2 Bitǝrus 2 - Maləmce Məfele mala Ɓakuli: Kurcau Məbəshe

Amǝ'ɓangna andǝ amalǝm mǝ'nyirì

¹ Sǝ amǝ'ɓangna mǝ'nyirì gbal ka à lo aɓalǝ amǝ Isǝrayila, sǝ kǝla mǝno ka amǝkanigir mǝ'nyirì nǝ̀ ngga lo aɓalǝ wun. Aɓa kutan à nǝ̀ yiu nǝ akanigir mǝ'nyirì mǝnana à nǝ̀ kiɗikina paɓamuru mala aɓwana nǝia ka, yale à nǝ̀ tǝmce Mǝtalabangŋo mǝnana akmúr sǝm aɓalǝ acauɓikea ma'sǝm ngga. Anggo sǝ à nǝ̀ nunmbi ɓamuria kiɗikiban a kaurǝa.

² Aɓwana pas nǝ̀ kpata kusǝia mala ɓiki do kìɗìkì mala nongginǝ-rǝarǝu, sǝ ace amǝnia yì amǝkanigir mǝ'nyirì ka, aɓwana nǝ̀ ɓǝsǝki njar mala mǝsǝcau.

³ Nzumon malea nǝ̀ cea à nǝ̀ yiu nǝ acau swarkiban aɓa kutan, à nǝ̀ ɓǝmbǝri wun. Ɓakuli angŋǝna dǝmbǝa ɗiɗyal kasǝnia ɓashi, sǝ kiɗikea malea ka, ceì nong ɗang.

⁴ Nggearǝ amǝturonjar mǝnana à pak cauɓikea ka, Ɓakuli sǝn mǝsǝswatǝr malea ɗang, ramtea aɓa nggea-tulibǝsa, kurkia kam aban mǝpǝndǝe mǝnana kǝlling-kǝlling ngga, she ɓǝ̀ pwari pak ɓashi pangŋǝna ka.

⁵ Sǝ aɓwana mǝnana a ɓanza mana ɗiɗyal ka, Ɓakuli sǝn mǝsǝswatǝr malea ɗang, she kǝ Nuhu mǝ hamnǝ cau mala do-ɓealɓoarna andǝ aɓea aɓwana tongno-nong-ɓari na. Ɓakuli amsǝia a baku mǝnana yinǝ nggea-murgula amur ɓanza mala amǝ'cauɓikea ka.

⁶ Ɗǝm ngga Ɓakuli ɓasha anggea-là mala amǝ Sodom andǝ mala amǝ Gomora, pisǝia à pǝlǝ agigi mala tú. Pǝlǝa cia à duk girkani arǝ gir mǝnana nǝ̀ kum amǝ ɗwanyi kpata Ɓakuli.

⁷ Sǝ Lotu mǝnana mǝɓealɓoarna na ka Ɓakuli amsǝi aɓa Sodom. Ɓakuli amsǝi acemǝnana yì ka, kuti aɓa ɗwanyi banɓoarnado andǝ bumkiɗikea arǝ do kìɗìkì mala nongginǝban mala amǝ'ɓealɓikea.

⁸ Aɓa do mala mǝno yì ɓwa mǝɓoarne yi Lotu, aɓalǝ amǝ'ɓealɓikea ka, kum tanni kǝrkǝr aɓa yilǝmi nǝ ɓealɓikea mana kǝ sǝni nǝ mǝsǝì, sǝ kǝ oe nǝ kiri a koya pwari ka.

⁹ Sǝ acemǝnana Ɓakuli pak mǝno ka, yì ka, surǝna njar mana nǝ̀ amsǝna amǝ'ɓealɓoarna nǝi aɓalǝ akárǝkiban malea, sǝ amǝ'ɓealɓikea ka, nǝ̀ cia aɓata tanni, ba pwari mala ɓashi.

¹⁰ Nggeamurǝmi ka, nǝ̀ ɓashi amǝ gyata kìɗìkì mala anpel mala nggūrǝu, andǝ amǝ burice yalban mala Ɓakuli amuria. Acemǝnana amǝnia yì amǝkanigir mǝ'nyirì ka à ndanǝ gusǝlǝ-ɓamuru, andǝ candǝ-ɓamuru ɗǝm ngga, ko ɓangciu kǝ pakkia wia arǝ na mǝɓane amur amǝturonjar a kuli, mǝnana Ɓakuli pea wia tǎ aɓa ɓoarɓwa ka ɗang.

