1 Yohana 2 - Maləmce Məfele mala Ɓakuli: Kurcau Məbəshe

Kǝrǝsti nda gbasha ma'sǝm

¹ Wun amunem mǝ keke, ǝn nggǝ gilǝa wun mǝnia yì cau ka ace mǝnana wu kǝa pak cauɓikea ɗang. Sǝ ɓǝ̀ kǝɓwa pak cauɓikea ka, sǝm ndanǝ mǝ pwan-nzali ace sǝm aban Tár sǝm, Yesu Kǝrǝsti Mǝɓealɓoarna.

² Yì nda gir'nkila mǝnana yinǝ twalban mala acauɓikea ma'sǝm ngga, sǝ acauɓikea ma'sǝm nǝmurǝia ɗang, nda andǝ mala ɓanza kat.

³ Ani sǝ sǝm nǝ̀ sǝla ama sǝm surǝna rǝ Ɓakuli, ɓǝ̀ sǝm nggǝ kpata anzongcau male ka.

⁴ Ɓǝ̀ ɓwa twali ɓamuri ama: “Ən surǝna rǝ Ɓakuli,” sǝ kǝ kpata anzongcau male raka, mǝ'nyir na, sǝ mǝsǝcau pa aɓa mǝno yì ɓwa ka ɗang.

⁵ Sǝ ɓwa mǝnana kat kǝ kpata cau mala Ɓakuli ka, earcearǝu mala Ɓakuli lumsǝna a ɓalǝi ɓafo. Anggo sǝ sǝm sǝlǝ ama sǝm nda aɓa dotarǝu sǝnǝa Ɓakuli.

⁶ Ɓwa mǝnana bangŋa ama nda aɓa dotarǝu andǝa Ɓakuli ka, dumǝna ama nǝ̀ dukdo mǝnana Yesu duk ka.

⁷ Wun agyajam, ǝn pa aban gilǝa wun bǝsa nzongcau ɗang, kǝ mǝ'e mǝnana wu ndanǝi ɗiɗyal a tite ka nda. Mǝnia yì nzongcau mǝ'e ka, nda kǝ cau mǝnana wu oe ka.

⁸ Kat andǝ amani ka, mǝ nda aban gilǝa wun bǝsa nzongcau ado. Mǝsǝcau mala nzongcau mǝnia ka, à sǝnǝni aɓa Kǝrǝsti sǝ à sǝnǝni gbal arǝ wun. Acemǝnana pǝndǝa na aban o, sǝ tǎlaban mǝ'mǝsǝcau nì ka, nda aban tá ado.

⁹ Ɓwa mǝnana twali ɓamuri ama nda aɓa tǎlaban, sǝ kǝ ɓinǝ mǝsǝ mǝ'eambǝi ka, nda aɓa kǝ pǝndǝa piu.

¹⁰ Ɓwa mǝnana kǝ earce mǝ'eambǝi ka, nda ban do aɓa tǎlaban, sǝ kǝgir pà kàm a ɓalǝi mǝnana nǝ̀ yinǝ annda ka ɗang.

¹¹ Sǝ ɓǝ̀ kǝɓwa ɓinǝ mǝsǝ mǝ'eambǝi ka, nda aɓa pǝndǝa; aɓa pǝndǝa sǝ kǝ gya, yale surǝ ban mǝnana kákiyi kam ngga ɗang, acemǝnana pǝndǝa dumsǝni a nte.

¹² Ən nggǝ gilǝa wun, wun amunem, acemǝnana à twalǝna wun ban acauɓikea ma'wun, ace gir mǝnana Kǝrǝsti pè ka.

¹³ Ən nggǝ gilǝa wun, wun atárru, acemǝnana wu surǝna rǝ ɓwa mǝnana ndakam ɗiɗyal a tite ka. Ən nggǝ gilǝa wun, wun alo-ɓwa, acemǝnana wu lina murǝm amur mǝɓealɓikea. Ən nggǝ gilǝa wun, wun amunem, acemǝnana wu surǝna rǝ Ɓakuli Tarrû.

¹⁴ Ən nggǝ gilǝa wun, wun atárru, acemǝnana wu surǝna rǝ ɓwa mǝnana ndakam ɗiɗyal a tite ka. Ən nggǝ gilǝa wun, wun alo-ɓwa, acemǝnana wu ndanǝ rǝcandǝa, cau mala Ɓakuli na aɓalǝ wun, sǝ wu lina murǝm amur mǝɓealɓikea.

Wu kǝa earce ɓanza ɗang

¹⁵ Ce wu earce ɓanza ko agir mǝnana a ɓanza ka ɗang. Ɓǝ̀ kǝɓwa earce ɓanza ka, earcearǝu mala Ɓakuli Tarrû ka, pà a ɓalǝi ɗang.

