Amǝ Mishan 24 - Maləmce Məfele mala Ɓakuli: Kurcau Məbəshe

Bulǝs a ɓadǝm Felis

¹ Anzǝm nongŋo tongno ka, Hananiya Pǝris Mǝgule yiu a Kaisariya andǝ aɓea aɓwana-mǝgule mala amǝ Yahudi andǝ ɓe lauya mǝnana à tunǝki ama Tatulus ka. À yiu a ɓadǝm Felis mǝnana nda Nggwamna ka. À yiu nǝ acauɓashi mǝnana à ndanǝi arǝ Bulǝs ka.

² Pǝlǝa à tunǝ Bulǝs yiu yi kutio, sǝ Tatulus sarǝ acau mǝnana à tsǝki Bulǝs ate ka a ɓadǝm Felis, ama: Ɓǝ̀ rǝo pwalo, Nggwamna! Sǝndǝmba mo aɓa yalban amur aɓwana ka nda yina sǝm, amǝ Yahudi nǝ li banɓoarnado mǝsauwe aɓa rǝpwala yalung ngga. A nyesǝ agir pas à pǝlǝa amǝɓoarne, mǝnana à yiu nǝ lidǝmbǝa a nzali ma'sǝm ngga.

³ Sǝm earǝna nǝ amǝnia yì agir ka kat, a koya ban ngga sǝ a koya pwari ka, sǝ sǝm nggǝ walo bu pepe.

⁴ Sǝa ma ǝn earce nǝma mǝ nǝ po aulǝa ɗang, ace mani ka, ǝn nggǝ zǝmbǝo, twal gandǝa nǝ sǝm, ok cau mǝnana sǝm nǝ̀ na bǝti ka.

⁵ Man yì ɓwa ka sǝm kumi ka mǝzunggǝliban na, mǝnana kǝ yiu nǝ loasǝban aɓalǝ amǝ Yahudi aɓa ɓanza kat ka. Yì nda gbani mala amǝkpata Yesu, mǝnana à tunǝkia ama amǝ Nazarin ngga.

⁶ Yi ɓariki nǝ̀ pakki aɓea agir aɓa Ndàmǝgule mala Ɓakuli nǝ̀ nyesǝ ce ɓà; nda sǝm bwali ka.

⁷ Ɓǝ́ sǝm pangŋǝni wi ɓashi nǝ nggurcau ma'sǝm sǝa ma Lisiyas, mǝsarǝban mala asoje yiu yi é a bu sǝm nǝ rǝcandǝa. Pǝlǝa tsǝk sǝm ɓǝ̀ sǝm yiu nǝ acau mǝnana sǝm ndanǝi arǝ mǝnia yì ɓwa ka aɓa ndaɓashi mo.

⁸ Ɓǝ̀ a ɗíkí ka, we nǝ ɓamuro a nǝ gandǝ surǝ mǝsǝcau amur acauɓashi mǝnia sǝm nggǝ yinǝia a rǝì ka.

⁹ Amǝ Yahudi mǝnana abanì ka, pǝlǝa à ear kat ama anggo sǝ ce pa.

Bulǝs na kuni a ɓadǝm Felis

¹⁰ Nggwamna pǝlǝa lǝmndǝì Bulǝs bu ɓǝ̀ na cau. Bulǝs pǝlǝa pǝlǝ cau ama: We ɓwamǝgule, ǝn sǝlǝna nǝma arǝ apǝlǝa pas a ndaban pak ɓashi a nzali man, ace mani ka mǝ ndanǝ banɓoarnado ɓǝ̀ ǝn bǝl kunam a ɓadǝmbǝo.

¹¹ A nǝ gandǝ bǝlta mǝsǝcau nì ama, kuti anongŋo lum nong-ɓari mǝnana à kuti ka ɗang sǝ ǝn yiu a Urǝshalima ace peri a Ndàmǝgule mala Ɓakuli.

¹² Aɓwana man ngga à kumam aban makgir sǝnǝ kǝɓwa aɓa Ndàmǝgule mala Ɓakuli, ko ǝn tsǝk ɓwabunda à loasǝban arǝ andakpapi ko a ɓe kǝban aɓa la mǝgule ka ɗang.

¹³ Sǝ aman yì aɓwana ka, à pà nǝ̀ gandǝ lǝmndǝo kǝgir mǝnana nǝ̀ pà rǝcandǝa arǝ agir mǝnana à kǝ tsǝkam cau a rǝia ka ɗang.

