Amǝ Filipi 1 - Maləmce Məfele mala Ɓakuli: Kurcau Məbəshe

Makkun mala Bulǝs andǝ Timoti

¹ Cautera mǝnia ka, pur nǝban Bulǝs andǝ Timoti, aguro mala Kǝrǝsti Yesu. Aban ká aban aɓwana amǝ fele mala Ɓakuli a Filipi, yia mǝnana à nda aɓa dotarǝu andǝa Kǝrǝsti Yesu ka, kat andǝ aɓwana-mǝgule andǝ amǝ'bwalturo ɓa ndahiwi.

² Ɓǝ̀ Ɓakuli Tar sǝm andǝ Mǝtalabangŋo Yesu Kǝrǝsti, pa wun ɓwamuru andǝ dorǝpwala.

Yàwá andǝ hiwi mala Bulǝs

³ Ɓǝ̀ aya pwari sǝ ǝn ɗenyi nǝ wun ngga, ǝn nggǝ pakki Ɓakuli mem yàwá.

⁴ Hiwi mem ace wun kat ko aya pwari ka, ǝn nggǝ pê nǝ bumpwasǝa,

⁵ acemǝnana wu pam gbasha aɓa hamnǝ Cau Amsǝban mala Kǝrǝsti, twalo a bu-pwari mǝnana wu tita oe ka, yi puro adyan.

⁶ Mim ngga, mǝ ndanǝ makɓalǝu ama Ɓakuli mǝnana tita mǝnia yì turo mǝɓoarne aɓalǝ wun ngga, nǝ̀ lidǝmbǝa nǝi aban ká masǝlǝe a Pwari mǝnana Kǝrǝsti Yesu nǝ̀ nyar nǝi ka.

⁷ Ɓǝ̀ ǝn twal wun kat anggo ka, ǝn ɓwarki ɗang, acemǝnana ɓabumam na arǝ wun. Wun kat ka wu nda atam, wu nda arǝ bwalam arǝ mǝnia yì turo Ɓakuli pam aɓa ɓwamuru male ka, kat aɓa kùrban mem, andǝ bǝl ɓa Cau Amsǝban, andǝ lǝmndǝì aɓwana mǝsǝcau mǝnana a ɓalǝi ka.

⁸ Ɓakuli surǝna rǝ lime mala earcearǝu mǝnana mǝ ndanǝi ace wun, andǝ nzal wun kat mǝnana ǝn nggǝ oe, nǝ ulang earceban mǝnana Kǝrǝsti Yesu ndanǝi ace wun ngga.

⁹ Sǝ hiwi mem ngga, nda mǝnana ama earcearǝu ma'wun ɓǝ̀ lidǝmbǝa nǝ gulo, sǝ ɓǝ̀ wu lumsǝ nǝ surǝe andǝ bwaltagir mǝlime.

¹⁰ Acemǝnana ǝn nggǝ earce ama, ɓǝ̀ wu bwalta gir mǝnana ɓoaro kutibanì wu nǝ̀ twal ka, sǝ anggo ka wu nǝ̀ dukdo ɓoarnsari andǝ ɗwanyi cau a rǝǔ, ace Pwari nyare mala Kǝrǝsti.

¹¹ Wu lumsǝ nǝ aɓealǝu mala docauɓoarna, mǝnana Yesu Kǝrǝsti pea aɓalǝ wun ngga. Mǝnia ka, nǝ̀ pè Ɓakuli gulo andǝ ɓwangsǝban.

Banɓoari Bulǝs ama à hamǝna nǝ cau mala Yesu

¹² Ado ka ǝn nggǝ earce ɓǝ̀ wu sǝlǝa, wun amǝ'eamrǝarǝu, ama agir mǝnana à kumam kani ka, à nda à tsǝk Cau Amsǝban akiban ngga.

¹³ Àkǝ̀ ce sǝ aɓwana mǝnana akani, andǝ amǝyal palta kat ka, à sǝlǝ ama mǝ nda aɓa nsolo ace Kǝrǝsti.

¹⁴ Sǝ ace kuro mǝnana à kùrram a ndàkurban ngga, bangula amǝ'eamrǝarǝu mǝnana akani ka, à kum ɓabumcandǝa sǝ à bang cau mala Ɓakuli nǝ rǝcandǝa, ɓangciu pà kàm ɗang.

¹⁵ Mǝsǝcau na ama aɓea ɓwana kǝ̀ hamnǝ cau mala Kǝrǝsti ace mwararǝu andǝ mɓali, sǝ aɓea ka, à kǝ hamnǝi nǝ ɓabum mǝɓoarne.

¹⁶ Amǝnia yia ɓwana nǝ nzǝmo ka, à kǝ hama ace earcearǝu mǝnana à ndanǝi a rǝam ngga. Acemǝnana à sǝlǝna ama Mǝtalabangŋo twalam ace bǝl ɓa Cau Amsǝban.

