Matiu 1 - Maləmce Məfele mala Ɓakuli: Kurcau Məbəshe

Tau mala Yesu

¹ Aɓa malǝmce ka tau mǝnana Yesu Kǝrǝsti, Mǝkà Dauda, Mǝkà Ibǝrayim, pur kam ngga ndya ka:

² Ibǝrayim ɓǝl Ishaku, Ishaku ɓǝl Yakupu, Yakupu ɓǝl a Yahuda andǝ amǝ'eambǝi,

³ Yahuda ɓǝl Parisa andǝ Zera. Nggea nda Tamar. Parisa nda tar Hezǝron, Hezǝron ɓǝl Ram,

⁴ Ram ɓǝl Aminadap, Aminadap ɓǝl Nashon, Nashon ɓǝl Salmon,

⁵ Salmon ɓǝl Boaza. Ngge nda Rahap. Boaza ɓǝl Obet. Nggea Obet nda Rut. Obet ɓǝl Jeshi,

⁶ Sǝ Jeshi yi ɓǝl murǝm Dauda. Dauda ɓǝl Solomon. Nggea Solomon ɗiɗyal ka man-lú mala Yuriya na.

⁷ Solomon ɓǝl Riabwam. Riabwam ɓǝl Abija. Abija ɓǝl Asa.

⁸ Asa ɓǝl Jahoshafa. Jahoshafa ɓǝl Joram. Joram ɓǝl Uzaya.

⁹ Uzaya ɓǝl Jotam. Jotam ɓǝl Ahas. Ahas ɓǝl Hezakaya,

¹⁰ Hezakaya ɓǝl Manasa. Manasa ɓǝl Amon. Amon ɓǝl Josaya,

¹¹ sǝ Josaya yi ɓǝl Jekonaya andǝ amǝ'eambǝi (a baku mana a bwal amǝ Isǝrayila a nzali malea à um nǝia guro a nzali Babila ka).

¹² A nzǝm mana à umna nǝia a Babila ka Jekonaya ɓǝl Shaltiyel. Shaltiyel ɓǝl Jerubabel.

¹³ Jerubabel ɓǝl Abiuda. Abiuda ɓǝl Iliyakim. Iliyakim ɓǝl Azura.

¹⁴ Azura ɓǝl Zadok. Zadok ɓǝl Akim. Akim ɓǝl Iliyu.

¹⁵ Iliyu ɓǝl Iliyaza. Iliyaza ɓǝl Matan. Matan ɓǝl Yakupu.

¹⁶ Sǝ Yakupu yi ɓǝl Yisǝfu, bura Maryamu. Maryamu na yi ɓǝl Yesu, mana à tunǝki ama Kǝrǝsti ka.

¹⁷ Lǝmndǝ ama tite arǝ Ibǝrayim yi bwal ban Dauda ka anza lum-nong-ine na. Sǝ lo a ban Dauda yi bwal baku mala pwanban aban o a Babila ka anza lum-nong-ine na. Sǝ lo a baku mala pwanban aban o a Babila yi bwal ban Kǝrǝsti ka anza lum-nong-ine na.

Ɓǝlban mala Yesu Kǝrǝsti

¹⁸ Ani sǝ ɓǝl Yesu Kǝrǝsti pa. Ngge, yì Maryamu ka Yisǝfu pur amuri nǝ̀ ali. Maryamu ka malaká yiu a ɓala mala Yisǝfu peatu ɗang, sǝ muna kpa a bumi nǝ kanì mala Bangŋo Mǝfele.

¹⁹ Burri Yisǝfu, acemǝnana yì ka, ɓwa mǝɓoarne na ka, eare ama nǝ̀ pe wi kirsakya a mǝsǝ aɓwana ɗang. Yì ka, pak ɗenyicau ama à nǝ̀ gau aɓa sǝmbǝrǝa.

²⁰ Lang nda mur mǝnia yì ɗenyicau ka, mǝturonjar mala Mǝtalabangŋo yi pusǝrǝi abani a lorǝo. Mǝturonjar banggi wi ama, “Yisǝfu Mǝkà Dauda, ɓangciu ɓǝ̀ kǝa pakko arǝ twal Maryamu ɓǝ̀ duk mamo ɗang. Acemǝnana muna mana a bumi ka pě mala Bangŋo Mǝfele na.

²¹ Yì ka, nǝ̀ ɓǝl muna-ɓwabura, sǝ a wu nǝ tsǝki wi lullǝu ama Yesu, acemǝnana nǝ̀ yia amsǝ aɓwana male aɓalǝ acauɓikea malea ka.”

²² Agir mǝnia kat ka à yì pa anggo ace mǝnana ɓǝa lumsǝ cau mala Mǝtalabangŋo mana pur a kun mǝɓangna male ama:

²³ “Nsari nǝ̀ kum muna-bum, nǝ̀ ɓǝl muna-ɓwabura, à nǝ̀ tunǝi ama Immanuyel,” ɓālǝi ama, “Ɓakuli na ata sǝm.”

²⁴ Lang Yisǝfu loapi ntulo ka, pak gir mana mǝturonjar mala Mǝtalabangŋo banggi wi ka, twal Maryamu ɓǝ̀ duk mami.

²⁵ Sǝ yì ka, pak ɓwama nǝi ɗang yi pur a gbashi muna-ɓwabura male, pǝlǝa tsǝki muna lullǝu ama Yesu.