¹⁶ Acemǝnana agir mana aɓa ɓanza ka: npel mala nggūrǝu, suno ace kum gir mana mǝsǝu sǝni sǝ earce , andǝ nggori nǝ agirkuma mala ɓanza ka, à pur nǝban Ɓakuli Tarrû ɗang; a mala ɓanza na.

¹⁷ Sǝ ɓanza ka, kǝ kuti nǝ kutio andǝ agir mǝnana ɓwapǝndǝa ɓanggiyi atea ka. Sǝa ma ɓwa mǝnana kǝ pakturo nǝ ne mala Ɓakuli ka, nǝ̀ do nǝ yilǝmu mǝnana málá male pà kàm raka.

Ɓimǝbura mala Kǝrǝsti

¹⁸ Wun amunem, sǝm nda a masǝlǝata apwari ado; sǝ kǝla mǝnana wu ok ama ɓimǝbura mala Kǝrǝsti na aban yiu ka, nda ado ka, aɓiamǝbura mala Kǝrǝsti pas yina. Anggo sǝ sǝm sǝlǝ ama sǝm yina a masǝlǝata apwari.

¹⁹ Amǝnia yì aɓwana ka, à ma'sǝm na ɗang, nda gir mǝnana tsǝa sǝ à nying sǝm ngga. Ɓǝ̀ yia ka à ma'sǝm na ka, ɓǝ́ à dumǝna ata sǝm. À nying sǝm ace mǝnana ɓǝ̀ lǝmndǝ bwāng ama yia ka à ma'sǝm na raka.

²⁰ Sǝ wun ngga, à ɗarǝna wun nǝ Bangŋo Mǝfele, sǝ wun kat ka wu surǝna rǝ mǝsǝcau.

²¹ Ən pa aban gilǝa wun acemǝnana wu surǝ mǝsǝcau raka ɗang, wu surǝna rǝì, sǝ wu sǝlǝna ama mǝsǝcau kǝ ɓǝl nyir ɗang.

²² Yana nda mǝ'nyir? Kǝ nda ɓwa mǝnana ginǝ eare ama Yesu nda Kǝrǝsti, yì ɓwa mana Ɓakuli tarrì ka. Ɓwa mǝnana kat makgir Ɓakuli Tarrû andǝ Muni ka, nda kǝ ɓimǝbura mala Kǝrǝsti.

²³ Ɓwa mǝnana ginǝ eare ama Yesu nda Muna mala Ɓakuli ka, ginǝna Ɓakuli Tarrû, sǝ ɓwa mǝnana earnǝi ama Yesu nda Muna mala Ɓakuli ka, earǝna nǝ Ɓakuli Tarrû gbal.

²⁴ Wun ngga, gir mǝnana wu ok ɗiɗyal a tite ka, ɓǝ̀ do aɓalǝ wun. Ɓǝ̀ pa anggo ka, wun gbal ka, wu nǝ̀ do aɓa dotarǝu wunǝ Muna mala Ɓakuli andǝ Ɓakuli Tarrû.

²⁵ Sǝ mǝnia ka, nda gir mǝnana Kǝrǝsti pàcau ace ka ama nǝ̀ pà sǝm yilǝmu mǝnana málá male pà kàm raka.

²⁶ Mǝ nda ban gilǝa wun amǝnia yì agir ka, ace nunkir wun arǝ aɓwana mǝnana à kǝ earce à nǝ̀ tsǝk wun, ɓǝ̀ wu ɓwarki ka.

²⁷ Sǝ wun ngga, rǝcandǝa mala Bangŋo Mǝfele mǝnana wu kumo a bui ka, nda aɓalǝ wun. Pà nǝ̀ ɓoaro ɓǝ̀ ɓe kǝɓwa kania wun ɗang, acemǝnana mǝno yì rǝcandǝa mala Bangŋo male ka kǝ kania wun agirbunda kat, sǝ yi rǝcandǝa ka, mǝɓafoe na, mǝ'nyirì na ɗang; sǝ kǝla mǝnana kǝ kania wun ngga, wu do aɓa dotarǝu andǝi.

Amuna mala Ɓakuli

²⁸ Sǝ ado ka, wun amunem, wu lidǝmbǝa nǝ do aɓa dotarǝu wunǝa Kǝrǝsti, ace mǝnana nyare male mǝnana nǝ̀ pusǝna rǝì nǝi ka, sǝm nǝ̀ kum mǝsǝkang-kangŋa mala sungŋo a ɓadǝmbǝi, sǝ pa sǝm nǝ̀ kum kǝsǝkya ɗang.

²⁹ Sǝ acemǝnana sǝm sǝlǝna ama yì ka, mǝ'cauɓoarna na ka, sǝm nǝ̀ sǝlǝ gbal ama aɓwana mǝnana à kǝ pak cauɓoarna ka, amuna male na.