Markus 6 - Maləmce Məfele mala Ɓakuli: Kurcau Məbəshe

À ginǝ Yesu a Nazarat

¹ Yesu pǝlǝa nying mǝno yì bu-nzali ka, nyare andǝ alaggana male a Nazarat, la male.

² A pwari Sabbat mǝnana kar ka, yì pwari usǝlǝo mala amǝ Yahudi, Yesu tita kanigir aɓa ndakpapi. Aɓwana mǝnana kat à oe ka, à ndali kǝrkǝr, pǝlǝa à ɗiban ama, “Ake sǝ mǝnia yì ɓwa ka kum mǝnia yì sǝlǝe andǝ rǝcandǝa mala pakkia ulang amǝnia yì agir-ndali ka?

³ Kafinta man na mbak? Yì nda muna mala Maryamu mbo, sǝ amǝ'eambǝi Jemis, Yisǝfu, Yahuda andǝ Shiman, andǝ amǝ'eambǝi amuna mamǝna pa kani aban sǝm re?” Kara bumia kiɗiki a rǝì, à ginǝ earnǝi.

⁴ Yesu pǝlǝa nea wia ama, “Mǝɓangna mala Ɓakuli ka, à kǝ pe wi gulo a koya ban ngga, she àkǝ̀ la male, aɓalǝ aɓwana male, a nggearǝ kǝ amǝ ɓala male.”

⁵ Ace ɗwanyi earnǝban malea a rǝì ka gandǝ pakkia kǝ turo mǝgulke ɗang, kǝ amǝkwano shen à ndaka mǝnana tsǝkbu amuria sǝ twalia wia ban rǝkwana ka.

⁶ Ndali kǝrkǝr nǝ ɗwanyi pa ɓamuru malea abani. Pǝlǝa kutio arǝ amuna-là kǝ kanigir kam.

Yesu tasǝ alaggana mana lum-nong-ɓari ka

⁷ Yesu tunǝ alaggana male mana lum-nong-ɓari ka, tasǝia ɓari-ɓari, pea wia rǝcandǝa amur akukwar.

⁸ Kwarkiria ani: “Wu kǝa twal kǝgir ace gya ɗang, ko girlina, ko luru, ko boalo a lǝpan. Kǝ gara gya nda wu nǝ̀ twal ka.

⁹ Wu oasǝ ankura, wu kǝa twal daura ɓari ɗang.”

¹⁰ Nyare banggia wia ama, “Ɓǝ̀ ya ɓala na wu kuti kam sǝ à ak wun ngga, wu do a ɓalae she pwari mǝnana wu nǝ̀ nying le ka.

¹¹ Sǝ ɓǝ̀ wu wario àkǝ̀ ban sǝ à ɓinǝ ak wun ko à ginǝ cau ma'wun ngga, wu kǝtǝrǝki tu mǝnana a kusǝ wun ngga, ɓǝ̀ wu nǝ̀ nying banì ka. Ɓǝ̀ dupia wia gir'lǝmndǝa ama, bu wun pa aɓa ɓashi mǝnana nǝ̀ yiu amuria ka ɗang!”

¹² Pǝlǝa alaggane puro, à kǝ hambi aɓwana ama ɓǝa pwanzali ɓǝa ɗeki buia arǝ acauɓikea malea.

¹³ À pusǝki akukwar arǝ aɓwana pas, à hasǝ muru amur amǝ rǝkwana pas, sǝ à twalia wia aban rǝkwana.

Lú mala Yohana Mǝbatisǝma

¹⁴ Murǝm Hirǝdus Antipas ok ce amǝnia yì agir ka, acemǝnana lullǝ Yesu akiban. Aɓea aɓwana kǝ na ama, “Yohana Mǝbatisǝma na loapi ɓembe ka! Nda gir nî sǝ kum mǝnia yì rǝcandǝa pakki agir-ndali ka.”

¹⁵ Aɓea aɓwana ama, “Iliya na.” Sǝ aɓea aɓwana ka à bangŋa ama, “Ɓe kǝ mǝɓangna mala Ɓakuli ulang amǝnana a pwaryan ngga nda.”

¹⁶ Lang Hirǝdus ok ce ka, na ama, “Yohana Mǝbatisǝma mǝnana ǝn kasǝ meali ka, nda loapi ɓembe ka!”

¹⁷ Hirǝdus nǝ nggearǝì ka tasǝna aɓwana à kya bwalǝna Yohana, à oasǝni a ndàkurban. Pak mǝnia ka ace Hirǝdiya, mala mǝ'eambǝi Filip, mǝnana yì, yì Hirǝdus ali ate ka.

¹⁸ Nda acemǝnana Yohana Mǝbatisǝma ka, camarǝ ne Hirǝdus ama, “Nggurcau ear ama wu dum nǝ mala mǝ'eambǝo ɗang!”

