Luka 12 - Maləmce Məfele mala Ɓakuli: Kurcau Məbəshe

Nunkiru andǝ ɓakɓabum

¹ Anggo ka, lang ɓwabunda mǝnana lakki malea na á-pas à yì ramǝna aban Yesu gandǝa à kǝ parki rǝarǝia ka, Yesu tita na cau peatu nǝ alaggana male ama: Wu par kir wun arǝ yis mala amǝ Farisi. Mǝ nda ban na cau amur kúnɓárína malea.

² Kǝ gir pà kàm mǝnana gire sǝ à pà nǝ̀ ndǝli raka, sǝ ko ya gir'sǝmbǝra ka à nǝ̀ pusǝ ce.

³ Ace mani ka, cau mǝnana wu ne a pǝndǝa ka, à nǝ̀ ok ce bwāng, sǝ mǝnana wu sheri aɓa kiru aɓa ndà-nongŋo ka, à nǝ̀ hamnǝ ce amur akurǝm.

⁴ Ən nggǝ na wun, wun agyajam mem, wu kǝa ɓanggi aɓwana mǝnana à nǝ̀ wal lú ɓwa, sǝ anzǝmi ka à pànǝ kǝgir mǝnana à nǝ̀ pak ka ɗang.

⁵ Mǝ nǝ lǝmndǝa wun rǝ ɓwa mǝnana wu nǝ̀ ɓanggi wi ka. Wu ɓanggi Ɓakuli, mǝnana ɓǝ̀ walna ɓwa ka, ndanǝ rǝcandǝa mǝnana nǝ̀ ramta ɓwa a lu-bǝsa ka. Ɓafo, ǝn nggǝ na wun, wu ɓanggi wi!

⁶ Nggearǝì ka amǝpuɗeng tongno mbo sǝ à kǝ kúria kwapo ɓari? Kat andǝ amani ka kǝ ɓe pà kàm mǝnana Ɓakuli lorǝi ka ɗang.

⁷ Wu sǝni! Ko nggearǝ anyang ɓamuru wun ngga à ɓalnia kat. Ace mani ka, ɓangciu ɓǝ̀ kǝa pakka wun ɗang, wu kuti amǝpuɗeng kat nǝ ɓoarɓwa.

Bang paɓamuru mo amur Yesu a ɓadǝm ɓwapǝndǝa

⁸ Ən nggǝ bangga wun, ɓwa mǝnana kat bang paɓamuru male a rǝam a ɓadǝmbǝ aɓwana ka, mim Muna mala Ɓwa ka mǝ nǝ bangce gbal ama yì ka, mem na a ɓadǝmbǝ amǝturonjar mala Ɓakuli.

⁹ Sǝ ɓwa mǝnana kat makgir surǝam a ɓadǝm ɓwapǝndǝa ka, mǝ nǝ makgir surǝe gbal a ɓadǝm amǝturonjar mala Ɓakuli.

¹⁰ Ɓwa mǝnana kat bangcau mǝɓane amur Muna mala Ɓwa ka, à nǝ̀ twali wi banì, sǝ ɓwa mǝnana na cau kyauwikiban amur Bangŋo Mǝfele ka, à pà nǝ̀ twalbani ɗang.

¹¹ Ɓǝà wari nǝ wun aɓalǝ andakpapi, a ɓadǝmbǝ amǝɓashi andǝ amurǝma ka, ɓǝ̀ ɓalǝ wun ɓǝ̀ kǝa kasǝkia arǝ pǝlǝcau, ko mana wu nǝ̀ na ka ɗang.

¹² Acemǝnana àkǝ̀ banì Bangŋo Mǝfele nǝ̀ kania wun cau mǝnana wu nǝ̀ na ka.

Kanicau arǝ mǝkume mǝ ɗwanyi sǝlǝe

¹³ Ɓe ɓwa aɓa ɓwabunda ne Yesu ama, “Malǝm, ne mǝ'eambǝam ɓǝ̀ sǝm gau gǝna mǝnana tar sǝm nyingga sǝm ngga.”

¹⁴ Yesu pǝlǝi wi ama, “Ɓwabura, yana ciem mǝɓashi ko mǝgaugir anre wun?”

¹⁵ Pǝlǝa ne ɓwabunda ama, “Wu parkir wun, wu yal rǝ wun arǝ koya ulang kikil ka, acemǝnana lakki mala agirkuma mala ɓwa ka, nda yilǝmi ɗang.”

