2 Timoti 2 - Maləmce Məfele mala Ɓakuli: Kurcau Məbəshe

Timoti ka mǝkpata Kǝrǝsti Yesu na nǝ ɓabumi kat

¹ Sǝ we munem, Timoti ka, dum nǝ mǝsǝkang-kangŋa aɓa ɓwamuru mǝnana sǝm ndanǝi aɓa dotarǝu ma'sǝm sǝnǝa Kǝrǝsti Yesu ka.

² Sǝ kanigir mǝnana a oe a kunam a ɓadǝmbǝ amǝnakun pas ka, twali, kani aɓwana amǝ'mǝsǝcau nì mǝnana à nǝ̀ gandǝ tasǝi aban ká aban aɓea aɓwana gbal ka.

³ Dum nǝ gandǝrǝu aɓa tanni atam kǝla soje mǝɓoarne mala Kǝrǝsti Yesu.

⁴ Kǝ soje pâ kàm mǝnana nǝ̀ oasǝ ɓamuri aɓa dukiado mala aɓwana mǝnana asoje na raka ɗang, acemǝnana kǝ earce nǝ̀ pwasǝbum ɓwa mǝnana twali a soje ka.

⁵ Anggo gbal, ɓwa mǝnana nda aɓalǝ amǝ karǝki amire ka, kǝ li ɗang, she ɓǝ̀ ɓangŋǝna mire masǝlǝna te pepe, kpana ata nggurcau mǝnana à tsǝki amǝ mire ka.

⁶ Mǝrya mana pak turo mǝcande ka, ɓoaro ɓǝ̀ li tadǝmbǝa ɓǝla agirɓaban mǝno tanniki aɓalǝi ka.

⁷ Pak ɗenyicau amur agir mǝnana ǝn nggǝ banggo ka. Ɓakuli ka, nǝ̀ mǝnggio ɓalǝ amǝnia yì agir ka kat, ace mǝnana wu bwaltea.

⁸ Koya pwari ka, dum nǝ ɗenyicau ama, Yesu Kǝrǝsti, Mǝkà Dauda ka, à loasǝi a ɓembe. Mǝnia ka nda Cau Amsǝban mana ǝn nggǝ hamnǝi ka.

⁹ Sǝ acemǝnana ǝn nggǝ hamnǝ mǝnia yì Cau Amsǝban ngga, mǝ ndya ǝn nggǝ tanni, à kùrram nǝ ansolo kǝla ɓwa mǝnana mǝɓealɓikea na ka. Sǝa ma cau mala Ɓakuli ka, à kùrrì ɗang.

¹⁰ Ace mani ka, ǝn earǝna mǝ dum nǝ gandǝrǝu aɓa ko man, ace aɓwana mana Ɓakuli tària ka, ace mǝnana yia gbal ka ɓǝa kum amsǝban mana aɓa Kǝrǝsti Yesu ka, a tarǝia andǝ gulo mǝnana pà nǝ̀ mal raka.

¹¹ Mǝnia yì cau ka, cau na à nǝ̀ earnǝi, mana ama: “Ɓǝ̀ sǝm wu sǝnǝi ka, sǝm nǝ̀ dum nǝ yilǝmu sǝnǝi gbal.

¹² Ɓǝ̀ sǝm twal gandǝrǝu aɓa tanni ka, sǝm nǝ̀ duk amurǝma ate. Ɓǝ̀ sǝm tǝmce surǝe ka, yì gbal ka, nǝ̀ tǝmce surǝ sǝm.

¹³ Ɓǝ̀ sǝm dum nǝ mǝsǝcau raka, yì ka, dumǝna nǝ mǝsǝcau, acemǝnana pà nǝ̀ tǝmce ɓamuri ɗang.”

Mǝturo mǝnana Ɓakuli earnǝi ka

¹⁴ Wu kǝ kasǝ ɓalǝ aɓwana arǝ amǝnia yì agir ka, sǝ wu nunkiria a ɓadǝm Ɓakuli, ɓǝa ɗeki makgir amur acau. Amǝno yì amakgir ka, à pànǝ ɓoaro ɗang, à nǝ̀ kiɗiki aɓwana mǝnana à kǝ okia ace ka.