¹⁷ Aɓea mǝno ka, à kǝ hamnǝ cau mala Kǝrǝsti nǝ mǝsǝcau ɗang, à kǝ hamnǝi nǝ mwararǝu, à kǝ sǝni kǝla à nǝ̀ tsǝa ɓǝ̀ rǝam kwanam aɓa kùrban mǝnana mǝ ndakam ngga.

¹⁸ Sǝ mǝno ka kiɗiki kǝgir ɗang! Ko ɓǝ̀ nda aɓa mǝsǝcau ko aɓa nyir ka, à hamǝna nǝ Kǝrǝsti, sǝ aɓa mǝno ka ǝn nggǝ pak banɓoarnado. E, sǝ mǝ nǝ lidǝmbǝa nǝ pak banɓoarnado,

¹⁹ acemǝnana ǝn sǝlǝna ama nǝ ahiwi ma'wun, andǝ gbasha mǝnana Bangŋo mala Yesu Kǝrǝsti pam ngga, agir mǝnana à kumam ngga, à nǝ̀ ngga duk panzǝban mem.

²⁰ Ən nggǝ sǝn dǝmbǝa nǝ tsǝkɓalǝu ama pà mǝ nǝ nu kǝsǝkya ɗang ko bǝti. A kuni ka mǝ nǝ kum mǝsǝkang-kangŋa pepe, acemǝnana ado, kǝla mǝnana a koya pwari ka, Kǝrǝsti nǝ̀ kum gulo a ɓalǝam, ko nǝ yilǝmu ko aɓa lú.

²¹ A banam ngga, do nǝ yilǝmu ka nda ace Kǝrǝsti, sǝ ɓǝ̀ ǝn wu ka, ɓoaro kutibanì.

²² Sǝa ma ɓǝ̀ ǝn dum nǝ yilǝmu a nggūrǝu ka, mǝ nǝ pak aturo mǝɓoarne kpǝm ace Kǝrǝsti. Mim ado ka, mǝsǝcau, ǝn surǝ ko mǝ ye na ɓoaro kuti ɓi ka ɗang.

²³ Ɓabumam gau ɓari: Eare mem ngga, mǝ nǝ o mǝ nǝ ngga do sǝnǝa Kǝrǝsti, acemǝnana mǝnia ka nda nǝ̀ ɓoaram nǝ̀ kutibanì ka.

²⁴ Sǝ ace wun ngga, ndanǝ ɓoaro ɓǝ̀ ǝn lidǝmbǝa nǝ yilǝmu a nggūrǝu.

²⁵ Sǝ acemǝnana ǝn earǝna nǝ mǝno ka, ǝn sǝlǝna ama mǝ nǝ lidǝmbǝa nǝ do nǝ yilǝmu ace mǝnana ɓǝ̀ ǝn duk gbasha ma'wun kat, ɓǝ̀ wu gulo, sǝ wu kum banɓoarnado mala paɓamuru.

²⁶ Sǝ ɓǝ̀ ǝn yina aban wun ɗǝm ngga, wu nǝ̀ nggori nǝ Kǝrǝsti Yesu kǝrkǝr ace gir mǝnana kǝ pe a ɓalǝam ngga.

²⁷ Ado ka, gir mǝnana ɓoaribanì ka, nda mǝnana ama wu do kǝla aɓwana mala Kǝrǝsti, nǝ bwal ɓamur rǝ wun aɓa njar mala Cau Amsǝban. Sǝ ko ɓǝ̀ ǝn yiu ɗǝm a sǝn wun, ko ǝn yiu raka, mǝ nǝ ok ce came ma'wun kàngkàng aɓa Bangŋo andǝ ɓabum mǝ'mwashati andǝ ɓariki a tarǝ wun ace paɓamuru ma'wun arǝ Cau Amsǝban.

²⁸ Wu kǝa dum nǝ ɓangciu a ɓadǝm aɓi wun amǝbura ɗang. Mǝno ka, nda nǝ̀ lǝmndǝia wia ama à nǝ̀ ngga kiɗiki, sǝ wun ngga wu nǝ̀ auwa. Mǝnia ka nda pe mala Ɓakuli.

²⁹ Acemǝnana dǝmbǝu mǝnana wu kumo arǝ pakki Kǝrǝsti turo ka, pa ace paɓamuru nǝmurǝì abani ɗang, nda gbal acemǝnana ama wu nǝ̀ nu tanni ace ka.

³⁰ Mǝnia yì wara ka sǝm nda ate sǝnǝa wun. Wu sǝnǝna ɓariki mem, sǝ wu ongŋǝna ce mǝno ado mǝ nda a ɓalǝi ka.