Markus 10 - Maləmce Məfele mala Ɓakuli: Kurcau Məbəshe

Kanigir amur gau doɓala

¹ Yesu ɗeki Kapanahum, wario a bu-nzali Yahudi, a nkaring Mur Jodan. Ɓwabunda yi ram ɗǝm abani à kàrǝì aɓalǝu, pǝlǝa kania wia gir kǝla mǝnana pàkkiyi ka.

² Aɓea amǝ Farisi yiu à yì karǝki nǝ ɗiban ama, “Nggurcau eare ama ɓǝ̀ ɓwa ɓǝ̀ pǝr mami le?”

³ Yesu pǝlǝa earia wia nǝ ɗiban ama, “Mana ɗe Musa bangŋa aɓa nggurcau amur gau-doɓala?”

⁴ À eare ama, “Musa eare ama, ɓǝ̀ ɓwa ɓǝ̀ gilǝî mɓwama takada gau doɓala, sǝ ɓǝ̀ tasǝ takwari ɓǝ̀ o.”

⁵ Yesu nea wia ama, “Nda ace murcandǝa ma'wun sǝ Musa gilǝa wun mǝnia yì nggurcau ka.

⁶ Sǝ mǝno ka nda njar mala Ɓakuli ɗang. A tita pusǝ ɓanza ka, ‘Ɓakuli pusǝ ɓwapǝndǝa, ɓwabura andǝ mɓwama,’ kǝla mana Malǝmce na ka.

⁷ ‘Ace mani ka, ɓwabura nǝ̀ nying tarrí andǝ ngge, nǝ̀ yia lanzǝa arǝ mami.

⁸ Yia ɓari ka à dumǝna nggūrǝu mǝ'mwashati.’ À pa ɗǝm ɓari ɗang, à nda mwashat.

⁹ Ace mani ka, gir mǝnana Ɓakuli dapi ka, ɓǝ̀ ɓwa ɓǝ̀ kǝa gauwi ɗang.”

¹⁰ Lang à nyarǝna a ɓala ka, alaggana mala Yesu ɗi amur mǝnia yì cau ka.

¹¹ Pǝlǝa nea wia ama, “Ɓǝ̀ koyana sǝ pǝr mami sǝ al ɓe mɓwama ka, nda rǝ pakki mɓwama mǝdǝmbe cauɓikea mala nongnǝban a nza nǝ doɓala nǝ ɓaria mɓwama.

¹² Sǝ ɓǝ̀ mɓwama na gbal nying burri, sǝ kya al ɓe ɓwabura ka, nda rǝ pak cauɓikea mala nongnǝban a nza nǝ doɓala.”

Yesu tsǝki amuna bu

¹³ Aɓea ɓwana yiu nǝ amuna aban Yesu ɓǝ̀ tsǝkia bu, pǝlǝa alaggana male lo à sà a rǝia.

¹⁴ Lang Yesu nǝ̀ sǝn mǝnia yì gir ka, bumi lullo arǝ alaggana male. Pǝlǝa nea wia ama, “Wu ɗekia amuna ɓǝa yiu abanam, wu kǝa pǝria ɗang. Acemǝnana domurǝm mala Ɓakuli ka, nda ace aɓwana mǝnana à nda kǝla amǝnia yia amuna ka.

¹⁵ Ən nggǝ bangga wun ɓafo, ɓwa mǝnana pà nǝ̀ ak domurǝm mala Ɓakuli kǝla muna mǝkyauwe raka, pà nǝ̀ kuti kam ɗang.”

¹⁶ Pǝlǝa twal amuna a kikili, sǝ tsǝk bui a ɓamur koyan atea ka, sǝ tsǝkia wia bu.

Lagga mǝkume

¹⁷ Lang Yesu longŋǝna nǝ̀ o ka, ɓeɓwa ɓangŋa ate kya kūndǝo a ɓadǝmbǝi, sǝ zǝmbǝi wi ama, “Malǝm mǝɓoarne, mana gir ni mǝ nǝ pa sǝ mǝ nǝ kum yilǝmu mǝnana málá male pà kàm raka?”

¹⁸ Yesu ɗi ama, “Palang sǝ a tunǝam ama Malǝm mǝɓoarne? Kǝɓwa pà kàm mǝɓoarne na ɗang, kǝ Ɓakuli na nǝmurǝì ɓǝrɓǝr.

¹⁹ A surǝ anzongcau mǝnia ka: ‘Kǝa wal lú ɗang, kǝa pak cauɓikea nongnǝban a nza nǝ doɓala ɗang, kǝa iun'i ɗang, kǝa na nyir ɗang, kǝa ɓǝmbǝriban ɗang, gusǝlǝ tárro andǝ nggo.’ ”

²⁰ Pǝlǝa ɓwabure na ama, “Malǝm, yale mǝ nda muna sǝ ǝn bwal amǝnia yì anzongcau ka.”