¹⁹ Nda gir nî sǝ Hirǝdiya bwal Yohana a bumi, kǝ earce wal-lui ka, sǝ ɓǝ̀ pà nǝ́ eare mala Hirǝdus raka, pà nǝ̀ gandǝ pakki wi kǝgir ɗang.

²⁰ Hirǝdus ka, kǝ ɓanggi Yohana; sǝ acemǝnana sǝlǝna ama Yohana ka ɓwa mǝɓoarne na, ɗǝm ngga ɓwa mala Ɓakuli na ka, kǝ yállí, eare ama kǝgir je ɗang. A koya pwari sǝ ɓǝ̀ Yohana bangcau andǝ Hirǝdus ka, ban kǝ ɓiki Hirǝdus kǝrkǝr. Sǝ kat andǝ amani ka, kǝ earce kwaki kiri arǝ Yohana.

²¹ A masǝlǝate ka Hirǝdiya kum dǝmbǝu, a pwari pakiɗire ɓǝlban mala Hirǝdus. À lamnggi agirlina, à turkiban arǝ amǝte, andǝ akasǝla, andǝ aɓwana-mǝgule mǝnana a bu-nzali Galili ka.

²² Muna-ɓwama mala Hirǝdiya puro aɓa tūli sǝ tanggwam nǝ ta ana, ban ɓoari Hirǝdus andǝ abǝri mǝnana tunǝia li ka. Gandǝa Murǝm banggi muna-ɓwama ama, “Zǝm ko mana gir nî kat a earki ce ka, mǝ nǝ po wi.”

²³ Murǝm kpapì kánmbi wi gir ama, “Gir mǝnana kat a zǝmbǝam ngga, ko ɓǝ̀ mǝ nǝ gau nzali domurǝm mem a ɓalǝu ka, mǝ nǝ po wi.”

²⁴ Kara muna-ɓwama man nyare aban ngge, ɗi ama, “Mana ado mǝ nǝ zǝm le?” Ngge ne wi ama, “Ne wi ama ɓǝa po ɓamur Yohana Mǝbatisǝma.”

²⁵ Kara nyare a kaurǝa aban murǝm sǝ ne wi ama, “Ən nggǝ earce nǝma wu pam ɓamur Yohana Mǝbatisǝma aɓa tasau àkǝ̀ dyadyan!”

²⁶ Ɓabum murǝm kiɗiki kǝrkǝr, sǝ ace kana mǝnana kana a ɓamǝsǝ abǝri male ka, gandǝ ginǝi wi ɗang.

²⁷ Àkǝ̀ banì sǝ murǝm tasǝ mǝwalki alú, ne wi ama ɓǝ̀ kya ndàkurban ɓǝ̀ kasǝ ɓamur Yohana sǝ ɓǝ̀ yinǝi. Ɓwabure pǝlǝa wario kya kasǝ ɓamur Yohana a ndàkurban

²⁸ sǝ yinǝi aɓa tasau yi pe muna-ɓwame. Yì gbal ka kutio kya pe ngge.

²⁹ Lang alaggana mala Yohana ok ce ka, à wario à kya twal lui à yì ci a ɓembe.

Yesu linǝ́ aɓwana á-tongno

³⁰ Amǝ'mishan mala Yesu nyari turo hama sǝ à yiu abani, à naki wi ce agir mǝnana kat à pakki ka andǝ agir mǝnana à kànì ka.

³¹ Yesu pǝlǝa na ama, “Wu fani sǝm nǝ̀ sunyi aban mǝnana kǝɓwa pà kàm raka, wu kya usǝlǝo.” Bangŋa anggo acemǝnana ɓwapǝndǝa pas camarǝ yiu sǝ à kǝ o, ko à kum njar à lili ɗang.

³² Nda à eauwe a waru aban ká aban mǝnana kǝɓwa pà kàm raka, yia na nǝmurǝia.

³³ Ɓwapǝndǝa pas mǝnana à sǝnia aban o ka, à surǝia, pǝlǝa à ɓangŋa a kun nggeamur aban ká. Ɓwapǝndǝa puro à koya la ka nǝ kusǝia, à kya kasǝ muria.

³⁴ Lang Yesu nǝ̀ eapi waru ka, sǝn lakki mala ɓwapǝndǝa, mǝsǝswatǝr malea bwali kǝrkǝr, acemǝnana à nda kǝla anzur mǝnana yalgir pa atea raka. Pǝlǝa tita kania wia agir pas.

³⁵ Anggo ka pwari na arǝ ká kpa, alaggana male yiu abani à yì ne wi ama, “Ban mǝnia ka kǝɓwa pà kàm ɗang, ɗǝm ngga pwari kpana.

³⁶ Ɓoaro male ka, ɗeki aɓwana ɓǝa o arǝ amuna-là aban mǝnana à nǝ̀ kum girlina kam ngga.”

