Luka 8 - Maləmce Məfele mala Ɓakuli: Kurcau Məbəshe

Amamǝna mana à pe Yesu gbasha ka

¹ Tu anzǝm man ngga Yesu gya arǝ ala mǝgulke andǝ amuna-là ɗàngɗáng aban hamnǝ Cau Amsǝban mala Domurǝm mala Ɓakuli. Alaggana male man lum-nong-ɓari ka, à nda ate.

² Aɓea mamǝna mǝnana à pusǝ akukwar a rǝia sǝ à twalia wia ban arǝkwana ka, à nda gbal ate. Amǝnia yì amamǝna ka à ndaka Maryamu (mǝnana à tunǝki ama Ɓwa Magdala), mana à pusǝ akukwar tongno-nong-ɓari a rǝì ka,

³ andǝ Joana mālá Kuza, mǝnana kǝ ɗenyi nǝ ɓala mala Murǝm Hirǝdus ka, sǝ Suzana andǝ acilia pas. À kǝ pakki Yesu andǝ alaggana male gbasha nǝ girkuma malea.

Kanicau arǝ mǝɓeale

⁴ Lang ɓwabunda na arǝ rambǝa sǝ aɓwana na rǝ purki arǝ ala ɗàngɗáng aban yiu aban Yesu ka, Yesu pǝlǝa nea wia mǝnia yì kanicau ka:

⁵ Ɓe mǝ'rya wario a ɓeale. Nda ban kok mǝsǝɓeale ka, aɓea sukkio amur njargula. Aɓwana parkia a ɓakusǝia sǝ amuna-nyal mana a kuli ka à yì tarkia.

⁶ Aɓea sukkio amur tali, lang à purna ka kara à ime, acemǝnana à kum banpwala ɗang.

⁷ Aman sukkio aɓalǝ azwe, sǝ à gulo andǝia ka, kara zwe sorǝkia.

⁸ Sǝ aman ngga à sukkio amur nzali mǝɓoarne. À puro, à gulo, à kya ɓǝla, ko mǝyani ka pusǝ ɓǝle kuti mǝnana à ɓeali ka kusǝ gbǝman. Yesu bangŋǝna mǝnia yì cau ka, pǝlǝa loasǝ gi na ama, “Ɓwa mǝnana ndanǝ kir okban ngga ɓǝ̀ o.”

Yesu mǝnggi ɓa kanicau mala mǝɓeale

⁹ Alaggana mala Yesu ɗi ama, mana nda ɓa mǝnia yì kanicau ka.

¹⁰ Pǝlǝa nea wia ama: Wun ngga à pana wun surǝ gir ɓa sǝmbǝrǝa mala Domurǝm mala Ɓakuli. Sǝ mala acili aɓwana ka, ǝn nggǝ nea wia nǝ kanicau ace mǝnana ɓǝa lumsǝ cau ɓa Malǝmce mǝnana ama: “À nǝ̀ sǝnban, sǝ à pà nǝ̀ sǝn kǝgir ɗang; À nǝ̀ okban, sǝ ce pà nǝ̀ kpakia wia ɗang.”

¹¹ Mǝnia ka ndà ɓa man yì kanicau: Mǝsǝɓeale ka nda cau mala Ɓakuli.

¹² Amǝsǝɓeale mǝnana à kpa mur njargula ka, à ndaka aɓwana mǝnana a o, sǝ Shetan yiu yi pwan cau mǝnana a ɓabumia ka, ace mǝnana ɓǝa kǝa pà ɓamuria ɓǝa kum auwa ɗang.

¹³ Amǝnana amur tali ka, à ndaka aɓwana mǝnana à ok cau ka, à é nǝ bumpwasǝa, sǝ cau kum kutio a ɓabumia ɗang. Paɓamuru malea ka banì sau ɗang, pwari karǝkiban yiu ka kara à kpa.

¹⁴ Amǝsǝɓeale mǝnana à kpa aɓalǝ azwe ka, à ndaka aɓwana mǝnana à ak cau mala Ɓakuli, sǝ nǝ nzǝmo ka aɗenyicau mala doɓanza andǝ alta kume, sǝ bumpina arǝ kum banɓoarnado mala gir ɓanza, yi tsǝa ko à ɓǝl ɗang.