²¹ Yesu sǝni sǝnban earcearǝu, pǝlǝa ne wi ama, “Gir mwashat sǝ a ɗwanyi, o, kya mak girkuma mo kat, sǝ wu gaki amǝtǝr boale, a nǝ kum gǝna a kuli. Sǝ wu yiu wu yi kpa atam.”

²² Lang nǝ̀ ok mǝnia yì cau ka, nun nggur a dǝmbǝi. Pǝlǝ rǝì o nǝ ɓabumkiɗikea, acemǝnana yì ka, ndanǝ kume kǝrkǝr.

²³ Yesu pǝlǝ rǝì sǝnban, pǝlǝa ne alaggana male ama, “Amǝkume ka, nǝ kwanbia wia sǝ à nǝ̀ kutio a domurǝm mala Ɓakuli!”

²⁴ Cau male pakki alaggana male ndali. Pǝlǝa Yesu nea wia ama, “Wun amuna, kutio a domurǝm mala Ɓakuli ka kwano na a gir nì ɗang fa!

²⁵ Kutio mala mǝkume aɓa domurǝm mala Ɓakuli ka kwano kuti kutio mala kalakadambi a tūli nlerǝman.”

²⁶ Alaggana ndali kǝrkǝr. À ɗiki rǝarǝia ama, “Sǝ yana ado nǝ̀ au le?”

²⁷ Yesu sǝnia kyap-kyap, sǝ na ama, “Ɓǝ̀ mala ɓwapǝndǝa na ka, mǝ gandǝe pà kàm ɗang, sǝa ma pa anggo aban Ɓakuli ɗang. Aban Ɓakuli ka koman ngga nǝ̀ gandǝ pa.”

²⁸ Bitǝrus pǝlǝa kasǝi ama, “Sǝni, sǝm ɗekina koyagir ka, sǝm yiu a kpato!”

²⁹ Yesu pǝlǝi wi ama, “Ɓafo na, ǝn nggǝ na wun ngga, ɓǝ̀ ɓwa ɗeki ɓala, ko amǝ'eambǝi amuna-burana, andǝ amuna-mamǝna, ko ngge ko tarrí, ko amuna, ko aɓaban acem andǝ ce hamnǝ Cau Amsǝban ngga,

³⁰ nǝ̀ kum tangnakusǝi. A ɓanza mǝnia ka, nǝ̀ kum aɓala, amǝ'eambu aburana andǝ amamǝna, anggeau, amuna, andǝ aɓaban; amǝnana lakki malea nǝ̀ ká kusǝ gbǝman mala amǝnana ɗekia ka. Nǝ̀ kumia a tarǝia andǝ nutanni gbal. Sǝ a ɓanza mǝnana kǝ yiu ka nǝ̀ kum yilǝmu mǝnana málá male pà kàm raka.

³¹ Aɓwana pas mǝnana à nda tyang-tyang ado ka, à nǝ̀ ngga buricea, sǝ amǝnana à buricea ado ka, à nǝ̀ ngga duk tyang-tyang.”

Yesu na cau ɗǝm amur lú male

³² À nda aban o a Urǝshalima ka, Yesu ak dǝmbǝa kǝ ká sǝ alaggana male na ate. Alaggana male ndali kǝrkǝr, sǝ acili aɓwana mǝnana à kǝ yiu atea ka ɓangciu pakkia wia, acemǝnana a Urǝshalima ka, aɓwana na kam pas mǝnana à ɓinǝmǝsǝì ka. Pǝlǝa Yesu tunǝ alaggana male lum-nong-ɓari a giriban, sǝ banggia wia koyagir mǝnana nǝ̀ ngga kumi ka.

³³ Nea wia ama, “Sǝm ndya sǝm kǝ eauwe aban o a Urǝshalima ka. Muna mala Ɓwa ka à nǝ̀ ngga kurna kuro nǝi, aban agbani pǝris andǝ amǝkani Nggurcau mala Musa. À nǝ̀ kasǝi wi ɓashi lú, sǝ à nǝ̀ tasǝi a bu aɓwana mǝnana amǝ Yahudi na raka.

³⁴ Yia ka à nǝ̀ oali, à nǝ̀ tapi ntara a rǝì, à nǝ̀ kwe, sǝ à nǝ̀ wal-lui. Sǝa ma anzǝm anongŋo tārú ka nǝ̀ lo nǝ yilǝmu.”

Zǝmbǝa mala Jemis andǝ Yohana

³⁵ À nǝ̀ nggǝ ká a njar ka, Jemis andǝ Yohana, amuna mala Zabadi, à yiu abani tu à yì ne wi ama, “Malǝm, sǝm nggǝ earce ama wu pakka sǝm gir mǝnana sǝm nǝ̀ zǝmbǝo wu pak ka!”

