Amǝ Mishan 17 - Maləmce Məfele mala Ɓakuli: Kurcau Məbəshe

Tanni lo aɓa Tasalonika

¹ Bulǝs andǝ Silas yi gya arǝ ala Amfipolis andǝ Apoloniya, à yì bwal Tasalonika, ban mǝnana ɓe ndakpapi mala amǝ Yahudi nakam ngga.

² Kǝla mana pakkiyi ka, Bulǝs pǝlǝa kutio a ndakpapi mala amǝ Yahudi. Abanì ka, twal apwari Sabbat tārú, à camarǝ sǝnggi acau aɓa Malǝmce mala Ɓakuli andǝ aɓwana,

³ kǝ mǝnggi ɓalǝ acau, kǝ lǝmndǝia wia ama, Kǝrǝsti Mǝ'amsǝban ngga dumǝna púp nǝ̀ nu tanni sǝ nǝ̀ loapi ɓembe nǝ yilǝmu. Ɓǝsǝlǝi banggia wia ama, “Yì Yesu mana ǝn nggǝ hamnǝ ce ka, nda kǝ Kǝrǝsti Mǝ'amsǝban.”

⁴ Aɓea amǝ Yahudi kum jeban mala Ɓakuli a ɓabumia pǝlǝa à kpapi muria andǝa Bulǝs andǝ Silas. Anggo gbal sǝ aɓwana-mǝgule amamǝna andǝ aɓwana pas amǝ Gǝrik, mana à kǝ peri aban Ɓakuli ka, à pu ata Bulǝs andǝ Silas.

⁵ Sǝa ma, aɓea amǝ Yahudi ka mɓali pakkia wia, pǝlǝa à kum aɓwana amǝɓane aɓa limo, à rambǝia, sǝ à kutia zunggǝliban aɓa nggeala. À wari nǝ munǝo a ɓala mala Jasǝn, acemǝnana à nǝ̀ bwal Bulǝs andǝ Silas à nǝ̀ yinǝia a nza aban ɓwabunda ka.

⁶ Sǝ lang à kum Bulǝs andǝ Silas raka, à nunggi Jasǝn andǝ aɓea amǝkpata Yesu, à yiu nǝia aban amǝkurcau mala la. À camarǝ loasǝban nǝ gia a kuli ama, “Aɓwana mǝnia ka, à nda à kǝ yinǝ zunggǝli a bum ɓanza kat ka! À ndya ɗǝm à yiua zurǝi nggeala ma'sǝm ngga,

⁷ sǝ Jasǝn angŋǝnia a ɓala male. Aɓwana mǝnia kat ka à nyesǝ anzongcau mala Kaisar, yì murǝm mǝgule mala amǝ Roma ɓà, à kǝ na ama ɓe kǝ murǝm nakam, lullǝi ama Yesu.”

⁸ Lang amǝtala nggeala andǝ aɓwabunda nǝ̀ ok anggo ka, kara bumia lullo à lo aban loasǝban.

⁹ Amǝtala nggeala tsǝk Jasǝn andǝ acili amǝkwaɗi à mbwe boalo mana à kasǝ ace panzǝia ka, nda sǝ à nyingŋǝnia ɓǝa o ka.

Bulǝs andǝ Silas a Biriya

¹⁰ Lang du pǝndǝna ka, amǝkpata Yesu tasǝ ta Bulǝs andǝ Silas a Biriya. À yì bwalǝna ka, à kutio a ndakpapi mala amǝ Yahudi.

¹¹ Amǝ Biriya ka ɓealǝia ɓoaro kuti mala amǝ Tasalonika, acemǝnana à akcau nǝ rǝɓǝla. À kǝ̀ bǝlki ɓa Malǝmce a koya pwari ka, ace mǝnana à nǝ̀ sǝni ko cau mana Bulǝs bang ngga, nda kǝ mǝsǝcau.