¹⁵ Sǝ amǝsǝɓeale mǝnana a nzali mǝɓoarne ka, à ndaka aɓwana mǝnana à ok cau sǝ à bwali nǝ ɓabum mǝɓoarne mǝɓafoe ka. À lidǝmbǝa aɓa gandǝrǝu, sǝ cau pusǝ ɓealǝu mǝɓoarne aɓalǝia.

Kanicau arǝ pitǝla

¹⁶ Ɓwa pà nǝ̀ tsǝk bǝsa a pitǝla sǝ nǝ̀ kùmsǝi wi nkenye amuri, ko nǝ̀ oasǝi a tǝta gado ɗang. Nǝ̀ gyari a kuli ace aɓwana mǝnana à nǝ̀ kuti ka ɓǝa sǝn tǎlaban.

¹⁷ Kǝgir pà kàm a sǝmbǝrǝa mǝnana à pà nǝ̀ pusǝ ce raka, sǝ kǝgir pà kàm mǝnana à nǝ̀ gir ce, mǝnana à pà nǝ̀ surǝì ko tè pà nǝ̀ pur raka.

¹⁸ Wu tsǝkiru arǝ gir mǝnana wu kǝ ok ka. Ɓwa mǝnana ndanǝi ka, à nǝ̀ tsǝki wi ɓe amuri. Sǝ ɓwa mǝnana pànǝi raka, ko mǝnana kǝ sǝni kǝla ndanǝi ka, à nǝ̀ é a rǝì.

Nggea Yesu andǝ amǝ'eambǝi

¹⁹ Pǝlǝa nggea Yesu andǝ amǝ'eambǝi yiu abani, sǝ ace lakki mala aɓwana ka à bwal bani ɗang.

²⁰ Pǝlǝa ɓeɓwa ne Yesu ama, “Nggo andǝ amǝ'eambǝo ka, à nda ban came a nza, à kǝ earce sǝno.”

²¹ Yesu nea wia ama, “Nggem andǝ amǝ'eambǝam ngga, à ndaka ɓwana mǝnana à kǝ ok cau mala Ɓakuli sǝ à kǝ tsǝi aɓa turo ka.”

Yesu tamsǝ nggea gung

²² A ɓe pwari mwashat Yesu ne alaggana male ama, “Wu fani sǝm nǝ̀ eauwe a ɓe nkaring nggeamur.” Pǝlǝa à eauwe a waru aban ká.

²³ À nda rǝ o ka, Yesu koa ntulo. Kara nggea gung mǝcande longŋǝna ɓua a nggeamur, ɓǝ́ kongsǝna waru. Yia ka à nda aɓa nggea tanni mǝgule.

²⁴ Alaggana wario à kya loasǝkì a ntulo ama, “Ɓwamǝgule, Ɓwamǝgule, sǝm ndo sǝm nǝ̀ ko!” Yesu lo pǝlǝa sà arǝ gung andǝ mur mǝnana gung kǝ loasǝki ka. Kara gung kur kǝkǝs, ban nyare pwal ɗǝong.

²⁵ Yesu pǝlǝa ɗi alaggana male ama, “Guliarui ma'wun na ke?” Ɓangciu pakkia wia, à ndali pǝlǝa à ɗi rǝarǝia ama, “Ya ɓwa nda man, mǝnana sa arǝ gung andǝ mur, pǝlǝa à oki wi ka!”

Yesu pusǝ kukwar arǝ ɓeɓwa

²⁶ Yesu andǝ alaggana male samsǝa à yàllî nggeamur Galili à kya kpasha a bu-nzali mala amǝ Gerasin.

²⁷ Lang Yesu nǝ̀ eauwe anza ka, kara ɓe ɓwabura nia, mǝnana nǝ́ akukwar a rǝì ka. Ɓwabure pur amǝno yì la ka. Ɓwabure ka banì sauwuna oasǝ agir-nggurǝu a rǝì ɗang, sǝ dukiyi a ɓala ɗang, akiyi rǝì aɓalǝ aɓembe.

