2 Timoti 1 - Maləmce Məfele mala Ɓakuli: Kurcau Məbəshe

Makkun mala Bulǝs

¹ Man yì cautera ka, pur nǝ banam Bulǝs, mǝnana Ɓakuli nǝ nggearǝì twallam ɓǝn duk mǝ'mishan mala Kǝrǝsti Yesu ka. Ɓakuli tasǝam ɓǝn hamnǝ ce pàcau mala yilǝmu mǝnana sǝm ndanǝi aɓa kpapi ma'sǝm sǝnǝa Kǝrǝsti Yesu ka.

² Mǝ nda ban gilǝì Timoti munem mǝnana ǝn earkiyi ace raka. Ɓǝ̀ Ɓakuli Tárrû, andǝ Kǝrǝsti Yesu Mǝtala sǝm, lǝmndǝo ɓwamuru, ɓǝ̀ sǝn tǝ̀r mo, sǝ ɓǝ̀ cio wu kum dorǝpwala.

Ɓakɓabum ace do nǝ mǝsǝcau

³ Du andǝ pwari ka, ǝn nggǝ ɗenyi nǝ we aɓalǝ ahiwi mem. Ən nggǝ pakki Ɓakuli yàwá, yì Ɓakuli mǝnana ǝn nggǝ kpate nǝ ɓabum mǝɓoarnsari, kǝla mǝnana akêm pak ka.

⁴ Ɓǝ̀ ǝn ɗenyi nǝ mǝrǝm mǝnana a sukki a pwari gauwa ma'sǝm ngga, nzal sǝno kǝ pakkam. Ban nǝ̀ ɓoaram kǝrkǝr, yi mǝnana ɓǝ̀ sǝm kum ɓamur rǝ sǝm a tarǝ sǝm ɗǝm ngga.

⁵ Ən nggǝ ɗenyi nǝ paɓamuru mo mǝɓafoe aban Mǝtalabangŋo kǝla ulang pe mala keo mǝ'mɓwamae, yì Loyis andǝ nggo Yunis, sǝ ǝn sǝlǝna nǝma a ndarǝ lidǝmbǝa aɓa mǝno yì paɓamuru ka nǝ rǝcandǝa.

⁶ Ace mani ka ǝn nggǝ kasǝ ɓalǝo ama, ɓoro mala Bangŋo mǝnana Ɓakuli po a pwari mǝnana ǝn tsǝk abuam a muro ka, lo ci aɓa turo nǝ pi mala ɓabum.

⁷ Acemǝnana Bangŋo mana Ɓakuli pa sǝm ngga, mala ɓangciu na ɗang. Bangŋo mǝnana pa sǝm ngga, mala rǝcandǝa na andǝ earcearǝu andǝ bwalɓamuru.

⁸ Ace mani ka, ce kǝsǝkya pakko arǝ banggia aɓwana cau amur Mǝtalabangŋo ɗang. Sǝ ce kǝsǝkya pakko a rǝam gbal ɗang, kat andǝ amani ama mǝ nda a ndàkurban ace Kǝrǝsti ka. Nǝ rǝcandǝa mǝnana Ɓakuli po ka, dum nǝ kur rǝǔ ace nutanni atam ace hamnǝ Cau Amsǝban.

⁹ Ɓakuli amsǝ sǝm, sǝ tunǝ sǝm ɓǝ̀ sǝm duk aɓwana male amǝ fele. Pa ace aturo mǝnana sǝm pak ka ɗang, nda àkǝ̀ ce male yì kani mana pusǝ sǝm ace ka, andǝ ɓwamuru male. Pa sǝm mǝnia yì ɓwamuru ka nǝ bu Kǝrǝsti Yesu sǝ yi kwakita ɓanza.

¹⁰ Sǝ ado ka, lǝmndǝna sǝmi bwāng nǝ yiu mala Kǝrǝsti Yesu, Mǝ'amsǝ sǝm, mǝnana ɓun rǝcandǝa mala lú, pǝlǝa lǝmndǝa sǝm njar mala yilǝmu mǝnana málá male pà kàm raka, aɓa Cau Amsǝban.

¹¹ Sǝ Ɓakuli twalam ɓǝn duk mǝ hamnǝ cau male, andǝ mǝ'mishan, andǝ mǝkanigir mala mǝnia yì Cau Amsǝban.

¹² Nda gir mǝnana tsǝa sǝ ǝn nggǝ nu tanni kǝla mǝno mǝ nda a ɓalǝi ka. Sǝ mim ngga, kǝsǝkya kǝ pakkam arǝ mani ɗang, acemǝnana ǝn surǝna rǝ ɓwa mǝnana ǝn guli a rǝì, sǝ ǝn sǝlǝna ama gir mǝnana ǝn nyingŋǝni wi a bui ka, nǝ̀ gandǝ bwale ba pwari nyare male.

¹³ Bwal kanigir mǝɓafoe mǝnana a kanì abanam ngga, ɓǝ̀ dupo girkani mǝnana a nǝ kpate ka, sǝ pè aɓa paɓamuru andǝ earcearǝu mǝnana ndakam aɓa Kǝrǝsti Yesu ka.

¹⁴ Tsǝk kiro arǝ cau mǝ'mǝsǝcau nì, mǝnana à po a buo, nǝ rǝcandǝa mala Bangŋo Mǝfele mǝnana do a ɓabum sǝm ngga.

¹⁵ Kǝla mǝnana a sǝlǝna ka, aɓwana mǝnana a bu-nzali Asiya ka, à pǝlǝna nzǝmia a rǝam kat à nyingŋǝnam. Ko nggearǝ Fijelus andǝ Hamojenis gbal ka, à nyingŋǝnam.

¹⁶ Ɓǝ̀ Ɓakuli lǝmndǝì Onisǝforǝs andǝ amǝ ɓala male ɓwamuru, acemǝnana kǝ yiu abanam tutu, sǝ kǝ ɓakɓabum, sǝ ko kǝsǝkya pakki wi a rǝam acemǝnana mǝ nda aɓa nsolo ka ɗang.

¹⁷ Yiu male a Roma ka, altam kǝrkǝr, gandǝa yi kumam.

¹⁸ Ɓǝ̀ Ɓakuli lǝmndǝì wi ɓwamuru ɓǝ̀ kum earmuru a pwari nyare yiu mala Kǝrǝsti. Sǝ we ka a sǝlǝna rǝ ulang gbasha mǝnana pam a Afisu ka.