwanyi earnǝɓwa malea.