1 Timoti 5 - Maləmce Məfele mala Ɓakuli: Kurcau Məbəshe

À kwar kir Timoti amur yal ikǝlisiya

¹ Ce a pyau jamgula ɗang, ne wi cau ɓukɓuk nǝ pagulo, kǝla mǝnana a nǝ ne tárro ka. Ne alaggana cau kǝla mǝnana a nǝ ne amǝ'eambǝo ka.

² Tsǝk kir aɓwagula kǝla mǝnana a nǝ tsǝk kir anggeau ka. Sǝ ansarina ka, tsǝk kiria kǝla amǝ'nggaulǝo, nǝ ɓabum mǝɓoarnsari.

³ Ɗenyi nǝ aman-lú mǝnana kǝɓwa pa muria raka, tsǝkiria.

⁴ Sǝ ɓǝ̀ man-lú ka ndanǝ amuna ko amǝkau ka, ɓǝa tita kànì lǝmndǝ do ɓanggi Ɓakuli nǝ ɗenyi nǝ amǝɓala malea, anggo ka à nǝ̀ mbwekia amǝɓǝlia andǝ akea nǝ pa gbasha. Mǝnia ka, nda gir mǝnana kǝ pwasǝbum Ɓakuli kǝrkǝr ka.

⁵ Man-lú mǝɓafoe, mǝnana nda nǝmurǝì, kǝɓwa pà amuri a ɓanza man raka, kǝ tsǝk ɓalǝi arǝ Ɓakuli, sǝ kǝ lidǝmbǝa du andǝ pwari, aban zǝmbǝi Ɓakuli ɓǝ̀ bwali wi kam.

⁶ Sǝ man-lú mǝnana ɗwanyi bwalrǝu a do male, kǝ gyata pè ɓamuri banɓoarnado ka, wuna aɓa bangŋo, kat andǝ amani ama nda andǝ amǝsǝì a nggūrǝu ka.

⁷ Kwarkir ikǝlisiya arǝ amǝnia yia agir ka, ace mǝnana ɓǝa duk do ɗwanyi cau a rǝǔ.

⁸ Sǝ ko ɓǝ̀ ya ɓwa na kat mǝnana kǝ tsǝk kir aɓǝla male, nggeamurǝmi ka amǝɓala male raka, man yì ɓwa ka pangŋǝna ce paɓamuru male ɓa, yale ɓwa mǝnana surǝ Ɓakuli raka, ɓoari wi.

⁹ Man-lú mǝnana à nǝ̀ ɓalli aɓalǝ aman-lú mana à nǝ̀ tsǝk kiria ka, nda mana lumsǝna apǝlǝa lumi-tongno-nong mwashat ka. Sǝ ɗǝm ngga aɓa dolabura male ka ɓwabura mwashat na dum nǝi ka.

¹⁰ Ɓǝ̀ duk ɓwa mǝnana aɓwana surǝì pepe ace aturo-ɓoarna male, kǝla tsǝk kir amuna andǝ lǝsǝia pepe, andǝ ak abǝri, andǝ ɗenyi nǝ amǝkwaɗi pepe, andǝ ɓwamur aɓwana mǝnana à nda aɓa tanni, andǝ do pa ɓabum arǝ pakkia koya turo mǝɓoarne ka.

¹¹ Aman-lú mǝnana alo-ɓwa na ka, ɓǝa kǝa oasǝ lullǝia ɗang, acemǝnana nzal dolabura nǝ̀ tsǝa à pà nǝ̀ gandǝ do anggo nǝmurǝia aban pakki Kǝrǝsti turo ɗang, à nǝ̀ nyare à nǝ̀ dukɓala ɗǝm.

¹² Sǝ anggo ka à nǝ̀ yinì ɓamuria ɓashi, acemǝnana à yalni kurcau malea mǝnana à twal a dǝmbe ɗiɗyal ka.

¹³ Ɗǝm ngga, à nǝ̀ ngga surǝ doɓàna, à nǝ̀ kutia gali aban kutiki arǝ aɓala. Sǝ amǝ'doɓana na nǝmurǝì à nǝ̀ pǝlǝ ka ɗang, à nǝ̀ duk amǝ'twalki alullǝu andǝ amǝ'oasǝkiacau, aban naki acau mǝnana ɓoaro ɓǝa kǝ na raka.

