2 Timoti 3 - Maləmce Məfele mala Ɓakuli: Kurcau Məbəshe

Ɓike mala ado a masǝlǝata apwari

¹ We ka, sǝlǝ ama, kwano mala ado nǝ̀ ngga yiu a masǝlǝata apwari.

² Ɓwapǝndǝa nǝ̀ duk amǝ earce ɓamuria, amǝ rufi ata boalo, amǝ nggori andǝ amǝ twalɓamuru. À nǝ̀ duk amǝ ɓǝsǝki Ɓakuli, andǝ amǝ mgbikiru aban atárria andǝ anggea, andǝ amǝ ɗwanyi pak yàwá, à pà nǝ̀ fali nǝ Ɓakuli ɗang.

³ Ɓwapǝndǝa nǝ̀ dum nǝ ɗwanyi earcearǝu, à nǝ̀ duk amǝ ɗwanyi twalbani, amǝ twalki alullǝ aɓwana, amǝ ɗwanyi bwalrǝu, amǝ bum tǝra, à pà nǝ̀ earce gir mǝɓoarne ɗang.

⁴ Ɓwapǝndǝa nǝ̀ duk amǝ mak aɓea, amǝ ɗwanyi tsǝkiru, amǝ gusǝlǝ-muru, andǝ amǝ earce banɓoarnado amur earce Ɓakuli.

⁵ À nǝ̀ lǝmndǝi a nza kǝla yia ka aɓwana mala Ɓakuli na, sǝ à ɓinǝ pà ɓamuria arǝ rǝcandǝa mala Ɓakuli mǝnana nǝ̀ cia à nǝ̀ duk do mala amǝkwaɗi ka. A ulang amǝnia yì aɓwana ka, wu ɓanggi bania.

⁶ À ndaka aɓwana mǝnana à kǝ swár zàng, à kǝ kutiki arǝ aɓala mala aɓwana, à kǝ swár amamǝna amǝ'ɗwanyi sǝlǝe, mǝnana cauɓikea akina ɓabumia, sǝ à kǝ ɓangŋa ata koya ulang suno mǝɓane ka.

⁷ A ulang amamǝna mǝno ka, à kǝ kyal ata akanigir ɗàngɗáng koya pwari, sǝ ko à kǝ gandǝ bwalta mǝsǝcau ɗang.

⁸ Kǝla mǝnana Janis andǝ Jambǝris ɓinǝì Musa à earnǝi raka, anggo sǝ aman yì aɓwana ka, à ginǝki mǝsǝcau. Yia ka, aɓwana na mǝnana ɓabumia sharna aɓa cauɓikea, sǝ paɓamuru malea ka, mǝɓafoe na ɗang.

⁹ Sǝa ama yia ka, à pà nǝ̀ ká ɗār ɗang, ɗwanyi sǝlǝe malea nǝ̀ lǝmndǝ rǝì aban aɓwana kat, kǝla mǝnana kum a Janis andǝ Jambǝris ka.

Masǝlǝata kwarkiru mala Bulǝs aban Timoti

¹⁰ Sǝ we Timoti ka, à surǝna rǝ kanigir mem andǝ ɓealǝam. À surǝna rǝ kani mala ɓabumam aɓa do mem. À surǝ paɓamuru mem, andǝ munyi, andǝ earcearǝu, andǝ gandǝrǝu mem;

¹¹ kat andǝ atanni mem, andǝ apatanni mana à yiu amuram ngga. À surǝna rǝ kanggǝrang tanni mǝnana à pam a Antiyok, andǝ Ikoniya andǝ Listǝra ka. Kat andǝ amani ka, Mǝtalabangŋo amsǝam aɓalǝ amǝnia yì agir ka kat.

¹² E, sǝ koya ɓwa na ear ama nǝ̀ duk do ɓealɓoarna aɓa Kǝrǝsti Yesu ka, à nǝ̀ pe wi tanni.

¹³ Sǝ amǝ'ɓealɓikea andǝ amǝ'swarkiban ngga, à nǝ̀ lidǝmbǝa nǝ ɓealɓikea aban ká kìɗìkì, à nǝ̀ nggǝ swarki aɓwana sǝ yia gbal ka à nǝ̀ nggǝ swarkia.

¹⁴ Sǝ we ka, lidǝmbǝa aɓa mǝsǝcau mǝnana à kanio, sǝ a earnǝi ka, acemǝnana a surǝna rǝ aɓwana mǝnana à kanio gir ka.

¹⁵ Sǝ ɓǝ̀ ɓalǝo kasǝ ama, lo mo a muntulo ka, a surǝ a Malǝmce mǝfele mana à gandǝ po sǝlǝe ace kum auwa nǝ paɓamuru aban Kǝrǝsti Yesu ka.

¹⁶ Malǝmce mǝfele kat ka, ǝn'yali mala Ɓakuli na, sǝ ndanǝ ɓoaro ace kani mǝsǝcau, andǝ lǝmndǝ ɓwarkio, andǝ gilǝkiban aɓa ɓwarkio, andǝ kwarkiru ace pak mǝɓoarne.

¹⁷ Ɓakuli kǝ pangŋǝna turo nǝi, ace gilǝki aɓwana male, ɓǝa dum nǝ kur rǝǔ ace pak koya gir mǝɓoarne.