Luka 4 - Maləmce Məfele mala Ɓakuli: Kurcau Məbəshe

Shetan karǝki Yesu

¹ Yesu lumsǝ nǝ Bangŋo Mǝfele, nyari Nggeasala Jodan ngga, Bangŋo mala Ɓakuli um nǝi a ɓabondo.

² Akano ka Shetan camarǝ karǝkì nongŋo lumi-ine. Aɓalǝ amǝno yì anonggeo ka li kǝgir ɗang. A masǝlǝata anongge ka nzala wali.

³ Shetan ne wi ama, “Ɓǝ̀ a nda Muna mala Ɓakuli ka, ne mǝnia yì tali ka ɓǝ̀ pǝlǝ nɗǝmo.”

⁴ Yesu nyesǝi wi ama, “À gilǝ a Malǝmce mala Ɓakuli ama, ‘Ɓwa pà nǝ̀ au nǝ girlina nǝmurǝì ɗang.’”

⁵ Shetan loasǝi um nǝi a nggea ban mǝdāre, sǝ lǝmndǝì wi anzali-murǝm mala ɓanza kat aɓa kuɓimǝsǝu.

⁶ Pǝlǝa Shetan ne wi ama, “Mǝ nǝ po arǝcandǝa malea andǝ ɓoarɓwa malea kat, acemǝnana à panamia. Mǝ nǝ gandǝ pe ko yan mǝnana ǝn earce pe wi ka.

⁷ Sǝ ɓǝa kūndǝo, a gusǝlǝam ngga, agir man nǝ̀ duk amo yia kat.”

⁸ Yesu nyesǝi wi ama, “À gilǝ a Malǝmce mala Ɓakuli ama, “ ‘Peri aban Mǝtalabangŋo Ɓakuli mo, sǝ wu kpate yì nǝmurǝì.’”

⁹ Shetan nyare loasǝi um nǝi a Urǝshalima, kya tamsǝi a ɓwang Ndàmǝgule mala Ɓakuli, sǝ ne wi ama, “Ɓǝ̀ a nda Muna mala Ɓakuli ka, ta zurro a nzali.

^10-11 Acemǝnana Malǝmce mala Ɓakuli bangŋa ama, “ ‘Ɓakuli nǝ̀ tsǝk amǝturonjar male aceo ɓǝa yalo caca; à nǝ̀ mbalǝkio a ɓabuia ace mǝnana wu kǝa tul kusǝo arǝ tali raka.’ ”

¹² Yesu nyesǝi wi ama, “À gilǝ aɓa Malǝmce mala Ɓakuli ama, ‘Ce a karǝki Mǝtalabangŋo Ɓakuli mo ɗang.’ ”

¹³ Lang Shetan malǝna karǝki Yesu ka, pǝlǝa gǝshì banì zuku.

¹⁴ Yesu nyare a Galili aɓa rǝcandǝa mala Bangŋo mala Ɓakuli. Cau male akiban kat aɓa nzali mǝno.

¹⁵ Kanigir arǝ andakpapi malea, sǝ koyan ngga ɓwangsǝki.

À ɓinǝ Yesu a Nazarat

¹⁶ Yesu kutio a Nazarat la mǝnana gul kam ngga. A pwari Sabbat, pwari usǝlǝo mala amǝ Yahudi ka, Yesu kutio a ndakpapi kǝla mǝnana pakki ka. Lo came nǝ̀ ɓal cau aɓa Malǝmce.

¹⁷ Pǝlǝa à pe wi Malǝmce mala Ishaya Mǝɓangna mala Ɓakuli. Lang mǝnni ka pǝlǝa kum ban mǝnana à gilǝa ama,

¹⁸ “Bangŋo mala Mǝtalabangŋo na a muram, acemǝnana tarnam ɓǝn hamnǝ Cau Mǝɓoarne aban amǝtǝr. Tasǝam ɓǝ̀n yi hamnǝ cau mala panzǝban aban aɓwana mǝnana à kùria ka. Ɓǝa nyesǝi ante mǝsǝu sǝnban, sǝ ɓǝa pusǝ aɓwana mǝnana à nda aɓata parban ngga a gung.

¹⁹ Ɓǝn hama ama pwari mana Ɓakuli nǝ̀ amsǝ aɓwana male nǝi ka yina.”

²⁰ Pǝlǝa kar Malǝmce pe mǝ ɗenyi nǝia, ɓunte do. Mǝsǝ ɓwapǝndǝa mǝnana a ndakpapi ka kar a rǝì kat.

²¹ Pǝlǝa tita nea wia ama, “Mǝnia yì cau ɓa Malǝmce mala Ɓakuli kir wun oe ka, lumsǝna yalung.”

²² Ko yan ngga bang cau mǝɓoarne amuri, sǝ à pak ndali arǝ sǝlǝ nacau male mǝɓuɓɓuki. Pǝlǝa à ɗiban ama, “Nggearǝì ka, muna mala Yisǝfu na man re?”