¹⁶ Pǝlǝa nea wia mǝnia yì kanicau ka ama: Ɓaban mala ɓe mǝkume pusǝ girlina kǝrkǝr.

¹⁷ Pǝlǝa ne ɓamuri ama, “Mana do mǝ nǝ pa? Ən panǝ ban mǝnana mǝ nǝ ram girlina mem kam ngga ɗang.

¹⁸ “Mǝnia ka nda gir mǝnana mǝ nǝ pak ka, mǝ nǝ arki abá mem sǝ mǝ nǝ ɓakki amǝgulke, mǝ nǝ so girlina andǝ acili agirkuma mem kam.

¹⁹ Sǝ mǝ nǝ ne yilǝmem ama, ‘A ndanǝ gǝna kǝrkǝr aban rambǝa mǝnana nǝ̀ twalki apǝlǝa pas ka, panzǝ rǝo, lili, nu, sǝ wu pak banɓoarnado.’ ”

²⁰ Sǝ Ɓakuli ne wi ama, “We gǝm ɓwa! Àkǝ̀ bu du mǝnia ka, à nǝ̀ twal yilǝmio a rǝo. Sǝ agirbunda mǝnia a rambǝi ɓamuro ka, à nǝ̀ duk mala yana?”

²¹ A masǝlǝate ka Yesu bangŋa ama, “Anggo sǝ nǝ̀ kum ɓwa mǝnana rambǝi ɓamuri gǝna, sǝ yì ka, mǝtǝ̀r na aban Ɓakuli ka.”

Ɓabum wun ɓǝ̀ kǝa kiɗiki ɗang wu guli arǝ Ɓakuli

²² Yesu pǝlǝa ne alaggana male ama: Ən nggǝ na wun ama ɓabum wun ɓǝ̀ kǝa pi ace gir mǝnana wu nǝ̀ li ace do nǝ yilǝmu, andǝ mǝnana wu nǝ̀ oasǝo a rǝ wun ngga ɗang.

²³ Acemǝnana yilǝmu ka kuti girlina, sǝ nggurǝu gbal ka kuti agir-nggurǝu.

²⁴ Wu sǝna arǝ agang'lang pe! À kǝ̀ ɓealɓeale ɗang, à kǝ ram girɓaban ɗang, ko nggearǝ ban tsǝk girlina ko bà ka à pànǝi ɗang. Kat andǝ amani ka Ɓakuli kǝ linǝia. Sǝ ɓoarɓwa ma'wun aban Ɓakuli ka kuti mala amuna-nyal!

²⁵ Sǝ yana aɓalǝ wun ɗe mǝnana ɗenyicau mala ɗwanyi nǝ̀ tsǝk yilǝmi nǝ̀ sauwa a ɓanza nǝ bu-pwari mwashat ka? Kǝɓwa pà kàm ɗang.

²⁶ Sǝ ɓǝ̀ pà wu nǝ̀ gandǝ pak gir mǝkyauwe kǝla mǝnia raka, palang sǝ wu kǝ pisǝ ɓalǝ wun arǝ acilia?

²⁷ Wu sǝni, lang sǝ apwasǝo-bondo kǝ gulo! À kǝ̀ pak turo ko à kǝ pyau nkonggur ɗang. Sǝ ǝn nggǝ na wun ama, nggearǝ Murǝm Solomon aɓa kume andǝ gulo male kat ka oasǝ agir-nggurǝu kǝla malea ɗang.

²⁸ Sǝ ɓǝ̀ anggo sǝ Ɓakuli kǝ ɗenyi nǝ abondo mǝnana à ndya à kǝ sǝnia yalung, sǝ li ka à turnia a bǝsa ka, sǝ nǝ wun? Pà nǝ̀ pakka wun mǝnana kuti malea ka re? Guliarǝu ma'wun kyau fat!

²⁹ Ɓǝ̀ ɓabum wun ɓǝ̀ kǝa pi ace agir mǝnana wu nǝ̀ li ko wu nǝ̀ nu ka ɗang, wu kǝa pak ɗenyicau amuri ɗang.

³⁰ Amǝɓanza ka à kǝ ɓangŋa ata mǝnia yì agir kat ka. Sǝ Tar wun sǝlǝna ama wu kǝ earce amǝnia yì agir ka.