¹² Aɓwana pas aɓalǝ amǝ Yahudi akcau mala Ɓakuli; sǝ pas ata aɓwana-mǝgule, amamǝna andǝ aburana mala amǝ Gǝrik gbal ka, à paɓamuria à pǝlǝ amǝkwaɗi.

¹³ Lang amǝ Yahudi mana a Tasalonika ongŋǝna ama a Bulǝs na ban hamnǝ cau mala Ɓakuli a Biriya ka, à yiu abanì à yì soakita aɓwana kam pas, à lo loasǝban.

¹⁴ Amǝkpata Yesu lo tu, à tasǝ ta Bulǝs a kun nggeamur, sǝ Silas andǝ Timoti ka à ueo a Biriya.

¹⁵ Aɓwana mana à waria tsǝkta Bulǝs ka, à wari nǝi a la mana à tunǝki ama Atina ka, sǝ à nyare à yiu a Biriya. Bulǝs banggia wia ɓǝa ne Silas andǝ Timoti ama, ɓǝa lo tu, ɓǝa kya kumi a Atina.

Bulǝs a Atina

¹⁶ Lang Bulǝs na ban kundǝ Silas andǝ Timoti a Atina ka, bumi kiɗiki kǝrkǝr arǝ sǝn mǝnia yì nggeala ka, lumsǝ nǝ ankúl.

¹⁷ Pǝlǝa kuti arǝ andakpapi aban bangcau nǝ amǝ Yahudi andǝ amǝ Gǝrik mana amǝ ɓanggi Ɓakuli na ka. Sǝ koya pwari gbal ka, kǝ bangcau a bankpapi mala la, nǝ aɓwana mǝnana kat à kǝ yiu abanì ka.

¹⁸ Aɓea amǝ sǝlǝe mala amǝ Epikiuriya andǝ amǝ Stoyik kutia makgir arǝ Bulǝs, acemǝnana Bulǝs nea wia Cau Amsǝban amur Yesu andǝ loapi ɓembe ka. Aɓea aɓwana aɓalǝia à ɗiban ama, “Mana gir ni na mǝ'loasǝban mǝnia kǝ earce ama nǝ̀ na le?” Sǝ aɓea aɓwana atea na ama, “Yì ka, sǝm nggǝ sǝni kǝla nda aban hamnǝ cau amur ankúl mala aɓea nzali.”

¹⁹ Pǝlǝa à twal Bulǝs, à yiu nǝi a ɓadǝmbǝ aɓwana-mǝgule, amǝkurcau mala lê, a ban mana à tunǝki ama, Ariyopagus ka, sǝ à ne wi ama, “Sǝm nggǝ earce ama sǝm nǝ̀ surǝ cau mala bǝsa kanigir mana a nakiyi cau amuri ka.

²⁰ Aɓea agir mǝnana sǝm oeo a na cau amuria ka, sǝm surǝia ɗang. Aceì dupa sǝm abǝshe a kir sǝm, sǝ sǝm nggǝ earce ama sǝm nǝ̀ surǝ ɓalǝia.”

²¹ À bangŋa anggo acemǝnana amǝ Atina kat andǝ abǝri mana à nda aɓa mǝnia yì la ka, à kǝ mal pwari malea amur naki acau andǝ oki abǝsa acau.

²² Bulǝs pǝlǝa lo came a ɓadǝmbǝ aɓwana-mǝgule, amǝkurcau mala la, a Ariyopagus, sǝ bangŋa ama: Ən sǝni ama, wun, amǝ Atina ka, wu nda ka amǝ peri kǝrkǝr.

²³ Lang mǝ ndaban gya aɓa la ma'wun ngga, ǝn sǝn aban peri ma'wun pas. Ən sǝn ɓe gyangŋan mana à gilǝ cau kam a rǝì ama, “Mǝnia ka Nda Ace Pagulo Aban Ɓakuli Mana Sǝm Surǝì Raka.” Ado ka, mǝno yì Ɓakuli wu kpakiyi ate sǝ wu surǝì raka, nda mǝnana mǝ nǝ na wun cau amuri ka.