²³ Yesu nea wia ama: Ɓafo ka wu nǝ̀ nam mǝnia yì kun-nacau ka, ama, “Mǝsonzǝo, sonzǝ ɓamuro!” Ɗǝm ngga wu nǝ̀ nam ama, “Agir mǝnana sǝm ok ama a pakkia a Kapanahum ngga, pea kani a là mo.”

²⁴ Ən nggǝ bangga wun mǝsǝcau, kǝ mǝɓangna mala Ɓakuli pà kàm mǝnana à earnǝi a là male ka ɗang.

²⁵ Ən nggǝ na wun mǝsǝcau ama, aman-lú nakam pas a nzali Isǝrayila a nza mala Iliya mǝɓangna mala Ɓakuli a baku mǝnana mbulo came pǝlǝa tārú nǝ cili, sǝ nggea nzal-gula kpa a nzali kat ka.

²⁶ Kat anggo ka Ɓakuli tasǝ Iliya aban kǝɓwa atea ɗang, she aban ɓe man-lú a Zarefat, a bu-nzali Sidon kano kuko.

²⁷ Amǝdakali nakam pas a nzali Isǝrayila a nza mala Elisha mǝɓangna mala Ɓakuli, kat anggo ka Ɓakuli sonzǝ kǝɓwa atea ɗang, she kǝ Naaman, bǝri ɓwa Suriya.

²⁸ Aɓwana mǝnana kat a ndakpapi ka bumia lullo lang à ok amǝnia yì acau ka.

²⁹ Pǝlǝa à lo à ramnggi ta Yesu, à pusǝì anzǝm la, à um nǝi amur muna-nkono mǝnana la malea cam amuri ka, ama à nǝ̀ ramte ɓǝ̀ kpa.

³⁰ Kara gya kutio a nre ɓwabunda, bwal njar male aban o.

Yesu pusǝ akukwar

³¹ Pǝlǝa Yesu sulǝo aban ká Kapanahum, ɓe la aɓa bu-nzali Galili. A pwari usǝlǝo ka tita kani aɓwana gir.

³² À ndali nǝ kanigir male acemǝnana cau male ka ndanǝ rǝcandǝa.

³³ Aɓa ndakpapi ka, ɓeɓwa nakam nǝ kukwar a rǝì. Lo mak zwalo bang-bang kǝ na ama,

³⁴ “Oi! Mana a alkite arǝ sǝm, we Yesu Ɓwa Nazarat. A yiu ace wal sǝm le? Ən surǝna rǝo, a nda Ɓwa Mǝfele mala Ɓakuli.”

³⁵ Yesu sà a rǝì ama, “Gir kuno piu! Puri rǝì!” Pǝlǝa kukwar loasǝi me a nzali a ɓadǝm ɓwapǝndǝa kat, pǝlǝa puri rǝì, tsǝki wi pengye ɗang.

³⁶ Ɓwapǝndǝa kat ndali, à kǝ nea rǝia ama, “Ulang ya kanigir na man? Nǝ nacau sàrǝban andǝ rǝcandǝa mǝgule sǝ kǝ pusǝ akukwar!”

³⁷ Kara cau mala Yesu akiban kat a bu-nzali malea.

Yesu twalia aɓwana pas ban rǝkwana

³⁸ Yesu pǝlǝa puri Ndakpapi kutio a ɓala mala Shiman. Nkil Shiman ngga ɓauwa gandǝi nongsǝi. Pǝlǝa à zǝmbǝi Yesu ɓǝ̀ sonzǝi.

³⁹ Yesu kūndǝo amuri sǝ gim ɓauwa, pǝlǝa ɓauwa sulǝi rǝì. Kara long nǝ lo àkǝ̀ banì pea wia girlina.

⁴⁰ Lang pwari na rǝ kpa ka, ɓwapǝndǝa yinǝ amǝkwano ɗàngɗáng, pǝlǝa tsǝk bui amur koyan aɓalǝia ka, twalia wia ban rǝkwana kat.

⁴¹ Ɗǝm ngga akukwar puri rǝ aɓwana pas, à kǝ loasǝ gia ama, “A nda Muna mala Ɓakuli.” Yesu gimbia, eare ama ɓǝa na kǝ cau ɗang, acemǝnana à sǝlǝna ama yì ka, nda Kǝrǝsti Mǝ'amsǝban.

Yesu hamnǝ cau mala Ɓakuli arǝ andakpapi

⁴² Nǝ tadǝmbari ka Yesu lo o aban mǝnana kǝɓwa pà kàm raka. Ɓwapǝndǝa camarǝ alte. Lang à kumǝni ka, à ɓariki à nǝ̀ kasǝkuni acemǝnana ɓǝ̀ kǝa nyia ɗang.

⁴³ Pǝlǝa nea wia ama, “Dumǝnam púp mǝ hamnǝ Cau Amsǝban mala Domurǝm mala Ɓakuli arǝ aɓea lá gbal, acemǝnana àkǝ̀ ce sǝ à turam.”

⁴⁴ Pǝlǝa kutio aban hamnǝ cau arǝ andakpapi, a nzali Yahudi.