³¹ Wu alta Domurǝm mala Ɓakuli a dǝmbǝa nǝ ko man ngga, sǝ amǝnia yì agir ka à nǝ̀ pa wunia gbal.

Kume aɓa bangŋo

³² Domwan mǝkyauwe, ɓangciu ɓǝ̀ kǝa pakka wun ɗang, acemǝnana Tar wun ngga ban kǝ ɓoari wi ɓǝ̀ pa wun agir mǝɓoarne mala Domurǝm male.

³³ Wu makki agirkuma ma'wun, wu pe amǝtǝr boale. Wu kumbi ɓamur rǝ wun andaboalo mǝnana à kǝ sanggi raka, sǝ wu tsǝk kume ma'wun a kuli aban mǝnana pà nǝ̀ amsǝa, sǝ amǝn'i pa nǝ̀ gbashì, ko tatǝmdi nǝ̀ kiɗiki raka.

³⁴ Acemǝnana ban mana kume mo nakam ngga, akàm sǝ ɓabumo nǝ̀ pa.

Amuna-ɓala mǝnana à dum nǝ tsǝkiru ka

³⁵ Wu kur rǝwun ace turo, apitǝla ma'wun ɓǝa kǝ ta.

³⁶ Kǝla aɓwana mǝnana à kǝ kundǝmur mǝtala-ɓala malea ɓǝ̀ nyari ban isǝban ngga. Acemǝnana ɓǝ̀ nyarǝna sǝ yi walkina kunɓala ka, à nǝ̀ lo a kaurǝa, à nǝ̀ mǝnmbi wi.

³⁷ Ban nǝ̀ ɓoari amǝno yia amuna-ɓala ka, yì mǝnana ɓǝ̀ mǝtala-ɓala yiu yi kumia andǝ amǝsǝia ka. Ən nggǝ na wun ɓafo, nǝ̀ kur rǝì, nǝ̀ nea wia ɓǝa do, sǝ nǝ̀ pea wia girlina.

³⁸ Ban nǝ̀ ɓoari amǝno yì amuna-ɓala ka, yì mana mǝtala-ɓala malea yi kumia aɓa gilǝkirǝu ka, ko ɓǝ̀ yiu nǝ ɓadu ko ɓǝ̀ nggu mala nǝ̀ ɓua ka.

³⁹ Wu sǝlǝ ama, ɓǝ̀ mǝtala-ɓala sǝlǝna rǝ bu-pwari mǝnana mǝn'i nǝ̀ yiu nǝi ka, pà nǝ̀ eare mǝn'i nǝ̀ kutio a ɓala male ɗang.

⁴⁰ Sǝ wun gbal ka, wu do nǝ kur-rǝu, acemǝnana Muna mala Ɓwa nǝ̀ yiu a bu-pwari mǝnana wu tsǝk ɓalǝu ama nǝ̀ yiu nǝi raka.

Muna-ɓala mǝ'mǝsǝcau nì andǝ mana pànǝ mǝsǝcau raka

⁴¹ Bitǝrus ɗiban ama, “Mǝtalabangŋo, sǝm nda a nakiya sǝm mǝnia yì kanicau ka le ko a ndaban ne aɓwana kat?”

⁴² Mǝtalabangŋo Yesu eare ama: Yana nda muna-ɓala mǝnana mǝsǝle na, à nǝ̀ earnǝi ka? Yì ka, nda ɓwa mǝnana mǝtala-ɓala male nyinggi wi ɓala a bui, ɓǝ̀ pe acilia amuna-ɓala girlina ɓǝ̀ pwari malea pangŋǝna ka.

⁴³ Mǝno yì muna-ɓala ka ndanǝ banɓoarnado yi mǝnana ɓǝ̀ mǝtala-ɓala male nyare yi kumi ndaban pak turo mǝnana à pe wi ka.

⁴⁴ Ən nggǝ na wun ɓafo, mǝtala-ɓala male nǝ̀ yia ci amur girkuma male kat.

