Amǝ Mishan 20 - Maləmce Məfele mala Ɓakuli: Kurcau Məbəshe

Gya mala Bulǝs arǝ abu-nzali Masǝdoniya andǝ Akaya

¹ Anzǝm mana loasǝkiaban malǝna ka, Bulǝs tunǝ amǝkwaɗi à yì rambǝa abanarǝia, pǝlǝa ɓak ɓabumia nǝ cau mala Ɓakuli, pea wia rǝcandǝa sǝ cia a ndà. Pǝlǝa nying banì kutio o a bu-nzali Masǝdoniya.

² Lang gingna arǝ abumban aɓa mǝno yì bu-nzali aban ɓak ɓabum amǝkwaɗi nǝ cau mala Ɓakuli ka, pǝlǝa kutio wario a Gǝris mǝnana gbal à tunǝki ama bu-nzali Akaya ka.

³ Abanì sǝ kya do pak azongŋo tārú. Lang Bulǝs mala nǝ̀ twal gya a waru nǝ̀ o a Suriya ka, yi ok ama aɓea amǝ Yahudi kùrna kunia amuri à nǝ̀ wal-lui a njar. Nda gir mǝnana tsǝa sǝ nyar a kusǝì twal nza, pǝlǝ nǝ njar ɓa bu-nzali Masǝdoniya ka.

⁴ Aɓea burana mǝnana à o ate ka à ndaka Sopata, muna mala Pirus ɓwa Biriya, andǝ Aristakus andǝ Sekundus amǝnana à pur nǝ nggeala Tasalonika ka. Gayus ɓwa Dabe, andǝ Tikikus andǝ Tǝrofimus, amana à pur a bu-nzali mala Asiya ka, à o ate gbal, yia andǝ Timoti.

⁵ Yia mǝnia tongno-nong-ɓari ka, à aka sǝm dǝmbǝa, mim Luka sǝnǝ Bulǝs, à o a waru-mur à kya kundǝ sǝm a Tǝros.

⁶ Sǝ sǝm twal gya nǝ kwar-nza sǝm o a nggeala Filipi. Akano anzǝm Lamsan mala Bǝredi mana Yist pa a rǝì raka, sǝm nggea kutio a waru-mur aban o a nggeala Tǝros. Anzǝm anongŋo tongno ka sǝm nggea kumia a Tǝros. Abanì sǝ sǝm pak limo mwashat.

Masǝlǝata pak bǝri mala Bulǝs aban ká Tǝros

⁷ Nǝ pwari kpǝra a pwari Ladi ka, sǝm yì rambǝa a tarǝ sǝm aban li girlina. Bulǝs tita hami aɓwana cau, sǝ acemǝnana ɓǝ̀ ban kwarǝna ka nǝ̀ bwal njar nǝ̀ o ka, camarǝ na cau kya bwal ɓadu.

⁸ Apitǝla nakam pas à kǝ pa tǎlaban aban mǝnana sǝm kpapiyi kam a ndakuli ka.

⁹ Mǝ lagga mǝnana lullǝi ama Yutikus ka, nda ban do a ferang mala ndakuli. Sǝ lang Bulǝs camarǝ na cau ba ka, Yutikus ka ntulo kǝ aiki, yi kongŋǝna a ntulo kǝrkǝr, nda kara pur kano a ferang, a bu tāruia ndakuli mǝno ɓong-ɓong, yi kpa a nzali. À nǝ̀ yiu à nǝ̀ yia twali ka, lú na.

¹⁰ Pǝlǝa Bulǝs sulǝ a nzali, kya kūndǝo amur mǝ lagga, sǝ kùrrì a rǝì nǝ abui, na ama, “Ce ɓalǝ wun zuriki ɗang, ndanǝ yilǝmu!”

¹¹ Pǝlǝa Bulǝs andǝ acili aɓwana nyare à o a ndakuli ɗǝm. Anzǝm mǝnana à lina girlina a tarǝia ka, Bulǝs lidǝmbǝa nǝ nea wia cau ba kwaro mala ban. Pǝlǝa bwal njar kutio o.

¹² Sǝ à twal mǝ lagga à um nǝi a ɓala nǝ banɓoarnado kǝrkǝr, acemǝnana yilǝmi nyarǝna a rǝì ka.

