Biblia Todo Logo
Bìoball air-loidhne

- Sanasan -

Luka 3 - Maləmce Məfele mala Ɓakuli: Kurcau Məbəshe


Hama mala Yohana Mǝbatisǝma

1 Nda aɓa lum-nong-tongnoea pǝlǝa mala do murǝm mala Kaisar Tiberiya, murǝm mǝgule mala amǝ Roma. Buntu Bilatus nda nggwamna mala bu-nzali Yahudi. Hirǝdus nda murǝm mala bu-nzali Galili, sǝ mǝ'eambǝi Filip nda murǝm mala abu-nzali Ituriya andǝ Tǝrakonitis. Lisaniyas nda murǝm mala bu-nzali Abilini.

2 Annas andǝ Kayafas ka à nda ka apǝris mǝgule. A baku mǝno ka cau mala Ɓakuli yiu aban Yohana muna mala Zakariya a ɓabondo.

3 Yohana ka kutio arǝ ala mǝnana a kun Nggeasala Jodan ngga, kǝ hamnǝ cau ama, “Wu pwanzali, wu ɗeki bu wun arǝ acauɓikea ma'wun, ɓǝa pakka wun batisǝma, ace mǝnana Ɓakuli ɓǝ̀ twala wun ban acauɓikea ma'wun ngga.”

4 Kǝla mǝnana à gilǝì aɓa Malǝmce mala Ishaya mǝɓangna mala Ɓakuli ɗiɗyal ama: “Gi ɓeɓwa kǝ tunǝban a ɓabondo ama, ‘Wu gilǝki tanjar mala Mǝtalabangŋo; Wu tsǝk atanjar ɓǝa cam pǝrapǝra ace.

5 Koya ɓatuliban ngga à nǝ̀ lumsǝí, koya nkono andǝ muna nkono ka à nǝ̀ bǝbbǝrǝki. Atanjar mǝkarke ka à nǝ̀ sārǝia, aban mana gwangɗing- gwangɗing ngga à nǝ̀ gilǝkia ɓǝa nong pàling.

6 Sǝ ɓwapǝndǝa kat ka nǝ̀ sǝn amsǝban mala Ɓakuli!’ ”

7 Yohana ne aɓwabunda mǝnana à kǝ yiu abani ɓǝ̀ pakkia wia batisǝma ka ama, “Wun amuna baffu, yan sangsǝ kir wun ama ɓǝ̀ wu ɓanggi nggea bumlulla mala Ɓakuli mǝnana kǝ yiu ka?

8 Wu pusǝ ɓealǝu mǝnana nǝ̀ lǝmndǝ ama wu pwanǝna'nzali, wu nyingŋǝna acauɓikea ma'wun ngga. Wu kǝa twali ama do ma'wun kǝla amǝkau mala Ibǝrayim ngga nǝ̀ amsǝ wun ɗang. Ən nggǝ na wun ama aɓalǝ atali man ngga, Ɓakuli nǝ̀ gandǝ loasǝi Ibǝrayim amǝkau.

9 Ko ado ka kun bero na a tǝrta anggun. Koya nggun mǝnana pà nǝ̀ pusǝ ɓǝle mǝɓoarne raka à nǝ̀ kasǝi à nǝ̀ turi a bǝsa.”

10 Ɓwabunda pǝlǝa ɗi Yohana ama, “Sǝ mana ado sǝm nǝ̀ pa?”

11 Yohana earia wia ama, “Ɓwa mǝnana kat ndanǝ adaura ɓari ka, ɓǝ̀ nyesǝ ɓe ɓǝ̀ pè ɓwa mǝnana pa nǝi raka. Ɓwa mǝnana nǝ girlina ka, ɓǝ̀ pè aɓwana mǝnana à pa nǝi raka.”

12 Amǝ'ak boalo-cemi gbal ka à yiu ama ɓǝa pakkia wia batisǝma. Pǝlǝa à ɗi ama, “Malǝm, mana sǝm nǝ̀ pa?”

13 Yohana pǝlǝa nea wia ama, “Wu kǝa ak gir mǝnana kuti mana à kasǝa wun ngga ɗang.”

14 Aɓea soje ɗi ama, “Sǝ sǝm ngga, mana sǝm nǝ̀ pa?” Pǝlǝa nea wia ama, “Wu kǝa kumsǝ kun kǝɓwa ɗang, wu kǝa ɓumbi kǝɓwa cau ɓà a rǝì ɗang. Wu do amur kǝ boalo zongŋo ma'wun.”

15 Ɓwapǝndǝa kwaki kiria, nǝ tsǝkɓalǝu, à kǝ ndali nǝ ɓabumia ko Yohana nda Kǝrǝsti Mǝ'amsǝban.

16 Pǝlǝa Yohana earia wia kat ama, “Ən nggǝ pakka wun batisǝma nǝ mur. Sǝ ɓeɓwa nakam kutiam nǝ gulo, nda nǝ̀ yiu ka. Anggur-nkura male ka, ǝn kārǝa mǝ nǝ panzǝia ɗang. Yì ka, nǝ̀ yia pakka wun batisǝma nǝ Bangŋo Mǝfele andǝ bǝsa.