²⁴ Ɓakuli mǝnana pusǝ ɓanza andǝ agir mana a ɓalǝi kat ka, nda Mǝtala kuli andǝ nzali, sǝ yì ka, dukiyi a ndàperi mana à ɓe nǝ bu ɓwapǝndǝa ka ɗang.

²⁵ Sǝ yì ka, alkiyita kǝgir a bu ɓwapǝndǝa mǝnana à nǝ̀ pe wi aɓa pakki wi turo ka ɗang, acemǝnana kǝ yì nda ɓwa mǝnana pākiyi yilǝmu, andǝ lin'ueo, andǝ agirbunda kat aban aɓwana ka.

²⁶ Aɓa ɓwa mwashat sǝ pusǝ aɓwapǝndǝa ɗàngɗáng, amana à lumsǝ ɓanza kat ka. Kǝ yì na ɓara-ɓara kasǝ tite andǝ masǝlǝata anza malea, andǝ abu-ɓanza mana à nǝ̀ do kam ngga.

²⁷ Ɓakuli pa anggo, ace mǝnana ɓǝ̀ ɓwapǝndǝa alte, nǝ tsǝkɓalǝu ama aɓa harǝkiban aban alte ka à nǝ̀ kumi. Kat andǝ amani ka, Ɓakuli ka nda tu aban ko yan ata sǝm ngga.

²⁸ Acemǝnana “A ɓalǝi sǝ sǝm do nǝ yilǝmu, sǝm nggǝ gya, sǝ sǝm pa.” Kǝla mana aɓea amǝnggyal ma'wun bang ngga ama, “Sǝm gbal ka, sǝm ndaka muna male” ka.

²⁹ Sǝ acemǝnana sǝm ndaka muna mala Ɓakuli ka, ɓǝ̀ sǝm ngga sǝni ama Ɓakuli na kǝla ɓǝ̀nzál mana à ɓeì nǝ bolo, ko tali, aɓa nyoule ko sǝlǝpe mala ɓwapǝndǝa ka ɗang.

³⁰ Adó-ɗwanyi surǝ Ɓakuli mana ɗiɗyal ka, Ɓakuli tsǝk kir cea ɗang, sǝ a dyan ngga, kǝ bangŋa ama tsǝngŋǝna nzongcau, ɓǝa ɓwana kat a koya aban, ɓǝa nying acauɓikea malea, ɓǝa pwanzali abani.

³¹ Acemǝnana yì ka, tsǝngŋǝna pwari mana nǝ̀ ɓashi ɓanza nǝi aɓa mǝsǝcau, nǝ bu ɓwa mǝnana ci ka. Lǝmndǝna mǝnia yì ɓwa ka aban aɓwana kat, nǝ loasǝo mana loasǝi a ɓembe nǝ yilǝmu ka.

³² Lang à ok Bulǝs na cau mala loapi ɓembe nǝ yilǝmu ka, aɓea aɓwana aɓalǝia nyesǝ cau mǝnana Bulǝs bang ngga cau oalban na. Acilia ka à na ama, “Sǝm nggǝ earce ama she a ɓe kǝ pwari sǝ wu yi bangga sǝm cau ɗǝm amur mǝnia yì gir ka.”

³³ Anggo sǝ Bulǝs nying ɓalǝia, bwal njar nǝ̀ o,

³⁴ sǝ aɓea aɓwana ka, à o ata Bulǝs, à paɓamuria aban Mǝtalabangŋo. Aɓalǝ amǝnia yì aɓwana à paɓamuria ka, mwashat ka nda aɓalǝ amǝkurcau, à kǝ tunǝi ama, Diyonisiyos. Ɓe mɓwama na kam gbal aɓalǝia, lullǝi ama, Damaris, andǝ aɓea aɓwana.