Bulǝs lo a Tǝros aban ká a Miletus

¹³ Pǝlǝa sǝm o amuria sǝm kya eauwe a waru sǝm samsǝa aban ká a Asos, aban mǝnana sǝm nggea twal Bulǝs a waru kam ngga. Yì Bulǝs ka eau ata sǝm a waru a Tǝros ɗang acemǝnana earce nǝ̀ kàr nǝ nza aban ká Asos.

¹⁴ Lang yiu yi kum sǝm a Asos ka, sǝm twali a waru sǝm kutio aban o a Mitǝlin.

¹⁵ Sǝm nying ban mǝno sǝm samsǝa aban o. Ba ɓe ban fana ka, sǝm yì bwal ban luran Kiyos. Ɓe ban fana ɗǝm ngga, sǝm samsǝa sǝm yì pur a luran Samos. Sǝm nying Samos ka, twal sǝm pwari mwashat sǝ sǝm yì bik là Miletus.

¹⁶ Amur njar aban ká Miletus ka, waru samsǝa yi kuti nǝ ban nggeala Afisu. Bulǝs ka angŋǝna dǝmbǝa twalǝna a ɓabumi ama pà nǝ̀ came a Afisu ɗang, ace mǝnana ɓǝ̀ kǝa kiɗiki pwari kǝrkǝr aɓa bu-nzali Asiya raka. Yì ka, nda mur larri nǝ̀ ngga bwal Urǝshalima, ɓǝ̀ nǝ̀ gandǝ pa ka ɓǝ̀ yi kum pwari Pakiɗire Pentikos.

Bulǝs tsǝk aɓwana-mǝgule mala ikǝlisiya a Afisu a ndà.

¹⁷ A Miletus sǝ Bulǝs turban ata aɓwana-mǝgule mala ikǝlisiya mana a Afisu ɓǝa yiu ɓǝa yi kumi a Miletus.

¹⁸ Lang à yina ka, pǝlǝa nea wi ama: Wun ngga wu surǝna ulang do mem andǝ turo mǝnana ǝn pa aɓalǝ apwari mǝno kat mǝ nda aban wun ngga, tite àkǝ̀ pwari mǝnana ǝn yiu nǝi a bu-nzali Asiya ka.

¹⁹ Nǝ nyesǝɓamuru andǝ mǝrǝm a mǝsǝam sǝ ǝn pakki Mǝtalabangŋo turo, acemǝnana mǝ nda mǝguro male. Ən do nǝ gandǝrǝu aɓa nutanni mala agir mǝnana à yipam nǝ kurkunarǝu mala amǝ Yahudi mǝnana amǝkwaɗi na raka.

²⁰ Wun ngga wu sǝlǝna ama aɓa hamnǝ cau mala Ɓakuli bwāng, mǝnana ǝn pe aɓalǝ aɓwana, andǝ kanigir arǝ aɓala ma'wun ngga, ǝn nying kǝgir mǝnana ɓoaro ɓǝ̀ ǝn bangga wun, mǝnana nǝ̀ bwala wun nggam ngga ɗang.

²¹ Ən banggi amǝ Yahudi andǝ aɓwana mana amǝ Yahudi na raka, nǝ nunkiru nǝma, dumǝna púp ɓǝa nyare aban Ɓakuli. Ɓǝa pǝlǝ nzǝmia arǝ acauɓikea malea, ɓǝa pwanzali, sǝ ɓǝa paɓamuri aban Mǝtalabangŋo Yesu.

²² Sǝ ado ka, mǝ ndo mǝ nǝ ká a Urǝshalima acemǝnana Bangŋo Mǝfele lǝmndǝ nam a banfana ama dumǝna púp ɓǝn kyane. Ən surǝ gir mǝnana nǝ̀ ngga kumam akano ka ɗang.

²³ Kǝ gir mǝnana ǝn sǝlǝ ka nda mǝnana ama, a ko ya nggeala ǝn kuti kam ngga, Bangŋo Mǝfele kǝ nunkiram ama oasǝban a ndàkurban andǝ tanni na à kǝ kundǝam ngga.

²⁴ Sǝ amur mani ka, ǝn twal yilǝmem a kun ɓe kǝgir ɗang. Mim ngga, gir mǝnana ǝn tsǝk muram a rǝì ka nda mǝnana ama ɓǝ̀ ǝn mal turo mǝnana Mǝtalabangŋo Yesu pam ɓǝ̀ ǝn pe ka, yì turo hamnǝ Cau Amsǝban mala ɓwamuru mala Ɓakuli.