³⁷ Sǝ Yesu nea wia ama, “Wu pea wia ɓe kǝgir ɓǝa li.” À ɗi ama, “Sǝm nǝ̀ kum ake? Sǝm nǝ̀ ngga pak turo boalo mala zongŋo tongno-nong-tārú sǝ sǝm nǝ̀ kur girlina mǝnana nǝ̀ karǝ amǝnia yia aɓwana ka le?”

³⁸ Pǝlǝa Yesu ɗia ama, “Bǝredi na shen a bu wun? Wu kyane wu sǝnban.” À kya sǝnban sǝ à yì ne wi ama, “Sǝm ndanǝ bǝredi tongno nǝ nji ɓari.”

³⁹ Yesu pǝlǝa nea wia ama ɓǝa tsǝk aɓwana kat ɓǝa do mbop-mbop amur bondo mǝpwale.

⁴⁰ Pǝlǝa à do mbop-mbop. Aɓea aɓwana ka à do gbǝman-gbǝman, sǝ aɓea ka, à do lumi tongno-tongno.

⁴¹ Pǝlǝa Yesu twal agbatali bǝredi mǝnia tongno andǝ anji ɓari ka a bui. Loasǝ mǝsǝì a kuli, pak hiwi amuria. Pǝlǝa ɓwanggi agbatali bǝredi, pe alaggana male ɓǝa gakia aɓwana. Ɗǝm ngga ɓwanggi anji mǝnia ɓari ka pea wia, ace mǝnana koyan ngga ɓǝ̀ kumo.

⁴² Ɓwapǝndǝa man kat ka à lili à ɗǝmbǝo.

⁴³ Alaggana ram cili ɓwanggine bǝredi andǝ nji mǝnana ue ka, à lumsǝ ago lum nong-ɓari.

⁴⁴ Aburana nǝmurǝia mǝnana à lili ka, ɓwa á-tongno na.

Yesu gya amur mùr

⁴⁵ Tu anzǝm mǝno ka, Yesu tsǝk alaggana male ama ɓǝa eauwe a waru, ɓǝa aki dǝmbǝa ɓǝa o a Beseda, sǝ yì ka, kúndǝo nǝ̀ ne aɓwabunda ɓǝa o a la.

⁴⁶ Anzǝm mǝnana tsǝngŋǝna aɓwana a ndà ka, pǝlǝa eauwe o a pak hiwi amur nkono.

⁴⁷ Lang ban bwalǝna ka, alaggana male ka à nda aɓa waru aɓa gauwa mala nggeamur, sǝ Yesu ka nda nǝmurǝì a nza.

⁴⁸ Sǝn alaggana male ka à nǝ̀ nggǝ tanniki nǝ samsǝa kǝrkǝr arǝ gung andǝ eaki-nkono mala mùr, acemǝnana gung soea. Nǝ du anzǝm ɓaria ɓua mala nggu ka, Yesu yi gbashi bania, kǝ gya amur mùr. Yi pa kǝla nǝ̀ kutia.

⁴⁹ À nǝ̀ sǝni aban gya amur nggeamur ka, à twali ama kukwar na. À mak'zwalo bang-bang,

⁵⁰ acemǝnana yia kat ka à sǝni, sǝ ǝn'o pakkia wia kǝrkǝr. Anggo ka, Yesu sa a rǝia ama, “Wu candǝ mǝsǝ wun! Mǝ nda. Ɓangciu ɓǝ̀ kǝa pakka wun ɗang!”

⁵¹ Pǝlǝa yiu eauwe atea a waru, gung nyare kur kǝs-kǝs. Yia ka à ndali kǝrkǝr, nǝ gya male amur mùr,

⁵² sǝ ɗǝm ngga, acemǝnana yia ka à bwalta ɓa gir'ndali mala linǝ́ aɓwana á-tongno nǝ bǝredi ka ɗang, ɗenyicau malea shilina, à gandǝ é ɗang.

Yesu sonzǝ amǝkwano a Jenasaret

⁵³ Lang à eauna ka, à kya kpashi nǝ bu-nzali Jenasaret, à kùr waru akano a kunto.

⁵⁴ Lang à nǝ̀ eapi waru ani ka, ɓwapǝndǝa kara sǝlǝ ama Yesu na.

⁵⁵ Pǝlǝa à purkio nǝ mire, à pwan amǝkwano amur aleso, à warinia aban mǝnana à ok gǝshì kam ngga.

⁵⁶ Koya ban Yesu kar kam ngga: aɓalǝ amuna-là, andǝ alamǝgule, andǝ anzǝm ala ka, à nongsǝ amǝ rǝkwana a kun alimo. À zǝmbǝi wi ama ko ɓǝ̀ kun daura male na ka, à nǝ̀ je; sǝ aɓwana mǝnana kat à je ka, à kum sonzǝban.