Luka 17 - Maləmce Məfele mala Ɓakuli: Kurcau Məbəshe

Yesu na cau amur twalban cauɓikea

¹ Yesu ne alaggana male ama: Agir mǝnana à nǝ̀ tsǝk aɓwana à nǝ̀ kpa aɓa cauɓikea ka dumǝna púp à nǝ̀ yiu. Sǝa ma caukwanban nǝ́ ɓwa mǝnana amǝnia yì agir à pur nǝ bani ka.

² Ɓǝ̀ ɓwa nǝ̀ tsǝk mwashat ata amǝnia yì amuna ɓǝ̀ pak cauɓikea ka, kǝpǝna ɓǝa ɗurri ɓwe taligo a meali sǝ ɓǝa ramte aɓa nggeamur.

³ Ace mani ka wu tsǝk kir wun. Ɓǝ̀ mǝ'eambǝo pakko cauɓikea ka, gimbi, sǝ ɓǝ̀ vwaki bui arǝ cauɓikea male pwanzali ka, twali wi banì.

⁴ Ko ɓǝ̀ pakko cauɓikea kusǝ tongno-nong-ɓari aɓa pwari mǝ'mwashati, sǝ nyar kusǝ tongno-nong-ɓari abano yi pwanmbo nzali ka, twali wi banì.

⁵ Pǝlǝa Amǝ'mishan ne Mǝtalabangŋo ama, “Tsǝk paɓamuru ma'sǝm ɓǝ̀ gulo.”

⁶ Mǝtalabangŋo pea wia eare ama: Ko ɓǝ̀ guliarǝu ma'wun kyauwe kǝla mǝsǝ musta ka, wu nǝ̀ gandǝ banggi nggea nggun mǝnia ka ama, “U, kya kpa aɓa nggeamur!” Sǝ yì ka, nǝ̀ kpata cau ma'wun.

⁷ Ɓǝà twali ama ɓeɓwa na kam aɓalǝ wun mana ndanǝ muna-ɓala mǝnana wario a rya a ɓaban ko a yal anzur ka. Ɓǝ̀ mǝnia yì muna-ɓala ka ndo kǝ nyari ɓabondo nǝ nyare ka, mǝtala-ɓala male nǝ̀ ne wi ama, “Faro, yiu do lili le?”

⁸ Pa nǝ̀ ne wi ama, “Pakkam girlina peatu, wu yi tsǝkami a ɓadǝmbǝam, ɓǝ̀ ǝn linali sǝ ǝn nuna mur ka, sǝ a wu nǝ lili, a wu nǝ nu mur re?”

⁹ Nǝ̀ pakki muna-ɓala man yàwá, acemǝnana kpata cau mana ne wi ɓǝ̀ pe ka le?

¹⁰ Anggo gbal sǝ nǝ̀ pang nǝ wun: ɓǝ̀ wu pangŋǝna agir mǝnana kat à bangga wun ama ɓǝ̀ wu pea ka, wu nǝ̀ na ama, “Sǝm nda ka mǝturo-ɓala mǝnana sǝm pà a kun kǝgir raka. Kǝ turo ma'sǝm na sǝm pak ka.”

Yesu twali amǝ dakali lum ban kwano malea

¹¹ Yesu nǝ̀ o a Urǝshalima ka, kar nǝ nzong-nzali mala amǝ Samariya andǝ amǝ Galili.

¹² Nda ban kutio aɓa ɓe muna-la ka, aɓea burana lum amǝdakali na, à yì kasǝa akuni. À cam zak,

¹³ sǝ à loasǝ gia à tunǝban ama, “Ɓwamǝgule! Yesu! Sǝn mǝsǝswatǝr ma'sǝm!”

¹⁴ Yesu pǝlǝ mǝsǝì sǝnia sǝ nea wia ama, “Wu kyane, wu kya lǝmndǝ rǝ wun aban apǝris.” À nda ban o ka, kara dakali mali rǝia.

¹⁵ Lang ɓwa mwashat aɓalǝia sǝni rǝì malǝna ka, kara soaɓunu nyare aban yiu, loasǝ gi, kǝ ɓwangsǝki Ɓakuli.

¹⁶ Yi kpa a ɓadǝm Yesu aban pakki wi yàwá. Sǝ yì ka, ɓwa Samariya na.

¹⁷ Yesu ɗiban ama, “Aɓwana lum mbo sǝ à twalia wia ban dakali? Aman tongno-nong-ine ka à nda malea aya là?

¹⁸ Kǝ ɓwa pà kàm atea nǝ̀ nyare nǝ̀ ɓwangsǝ Ɓakuli ka ɗang, she kǝ ɓwa-kúnɗangna mǝnia ka?”