¹¹ Sǝ kat andǝ amani ama yia amǝturonjar ka à kútì aɓwana mǝnia nǝ rǝcandǝa andǝ gulo ka, à kǝ loasǝ kunia ama à nǝ̀ na mǝɓane amuria aɓa ká nǝ cauɓashi a ɓadǝm Ɓakuli ɗang.

¹² Amǝnia yì amǝkanigir mǝ'nyirì ka, à kǝ gyata oe malea a rǝǔ, kǝla anyamɓikea mǝnana à pànǝ ɗenyicau raka, mana à pusǝia ace mǝnana ɓǝa bwalia ɓǝa wallia ka. À kǝ na mǝɓane amur gir mǝnana à bwalta kusǝì raka, sǝ acemǝnana à nda kǝla agirkusǝu ka, à nǝ̀ kiɗikia.

¹³ Kiɗikea malea ka, tangnakusǝia na ace ɓealɓikea mǝnana à lǝmndǝi ka. Do kìɗìkì mala likiali andǝ nukiagir nǝ nggea pwari a kuli ka, à nyesǝi banɓoarnado na abania. Aban likwar ata wun ngga à duk agir kǝsǝkya andǝ agir ɓǝsǝkiban aɓalǝ wun, à panzǝ rǝia arǝ pak banɓoarnado nǝ pakkiagir ɓosǝkiban malea.

¹⁴ Rǝia kǝ ɓǝla nǝ suno nong nǝ amamǝna ko aburana mǝnana à pà doɓala andǝia raka, sǝ ko à kǝ aulǝ nǝ pak cauɓikea ɗang. À kǝ swár aɓwana mǝnana kusǝia cam raka aban ká pak cauɓikea. Ɓabumia kwár aɓa nzumon. Yia ka aɓwana na aɓata suban mala Ɓakuli.

¹⁵ À nyingŋǝna njar mala mǝsǝcau sǝ à ɓwarkini tanjar mǝɓoarne. À kpanata njar mala Balaam muna mala Beyo, mǝnana earce kum boalo nǝ njar gir mala cauɓikea ka.

¹⁶ Sǝ yì ka, mǝndambǝritso gimbi arǝ turo mǝɓike male; mǝndambǝritso mǝnana girkusǝu na kǝ na cau raka, bangcau nǝ gi ɓwapǝndǝa sǝ tamsǝ ɓanggya mala mǝɓangna.

¹⁷ Amǝnia yì aɓwana ka, à dumǝna agir mǝɓane kǝla amgbeaɗe mǝnana à imǝna ka, ko kǝla burambulo mǝnana gung loasǝi ka. Ɓakuli gilǝkina ban acea a nggea ɓa pǝndǝa mǝlime.

¹⁸ Nǝ́ naki acau mǝɓangge mala twalɓamuru malea, à kǝ swár aɓwana mǝnana à ndarǝ puro à nǝ̀ api ɓalǝ aɓwana mǝnana a do aɓa ɓwarkio mala cauɓikea ka. À kǝ ɓariki à nǝ̀ nunnia aɓalǝ asuno mǝɓane mala nggurǝ ɓwapǝndǝa mǝ'earce kìɗìkì mala cauɓikea.

¹⁹ Amǝnia yì amǝkanigir mǝ'nyirì ka à kǝ nea aɓwana mǝnia ama à nǝ̀ pea wia kum-ɓamuru, sǝ yia nǝ ɓamuria ka, à nda ka guro mala aɓealǝu mala kìɗìkì. Gir mǝnana kat limurǝm amur ɓwa ka, ɓwe pǝlǝna guro aɓata gir nî.

²⁰ Sǝ ɓǝa ɓwana apini aɓealɓikea mala ɓanza nǝ njargula surǝ Mǝtala sǝm andǝ Mǝ'amsǝ sǝm Yesu Kǝrǝsti, sǝ à nyar ɗǝm nǝ nzǝmo à yì marǝki rǝia sǝ à ɓunggio aɓalǝ aɓealɓikea mǝno ka, zuriki mǝnana à nda a ɓalǝi ado ka, ɓikina kutina mǝdǝmbe.

²¹ Ɗwanyi surǝ njar mala do ɓealɓoarna malea ka ɓǝ́ ɓoarǝni banì amur mǝnana à surǝni sǝ à pǝlǝ nzǝmia arǝ nzongcau mǝfele mǝnana à pea wia ka.

²² Yia ka, à lǝmndǝna mǝsǝcau mala mǝnia yì kun-nacau mana ama, “Nvwa nyarǝna a li gir mǝnana ukki ka.” “Tǝmbǝrǝm ɓala mana à sussǝi ka, nyarǝna aban tapiki a dǝɓang.”