Jemis 5 - Maləmce Məfele mala Ɓakuli: Kurcau Məbəshe

Nunkiru amur amǝkume

¹ Wu kwaki kir wun, wun amǝkume! Wu ɓua, wu mak zwalo, ace akanggǝrang tanni mǝnana à kǝ yiu amur wun ngga.

² Agǝna ma'wun rǝmǝna, sǝ agir-nggurǝu ma'wun ngga mburia linia.

³ Agirkuma ma'wun mǝnana à pea nǝ azǝrfa andǝ zǝnariya ka, sásà linia. Sǝ mǝno yì sásà ka nda mana nǝ̀ yinǝ nakun ɓashi amur wun, sǝ nǝ̀ li nyam wun kǝla bǝsa ka. Wu ramǝni ɓamur rǝ wun gǝna aɓa mǝnia yì ɓanza kǝ ká nǝ ká masǝlǝate ka.

⁴ Wu sǝni! Aɓwana mǝnana à pakka wun turo a ɓaban sǝ wu ginǝ mbwea ace ɓǝmbǝriban ma'wun ngga, ɓua malea bwalǝna ban Ɓakuli. Aɓwana mǝnana à pakka wun turo pwan girɓaban ngga, ɓua malea warina a kir Mǝtalabangŋo mǝnana Karban kat ka.

⁵ Wu dumǝna a ɓanza aɓa mǝɓoarne mala kume andǝ liki agir meang'meang mana ɓabum wun earkiyice ka. Wu nda kǝla andá-lǝsǝa mǝ'nyangge mǝnana à nǝ̀ ngga pwan mealia ka.

⁶ Wu kumsǝna kun amǝ'kunpwasǝa a ɓashi, wu walna luia, yia mǝnana à pànǝ kǝ cau arǝ wun raka.

Domunyi aɓa tanni

⁷ Wun amǝ'eamrǝarǝu, wu dum nǝ munyi ba pwari mǝnana Yesu Mǝtalabangŋo nǝ̀ yiu nǝi ka. Wu sǝn domunyi mala mǝ'rya mǝnana kǝ pa aban kundǝ mbulo dǝmbǝa andǝ masǝlǝata mbulo ka. Kǝ dum nǝ tsǝkɓalǝu ace agir ɓaban ɓǝa pa ɓǝlea mǝɓoarne.

⁸ Wun gbal ka, wu dum nǝ munyi sǝ wu cam kàngkàng aɓa ɗenyicau ma'wun, acemǝnana yiu mala Mǝtalabangŋo gbashina tu.

⁹ Wun amǝ'eamrǝarǝu, wu kǝa nggwani arǝarǝ wun ɗang, acemǝnana Ɓakuli ɓǝ̀ kǝa ɓasha wun ɗang. Wu sǝni! Mǝɓashi na aban came a kunkurǝm!

¹⁰ Wun amǝ'eamrǝarǝu, wu ɗenyi nǝ amǝ'ɓangna mala Ɓakuli mǝnana à yì bang cau aɓa lullǝ Mǝtalabangŋo ka. Ɓǝ̀ domunyi malea aɓa gandǝrǝu aɓata tanni dupa sǝm gir kani.

¹¹ Kǝla mǝnana wu sǝlǝ ka, yia mǝnana à lidǝmbǝa nǝ came kàngkàng aɓa paɓamuru malea ka, sǝm twalia amǝ'kúm tsǝkbu mala Ɓakuli na. Wu ongŋǝna ce came mala Ayuba aɓa mǝkwane, sǝ wu sǝna gir mǝnana Mǝtalabangŋo Ɓakuli pakki wi a masǝlǝate ka. Mǝtalabangŋo ka lumsǝ nǝ mǝsǝswatǝr andǝ ɓwamuru.

¹² Wun amǝ'eambǝam, a dǝmbǝa nǝ ko yia gir ka, wu kǝa kángir ɗang, ko “nǝ kuli,” ko “nǝ nzali,” ko nǝ kǝgir ɗang. Cau ma'wun ngga ɓǝ̀ kǝa kuti “E” ko “Awo” ɗang. Ɓǝ̀ ana raka, ɓashi mala Ɓakuli nǝ̀ bwal wun.

Rǝcandǝa mala hiwi

¹³ Kǝ ɓwa aɓalǝ wun kǝ tanni le? Ɓwe ɓǝ̀ pak hiwi. Kǝ ɓwa na aɓa bumpwasǝa? Ɓwe ɓǝ̀ tu nggyal ɓwangsǝki Ɓakuli.

¹⁴ Kǝ ɓwa ata wun rǝì kǝ pakki wi le? Ɓwe ɓǝ̀ tunǝ aɓwana-mǝgule mala amǝkpata Ɓakuli, ɓǝa pakki wi hiwi, sǝ ɓǝa hasǝi wi muru olif amuri aɓa lullǝ Mǝtalabangŋo.

¹⁵ Sǝ hiwi mǝnana à pe nǝ ɓabum mwashat ka, nǝ̀ amsǝ mǝrǝkwana ɓǝ̀ nggūrǝi ɓǝ̀ pwalo. Mǝtalabangŋo ka nǝ̀ loasǝi aɓa rǝpina male, sǝ ɓǝ̀ pak cauɓikea ka à nǝ̀ twali wi banì.

¹⁶ Ace mani ka wu banggi arǝ wun acauɓikea ma'wun, sǝ wu pakki arǝ wun hiwi, ace mǝnana ɓǝa twala wun ban arǝkwana ma'wun ngga. Hiwi mala mǝɓealɓoarna mǝnana pe nǝ ɓabumi mwashat ka, ndanǝ rǝcandǝa sǝ kǝ pak turo.

¹⁷ Iliya ka ɓwapǝndǝa na kǝla sǝm. Pak hiwi a ɓe pwari nǝ ɓabumi kat ama mbulo ɓǝ̀ kǝa nya ɗang, sǝ à nya mbulo a ɓanza ɗang, pǝlǝa tārú nǝ zongŋo tongno-nong-mwashat.

¹⁸ Ɗǝm ngga yi pak hiwi ama mbulo ɓǝ̀ nya, sǝ kuli nya mbulo, nzali pusǝ agirpwala, à pusǝ ɓǝlea.

Nyesǝ amǝɓwarkio a tanjar

¹⁹ Wun amǝ'eambǝam, ɓǝ̀ kǝ ɓwa aɓalǝ wun ɓwarki tanjar mala Ɓakuli, wu nyesǝi a tanjar.

²⁰ Wu sǝlǝ ama ɓwa mǝnana nyesǝ mǝ'cauɓikea a tanjar ka, nǝ̀ amsǝ yilǝmi mǝ'cauɓikea man aɓa lú, sǝ nǝ̀ tsǝa Ɓakuli nǝ̀ twalban acauɓikea pas.