²⁸ Lang nǝ̀ sǝn Yesu ka, kara mak zwalo bang-bang, yi kpa a ɓadǝmbǝi, loasǝ gi kǝrkǝr ama, “Mana ǝn pakko, Yesu, Muna mala Ɓakuli mana Karban kat ka? Ən nggǝ zǝmbǝo, kǝa pam tanni ɗang!”

²⁹ Ne anggo acemǝnana Yesu angŋǝna dǝmbǝa sàrǝ̀nà amǝnia yì akukwar ka ɓǝa purî rǝ mǝnia yì ɓwa ka. Kusǝ pas ka abangŋo mǝɓane man kǝ lo a rǝì. Sǝ kat andǝ amani ama aɓwana nǝ̀ taka akusǝi andǝ abui nǝ anko andǝ ansolo, sǝ à nǝ̀ tamsǝ aɓwana ɓǝa yallí ka, nǝ̀ kasǝki ansolo, nǝ̀ ɓunggia anko. Pǝlǝa akukwar nǝ̀ um nǝi a ɓabondo.

³⁰ Yesu ɗi ama, “Lullǝo a mana?” Pǝlǝa eare ama, “Lullǝam nda Pas.” Bangŋa anggo acemǝnana akukwar pas sǝ à kutia rǝì.

³¹ Akukwar nì camarǝ zǝmbǝi Yesu ama ɓǝ̀ kǝa tasǝia aɓa tuli-tàtǝkǝtè, yì tuli-bǝsa ɗang.

³² A girǝi bania anggo ka, nggea domwan mala atǝmbǝrǝm-ɓala nakam, aban likiali a bum-nkono. Akukwar nì zǝmbǝi Yesu ama ɓǝ̀ earia wia ɓǝa kya kutio arǝ atǝmbǝrǝm-ɓala mǝno, pǝlǝa earia wia ɓǝa kyane.

³³ Lang akukwar purî rǝ mǝnia yì ɓwa ka, à kya kutio arǝ atǝmbǝrǝm-ɓala. Kara domwan man kat giɓi nǝ mire a pal nkono à kya ɓunno a kun gwanyi mǝdāre, à sukkio aɓa anggeamur, à ko kat à wu mbǝtǝp.

³⁴ Lang amǝyal atǝmbǝrǝm-ɓala sǝn gir mǝnana kumban ngga, à sarǝa mire aban o, à kya bangce a la andǝ acilia ban aɓa bu-nzali mǝno.

³⁵ Ɓwabunda puro aban ká sǝn gir mǝnana kumban ngga. Lang à yina aban Yesu ka, à yì kum mǝnia yì ɓwa mǝnana akukwar purî rǝì ka, aban do a ɓadǝm Yesu nǝ agir-nggurǝu a rǝì, ɗenyicau male nyarǝna a rǝì, sǝ ɓangciu pakkia wia.

³⁶ Aɓwana mǝno à sǝn gir nî nǝ mǝsǝia ka, à kanî aɓwana ce pusǝo mǝnana à pusǝ akukwar arǝ mǝnia yì ɓwa ka.

³⁷ Ɓwabunda kat mǝnana a bu-nzali mǝno mala amǝ Gerasin ngga, à zǝmbǝi Yesu ama ɓǝ̀ upi nzali malea, acemǝnana ɓangciu pakkia wia kǝrkǝr. Lang Yesu eauwe a waru, nǝ̀ nyare nǝ̀ o ka,

³⁸ ɓwa mǝnana akukwar purî rǝì ka zǝmbǝi wi ama, nǝ̀ o a te. Sǝ Yesu ɓine, ne wi ama,

³⁹ “Nyare a la ma'wun kya na ce nggea gir mǝgule mǝnana Ɓakuli pakko wi ka.” Pǝlǝa mǝnia yì ɓwa ka nyare o a la malea, camarǝ bang ce gir mǝnana Yesu pakki wi ka.

