Amǝ Mishan 22 - Maləmce Məfele mala Ɓakuli: Kurcau Məbəshe

¹ Bulǝs na ama, “Wun amǝ'eambǝam amǝ Yahudi andǝ aɓwana-mǝgule ma'sǝm, wu kwaki kir wun wu ok cau mem!”

² Lang à oe aban na cau nǝ kun malea, kun Ibǝru ka, kara ban nyare pwal atea piu-piu. Sǝ Bulǝs lidǝmbǝa nǝ na cau ama:

³ Mim ngga mǝ nda ɓwa Yahudi. À ɓǝlam a nggeala Tarsus aɓa bu-nzali Sǝlisiya, sǝa ma ǝn gulo, sǝ à kaniam gir akani a Urǝshalima aɓata Gamaliyel. À kaniam Nggurcau mala aká sǝm nǝ kwarkiru pepe, ɓǝn kpata anzongcau kat ko mǝye na ka. Ən pa ɓamuram gbal nǝ rǝɓǝla mǝgule ace pe Ɓakuli gulo aɓa ko mana ǝn pak ka, kǝla mǝnana wu pa, wun mǝnana ado kat akani ka.

⁴ Ən pea amǝ kpata Njar mala Mǝtalabangŋo tanni kǝrkǝr. Aɓea atea ka ǝn walia à wu tam-tam. Sǝ aɓea, aburana andǝ amamǝna ka, ǝn bwalkia ǝn turia aɓa ndàkurban.

⁵ Nggearǝ Pǝris mǝgule andǝ aɓwana male ka à nǝ̀ earnǝ mim ama mǝ ndaban na mǝsǝcau. Acemǝnana a buia sǝ ǝn nggǝ ak acautera aban ká aban aɓwana-mǝgule amǝla-sǝm amǝ Yahudi mǝnana a Damaska ka. Tǝr wario mem ngga nda mǝnana ama, ɓǝn bwalki amǝ kpata Yesu, ɓǝn kurkia nǝ ansolo, ɓǝn yiu nǝia a Urǝshalima ace mǝnana ɓǝa yi pea wia tanni ka.

Bulǝs bangcau amur je male andǝ Yesu andǝ ê

⁶ A ɓe fara mǝ nda mur njar aban ká, ǝn gbashina nggeala Damaska, nǝ pwari zǝkia. Kaniama ɓalǝam nǝ̀ kasǝ ka, kara nggea tǎlaban karara, pur nǝ kuli yi tá gumbǝlǝem.

⁷ Ən kasǝa ǝn kpa a nzali, sǝ ǝn ok giu aban nam ama, “Sawul, Sawul! Ace mana sǝ a kǝ pam tanni?”

⁸ Sǝ ǝn ɗiban nǝma, “A nda yana le, ɓwamǝgule?” Pǝlǝa nam ama, “Mǝ nda Yesu ɓwa Nazarat, mǝnana a kǝ pe wi tanni ka.”

⁹ Aɓwana mǝnana atam ngga, à sǝn tǎlaban sǝ à bwalta ɓa gir mǝnana giu nakiyiam ngga ɗang.

¹⁰ Sǝ ǝn ɗi ama, “Mana mǝ nǝ pak le Mǝtalabangŋo?” Pǝlǝa Mǝtalabangŋo nam ama, “Lo, o aɓa Damaska, akàm sǝ à nǝ̀ ngga no gir mǝnana kat a wu nǝ́ pak ka.”

¹¹ Mǝno yì tǎlaban ngga kara ciem amǝsǝam duk nte. Aɓwana mǝnana sǝm nda sǝnǝia ka, à bwalam a buam à warinǝ mim aɓa nggeala Damaska.

¹² Aɓa mǝno yì lamǝgule ka, ɓe kǝ ɓwabura na abanì à tunǝki ama, Hananiya; mǝ'ɓanggi Ɓakuli na, bwal nggurcau mala amǝ Yahudi nǝ paɓamuru tam-tam. Amǝ Yahudi mǝnana a Damaska kat ka, à kǝ pe wi gulo.

¹³ Yiu yi came a nkanggariam sǝ nam ama, “Mǝ'eambǝam Sawul, ak sǝnban mo!” Anggo àkǝ̀ banì amǝsǝam mǝnna, kara ǝn sǝni.

¹⁴ Pǝlǝa na ama, “Ɓakuli mala aká sǝm tàrrǒ ace mǝnana wu surǝ kànì male. Tàrno wu sǝn Ɓwa male Mǝɓealɓoarna, yì Mǝ'amsǝban, sǝ wu ok gi aban na cau.

¹⁵ Kǝ earce ama we ka, a wu nǝ duk mǝ'nakuni. A wu nǝ ne koya ɓwa ka gir mǝnana a o sǝ a sǝn ngga.

