Amǝ Ibǝru 3 - Maləmce Məfele mala Ɓakuli: Kurcau Məbəshe

Yesu ka kuti Musa

¹ Ace mani ka, wun amǝ'eamrǝarǝu mǝnana Ɓakuli tária ɓǝa duk amale, sǝ à kum tunǝban mǝ'mwashati ata aɓwana male ace ká kuli ka, ɓǝ̀ sǝm nyesǝ ɗenyicau ma'sǝm aban Yesu. Yì nda ɓwa mǝnana Ɓakuli tasǝi ɓǝ̀ yì duk Pǝris Mǝgule mala paɓamuru mǝnana sǝm bangŋǝna ama nda sǝm kpakiyi ate ka.

² Yì ka, ndanǝ mǝsǝcau aban Ɓakuli mana twali, kǝla mǝnana Musa ka, ndanǝ mǝsǝcau aɓa turo male aban aɓwana mala Ɓakuli kat ka.

³ Sǝa ma Yesu ka, ndanǝ gulo mana kuti mala Musa ka, kǝla mana ɓwa mǝnana ɓak ɓala ka, gulo kuti nggearǝ ɓah ka.

⁴ Acemǝnana koya ɓala ka, ɓwa nǝ̀ ɓè, sǝ Ɓakuli ka, nda ɓak koya gir kat ka.

⁵ Musa, kǝla guro aɓalǝ aɓwana mala Ɓakuli kat ka, dum nǝ mǝsǝcau, sǝ bangcau amur agir mǝnana Ɓakuli nǝ̀ yia nea a dǝmbǝa ka.

⁶ Sǝ Kǝrǝsti, kǝla muna ka, dum nǝ mǝsǝcau amur aɓwana mala Ɓakuli. Sǝ sǝm ngga, sǝm ndaka amǝno yì aɓwana mala Ɓakuli, ɓǝ̀ sǝm bwal kàngkàng arǝ paɓamuru andǝ tsǝkɓalǝu ma'sǝm mǝnana sǝm nggǝ jali nǝi ka.

Nunkiru arǝ ɗwanyi paɓamuru

⁷ Ace mani ka, kǝla mǝnana Bangŋo Mǝfele kǝ na ama: “Ɓǝ̀ yalung, sǝ wu ongŋa gi ka,

⁸ wu kǝa na ama wu nǝ̀ tǝ́r ɓabum wun, kǝla mǝnana aká wun pâ a pwari mgbicau, a baku mǝno à karǝkiam a ɓabondo ka ɗang.

⁹ Aban mǝno ka, aká wun karǝkiam, à mwamnggi munyi mem, kat andǝ sǝna mana à sǝn agir-ndali mana ǝn pea aɓa pǝlǝa lumi-ine ka.

¹⁰ Nda gir mǝnana tsǝa sǝ bumam lullo arǝ amǝno yì aɓwana ka, sǝ ǝn bangŋa nǝma, ‘Ɓabum amǝnia yì aɓwana ka, pà a rǝam ɗang, sǝ à earce kpata nggurcau mem ɗang.’

¹¹ Nda sǝ ǝn kángir aɓa bumlulla mem ama, ‘À pà nǝ̀ kutio aɓa usǝlǝo mem ɗang.’ ”

¹² Wun amǝ'eamrǝarǝu, wu tsǝkir wun, ɓǝa kǝa kum kǝɓwa aɓalǝ wun mǝnana ndanǝ ɓabum mala ɓealɓikea andǝ ɗwanyi earnǝ cau mana nǝ̀ ci nǝ̀ bwaki bui arǝ kpata Ɓakuli mǝyilǝmuì ka ɗang.

¹³ Dumǝna ama wu nǝ̀ nggǝ ɓak ɓabum arǝ wun a koya pwari mǝnana à nǝ̀ tunǝi ama “Yalung” ngga, ace mǝnana ɓǝ̀ cauɓikea ɓǝ̀ kǝa swarki kǝ̀ ɓwa ata wun, ɓǝ̀ dum nǝ murcandǝa arǝ Ɓakuli ɗang.

¹⁴ Ɓǝ̀ sǝm bwal kàngkàng arǝ guliarǝu ma'sǝm mana sǝm tinate nǝi sǝ kya bik masǝlǝate ka, gir mǝnana kat mala Kǝrǝsti na ka, sǝm nǝ̀ kumi ate.

¹⁵ Kǝla mǝnana Malǝmce na ka: “Yalung, ɓǝ̀ wu ongŋa gi ka, wu kǝa tǝ́r ɓabum wun kǝla mǝnana aká wun pa a pwari mgbicau ka ɗang.”

¹⁶ Sǝ à yana mǝnana ɗe à ok gi, sǝ à mgbicau ka? Kǝ aɓwana mǝnana Musa pusǝia aɓa Masar ka, à nda re?

¹⁷ Sǝ arǝ ayan sǝ bum Ɓakuli lullo, pǝlǝa lumi-ine? Pa arǝ aɓwana mǝnana à pak cauɓikea, yia mǝnana aluia sukkio a ɓabondo ka re?

¹⁸ Sǝ nǝ ayan sǝ Ɓakuli kánna, ama à pà nǝ̀ kutio aɓa usǝlǝo male raka? Kǝ amǝ mgbikiru mǝno na re?

¹⁹ Nda sǝm yì sǝni ka, à kum kutio ɗang, ace kǝ ɗwanyi paɓamuru malea.