Muna Jarus andǝ mɓwama mǝ rǝkwana

⁴⁰ Lang Yesu nyarǝna ka, ɓwabunda gingsǝi, acemǝnana à nda aban kundǝe.

⁴¹ Pǝlǝa ɓeɓwa, lullǝi ama Jarus, ɓwamǝgule mala Ndakpapi, yiu yi kpa a ɓadǝm Yesu, kǝ ɓuakia rǝì ama ɓǝ̀ yiu ate a ɓala male,

⁴² acemǝnana kǝ mǝɓoarnsarile mwashat ɓǝrɓǝr, mǝnana ndanǝ apǝlǝa lum-nong-ɓari ka, kuni mala nǝ̀ kumsǝo. Yesu bwalǝna njargula aban ká, ɓwabunda mǝnana lo a te ka nggiki kǝrkǝr.

⁴³ Ɓe mɓwama na aɓalǝia, mǝnana pak apǝlǝa lum-nong-ɓari nkila na aban sukkio a rǝì. Mal girkuma male aban amǝ sonzǝo, sǝ kǝɓwa gandǝ sonzǝe ɗang.

⁴⁴ Ɓwama man kar nǝ nzǝm Yesu, je kun daura male, anggo ka kara sukkio mala nkila male came.

⁴⁵ Yesu ɗiban ama, “Yana ɓwe jem?” Koyan ngga na ama ndà ɗang. Pǝlǝa Bitǝrus na ama, “Ɓwamǝgule, ɓwabunda kārǝio aɓalǝu, sǝ à kǝ ramnggio, sǝ a kǝ ɗiban ama, ‘Yana ɓwe jem?’ ”

⁴⁶ Sǝ Yesu ka bangŋa ama, “Ɓe ɓwa jenam, ǝn sǝlǝa, acemǝnana ǝn ok rǝcandǝa puro a rǝam.”

⁴⁷ Lang mɓwama man sǝnǝni te no nǝ̀ pur ka, puro rǝì kǝ ɓǝla, yi kpa a ɓadǝm Yesu. A ɓamǝsǝ ɓwabunda kat, bang tǝr gir mana tsǝi sǝ je Yesu, andǝ kumo mǝnana kum rǝpwala àkǝ̀ banì ka.

⁴⁸ Sǝ Yesu ne wi ama, “Ɓoarnsarilem, guliarǝu mo twalǝno ban rǝkwana mo, o aɓa rǝpwala.”

⁴⁹ Yesu na arǝ na cau piu ka, ɓeɓwa pur nǝ ɓala mala Jarus, yì ɓwamǝgule mala Ndakpapi. Yi ne Jarus ama, “Ɓoarnsarileo pangŋǝna lú. Kǝa pe Malǝm tanni ɓà ɗang.”

⁵⁰ Lang Yesu ok ce ka, ne Jarus ama, “Ɓangciu ɓǝ̀ kǝa pakko ɗang, we ka tamsǝ ɓabumo, rǝ munio nǝ̀ malâ.”

⁵¹ Lang à yì bwalǝna ɓala mala Jarus ka, Yesu eari kǝɓwa kutio ate ɗang, she kǝ Bitǝrus, sǝ Yohana andǝ Jemis, sǝ tár muna andǝ ngge.

⁵² Anggo ka ɓwapǝndǝa kat à nda rǝ ɓua sǝ à kǝ keban ace. Yesu nea wia ama, “Wu kǝa ɓua ɗang, muna ka wu ɗang, nda a ntulo!”

⁵³ Kara à oali oalo kyauwikiban, acemǝnana à sǝlǝna ama muna ka wu na.

⁵⁴ Pǝlǝa Yesu bwal muna a garabui, sǝ na ama, “Munem, lo!”

⁵⁵ Yilǝmi muna kara nyare, sǝ par bui lo cam nǝ came. Yesu pǝlǝa nea wia ama, ɓǝa pe wi girlina ɓe li.

⁵⁶ Atár muna andǝ ngge ndali kǝrkǝr. Pǝlǝa Yesu nunkiria, ama ɓǝa kǝa ne kǝɓwa ce gir mǝnana kumban ngga ɗang.