²⁵ Ən sǝlǝna ama wun mǝnana ǝn camarǝ gya aɓalǝ wun, aban hamnǝ cau mala Domurǝm mala Ɓakuli ka, kǝɓwa pà kàm aɓalǝ wun nǝ sǝnam ɗǝm ɗang.

²⁶ Ace mani ka, mǝ nda ban na wun yalung ama, kǝ nkila mala kǝɓwa aɓalǝ wun pa a muram ɗang.

²⁷ Acemǝnana kane kat mǝnana Ɓakuli ndanǝi a ɓabumi, sǝ kǝ earce ama ɓǝ̀ wu surǝì ka, ǝn nyar nǝ tam arǝ hamnǝ ce aban wun ɗang.

²⁸ Wu yal ɓamur rǝ wun andǝ aɓwana mala Ɓakuli mǝnana Bangŋo Mǝfele pa wun a bu wun ɓǝ̀ wu ɗenyi nǝia ka. Wu do kǝla ayalgir amur domwan mala Ɓakuli, yì ikǝlisiya male, amǝkpate mǝnana kúria nǝ nkila mala Muni, mǝnana sukki amur nggun-gangndi ace amsǝia ka.

²⁹ Ən sǝlǝna ama anzǝm mǝnana ǝn nyingŋǝna ban wun ngga, amǝkanigir-nyir, kǝla anvwa bondo mǝɓealɓike, à nǝ̀ yiu aɓalǝ wun, ace mǝnana à nǝ̀ kiɗiki domwan mala Ɓakuli, amǝkwaɗi ka.

³⁰ Sǝ a nggearǝ ɓalǝ wun ngga, aɓea aɓwana nǝ̀ lo à nǝ̀ ɓosǝki kusǝ mǝsǝcau. À nǝ̀ kutia kanigir-nyir ace mǝnana à nǝ̀ kum aɓea aɓwana mǝnana à nǝ̀ swarkia ɓǝa pǝlǝ amǝkpata tea ka.

³¹ Ace mani ka, wu tsǝkir wun pepe! Wu ɗenyi ama, nǝ amǝrǝm a mǝsǝam, du andǝ pwari, mǝ nda aban kani ko yan ata wun ngga cau mala Ɓakuli kat ba apǝlǝa tārú.

³² Ado ka, ǝn nggǝ nying wun aɓa bu Ɓakuli ɓǝ̀ bwal wun sǝ ɓǝ̀ tamsǝ wun aɓa paɓamuru arǝ cau mala ɓwamuru male, mǝnana nǝ̀ gandǝ ɓak wun, nǝ̀ pa wun atsǝkbu mǝnana Ɓakuli ndanǝi ace aɓwana mana twalnia à dumǝna amale na ka.

³³ Ən sham ma kǝ boalo mala ɓwa ko agir-nggurǝu male ɗang.

³⁴ Sǝ wun, nǝ́ ɓamur rǝ wun ngga, wu sǝlǝna ama, nǝ́ abuam mǝnia ka, sǝ ǝn nggǝ kum girlina mǝnana mǝ nǝ li sǝnǝ aɓwana mana sǝm nda sǝnǝia ka.

³⁵ Aɓa koya gir ǝn nggǝ pak ka, mǝ nda ban lǝmndǝa wun ama, aɓa pak turo mǝnana nkundǝr pa a rǝì raka sǝ sǝm nǝ̀ bwali aɓwana mana à pànǝi raka. Ɓǝ̀ sǝm ɗenyi nǝ acau mala Mǝtalabangŋo Yesu, mǝnana na nǝ ɓamuri ama, “Tsǝkbu mala Ɓakuli mana amur amǝ pa ɓoro ka nda kpǝm kuti do kúndǝo ɓǝa po.”

³⁶ Lang Bulǝs malǝna na cau ka, pǝlǝa kūndǝo amur ankuni andǝia kat, sǝ à pak hiwi.

³⁷ Yia kat à kutia ɓua nǝ mǝrǝm, à mǝn abuia à kǝ kurki Bulǝs a rǝia, sǝ à kǝ jeki nki nǝ kunia aban tsǝe a ndà.

³⁸ Gir mǝnana pea wia ɓabumkiɗikea kǝrkǝr ka nda cau mǝnana Bulǝs banggia wia ama, à pà nǝ̀ sǝni ɗǝm raka. Anggo sǝ à kya tsǝkte a kun-waru mur.