Amǝ Filipi 3 - Maləmce Məfele mala Ɓakuli: Kurcau Məbəshe

Kǝa guli arǝ nggūrǝu ɗang

¹ A masǝlǝate ka, wun amǝ'eambǝam, ɓǝ̀ ban ɓoara wun ama, wu nda ka mala Mǝtalabangŋo. Ɓǝsǝlǝ gilǝ agir mǝnana ǝn gilǝa wunia a dǝmbǝa ka, kwan rǝam ɗang. Nda ace yal paɓamuru ma'wun.

² Wu tsǝk kir wun arǝ anvwa mǝno, amǝ'ɓealɓikea, mǝnana à cam kingging nǝ cau mala kasǝ-ɓatau ace kum amsǝban ngga.

³ Sǝm mǝnana sǝm nggǝ peri aban Ɓakuli aɓa Bangŋo ka, sǝm ndaka aɓwana mǝnana à kasǝa sǝm ɓatau aɓa mǝsǝcau ka. Sǝm ngga, sǝm nggǝ nggori nǝ Kǝrǝsti Yesu, sǝm guli arǝ agir mǝnana à pe aɓa nggūrǝu ka ɗang,

⁴ kat andǝ amani ama mǝ nǝ gandǝ jali nǝ amǝno yì agir ka. Ɓǝa aɓwana nakam mǝnana à kǝ sǝni kǝla à ndanǝ agir mǝnana à nǝ̀ jali nǝia ka, mǝ ndanǝia pas mǝnana à kuti malea ka.

⁵ Acemǝnana à kasǝam ɓatam a tongno-nong-tāruia nongŋo mem nǝ ɓǝlam, mǝ nda ɓwa Isǝrayila, a tau mala Benjami, ɓwa Yahudi mǝɓafoe. Sǝ ɓǝ̀ nda ace kpata Nggurcau mala Musa ka, mǝ nda ɓwa Farisi, mǝnana à ndanǝ bumpina arǝ kpata Nggurcau ka.

⁶ Ɓǝ̀ nda a cau mala pakki Ɓakuli turo nǝ bumpina ka, ɓafo ǝn pe ikǝlisiya tanni kǝrkǝr. Sǝ ɓǝ̀ kàr a bui mala docauɓoarna aɓa kpata Nggurcau ka, ko ǝn yallì kǝ ɓe ɗang.

⁷ Agir mǝnana ɗiɗyal ǝn nggǝ twalia kǝla agirkuma ka, adyan ngga, ǝn nyesǝia ɓà, ace cau mala Kǝrǝsti.

⁸ Sǝ kǝgir pà kàm à nǝ̀ kani arǝ surǝ Kǝrǝsti Yesu Mǝtalem ɗang. Ən nying girbunda kat ace cau male. Ən sukkinia, ǝn twalia à pà a kun kǝgir ɗang, ace mǝnana ɓǝ̀ ǝn kum Kǝrǝsti,

⁹ sǝ ɓǝ̀ sǝm duk mwashat sǝnǝi. Ən panǝ cauɓoarna mala ɓamuram mǝnana à kumnggiki ace kpata Nggurcau ka ɗang; she kǝ mǝnana à kumnggiki nǝ paɓamuru aban Kǝrǝsti ka. Acemǝnana njar mana Ɓakuli nǝ tsǝk sǝm, sǝm nǝ̀ duk aɓwana mǝɓoarne a kane male ka, ndǎ ɓǝ̀ sǝm pa ɓamur sǝm aban Kǝrǝsti ka.

¹⁰ Ən nggǝ earce surǝ Kǝrǝsti andǝ rǝcandǝa mǝnana loasǝi a ɓembe ka. Ən earǝna mǝ kum kāmbe mem aɓa nu tanni ate, mǝ nǝ wú a cau male,

¹¹ nǝ́ tsǝkɓalǝu ama, ko lang ngga mǝ nǝ kum lo a ɓembe.

Ɓariki aban ká lumsǝ turo

¹² Mim ngga ǝn twali ama ǝn bwalǝna ban came ɗang, sǝ ǝn mala ká lumsǝ gbal ɗang. Mǝ nda aban ɓariki mǝ nǝ kum gir mǝnana Kǝrǝsti Yesu ciem, ǝn duk male ace ka.

¹³ Wun amǝ'eambǝam, ǝn twali kǝla ǝn kumǝni ɗang. Gir mǝnana mwashat ǝn nggǝ pak ka, nda mǝ lorǝ gir mǝnana kutina ka, sǝ mǝ soa mǝsǝu ata gir mǝnana nda a dǝmbam ngga.

¹⁴ Ən pa rǝcandǝa arǝ ɓangmire aban ká masǝlǝate, ace mǝnana mǝ kum tangnakusǝu a kuli, mǝnana Ɓakuli tunǝam ace nǝ̀ pam aɓa Kǝrǝsti Yesu ka.

¹⁵ Sǝm kat mǝnana sǝm gulna aɓa Kǝrǝsti ka, ɓǝ̀ sǝm sǝni anggo. Sǝ ɓǝ̀ aɓea ɓwana ata wun, à ndanǝ ɓe kǝ ɗenyicau ɗàng ngga, Ɓakuli nǝ̀ mǝnggia wun ɓālǝi.

¹⁶ Sǝm ngga, ɓǝ̀ sǝm bwal kàngkàng arǝ bancame mǝnana sǝm bingŋǝna kam ngga.

¹⁷ Wun amǝ'eambǝam, wu twal kusǝam, sǝ wu kani arǝ aɓwana mǝnana à kǝ twal kusǝu mǝnana sǝm lǝmndǝa wun ngga.

¹⁸ Kǝla mǝnana ǝn nunkir wun tutu ɗiɗyal ka, sǝ adyan ngga, mǝ nda ban ɓǝsǝlǝa wunì ɗǝm nǝ mǝrǝm a mǝsǝam, ama aɓwana pas ka, aɓia amǝbura mala nggun-gangndi mala Kǝrǝsti na.

¹⁹ Masǝlǝatea ka, kiɗiki na. Ɓakuli malea nda bumia, agir kǝsǝkya à nda ka agir jali malea, sǝ ɓabumia ka nda amur agir ɓanza.

²⁰ Sǝ ma'sǝm ngga, sǝm nda ka aɓwana mala kuli. Sǝm nda ban kundǝ nyare yiu mala Mǝ'amsǝ sǝm nǝ kuli, yì Mǝtalabangŋo Yesu Kǝrǝsti.

²¹ Nǝ́ rǝcandǝa male mala gandǝ nyesǝ agir kat aɓata yalban male ka, nǝ̀ yia nggaɗi nggūrǝ sǝm mǝ ká lui ɓǝ̀ pâ kǝla nggūrǝi mǝɓoarɓwe.