³⁶ Yesu pǝlǝa ɗia ama, “Mana wu earkiyice mǝ pakka wun?”

³⁷ À eari wi ama, “Pwari mǝnana a nǝ do a bunomurǝm mǝɓoarɓwe mo ka, ɓǝ̀ mwashat ata sǝm ɓǝ̀ do a buo mǝli, sǝ ɓeɓwa ɓǝ̀ do a buo mǝnggare aɓa ɓoarɓwa mo.”

³⁸ Yesu earia wia ama, “Wu surǝ gir mǝnana wu zǝmnggiyi ka ɗang. Wu nǝ̀ gandǝ nu aɓa kwap mala tanni mǝnana mala mǝ nǝ nu kam ngga, ko wu nǝ̀ gandǝ ak batisǝma mala walban lú kǝla mǝnana dumǝnam púp à nǝ̀ wal luem ngga le?”

³⁹ À pǝlǝa à eare ama, “Sǝm nǝ̀ gandǝi.” Yesu nea wia ama, “Ɓafo na wu nǝ̀ nu aɓa kwap mǝnana dupǝnam púp mǝ nǝ nu kam ngga, sǝ à nǝ̀ pakka wun batisǝma mǝnana dumǝnam púp à nǝ̀ pakkam ngga.

⁴⁰ Sǝa ma, pa aɓa buam ɓǝn tsǝk ɓwa ɓǝ̀ do ata buam mǝli ko a buam mǝnggare ɗang. Ɓakuli gilǝki amǝno yì aban ngga ace aɓwana mǝnana tarkia ka.”

⁴¹ Lang acilia alaggana mana lum nǝ̀ ok gir mǝno Jemis andǝ Yohana alkite ka, bumia lullo.

⁴² Pǝlǝa Yesu tunǝia à yì rambǝa, sǝ nea wia ama, “Kǝla mana wu sǝlǝ ka, aɓwana mǝnana à surǝia ama à nda ka murǝma ko à nda ka ɓwana-mǝgule a ɓanza man ngga, à kǝ lǝmndǝ rǝcandǝa amur aɓwana mana à nda aɓatea ka.

⁴³ Sǝa ma ata wun ngga pà nǝ̀ pa anggo ɗang. Ɓwa mǝnana kǝ earce nǝ̀ duk ɓwamǝgule ata wun ngga, dumǝna púp nǝ̀ duk rítǎu mala acilia.

⁴⁴ Sǝ ɓwa mǝnana earce ama nǝ̀ duk mǝ dǝmbǝa ka, dumǝna púp nǝ̀ duk guro mala aɓi kat.

⁴⁵ Ko nggearǝ Muna mala Ɓwa ka yiu ace mǝnana nǝ̀ do sǝ ɓǝ̀ aɓwana pakki wi turo ka ɗang. Yì ka, yiu ace mǝnana nǝ̀ pakki aɓwana turo, sǝ ɓǝ̀ pa yilǝmi ace amsǝ ɓwabunda pas.”

Nte Bartimawus kum sǝnban

⁴⁶ Yesu andǝ alaggana male yi bik Jeriko. Lang a nda aban puri ɓa Jeriko ka, aɓwana pas kana atea. Ɓe nte na kam lullǝi ama Bartimawus, muna mala Timawus, dumǝna a girǝi njargula aban zǝmnggi agir.

⁴⁷ Lang nǝ̀ ok ama Yesu Ɓwa Nazarat na kǝ kuti ka, tita loasǝ gi kǝ na ama, “Yesu, Mǝkà Dauda, sǝn mǝsǝswatǝr mem!”

⁴⁸ Aɓwana pas loarǝi, à pyau wi ɓǝ̀ pwalo. Kara nyare loasǝ gi kam kpǝm ama, “Mǝkà Dauda, sǝn mǝsǝswatǝr mem!”

⁴⁹ Lang Yesu oe ka, pǝlǝ rǝì sǝ came, na ama, “Wu tunǝi ɓǝ̀ yiu.” Pǝlǝa à tunǝi yì nte, à ne wi ama, “Ɓǝ̀ banɓoaro, lo, nda kǝ tunǝo ka.”

⁵⁰ Kara túr girkumsǝo male anggo, lo pǝrpǝr yiu aban Yesu.

⁵¹ Yesu ɗi ama, “Mana a earce ama mǝ pakko?” Nte man pǝlǝa ne wi ama, “Malǝm, ǝn nggǝ earce sǝnban!”

⁵² Yesu ne wi ama, “Kyane, guliarǝu mo arǝ Ɓakuli twalǝno ban rǝkwana.” Àkǝ̀ banì kara sǝnban, pǝlǝa kpata Yesu aban o a njargula.