⁴⁵ Sǝ ɓǝ̀ muna-ɓala ne ɓamuri ama, “Mǝtala-ɓala mem ngga pà nǝ̀ nyar tu ɗang.” Sǝ ɓǝ̀ kutia wal amuna-ɓala, aburana andǝ amamǝna, kǝ li, kǝ nu, sǝ kǝ wal wale ka,

⁴⁶ mǝtala-ɓala mala mǝno yì muna-ɓala ka, nǝ̀ nyare a bu-pwari mǝnana muna-ɓalae tsǝkbum raka, a pwari mǝnana pànǝ sǝlǝe raka. Nǝ̀ yia kwe, nǝ̀ kasǝki wi anpenye, sǝ nǝ̀ nyesǝi aɓalǝ amǝ'ɗwanyi kpata mǝsǝcau.

⁴⁷ Muna-ɓala mǝnana surǝ kani mala mǝtala-ɓala male, sǝ kur rǝi ace, ko pak kǝgir ace raka, à nǝ̀ kwe kǝrkǝr.

⁴⁸ Sǝ ɓwa mǝnana sǝlǝ ɗang sǝ pak gir mǝnana ɓoaro ɓǝa kwe ace ka, à nǝ̀ kwe bǝti. Ɓwa mǝnana à pe wi kpǝm ngga, à nǝ̀ alte a bui kpǝm. Sǝ ɓwa mǝnana à pe wi kpǝm ngga, à nǝ̀ ɗice a bui gbal kpǝm.

Yesu nda tǝr gakia

⁴⁹ Ən yiu ace soa bǝsa a ɓanza. Eare mem ngga ɓǝ́ bǝshe ka ndaban earke!

⁵⁰ Mǝ ndanǝ batisǝma mala tanni mǝnana à nǝ̀ pakkam ngga, ado ka ndaban pisǝam a ɓalǝam, she ɓǝa pangŋǝni ka.

⁵¹ Wu kǝ sǝni kǝla ǝn yiu ace yinǝ dorǝpwala a ɓanza le? Awo! Ən nggǝ na wun, gakia na ǝn yiu nǝi ka.

⁵² A dǝmbǝa ka, àkǝ ɓala mǝ'mwashati mǝnana aɓwana kam tongno ka, à nǝ̀ gaki rǝia. Aman tārú ka à nǝ̀ ɓinǝ mǝsǝ aman ɓari ka, amǝnana ɓari ka à nǝ̀ ɓinǝ mǝsǝ amǝnana tārú ka.

⁵³ Tarrû nǝ̀ ɓinǝ mǝsǝ muna-ɓwabura male, sǝ muna-ɓwabura gbal ka nǝ̀ ɓinǝ mǝsǝ tarrí. Nggeau nǝ̀ ɓinǝ mǝsǝ muna-ɓwama male, sǝ muna-ɓwama gbal ka nǝ̀ ɓinǝ mǝsǝ ngge. Nggeau nǝ̀ ɓinǝ mǝsǝ málá muni, sǝ mɓwama nǝ̀ ɓinǝ mǝsǝ nggea burri.

Surǝ agir-lǝmndǝa mala masǝlǝata apwari

⁵⁴ Yesu ne ɓwabunda ama: Ɓǝ̀ wu sǝn pǝrɓang aban eauwe, nǝ njarnzali ka, wu kǝ na ama, “Mbulo no nǝ̀ nya,” sǝ nǝ̀ nya gbal.

⁵⁵ Sǝ ɓǝ̀ gung njarkunmur ɓua ka, wu na ama “Ban no nǝ̀ pi yalung,” sǝ ban nǝ̀ pi gbal.

⁵⁶ Wun amǝ'kunɓarina! Wu surǝ kusǝpa mala agir mǝnana a nzali andǝ bumkuli ka, sǝ palang sǝ wu gandǝ surǝ kusǝpa mala agir-lǝmndǝa mala nza ma'sǝm man ɗang?

Gilǝki nre wun wunǝ ɓeomǝbura

⁵⁷ Palang sǝ wu gandǝ gakita mǝɓoarne andǝ mǝɓane ɗang?

⁵⁸ Ɓǝ̀ a ndaban o a ndaɓashi wunǝ ɓeomǝbura ka, ɓariki wu gilǝki cau wunǝi amur njargula, ɓǝ̀ ana raka nǝ̀ nunggio aban ká aban mǝɓashi, sǝ mǝɓashi nǝ̀ tasǝ takwaro aban amǝ'munagara, sǝ à nǝ̀ ramto a ndàkurban.

⁵⁹ Ən nggǝ na wun, a pà wu nǝ puri ban mǝno ka ɗang, she ɓǝa kpǝrina ta lǝpan mo ka.