¹⁵ Ɓariki nǝ pa rǝcandǝa arǝ turo kàngkàng, ace mǝnana wu lǝmndǝ rǝo a ɓadǝm Ɓakuli ɓǝ̀ earnǝ we. Duk mǝturo mǝɓoarne, mǝnana kǝsǝkya pa nǝ̀ pakki wi arǝ ture raka, mǝturo mǝnana kǝ mǝnggi ɓa cau mǝ'mǝsǝcau nì pépè ka.

¹⁶ Tārǝto arǝ naki acauɓana andǝ amǝnana à pà nǝ̀ yinǝi Ɓakuli gulo raka, acau ɓanggea mǝnana à kǝ tasǝta aɓwana nǝ tasǝa aɓa ɗwanyi surǝ Ɓakuli ka.

¹⁷ Akanigir ulang mǝno ka à kǝ akiban kǝla barya mpenye-gula mǝnana kǝ li ɓa'nyam ɓwa ka. Aburana ɓari mǝnana à yì kania aɓwana ulang amǝno yì akanigir ka, à nda ka, Hemǝniyos andǝ Filetus.

¹⁸ À ɗekini njar mala mǝsǝcau, à kǝ na ama loapi ɓembe mala alú kutina. Nǝ ulang mǝnia yì kanigir ka, à tsǝngŋǝna aɓwana pas à ɗekina paɓamuru malea aban Ɓakuli.

¹⁹ Kat andǝ amani ka, mǝsǝcau mala Ɓakuli ka, camǝna kàngkàng kǝla kusǝɓa mǝnana à kwaki sǝ pà nǝ̀ dǝurǝ raka. Amuri ka à nyoulǝ mǝnia yì cau ka ama: “Mǝtalabangŋo surǝna rǝ aɓwana mǝnana à ndaka male ka,” sǝ “Koya ɓwa mǝnana kat kǝ na ama mala Mǝtalabangŋo na ka, dumǝna pup nǝ̀ gapita rǝia andǝ ɓealɓikea.”

²⁰ Aɓa ɓala mǝgule ka, agirturo nakam ɗàngɗáng, aɓea ka, à pea nǝ zǝnariya andǝ azǝrfa, sǝ aɓea ka, à pea nǝ nggun andǝ dǝɓang. Amǝnana boalea gul ka, à nda ace pwari lamsan mǝɓoarne, sǝ amana boalea gul raka, à nda ace turo ɓala mala koya pwari ka.

²¹ Ɓǝ̀ ɓwa lak ɓamuri aɓalǝ amǝno yì aɓealǝu mǝɓane, do aɓa ɓoarnsari ka, nǝ̀ duk girturo ace turo mǝgule, mǝnana à tàrni ndanǝ ɓoaro aban mǝtala-ɓala, sǝ à gilǝkini ace koya turo mǝɓoarne ka.

²² Ɓanggi koya suno mala lo-ɓwa, sǝ wu ɓangŋa ata ɓealɓoarna, andǝ paɓamuru, andǝ earcearǝu, andǝ do rǝpwala, ata re wun wunǝ aɓwana mǝnana à kǝ tunǝ lullǝ Mǝtalabangŋo nǝ ɓabum mǝɓoarnsari ɓǝ̀ ɓwalia wia kam ngga.

²³ Kǝa kánǝ ɓamuri aɓalǝ agǝmi makgir andǝ mana sǝlǝe pà aɓalǝia raka ɗang, acemǝnana we ka a sǝlǝna ama, kǝ yinǝ munǝo.

²⁴ Sǝ guro mala Ɓakuli ka, ɓoaro ɓǝ̀ kǝ loasǝban andǝ kǝɓwa ɗang. Ɓoaro ɓǝ̀ duk ɓukɓuk nǝ aɓwana kat. Ɓǝ̀ duk mǝsǝlǝ kanigir andǝ ɓwa nǝ munyi.

²⁵ Aɓa pê ɓukɓuk ka, kwarkir aɓwana mǝnana à kǝ ɓinǝ earnǝ mǝsǝcau ka. Yakǝla ka, Ɓakuli nǝ̀ nggaɗi ɓabumia, sǝ à nǝ̀ vwaki buia arǝ cauɓikea à nǝ̀ pwanzali, ɓǝ̀ kyan nǝia aɓa surǝ mǝsǝcau.

²⁶ Aɓa mǝno anggo ka, à nǝ̀ nyare aɓa ɗenyicau malea, à nǝ̀ puri ɓa gbǝli mala Shetan mǝnana bwalia guro, sǝ cia à kǝ kpata cau male ka.