1 Timoti 1 - Maləmce Məfele mala Ɓakuli: Kurcau Məbəshe

Makkun mala Bulǝs

¹ Mǝnia yì cautera ka, pur nǝ ban Bulǝs, mǝ'mishan mala Kǝrǝsti Yesu nǝ tasǝban mala Ɓakuli mǝ'amsǝ sǝm, andǝ mala Kǝrǝsti Yesu mǝnana nda tsǝkɓalǝu ma'sǝm ngga.

² Mǝ nda ban gilǝì Timoti, yì munem mǝɓafoe aɓa paɓamuru aban Ɓakuli. Ɓǝ̀ ɓwamuru, andǝ sǝn mǝsǝswatǝr, andǝ dorǝpwala nǝ ban Ɓakuli Tár sǝm andǝ Kǝrǝsti Yesu Mǝtala sǝm do ato.

Nunkiru arǝ akanigir mǝ'nyirì

³ Mana mǝ nǝ o a Masǝdoniya ka, ǝn no nǝ rǝcandǝa nǝma wu came a Afisu, ace mǝnana wu tamsǝ aɓwana mǝnana akanigir malea ka, à nda ɗàng andǝ mǝsǝcau ka.

⁴ Kǝa earia wia ɓǝa kǝ kiɗiki do ace naki anjarnzǝne andǝ makgir amur acau mala atau mala aɓwana a pwaryan ngga ɗang. Acemǝnana amǝnia yì agir ka, à pà nǝ̀ lumsǝ pe mala Ɓakuli ɗang, ko a na raka, à pà nǝ̀ bwali aɓwana kam aɓa do paɓamuru malea aban Ɓakuli ɗang.

⁵ Tǝr mǝnia yì nzongcau ka nda mǝnana ama, amǝ kpata Ɓakuli kat ka, à nǝ̀ lumsǝ nǝ earcearǝu mǝnana purkiyi a ɓabum mǝɓoarnsari, andǝ ɗenyicau mǝɓoarne, andǝ paɓamuru mǝ'mǝsǝcau nì ka.

⁶ Sǝ aɓea aɓwana ka à kyangŋǝni mǝnia yì mugula cau ka. À ɓwarkini tanjar mala amǝnia yì agir ka, à kutina aban naki acau mǝnana ɓamuria pà kàm raka.

⁷ À kǝ earce ɓǝa surǝia ama à ndaka amǝ kanî aɓwana Nggurcau mala Musa, sǝ à surǝ gir mǝnana à nakiyi cau amuri ka ɗang, kat andǝ amani ama à kǝ ne nǝ rǝcandǝa malea kat ka.

⁸ Sǝm sǝlǝna ama Nggurcau ka ndanǝ ɓoaro, yi mǝnana ɓǝa pangŋǝna turo nǝi a njari ka.

⁹ Sǝ ɗǝm ngga sǝm sǝlǝna ama nggurcau ka, à ci ace aɓwana mǝnana à kǝ pak mǝɓoarne ka ɗang. Nda ace amǝ yàl nzongcau, andǝ amǝ'mgbikiru, andǝ amǝ ɗwanyi ɓanggi Ɓakuli, andǝ amǝ'cauɓikea. Nda gbal ace amǝ ɗwanyi dukdo mǝfele, andǝ amǝ nyesǝ ce kpata Ɓakuli ɓà, andǝ amǝ wal-lú ka tárria andǝ nggea.

¹⁰ Yì Nggurcau ka, nda ace amǝ nongginǝban a nza nǝ doɓala, andǝ amǝ pak cauɓikea nongginǝ rǝarǝia, aburana arǝ aburana sǝ amamǝna arǝ amamǝna. Nda ace amǝ bwalban a guro, andǝ amǝnyir, andǝ amǝ kanná amur nyir, andǝ aɓwana mǝnana kat do malea ka nda ɗàng andǝ kanigir mǝ'mǝsǝcau nì ka.

¹¹ Mǝnia yì kanigir ka pur aɓa Cau Amsǝban mǝɓoarne, mana Ɓakuli mǝnana ɓoaro ɓǝa pe wi ɓwangsǝban ngga, pam a buam ngga.

Ɓwamuru mala Ɓakuli aban Bulǝs

¹² Ən nggǝ pakki Kǝrǝsti Yesu Mǝtala sǝm yàwá mana pam rǝcandǝa mala pak turo male ka. Ən pak yàwá acemǝnana earnǝ mim sǝ twalam ama ɓǝ̀ ǝn pakki wi turo,

¹³ kat andǝ amani ama ɗiɗyal ka, ǝn zalǝki nǝ kunam, ǝn pe aɓwana male tanni, sǝ ǝn lǝmndǝì wi ɓeal ɓǝsǝkiban ngga. Sǝ Ɓakuli ka sǝn mǝsǝswatǝr mem, acemǝnana ǝn pe aɓa ɗwanyi sǝlǝe andǝ ɗwanyi paɓamuru abanì.

¹⁴ Sǝ Mǝtala sǝm solǝam ɓwamuru male mǝkǝrkǝr nì a muram, a tarǝia andǝ paɓamuru andǝ earcearǝu mǝnana à nda aɓa Kǝrǝsti Yesu ka.

¹⁵ Mǝnia ka nda ne mǝ'mǝsǝcau nì, mǝnana koyana ka, ɓǝ̀ earnǝ ce ka, ama “Kǝrǝsti Yesu ka, yiu aɓa ɓanza ace amsǝ amǝ'cauɓikea,” sǝ mǝ nda mana ǝn karmur aɓwana kat nǝ cauɓikea ka.

¹⁶ Sǝ àkǝ̀ ce mǝnia ka Ɓakuli sǝn mǝsǝswatǝr mem amsǝam, ace mǝnana ɓǝ̀ Kǝrǝsti Yesu pak turo nǝ mim, nggea mǝ'cauɓikea mana karban kat ka, ace lǝmndǝ munyi male mǝnana maɗanyi pà kàm raka a rǝam, ɓǝ̀ aɓwana sǝni. Sǝ anggo, acili aɓwana nǝ̀ sǝlǝ ama yia gbal ka, à nǝ̀ gandǝ paɓamuria abaní, à nǝ̀ kum yilǝmu mana málá male pà kàm raka.

¹⁷ Adyan ngga, gulo andǝ ɓoarɓwa kat ka, mala Ɓakuli na, mana málá male pà kàm raka. Yì mǝnana nda Murǝm mala anza kat, sǝ pà nǝ̀ wu ɗang, yale ɓwapǝndǝa pa nǝ̀ gandǝ sǝne raka, kǝ yì mwashat nda Ɓakuli. Amin.

¹⁸ We munem Timoti, mǝnia ka à nda ka kwarkiru mem abano, kǝla mǝnana cauɓangna mala Ɓakuli bangŋa a muro ɗiɗyal ka. Mǝnia ka ɓǝ̀ po rǝcandǝa mala munǝo pepe aɓalǝ a'lwa mala Mǝtalabangŋo.

¹⁹ Bwal kàngkàng arǝ paɓamuru mo aɓa Kǝrǝsti, nǝ ɗenyicau mǝɓoarne. Acemǝnana aɓea ɓwana ka, à ɓinǝi oki ɓabumia, gandǝa à kiɗikina paɓamuru malea.

²⁰ A ulang yia ka à nda ka Hemǝniyos andǝ Alizanda. Yia kǝm ngga, ǝn tasǝnia a ɓabu Shetan; mǝnia ka nǝ̀ kania wia gir ace mǝnana ɓǝa kǝa zalǝ Ɓakuli raka.