2 Bitǝrus 1 - Maləmce Məfele mala Ɓakuli: Kurcau Məbəshe

Makkun

¹ Makkun mǝnana pur nǝ bu Shiman Bitǝrus, guro sǝ mǝ'mishan mala Yesu Kǝrǝsti. Aban ká aban aɓwana mǝnana à kumǝna paɓamuru mǝɓoarne kǝla mǝnana sǝm ndanǝi ka, ata cau mala pémǝɓoarne mala Ɓakuli andǝ Mǝ'amsǝ sǝm Yesu Kǝrǝsti.

² Ɓǝ̀ Ɓakuli pa wun ɓwamuru andǝ dorǝpwala kam kpǝm nǝ lidǝmbǝa ma'wun aɓa surǝ Ɓakuli andǝ Yesu Mǝtala sǝm.

Do mala amǝkpata Kǝrǝsti

³ Ɓakuli aɓa rǝcandǝa male ka pana sǝm koyagir mǝnana ɓoaro ɓǝ̀ sǝm pang nǝi ace do yilǝmu andǝ do ɓanggi Ɓakuli ka. Amǝnia yia agir ka Ɓakuli pà sǝmia kat lang sǝm yì surǝ Yesu mǝnana tunǝ sǝm ɓǝ̀ sǝm kum kāmbe aɓa gulo andǝ ɓoaro male ka.

⁴ Sǝ ata cau mala gulo andǝ ɓoaro male ka, ɓwamur sǝm pà sǝm aɓoro amǝgulke kǝrkǝr andǝ amǝɓoarne mǝnana bangŋa ama nǝ̀ pà ka. Pak mǝnia ka ace mǝnana nǝ amǝnia yia aɓoro ka, ɓǝ̀ sǝm kum kāmbe aɓa pa male mala do Ɓakuli, sǝ ɓǝ̀ sǝm api kiɗikiban mala ɓanza mǝnana suno mǝɓane kǝ yiu nǝi ka.

⁵ Ace mǝnia ka, wu ɓariki, wu lumsǝkun paɓamuru ma'wun nǝ cauɓoarna; sǝ cauɓoarna ka wu gbashite nǝ surǝgir;

⁶ surǝgir ka wu gbashite nǝ bwalrǝu; bwalrǝu ka wu gbashite nǝ gandǝrǝu; gandǝrǝu ka wu gbashite nǝ do ɓanggi Ɓakuli.

⁷ Sǝ do ɓanggi Ɓakuli ka wu gbashite nǝ ɗenyi nǝ aɓwana kǝla amǝ'eamrǝarǝu andǝ lǝmndǝ earcearǝu aban koyan ngga.

⁸ Ɓǝ̀ wu ndanǝ amǝnia yì aɓealǝu, sǝ à nǝ̀ nggǝ gul aɓalǝ wun ngga, pa wu nǝ̀ gatti aɓalǝ aturo ɗang, sǝ surǝgir ma'wun amur Mǝtala sǝm Yesu Kǝrǝsti ka, nǝ̀ duk gir mǝɓoarne andǝ gbasha aban aɓwana.

⁹ Sǝ ɓwa mǝnana pànǝ amǝnia yì aɓealǝu raka, dumǝna nte, kǝ sǝnban kuko ɗang, sǝ ɓālǝi lorǝna ama à langŋǝni wi acauɓikea male mǝ'ɗiɗyali.

¹⁰ Ace mani ka, wun amǝ'eamrǝarǝu, wu pà rǝcandǝa arǝ lǝmndǝi ama ɓafo na wu nda aɓalǝ aɓwana mǝnana Ɓakuli tunǝia, sǝ tarkia ka. Ɓǝ̀ wu lidǝmbǝa nǝ do aɓalǝ amǝno yì aɓealǝu ka, pà wu nǝ̀ kuti aɓa cauɓikea ɗang, sǝ paɓamuru ma'wun ngga nǝ̀ kum kusǝu came.