17 Kwar sarǝgir male na bui. Nǝ̀ yia esǝki katǝra, nǝ̀ ram mǝsǝsa a bah male, sǝ kwá ka nǝ̀ pisǝì nǝ bǝsa mǝnana pà nǝ̀ linggi raka.”

18 Anggo nǝ aɓea cau pas sǝ Yohana kwarkir ɓwapǝndǝa sǝ hamnǝ Cau Amsǝban abania.

19 Sǝ lang Yohana gim murǝm Hirǝdus ace twal Hirǝdiya, mala mǝ'eambǝi, andǝ acilia ɓealɓikea mǝnana pakkia ka,

20 Hirǝdus tsǝa à bwal Yohana à oasǝi a ndàkurban. Mǝno ka ɓe cauɓikea na Hirǝdus pa amur amǝnana angŋa dǝmbǝa pangŋǝnia ka.


À pakki Yesu Batisǝma

21 Lang à ndarǝ pakki aɓwabunda kat batisǝma, sǝ Yesu gbal ka à pangŋǝni wi batisǝma sǝ nda ban pak hiwi ka, kara kuli mǝnna,

22 Bangŋo Mǝfele sulǝ amuri nǝ nggunrǝu kǝla kutu. Gi Ɓakuli pur nǝ kuli na ama, “A nda Munem mǝnana ǝn nggǝ earceo ka, ban kǝ ɓoaram a rǝo kǝrkǝr.”


Tau mǝnana Yesu pur kam ngga

23 Yesu ka ndanǝ pǝlǝa kǝla lumi-tārú sǝ tita turo mala Ɓakuli. Aɓwana twali ama yì ka, nda muna mala Yisǝfu. Yisǝfu ka nda muna mala Heli,

24 Heli nda muna mala Matat, Matat nda muna mala Lawi, Lawi nda muna mala Melki, Melki nda muna mala Janayi, Janayi nda muna mala Yisǝfu.

25 Yisǝfu nda muna mala Matatiyas, Matatiyas nda muna mala Amos, Amos nda muna mala Nahum, Nahum nda muna mala Esǝli, Esǝli nda muna mala Naggai.

26 Naggai nda muna mala Ma'af, Ma'af nda muna mala Matatiyas, Matatiyas nda muna mala Semeyi, Semeyi nda muna mala Yosek, Yosek nda muna mala Joda.

27 Joda nda muna mala Yoanan, Yoanan nda muna mala Resa, Resa nda muna mala Jerubabel, Jerubabel nda muna mala Shaltiyel, Shaltiyel nda muna mala Neri.

28 Neri nda muna mala Melki, Melki nda muna mala Addi, Addi nda muna mala Kosam, Kosam nda muna mala Elmadam, Elmadam nda muna mala Er.

29 Er nda muna mala Jesǝwa. Jesǝwa nda muna mala Eliaza. Eliaza nda muna mala Jorim. Jorim nda muna mala Matat. Matat nda muna mala Lawi.

30 Lawi nda muna mala Shimiyan. Shimiyan nda muna mala Yahuda. Yahuda nda muna mala Yisǝfu. Yisǝfu nda muna mala Yonam. Yonam nda muna mala Iliyakim.

31 Eliyakim nda muna mala Meliya. Meliya nda muna mala Menna. Menna nda muna mala Matata. Matata nda muna mala Natan. Natan nda muna mala Dauda.

32 Dauda nda muna mala Jeshi. Jeshi nda muna mala Obet. Obet nda muna mala Boaza. Boaza nda muna mala Salmon. Salmon nda muna mala Nashon.

33 Nashon nda muna mala Aminadap. Aminadap nda muna mala Adǝmin. Adǝmin nda muna mala Arni. Arni nda muna mala Hezǝron. Hezǝron nda muna mala Parisa. Parisa nda muna mala Yahuda.

34 Yahuda nda muna mala Yakupu. Yakupu nda muna mala Ishaku. Ishaku nda muna mala Ibǝrayim. Ibǝrayim nda muna mala Tera. Tera nda muna mala Naho.

35 Naho nda muna mala Saru. Saru nda muna mala Reu. Reu nda muna mala Pele, Pele nda muna mala Eba. Eba nda muna mala Shela.

36 Shela nda muna mala Kenan. Kenan nda muna mala Arfakza. Arfakza nda muna mala Shem, Shem nda muna mala Nuhu. Nuhu nda muna mala Lamek.

37 Lamek nda muna mala Metusela. Metusela nda muna mala Inok. Inok nda muna mala Jared. Jared nda muna mala Mahalale. Mahalale nda muna mala Kenan.

38 Kenan nda muna mala Enosh. Enosh nda muna mala Set. Set nda muna mala Adamu, sǝ Adamu nda muna mala Ɓakuli.

© Wycliffe Bible Translators, Inc. and © The Nigeria Bible Translation Trust 2016

Nigeria Bible Translation Trust
Lean sinn:



Sanasan