¹⁴ Ən nggǝ kwarkir amamǝna mǝnana aburria pangŋǝna lú, sǝ a malaká gul raka, ɓǝa albura ɗǝm, ɓǝa ɓǝl amuna, ɓǝa tsǝk kir aɓala malea. Anggo sǝ ɓiumǝbura pa nǝ̀ kum njar na mǝɓane amur sǝm ɗang.

¹⁵ Acemǝnana pas aɓalǝ amǝnia yia aman-lú ka, à angŋa dǝmbǝa à ɓwarkina, à kpana ata Shetan.

¹⁶ Ɓǝ̀ ɓe kǝ mɓwama mǝkwaɗi ndanǝ aɓǝla mǝnana aman-lú na ka, ɓǝ̀ kǝ tsǝk kiria, ɓǝ̀ kǝa na ama nǝ̀ nyinggi ikǝlisiya mǝnia yì twalo ka ɗang, ace mǝnana ɓǝ̀ ikǝlisiya tsǝk kiri arǝ aman-lú mǝnana kǝɓwa pa amuria raka.

¹⁷ Aɓwana-mǝgule mala ikǝlisiya mǝnana à kǝ pak turo malea pepe ka, ɓǝa kǝ pea wia gulo, ɓǝa kǝ mbwea pepe, nggeamurǝmi ka aɓwana mǝnana à kǝ pak turo kǝrkǝr aɓa hamnǝ cau andǝ kanigir ka.

¹⁸ Acemǝnana Malǝmce ka bangŋa ama, “Ce a kúr kun jamnda mǝnana kǝ nyaki mǝssa ka ɗang.” Sǝ aɓa ɓe ban ɗǝm ngga, à bangŋa ama, “Aɓwana mǝnana à kǝ pak turo kat ka, ɓoaro ɓǝa kǝ mbwea.”

¹⁹ Ce a na ama a nǝ earnǝ cau-kiɗikiban mǝnana à ne amur ɓwamǝgule ikǝlisiya ka ɗang, she ɓǝ̀ ce purna a kun aɓwana ɓari ko tārú ka.

²⁰ Aɓwana mǝnana à kumia aɓa cauɓikea ka, ɓǝa nunkiria a ɓadǝm a'ikǝlisiya bwāng. Acemǝnana anggo sǝ à nǝ̀ pe acili aɓwana ɓangciu.

²¹ Ən nggǝ kwarkiro a ɓadǝm Ɓakuli andǝ Kǝrǝsti Yesu, andǝ amǝturonjar mǝnana à tària ka, kpata amǝnia yia anggurcau ka, kǝa na ama a wu nǝ lǝmndǝ tàrban, ko earmǝsu ɗang.

²² Ce a kaurǝa ata pe ɓwa gulo aɓa ikǝlisiya ɗang. Sǝ kǝa wu oasǝ ɓamuro aɓalǝ acauɓikea mala aɓea aɓwana ɗang. Yal ɓamuro aɓa doɓoarnsari.

²³ Kǝa wu nu mùr bàng nǝmurǝì ɗang, kpapi andǝ mùr ɓǝlanggun anap mǝhangŋe bǝti ace bumo, andǝ nggūrǝo mǝnana kǝ po tanni pwari-pwari ka.

²⁴ Ɗenyi ama, acauɓikea mala aɓea aɓwana ka, à nda banfana bwāng, koya ɓwa ka, sǝlǝna ama amǝnia yì aɓwana ka a nǝ pakkia wia ɓashi. Sǝ aɓea aɓwana nakam cauɓikea malea kǝ lǝmndǝ ɗang, she nǝ nzǝmo.

²⁵ Àkǝ njar mǝ'mwashati, aturo mǝɓoarne mala aɓea aɓwana ka à nda banfana bwāng, sǝ aɓea ɓwana ka, aturo mǝɓoarne mǝnana à pakkiyia aɓa sǝmbǝrǝa ka, pwari na kǝ yiu ka, à nǝ̀ lǝmndǝia.