¹¹ Anggo ka, sǝ Ɓakuli nǝ̀ mǝnba wun kunɓala wyang ace kutio aɓa Domurǝm mala Mǝtala sǝm andǝ Mǝ'amsǝ sǝm yì Yesu Kǝrǝsti, Domurǝm male mǝnana masǝlǝate pà kàm raka.

Tsǝkiru arǝ cau mala Malǝmce

¹² Ace mani ka, mǝ ndanǝi a ɓabumam mǝ nggǝ kasǝɓalǝ wun koya pwari arǝ amǝnia yì acau ka, kat andǝ amani ama wu surǝnia, sǝ wu tamsǝna kusǝ wun kàngkàng amur mǝsǝcau mǝnana wu angŋǝni ka.

¹³ Yale a sǝne mem ngga, aɓa do mem kat aɓa mǝnia yì nggūrǝu ka, ɓoaro ɓǝn nggǝ kasǝɓalǝ wun.

¹⁴ Ən sǝlǝna ama pà nǝ̀ sau ɗang mǝ ndo mǝ nǝ ɗeki mǝnia yì do ɓanza ka, kǝla mǝnana Mǝtala sǝm Yesu Kǝrǝsti angŋǝna dǝmbǝa lǝmndǝnam ngga.

¹⁵ Sǝ mǝ nǝ ɓariki a koya njar ka, mǝ nǝ pak gir mǝnana nǝ̀ tsǝa anzǝm mǝnana ǝn umǝna ka, ɓalǝ wun ɓǝ̀ kǝ kasǝa rǝ amǝnia yì agir ka ko aya pwari.

Cau amur ɓoarɓwa mala Kǝrǝsti

¹⁶ Cau mǝnana sǝm bangga wun amur rǝcandǝa andǝ yiu mala Mǝtala sǝm Yesu Kǝrǝsti ka, sǝm pà aban bangga wun njarnzǝne mǝnana ɓeɓwa pusǝì aɓa kutan ngga ɗang. Nǝ nggearǝ mǝsǝ sǝm, sǝm sǝn tâ mala ɓoarɓwa male.

¹⁷ Sǝm nda kam à kǝ banì mǝnana Ɓakuli Tarrû pe wi ɓoarɓwa andǝ gulo, pǝlǝa gi Ɓakuli pur nǝ ɓa mǝno yì tâ mǝgule mala ɓoarɓwa ka, yiu abani ama, “Mǝnia ka, nda Munem mǝnana ǝn nggǝ earce ka, kǝ pwasǝ bumam kǝrkǝr.”

¹⁸ Nggearǝ sǝm ngga, sǝm ok mǝno yì giu pur nǝ kuli ka, acemǝnana sǝm nda kam ate amur nkono mǝfele.

¹⁹ Amur mani ka, sǝm ndanǝ mǝsǝkang-kangŋa mǝnana kuti mǝno ka ama, cau mǝnana amǝ'ɓangna hamnǝi ka mǝsǝcau na. Nǝ̀ dumnǝ ɓoaro, ɓǝ̀ wu tsǝk kir wun a rǝì, kǝla mǝnana wu nǝ̀ tsǝk kir wun arǝ pitǝla mana kǝ tá aɓa pǝndǝa ba kwaro mala ban, sǝ nlero dǝmbari yi tana a ɓabum wun ngga.

²⁰ Gir mǝnana kutibanì kat ka, wu sǝlǝ ama ɓe kǝ cau ɓangna pa kàm aɓa Malǝmce mǝnana pur nǝ ɓa mǝnggicau mala mǝɓangna ka ɗang.

²¹ Acemǝnana na gi Ɓakuli ka, kǝ pur aɓa kani mala mǝɓangna ɗang. Amǝno yì amǝ'ɓangna ka, Bangŋo Mǝfele na gingnǝia sǝ à na cau mǝnana pur nǝban Ɓakuli ka.