¹⁹ Pǝlǝa ne wi ama, “Lo o, guliarǝu mo amsǝno.”

Yiu mala Domurǝm mala Ɓakuli

²⁰ Amǝ Farisi ɗi Yesu ama, “A ya pwari sǝ Domurǝm mala Ɓakuli nǝ̀ yiu le?” Yesu earia wia ama, “Yiu mala Domurǝm mala Ɓakuli ka gir na mǝnana à nǝ̀ sǝni nǝ mǝsǝu ka ɗang.

²¹ Kǝɓwa pà nǝ̀ na ama, ‘Ndya ka, wu sǝni’ Ko ana raka, ‘Ndako ka’ ɗang. Acemǝnana Domurǝm mala Ɓakuli ka nda àkǝ̀ ɓalǝ wun.”

²² Pǝlǝa ne alaggana male ama: Pwari na kǝ yiu ka yi mǝnana rǝ wun nǝ̀ ɓǝla arǝ sǝn pwari mwashat aɓalǝ apwari mala Muna Mala Ɓwa ka, sǝ pà wu nǝ̀ sǝni ɗang.

²³ Ɓwapǝndǝa nǝ̀ na wun ama, “Ndako ka!” Ko ana raka, “Ndya ka!” Wu kǝa ɓangŋa atea ɗang.

²⁴ Kǝla mǝnana ɓǝ̀ mbulo linzama pǝlilip ka, nǝ̀ tá amur ɓanza a bui man nǝ̀ ngga bwal ɓe bui ka, anggo sǝ Muna Mala Ɓwa nǝ̀ pa a pwari nyare male.

²⁵ Sǝa ma peatu ka, Muna mala Ɓwa nǝ̀ nu tanni kǝrkǝr arǝ agir pas, sǝ aɓwana mǝnana a nza man ngga à nǝ̀ ɓinǝ mǝsǝì.

²⁶ Kǝla mǝnana kumban a nza mala Nuhu ka, anggo sǝ nǝ̀ pa aɓalǝ anonggeo mǝnana Muna Mala Ɓwa nǝ̀ nyare nǝ̀ yiu nǝi ka.

²⁷ Ɓwapǝndǝa kǝ lili, kǝ nu, à kǝ al rǝarǝia, à kǝ isǝ amunia ba pwari mǝnana Nuhu kuti nǝi a nggea-waru ka. Pǝlǝa mùrgula yiu yi twal tea kat.

²⁸ Kǝ nda anggo a nza mala Lotu. Ɓwapǝndǝa kǝ li, à kǝ nu, à kǝ kurkuro, à kǝ makkiagir, à kǝ rikrya, à kǝ ɓakki aɓah.

²⁹ A pwari mǝnana Lotu purî ɓa Sodom ngga, bǝsa andǝ amǝsǝtali bǝsa nya nǝ kuli amur amǝ Sodom twaltea kat.

³⁰ Anggo sǝ nǝ̀ kumban a pwari mǝnana Muna Mala Ɓwa nǝ̀ yia pusǝna rǝì nǝi ka.

³¹ A mǝno yì pwari ka, ɓwa mǝnana nda amur kurǝm male sǝ agirkuma male ka à nda aɓa kurǝm ngga, ɓǝ̀ kǝa na ama nǝ̀ sulǝ púp nǝ̀ ngga pwania ɗang. Anggo sǝ ɓwa mǝnana nda a ɓabondo ka, ɓǝ̀ kǝa nyare a ɓala ace twal kǝgir ɗang.

³² Wu ɗenyi nǝ málá Lotu!

³³ Ɓwa mǝnana kǝ earce nǝ̀ amsǝ yilǝmi ka nǝ̀ turte. Sǝ ɓwa mǝnana kǝ turta yilǝmi ka nǝ̀ amsǝi.

³⁴ Ən nggǝ na wun, a mǝno yì du ka, aɓwana ɓari nǝ̀ pa aban nongŋo a kala mǝ'mwashati, à nǝ̀ twal man mwashat ka, à nǝ̀ nying ɓe.

³⁵ À nǝ̀ kum amamǝna ɓari aban go aban mǝ'mwashati, à nǝ̀ twal mwashat à nǝ̀ nying man mwashat ka.

³⁶ [À nǝ̀ kum aburana ɓari a ɓaban, à nǝ̀ twal man mwashat ka, à nǝ̀ nying ɓe.]

³⁷ Pǝlǝa alaggana male ɗi ama, “Aya ban le, Mǝtalabangŋo?” Yesu earia wia ama, “Ban mǝnana lugir pak kam ngga, abanì sǝ adǝkǝlaki nǝ̀ rambǝa.”