¹⁴ Ən earǝna mbak ama ǝn nggǝ kpata Ɓakuli mala aká sǝm, aɓa kpata Njar mǝnana yia ka à twali ama mǝɓafoe na raka. Sǝ mim ngga ǝn earnǝ agir kat mǝnana à gilǝa aɓa Nggurcau mala Musa andǝa mǝnana aɓalǝa Malǝmce mala amǝ'ɓangna mala Ɓakuli ka.

¹⁵ Tsǝkɓalǝu mem arǝ Ɓakuli ka mǝ'mwashati na andǝ mǝnana aɓwana man ndanǝi arǝ Ɓakuli ka, ama nǝ̀ loasǝ amǝ cauɓoarna andǝ amǝ cauɓikea a ɓembe.

¹⁶ Ace mani ka, ǝn nggǝ ɓariki a koya pwari ka ama ɓǝn ngga dum nǝ ɓamur halǝkya a ɓadǝm Ɓakuli andǝ aɓwana ɗang.

¹⁷ Anzǝm apǝlǝa pas mǝnana ǝn ɗekina Urǝshalima nǝi ka, ǝn nyare ǝn wario abanì ace mǝnana ɓǝ̀ ǝn nggea pe aɓwana mem aɓoro ace amǝtǝr, sǝ ɓǝ̀ ǝn pâ gir-ɗarǝa aban Ɓakuli.

¹⁸ Mǝ ndaban pak mǝnia ka sǝ à yì kumam a Ndàmǝgule mala Ɓakuli, ǝn malǝna pakkiagir mala lak rǝǔ, kǝ ɓwabunda pa atam ɗang, sǝ loasǝban pa abanì ɗang.

¹⁹ Sǝ aɓea amǝ Yahudi mǝnana à pur a bu-nzali Asiya ka, à ndakam abanì. Ɓǝ́ ɓoaro à ndakani, mǝnana ɓǝa ndanǝ ɓe kǝcau a muram ngga.

²⁰ Ko ana raka, ɗìkam aman yia aɓwana ka, ɓǝa nam cauɓikea mǝnana amǝkurcau mala amǝ Yahudi bwalam nǝi ka.

²¹ Kǝ cau mwashat mǝnana à nǝ̀ yiu nǝi a rǝam ngga nda mǝnana ama ǝn loasǝ giem aɓa ndaɓashi aban na ama: “Mǝ ndaban cam ɓashi a ɓadǝm wun yalung ace earnǝ cau mǝnana mǝ ndanǝi ama alú nǝ̀ lo a ɓembe nǝ yilǝmu ka!”

²² Pǝlǝa Felis, mǝtala-nzali mǝnana sǝlǝna cau mala kpata Njar mala Yesu ka, gìr cau, bangŋa ama, “Ɓǝ̀ mǝsarǝban mala asoje, yì Lisiyas yina ka, sǝ mǝ nǝ kasǝ cau ma'wun.”

²³ Pǝlǝa Nggwamna tsǝa ɓe soje mǝgulo ɓǝ̀ yal Bulǝs, ɓǝ̀ panzǝ nsolo mǝnana à kùrrì nǝi ka, ɓǝ̀ nyi atarǝì, sǝ ɓǝ̀ kǝa na ama nǝ̀ ɓinǝì agyajam mala Bulǝs yiu abani ɓǝa kǝ ɗenyi nǝi ɗang.

²⁴ Anzǝm aɓea anonggeo ka Felis nyare yiu andǝ mami, Durǝsǝla mǝnana ɓwa Yahudi na ka. Pǝlǝa turban à tunǝ Bulǝs, yi kwaki kiri oe na cau amur paɓamuru aban Kǝrǝsti Yesu.

²⁵ Sǝ lang Bulǝs kutia na cau amur ɓealɓoarna, andǝ bwalɓamuru, andǝ ɓashi mala Ɓakuli mǝnana nǝ̀ yiu ka, Felis ka nggea ɓangciu pakki wi, nda na ama, “Karǝna anggo, a nǝ gandǝ o ado. Mǝ nǝ nyare mǝ nǝ tunǝo ɗǝm ɓǝ̀ ǝn kumǝna dǝmbǝu ka.”

²⁶ Yì gbal ka tsǝk ɓalǝi ko Bulǝs nǝ̀ pe wi boalo. Nda gir mǝnana tsǝa, pak ka nǝ̀ tunǝ Bulǝs nǝ̀ yiu à kǝ na cau andǝi.

²⁷ Anzǝm mǝnana apǝlǝa ɓari kutina ka, ɓe bǝsa Nggwamna Posiyos Festus yi aki Felis turo do Nggwamna. Sǝ acemǝnana Felis earce pwasǝbum amǝ Yahudi ka, nying Bulǝs a ndàkurban.