¹⁶ Sǝ adyan ngga, mana ɗǝm a kundǝkiyia? Lo, ɓǝa pakko batisǝma, pwanzali aban Mǝtalabangŋo ɓǝ̀ twalo ban acauɓikea mo.”

Ɓakuli tunǝ Bulǝs ɓǝ̀ hamnǝ cau aban aɓwana arǝ anzali

¹⁷ Anzǝm man ngga ǝn nyare a Urǝshalima, sǝ mǝ nda ban pak hiwi aɓa Ndàmǝgule mala Ɓakuli ka, kara ǝn sǝn sǝna aɓa bangŋo.

¹⁸ Ən sǝn Mǝtalabangŋo Yesu nda rǝ banggam ama, “Lo, faro nying Urǝshalima, acemǝnana aɓwana man kani ka à pà nǝ̀ ak cau mǝnana a wu nǝ na a muram ngga ɗang.”

¹⁹ Pǝlǝa ǝn ne wi nǝma, “Mǝtalabangŋo, kǝla yia ka à sǝlǝna ama, a koya ndakpapi ka ǝn wario ǝn nggǝ bwalki amǝ kpato, ǝn nggǝ pea wia tanni.

²⁰ Sǝ a pwari mǝnana à wal-lú mǝ'nakuno yì Itǝfanu ka, ǝn ear nǝ mǝno yì wal-lú ka pepe. Mǝ nda kam aban came ǝn nggǝ tsǝkir anggea-daura mala aɓwana mǝnana à ɓukki à wali wu ka.”

²¹ Pǝlǝa Mǝtalabangŋo nam ama, “Kyane, acemǝnana mǝ nǝ turo kuko aban aɓwana mǝnana amǝ Yahudi na raka.”

²² Ɓwapǝndǝa kwaki kiri, yi bwal ban mǝnana Bulǝs na mǝnia yì cau ka, pǝlǝa à lo loasǝban nǝ giu kpǝm aban na ama, “Wu wali ɓǝ̀ wu! Yì ka, kārǝa ɓǝ̀ dum nǝ yilǝmu ɗang!”

²³ Lang à ndaban makki'zwalo kǝrkǝr, à kǝ yasǝlǝki anggea-daura malea a kuli, à kǝ loasǝ tú a gung ka,

²⁴ mǝsarǝban mala asoje tsǝa à kuti nǝ Bulǝs aɓa banmǝcande malea. Pǝlǝa bangŋa ama ɓǝa kwe ace mǝnana ɓǝa surǝ tǝr gir mǝnana tsǝa sǝ amǝ Yahudi lo nǝ zwalo a rǝì anggo ka.

²⁵ À kurkina Bulǝs nǝ nggur ama à nǝ̀ kwe. Pǝlǝa ɗi soje mǝgulo mǝnana came abanì ka ama, “Nggearǝì ka, nggurcau mala nzali eara wun ama ɓǝ̀ wu kwak ɓwa nzali Roma mǝnana à malaká ɓashi wi, a kumi nǝ ɓe kǝ cauɓikea raka le?”

²⁶ Lang soje mǝgulo man ok man yì cau ka, kara o aban mǝsarǝban mala asoje, kya ɗi ama, “Mana a kǝ earce ama a wu nǝ pa? Ɓwa mǝno ka, ɓwa nzali Roma na!”

²⁷ Pǝlǝa mǝsarǝban mala asoje wario aban Bulǝs kya ɗi ama, “Nam, we ka, a nda ɓwa nzali Roma le?” Bulǝs eari wi ama, “E, mǝ nda ɓwa Roma.”

²⁸ Mǝsarǝban mala asoje banggi wi ama, “Mim gbal ka, mǝ nda ɓwa Roma, ǝn mbwe boalo kǝrkǝr ace.” Pǝlǝa Bulǝs ne wi ama, “Sǝ mem ngga, mǝ nda ɓwa Roma a ɓǝlban.”

²⁹ Kara asoje mǝnana àkǝ̀ earce pe Bulǝs tanni ka, à gbara à pusǝki abuia à nyi. Sǝ mǝsarǝban mala asoje ka, ɓangciu pakki wi lang ongŋǝna ama Bulǝs ka ɓwa Roma na, anzǝm mǝnana tsǝngŋǝna à kùrni ka.

Amǝkurcau pakki Bulǝs ɓashi

³⁰ Ban fana ka, mǝsarǝban mala asoje tsǝa ama agbani pǝris andǝ amǝkurcau mala amǝ Yahudi kat ɓǝa yi kpapi. Kǝ earce surǝ mǝsǝrǝ gir mana tsǝa sǝ à tsǝki wi cau a rǝì ka. Ace mani ka, tsǝa a panzǝ nsolo mǝnana à kùrna Bulǝs nǝi ka, sǝ tamsǝi a ɓadǝmbǝia.